Month: August 2026

Posted on

Sauti ya kipekee iliyotoka katika familia ya muziki – HabariLeo

KATIKA safari ndefu ya muziki wa Bongo Fleva, yapo majina ambayo yameweza kujenga heshima kutokana na kipaji, ubunifu na uwezo wa kudumu katika mioyo ya mashabiki.Miongoni mwa majina hayo ni mwanamuziki Banana Zoro, anayekumbukwa kwa sauti yake ya kipekee, mtindo wake wa uimbaji na nyimbo zilizogusa maisha ya jamii. Banana Zoro si jina geni katika tasnia ya muziki nchini. Ni msanii aliyekulia katika mazingira ambayo muziki ulikuwa sehemu ya maisha ya familia yake, hali iliyochangia kwa kiasi kikubwa kujenga msingi wa safari yake katika sanaa.

Katika mahojiano maalumu na HabariLeo Digital, Banana anaeleza kuwa alianza kujihusisha na muziki akiwa kijana, akichochewa na mazingira ya familia yake yaliyokuwa yamezungukwa na sanaa.Baba yake mzazi, Mzee Zahir Ally Zoro, alikuwa mwanamuziki anayeheshimika katika muziki wa dansi nchini Tanzania. Mazingira hayo yalimfanya Banana kukua akiwa karibu na muziki, jambo lililomvutia na hatimaye kumshawishi kuamua kujenga safari yake mwenyewe katika tasnia hiyo.

‘Mama Yangu’ yamtambulisha

Jina la Banana Zoro lilizidi kupata umaarufu baada ya kutoa wimbo ‘Mama Yangu’, uliopokelewa vizuri na mashabiki kutokana na ujumbe wake wa upendo, shukrani na kuthamini nafasi ya mama katika maisha ya mwanadamu. Baada ya mafanikio hayo, aliendelea kutoa kazi mbalimbali zikiwamo ‘Nipo Radhi’, ‘Nzela’, ‘Mama Kumbena’, ‘Mapenzi Gani’ na ‘Zoba’. SOMA: Kila mzigo wa taifa unahitaji bega la mzalendo (2)

Kazi hizo zilionyesha uwezo wake wa kuimba na kuwasilisha hisia kupitia muziki, huku zikimsaidia kujenga nafasi yake miongoni mwa wasanii waliotamba katika vipindi tofauti vya muziki wa Tanzania. Uwezo wa Banana kuchanganya ladha za R&B, Zouk na Bongo Fleva pia ulimfanya kuwa msanii mwenye mashabiki wa rika tofauti. Katika safari yake, amefanya kazi mbalimbali na wasanii wengine, akichangia katika kukuza muziki wa kizazi kipya.

Muziki wa live band

Kwa sasa, Banana Zoro amejikita zaidi katika muziki wa live band, akitumbuiza katika hoteli, kumbi za harusi, sherehe za send-off pamoja na hafla mbalimbali za serikali na taasisi. Anasema muziki wa moja kwa moja umekuwa sehemu muhimu ya safari yake, huku akisisitiza umuhimu wa wasanii kujenga uwezo wa kuimba bila kutegemea playback. Katika kuzungumzia kizazi kipya cha wanamuziki, Banana anawapongeza wasanii wanaozingatia ubora wa kazi zao na wenye uwezo wa kuimba moja kwa moja. Miongoni mwa wasanii anaowakubali, anawataja Nandy, King Music na Vanilla, akisema anavutiwa na namna wanavyowasilisha kazi zao.

Nidhamu ndiyo msingi

Kwa Banana Zoro, safari ndefu katika muziki haijajengwa na kipaji pekee. Anasema siri ya kudumu katika muziki na kuiongoza bendi yake kwa miaka mingi ni nidhamu ya kazi, kuheshimu mikataba na kujenga uaminