Month: September 2026

Posted on

POLISI WADAIWA KUMUUA KWA RISASI MTUHUMIWA WA UHALIFU ALIYEWATEKA MWANAMKE NA MTOTO WAKE

 

Kamanda wa Polisi Mkoa wa Morogoro ACP Andrew Kantimbo akikagua nyumba ambayo mtuhumiwa alijificha baada ya kuwaona polisi

Baba wa mtuhumiwa aliyeuawa

Na Matukio Daima Media, Kilosa

TUKIO la kutekwa kwa mwanamke na mtoto wake katika Kijiji cha Parakuyo Wilayani Kilosa Mkoani Morogoro limeishia kwa kifo cha Kokan State (30), baada ya mwanaume huyo kudhibitiwa kwa risasi na polisi.

Kwa mujibu wa Kamanda wa Polisi Mkoa wa Morogoro, ACP Andrew Kantimbo, Kokan alikuwa akitafutwa kwa tuhuma zinazohusisha mauaji, ubakaji na wizi wa kutumia silaha.

Kantimbo akasema mtuhumiwa huyo alikuwa akitafutwa na  polisi kwa muda mrefu ambapo baada ya kubaini alipo na kumfuata, alimshika mwanamke aliyekuwa alimhudumia kinywaji pamoja na mtoto wake mdogo na kujifungia nao katika chumba, akiwatumia kama kinga dhidi ya polisi.

Alisema Kokan alitishia kuwaua Mama na mtoto huyo kwa sime iwapo polisi wangejaribu kumkamata, hali iliyosababisha askari kutumia silaha na kumuua baada ya jitihada zote za kutaka ajisalimishe kushindikana.

Mwanamke na mtoto waliotumiwa kama Kinga na mtuhumiwa wa uhalifu

Mwanamke huyo aliyetekwa, mkazi wa Kijiji cha Parakuyo, Rehema Masuke, amesema tukio hilo liliwapa hali ya hofu wakiamini huenda wangeuawa kwa sime aliyokuwa nayo kijana huyo.

Kwa upande wake Baba mzazi wa Kokan amesema kwa muda mrefu alikuwa akimkanya mwanawe kuacha kujihusisha na Matukio ya ki uhalifu, lakini licha ya ushauri huo, alihusishwa mara kadhaa na matukio hayo.

Mwenyekiti wa Kijiji cha Parakuyo, Emmanuel Kibasisi, amewataka wananchi kutoa taarifa kwa vyombo vya usalama na kushirikiana na Serikali katika kukabiliana na uhalifu.

Polisi mkoani Morogoro wameendelea kutoa wito kwa vijana kujiepusha na uhalifu na kutafuta kipato kupitia shughuli halali.

Mwisho

KUPIGA KURA KWA MATUKIO DAIMA TUZO ZA SAMIA KALAMU AWARDS HAPA

 

 

MATUKIO DAIMA IMETEULIWA KUSHIRIKI TUZO ZA UMAHIRI WA VYOMBO VYA HABARI NA WANAHABARI TANZANIA TUZO HIZI ZIMETOLEWA NA TCRA NA TAMWA 

 MAARUFU KWA JINA LA SAMIA KALAMU AWARDS (SKA2026)⬇️⬇️⬇️

1:TUZO YA CHOMBO CHA HABARI -MATUKIO DAIMA MEDIA 

PIGA KURA YA CHOMBO MATUKIO DAIMA BONYEZA HAPA

2:TUZO YA JINSIA ,WANAWAKE NA MAKUNDI MAALUM 

PIGA KURA YA PILI YA MATUKIO DAIMA BONYEZA HAPA

3:TUZO YA AFYA

PIGA KURA YA TATU YA MATUKIO DAIMA BONYEZA HAPA

4:TUZO YA MPIGA PICHA 

PIGA KURA YA TATU YA MATUKIO DAIMA BONYEZA HAPA

AHSANTE KWA KUPIGIA KWA KUENDELEA KUTUPIGIA KURA MATUKIO DAIMA MEDIA ENDELEA KUTUPIGIA KURA KILA BAADA YA SAA 24 HADI SEPT 30 KASI YAKO YA KUPIGA KURA NDIO USHINDI .

Posted on

MOROGORO YAJIANDAA KUKABILIANA NA ATHARI ZA EL NINO

Na; Mwandishi Wetu – Morogoro.

Mkurugenzi Msaidizi kutoka Ofisi ya Waziri Mkuu Sera, Bunge Uratibu na Wenye Ulemavu, Idara ya Usimamizi wa Maafa Dkt. Salim Manyata ametoa Salaam za Ofisi ya Waziri Mkuu kwa Kamati za Maafa za Mkoa wa Morogoro pamoja na Timu ya Mkoa ya Kukabiliana na Dharura wakati wa kikao kazi kitakachoambata na ziara ya kufanya ukaguzi na ufuatiliaji wa utekelezaji wa maelekezo yaliyotolewa kwa Mikoa kuhusu kujiandaa na kukabiliana na athari za El Nino tarehe 28 Septemba 2026.

Mawasilisho mbalimbali yamewasilishwa katika kikao kazi hicho ikiwa ni pamoja na Taarifa ya Utayari kwa kila sekta na wadau ya kujiandaa na kukabiliana na athari za El Nino, ambapo sekta zilizohusika ni pamoja na TANROADS, TARURA, Sekta ya Afya,TANESCO, kilimo, Maji yaani maji safi na maji taka na Mamlaka zote za Bonde, Jeshi la Zimamoto na Uokoaji,  Shirika la Reli nchini (TRC), Maliasili, REDCROSS na SKAUTI.

Awali, akizungumza katika kikao hicho kilichohusisha pia kamati ya Ulinzi na usalama ya Mkoa kabla ya kuanza Ziara Maalum Mkoani hapo, Waziri wa Nchi Ofisi ya Makamu wa Rais – Muungano na Mazingira Mhandisi Hamad Masauni (Mb), alisema ni muhimu kuchukua tahadhari na hatua mahsusi  kuhusiana na tishio la El Nino na kuweka nguvu zaidi katika kuzuia na kujiandaa  ili hata madhara yatakapotokea yasiwe makubwa zaidi. 

“Tutumie vizuri Rasilimali zilizopo ili kuweza kukabiliana na jambo hili, sambamba na kuzingatia suala zima la usafi wa mazingira katika maeneo yetu Alisisitiza Waziri Masauni.’

Imeelezwa kuwa Mkoa wa Morogoro ni Miongoni mwa Mikoa ambayo imekuwa akiathirika mara nyingi na mvua za misimu tofauti, hivyo ni vyema  kuangaliwa kwa namna ya kipekee hasa katika kipindi hiki cha Mvua za El Nino, zilizotabiriwa na Mamlaka ya hali ya hewa Nchini kunyesha mwanzoni mwa mwezi Oktoba 2026

” Usimamizi wa Maafa ni jukumu la kila mtu, kila mmoja anatakiwa kushiriki sasa na kuchukua hatua katika eneo lake ili kuokoa  maisha, mali, miundombinu na mazingira.”

 

Posted on

MSAMVU YASOTA, ABIRIA WASUBIRI HATMA YA SAFARI

 

Na Matukio Daima Media, Morogoro 

Hali ya usafiri katika Kituo Kikuu cha Mabasi Msamvu mkoani Morogoro leo ilikuwa tete, huku mabasi mengi yanayoanzia safari kituoni hapo yakishindwa kuanza safari na kusababisha abiria waliokuwa wakielekea mikoa mbalimbali nchini kusubiri kwa muda mrefu bila kujua hatma yao.

Baadhi ya abiria waliokuwa wamefika kituoni hapo tangu saa 12 kamili alfajiri waliendelea kusubiri, huku wengine wakilazimika kurejea nyumbani baada ya kukosa uhakika wa kuondoka. 

Miongoni mwa waliokumbwa na hali hiyo ni Harold Jackson, Anold Munuo na Hemedi Michael waliokuwa wakielekea Arusha na Moshi ambao walilalamikia muda walioupoteza kituoni hapo.

Mwenyekiti wa Wasafirishaji Kituo Kikuu cha Mabasi Msamvu, Aziz Kapilima, akaishauri Serikali kukutana na madereva na kusikiliza malalamiko yao ili kupata ufumbuzi wa haraka.

Kapilima  alisema kuendelea kwa mgomo huo kutaathiri abiria, wamiliki wa mabasi, madereva na Serikali kwa ujumla kiuchumi na kijamii.

Dereva mwingine ambaye hakutaka kutaja jina lake alisema moja ya mambo yaliyowakwaza madereva ni kutoshirikishwa katika maamuzi yanayowahusu, huku akilalamikia faini, kufungiwa leseni na kupunguziwa pointi wanapokutwa na makosa barabarani.

 Alisema hali hiyo inaweza kuathiri ajira zao na maisha ya familia zinazowategemea hasa pale wanapokuwa hawana Leseni za kufanya kazi tofauti na madereva wa Serikali walioajiriwa ambao hata wakipata Ajali wakaumia na wasifanye kazi watalipwa.

Katika hatua nyingine, Kamanda wa Polisi Mkoa wa Morogoro, ACP Andrew Kantimbo, ametembelea maeneo mbalimbali ya usafirishaji, ikiwemo Mikumi na Kituo cha Mabasi Msamvu, na kutoa onyo kwa watu watakaowabughudhi madereva pamoja na vyombo vya usafiri vilivyoamua kuendelea kutoa huduma. 

Wakati huohuo, baadhi ya mabasi yalianza kutoa huduma  kwa uchache majira ya mchana tofauti na awali ambapo yale yaliyotokea safari za masafa marefu ndio  yaliyooendelea kupita kituoni hapo.

Mwisho

Posted on

Waziri Katambi Awasili Stendi ya Mbezi Magufuli Kufuatia Mgomo wa Madereva – Live

Global Publishers
September 29, 2026
18 views
0 Comments


DAR ES SALAAM: Waziri wa Mambo ya Ndani ya Nchi, Patrobas Katambi, amewasili katika Stendi Kuu ya Mabasi ya Mbezi Magufuli jijini Dar es Salaam, kufuatia kusitishwa kwa safari za mabasi kunakodaiwa kusababishwa na mgomo wa madereva.

Katambi amefika stendi hiyo jioni hii kwa ajili ya kukutana na madereva pamoja na abiria waliokwama kutokana na kusitishwa kwa safari za mabasi.

Waziri huyo anatarajiwa kuzungumza na madereva na abiria mbele ya vyombo vya habari, huku akieleza hatua zitakazochukuliwa kuhusu hali hiyo.

Mgomo huo umeathiri huduma za usafiri katika baadhi ya vituo vya mabasi nchini, huku madereva wakieleza kuwa wanapinga masuala mbalimbali yanayohusiana na adhabu na faini za usalama barabarani.

Hali hiyo imesababisha baadhi ya abiria kushindwa kuendelea na safari zao, huku mabasi yaliyokuwa yamepangwa kuondoka yakiwa hayajaanza safari.

Posted on

Video: DCEA Yakamata Mirungi na Bangi Zikisafirishwa kwa Mabasi na Magari

Global Publishers
September 29, 2026
6 views
0 Comments

DAR ES SALAAM: Mamlaka ya Kudhibiti na Kupambana na Dawa za Kulevya (DCEA) imekamata watuhumiwa waliodaiwa kutumia vyombo vya usafiri kusafirisha dawa za kulevya katika maeneo mbalimbali nchini.

Kwa mujibu wa DCEA, watuhumiwa watatu walikamatwa wakisafirisha bunda 238 za mirungi zenye uzito wa kilogramu 125.33, kwa kutumia basi la kampuni ya RATCO lenye namba za usajili T 443 EMG, lililokuwa likifanya safari kati ya Tanga na Dar es Salaam.

Katika tukio jingine, DCEA imekamata kilogramu 21.95 za bangi katika Wilaya ya Uyui mkoani Tabora.

Bangi hiyo ilidaiwa kuwa inasafirishwa kwa gari aina ya Tata lenye namba za usajili T 381 DW, lililokuwa likifanya safari kati ya Uyui mkoani Tabora na Kahama mkoani Shinyanga.

Katika tukio hilo, jumla ya watuhumiwa watano walikamatwa na wanatarajiwa kufikishwa katika hatua za kisheria kwa mujibu wa taratibu.

DCEA imeendelea kutoa tahadhari kuhusu matumizi ya vyombo vya usafiri katika kusafirisha dawa za kulevya, huku ikiimarisha operesheni za kudhibiti usafirishaji na biashara ya dawa hizo nchini.

Posted on

Jamhuri Yafafanua Jinsi Kauli za Mshtakiwa Zinavyohusishwa na Shtaka la Uhaini

Dar es Salaam – Upande wa Jamhuri umeendelea kutoa hoja zake katika kesi ya uhaini, ukieleza mbele ya Mahakama Kuu kuwa ili mtu ashtakiwe kwa kosa hilo, ni lazima awe chini ya utii wa Jamhuri ya Muungano wa Tanzania, awe ndani au nje ya nchi, pamoja na kuwepo kwa nia inayodaiwa kuhusishwa na kosa hilo.

Katika mawasilisho yake, upande wa Jamhuri umeieleza Mahakama kuwa hati ya mashtaka inahusisha madai kwamba mshtakiwa alikusudia kuchochea umma katika kipindi cha Uchaguzi Mkuu wa mwaka 2025, kwa lengo la kuitisha Serikali ya Jamhuri ya Muungano wa Tanzania.

Jamhuri imeeleza kuwa katika kuandaa hati ya mashtaka, baadhi ya maneno yaliyopo kwenye kifungu cha sheria yalitafsiriwa na kuwekwa kwa namna inayolingana na ushahidi ambao upande huo ulitarajia kuutoa mahakamani.

“KUTAMKA MANENO NI KITENDO”

Upande huo umeieleza Mahakama kuwa neno manifestation katika tafsiri ya kisheria linaweza kujidhihirisha kwa njia mbalimbali, ikiwemo kusambaza maandishi au michoro, pamoja na kufanya overt act, yaani kitendo kinachoonekana.

Kwa mujibu wa Jamhuri, hati ya mashtaka inadai kuwa mshtakiwa alidhihirisha nia yake kwa kutamka maneno na kisha kuyasambaza.

Jamhuri imesisitiza kuwa kutamka maneno ni kitendo katika tafsiri ya kisheria, na hoja hiyo inapaswa kuangaliwa pamoja na vipengele vya kosa vinavyotajwa katika sheria.

Aidha, upande huo umeeleza kuwa kuchapisha au kusambaza taarifa kunahusisha kufanya taarifa hiyo ijulikane kwa umma.

NENO “PUBLIC” LAIBIWA

Katika hoja zake, Jamhuri pia imeeleza matumizi ya neno public katika hati ya mashtaka, ikisema mshtakiwa anatuhumiwa kuchochea umma na si kundi maalumu au mtu mmoja.

Kwa mujibu wa hoja hizo, dhana ya public inaweza kumaanisha kundi la watu bila kuwepo kwa idadi maalumu inayotakiwa ili kundi hilo litambuliwe kama umma.

Jamhuri imeeleza kuwa matumizi ya maneno hayo katika hati ya mashtaka yamekusudiwa kufanya maelezo ya shtaka yaendane na ushahidi uliowasilishwa.

“SERIKALI” NA LENGO LA KUITISHA

Katika sehemu nyingine ya mawasilisho, Jamhuri imeeleza kuhusu matumizi ya neno Serikali katika hati ya mashtaka.

Upande huo umesema katika muktadha wa shtaka hilo, neno Serikali limetumika kuhusisha mihimili ya utendaji, bunge na mahakama, huku ukieleza kuwa Kanuni ya Adhabu haina tafsiri mahususi ya maneno executive na judiciary katika kifungu hicho.

Jamhuri imeirejea pia sehemu ya ushahidi ambapo mshtakiwa alieleza kuwa “the executive is responsible” kwa ajili ya kutunza amani, huku jukumu la kulinda amani likihusishwa na polisi walio chini ya Serikali.

Kwa hoja ya Jamhuri, ushahidi huo unaonyesha kuwa jambo lililodaiwa kutishiwa ni Serikali katika jukumu lake la kudumisha amani na utulivu.

“SI LAZIMA KUTHIBITISHA SERIKALI ILITISHIKA”

Jamhuri imeendelea kusisitiza kuwa katika kuthibitisha shtaka, si lazima ionyeshe kwamba Serikali kweli ilitishwa au ilitikisika kutokana na maneno yanayodaiwa kutolewa na mshtakiwa.

Kwa mujibu wa hoja hizo, kinachotakiwa kuangaliwa ni iwapo kulikuwa na nia ya kuitisha Serikali kama inavyodaiwa katika hati ya mashtaka.

Upande wa Jamhuri pia umebainisha kuwa baadhi ya maneno yaliyotumika katika hati ya mashtaka yametokana na vifungu vya sheria, huku mengine yakichaguliwa ili kuendana na mazingira ya ushahidi uliowasilishwa.

Baada ya kukamilisha hoja zake kuhusu masuala hayo, Jamhuri imeendelea kuielekeza Mahakama kwenye vipengele viwili vinavyohusiana na iwapo mshtakiwa alikuwa na nia ya kuitisha Serikali na iwapo matendo yanayodaiwa yanaendana na masharti ya kosa la uhaini.

Kesi hiyo inaendelea mbele ya jopo la Majaji watatu la Mahakama Kuu.

Posted on

MHANDISI SWEDI AWAAGIZA WACHIMBAJI KUIMARISHA USALAMA MIGODINI KUKABILIANA NA EL NIÑO

📍KAHAMA

Mkurugenzi wa Leseni wa Tume ya Madini, Mhandisi Aziza Swedi, amewataka wamiliki wa leseni, mameneja na wakaguzi wa migodi kujiandaa mapema kukabiliana na athari zinazoweza kusababishwa na mvua za El Niño, kwa lengo la kulinda maisha ya watu, mazingira, miundombinu na kuhakikisha shughuli za uzalishaji migodini zinaendelea kwa usalama.

Mhandisi Swedi ametoa agizo hilo wakati akifunga mafunzo yaliyowakutanisha washiriki 510 mjini Kahama, kwa niaba ya Katibu Mtendaji wa Tume ya Madini, Mhandisi Ramadhani Lwamo, akisisitiza kuwa maandalizi ya kukabiliana na mvua hizo yanapaswa kuzingatia hali halisi na vihatarishi vilivyopo katika kila mgodi.

Amesema washiriki wanapaswa kutekeleza maelekezo yaliyotolewa katika mafunzo hayo na kutumia maarifa waliyoyapata katika maeneo yao ya kazi ili kuzuia na kupunguza madhara yanayoweza kusababishwa na mvua hizo, ambazo zimetabiriwa na Mamlaka ya Hali ya Hewa Tanzania.

Kwa mujibu wa Mhandisi Swedi, mafunzo hayo yalilenga kuongeza uelewa na utayari wa wamiliki wa leseni, mameneja na wakaguzi wa migodi katika kujiandaa, kuzuia na kukabiliana na maafa yanayoweza kujitokeza kutokana na mvua kubwa, pamoja na kulinda miundombinu ya uchimbaji.

Amesema mada zilizowasilishwa zilihusu maandalizi ya kukabiliana na maafa, maeneo na miundombinu ya migodi inayoweza kuathirika, wajibu wa mameneja na wakaguzi wa migodi, pamoja na taratibu sahihi za uchimbaji na namna ya kuhakikisha usalama na uimara wa miamba.

Amewataka washiriki kuhakikisha taratibu za kiutendaji na ukaguzi zinaandaliwa na kutekelezwa ipasavyo, kufanya ukaguzi wa mara kwa mara wa maeneo na miundombinu ya migodi na kubaini vihatarishi mapema kabla havijasababisha madhara.

Kwa upande wake, Mkurugenzi wa Ukaguzi wa Migodi na Mazingira, Mhandisi Hamisi Kamando, amesema Tume ya Madini itaendelea kuimarisha matumizi ya teknolojia katika ukaguzi wa migodi, ikiwemo kusambaza vifaa vya kisasa vya ukaguzi katika mikoa ya kimadini.

Amesema hatua hiyo inalenga kurahisisha ukaguzi na kusaidia kubaini hali ya maeneo ya chini ya ardhi, huku akiwataka wachimbaji wadogo kuimarisha usalama kwa kutengeneza kanuni ndogo na kufanya vikao kabla ya kuanza kwa kila zamu ili kubaini idadi ya watu wanaoingia migodini.

Mhandisi Kamando amesisitiza kuwa wakati wa mvua, watu hawapaswi kuruhusiwa kuingia katika mashimo yenye vihatarishi vya usalama.

“Wakaguzi wa madini, kama kuna kipindi hamtakiwi kulala ni hiki. Kama duara ni bovu, msioneane haya kusema ukweli. Mmiliki wa duara akikaidi na kupeleka watu, hatua stahiki zichukuliwe,” amesema Mhandisi Kamando.

Awali, Mkurugenzi wa Huduma za Sheria wa Tume ya Madini, Francis Kayichile, aliwataka wachimbaji kuzingatia sheria, kanuni na masharti ya leseni zao, akieleza kuwa kila leseni ya uchimbaji ina masharti ambayo mwenye leseni anatakiwa kuyatekeleza.

“Shimo likipata shida wakati mlishatahadharishwa, sheria itawabana na hatutafumbia macho,” amesema Kayichile.

Posted on

Teknolojia kupewa nguvu Afrika – HabariLeo

DAR ES SALAAM: TANZANIA ni miongoni mwa nchi za Afrika zinazotarajiwa kushiriki mkutano wa Africa Blockchain Festival 2026, utakaofanyika nchini Kenya kwa lengo la kubadilishana uzoefu kuhusu matumizi ya teknolojia katika kukuza uchumi wa kidijitali.

Kwa mujibu wa taarifa iliyotolewa na Tume ya Teknolojia ya Habari na Mawasiliano (ICTC), mkutano huo utajadili matumizi ya Akili Bandia (AI), teknolojia ya blockchain na Big Data katika kuboresha huduma na kukuza biashara kadhalika na kushirikisha watu wasiopungua 3000.

Naye Mwanzilishi wa mkutano huo, Olubunmi Fabanwo amesema teknolojia ya blockchain inahitaji kuunganishwa na teknolojia nyingine, ikiwemo Akili Bandia, usalama wa mitandao, utambulisho wa kidijitali na mifumo ya malipo.Amesema hatua hiyo ni muhimu katika kuongeza matumizi ya teknolojia hizo na kuleta manufaa zaidi katika uchumi wa kidijitali.

Kwa Tanzania, mjadala huo unatoa fursa ya kuangalia namna ya kuimarisha miundombinu ya TEHAMA, kuongeza ujuzi na kukuza ubunifu wa kiteknolojia.Wakati huo huo, Benki Kuu ya Tanzania inaendelea kufuatilia maendeleo ya teknolojia za kifedha.

Posted on

MASHILI ATIMIZA AHADI, AKABIDHI MSAADA WA KICHOMEA TAKA NA JENERETA CHUO CHA UUGUZI NZEGA

Na Matukio Daima Nzega, Tabora

MKURUNGENZI Mtendaji wa Mashili Company Limited Ndg Peter Mashili, Leo tarehe 29 Septemba, 2026 ametekeleza ahadi aliyoitoa Agosti 7, 2026 wakati alipokuwa Mgeni Rasmi katika Mahafali ya Nne ya Chuo cha Uuguzi na Ukunga Nzega, kwa kukabidhi kichomea taka (incinerator) alichokijenga kwa gharama ya shilingi Milioni 6.9 pamoja na jenereta ambalo amelinunua shilingi milioni 4.2, kwa lengo la kuboresha mazingira ya kujifunzia na utoaji wa mafunzo chuoni hapo.

Akikabidhi mchango huo leo Septemba 29, 2026 kwa Mkuu wa Chuo cha Uuguzi na Ukunga Nzega, Bw. Josephat K. Kaja, Mashili amesema utekelezaji wa ahadi hiyo ni sehemu ya kuunga mkono juhudi za Serikali katika kuimarisha elimu na mafunzo ya wataalamu wa afya, sambamba na kuboresha mazingira ya wanafunzi na wakufunzi.

Mashili amesema vifaa hivyo vyote vilivyogharimu shilingi milioni 11.186 ili ni maalumu kwa ajili ya kukabiliana na changamoto za umeme na kuboresha mazingira ya chuo.

Amesema kichomea taka kitasaidia kuboresha usimamizi wa taka zinazozalishwa katika mazingira ya chuo, hususani taka zinazohusiana na mafunzo na huduma za afya, wakati jenereta litasaidia kuhakikisha shughuli za mafunzo zinaendelea hata pale kunapokuwa na changamoto ya upatikanaji wa umeme.

Kwa upande wake, Kaimu Katibu Tawala wa Wilaya ya Nzega, Bi Zalna Dickolagwa, amemshukuru Mkurugenzi Mtendaji wa Mashili Company Limited Ndg Peter Mashili kupitia kampuni yake inayojihusisha na uchimbaji wa madini kwa kuendelea kufanya shughuli za uwekezaji huku akitambua umuhimu wa kurudisha sehemu ya mafanikio kwa jamii kupitia Uwajibikaji kwa Jamii (CSR). Amesema utekelezaji wa ahadi hiyo umeongeza uaminifu kwa wananchi, kwa kuwa Mashili ameonesha kwa vitendo kwamba ahadi anazotoa anazitekeleza.

Amesema Serikali wilayani Nzega itaendelea kushirikiana na Mashili Company pamoja na sekta binafsi kwa ujumla, kwa lengo la kuimarisha ushirikiano na kuchochea utekelezaji wa shughuli za maendeleo zitakazonufaisha jamii.

Kwa upande wake, Mkuu wa Chuo cha Uuguzi na Ukunga Nzega, Bw. Josephat K. Kaja, amemshukuru Mashili kwa kutekeleza ahadi hiyo, akisema msaada huo utasaidia kukabiliana na changamoto zilizokuwa zikiathiri mazingira ya kujifunzia na uendeshaji wa shughuli za chuo.

Mchango huo unakuja ikiwa ni sehemu ya kuunga mkono jitihada za Serikali za kuongeza idadi ya wataalamu wa afya nchini kupitia vyuo vya mafunzo, wakati Chuo cha Uuguzi na Ukunga Nzega kikiwa na wanafunzi 143, wakiwemo wasichana 93 na wavulana 50.

MWISHO

 

Posted on

Rais Mwinyi: Afrika Isibakie Kuwa Soko la Teknolojia, Ijenge Uwezo wa Kuizalisha

ZANZIBAR: Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi, amesema Afrika haiwezi kuendelea kubaki kuwa soko la teknolojia zinazozalishwa na mataifa mengine, bali inapaswa kujenga uwezo wa kuzalisha teknolojia na bunifu zake, kukuza vipaji na kujipambanua kuwa kitovu cha ushindani katika ubunifu na uwekezaji.

Rais Dkt. Mwinyi ameyasema hayo leo, Septemba 29, 2026, wakati akifungua Maonesho ya Teknolojia na Akili Unde (Tech and AI Expo Zanzibar 2026) katika Hoteli ya Golden Tulip Airport, Zanzibar, sambamba na uzinduzi wa Sera ya Kidijitali ya Zanzibar 2026 (Zanzibar Digital Policy 2026) inayolenga kutoa mwelekeo wa mageuzi ya mageuzi ya kidijitali Zanzibar.

Amesema mageuzi ya teknolojia yanatoa fursa kubwa kwa Afrika kukabiliana na changamoto za maendeleo, kuboresha huduma za umma, kupanua upatikanaji wa elimu na afya, kuongeza uzalishaji, kuimarisha biashara na kufungua fursa mpya za ajira.

Rais Mwinyi amesema Serikali ya Mapinduzi ya Zanzibar imeanza kuweka mazingira na miundombinu yatakayowezesha wananchi, wafanyabiashara na taasisi kutumia teknolojia kwa maendeleo ya kiuchumi na kijamii.

Amesema Serikali inalenga kuunganisha kaya 100,000 na huduma za intaneti za uhakika kupitia mfumo wa Fibre-to-the-Home (FTTH) ndani ya miaka mitatu, sambamba na kuimarisha mawasiliano kupitia nyaya za chini ya bahari (Submarine Cable) na kuendeleza miundombinu ya vituo vya kuhifadhi na kuchakata taarifa (Data Centers).

Akizungumzia Akili Unde (Artificial Intelligence – AI), Rais Mwinyi amesema teknolojia hiyo ina uwezo mkubwa wa kuongeza tija katika sekta mbalimbali ikiwemo kilimo, afya, elimu, utalii, huduma za Serikali na biashara.

Hata hivyo, amesema matumizi ya AI yanahitaji miundombinu imara, taarifa sahihi na za kuaminika, wataalamu wenye ujuzi, usimamizi wenye uwajibikaji pamoja na imani ya wananchi katika matumizi ya teknolojia hiyo.

Amesema Serikali inaandaa Mfumo Mkakati wa Akili Unde (AI Strategy Framework) utakaosaidia kuhakikisha matumizi ya teknolojia hiyo yanafanyika kwa usalama na kwa kuzingatia uwajibikaji katika uchumi na huduma za umma, huku ikilinda faragha, usalama na haki za msingi za wananchi.

Aidha, Rais Mwinyi amesema Serikali inaendelea kuchukua hatua za kuweka mfumo bora wa kisheria na kisera kwa kampuni changa, wabunifu na wawekezaji wa teknolojia, sambamba na kuimarisha ulinzi wa taarifa binafsi na uwajibikaji katika mazingira ya kidijitali.

Amesisitiza umuhimu wa nchi za Afrika kuimarisha ushirikiano katika miundombinu ya kidijitali, usalama wa mtandao, usimamizi wa taarifa, utafiti, ubunifu na uhamishaji wa teknolojia ili kuiwezesha Afrika kuwa na uwezo mkubwa wa kutatua changamoto zake.

Kwa upande wake, Waziri wa Mawasiliano, Teknolojia ya Habari na Ubunifu Zanzibar, Mhe. Mudrik Ramadhan Soraga, amesema Serikali inalenga kujenga mazingira yatakayowawezesha vijana kutumia teknolojia na ubunifu kushiriki kikamilifu katika uchumi wa kidijitali na kutengeneza bidhaa na huduma zenye uwezo wa kushindana katika masoko ya kimataifa.

Katika maonesho hayo, Rais Dkt. Mwinyi pia ameshuhudia utiaji saini wa Hati ya Makubaliano ya Ushirikiano (MoU) baina ya Wizara ya Mawasiliano, Teknolojia ya Habari na Ubunifu Zanzibar na Huawei Technologies Tanzania Limited, kwa lengo la kuimarisha ushirikiano katika sekta ya teknolojia.

Maonesho hayo yamewakutanisha wadau mbalimbali wa teknolojia, wakiwemo wataalamu wa Akili Unde, wawekezaji, watafiti, kampuni changa, washirika wa maendeleo na vijana wabunifu kutoka ndani na nje ya nchi, kwa lengo la kubadilishana maarifa, kuimarisha ushirikiano na kujadili nafasi ya teknolojia katika maendeleo ya Afrika.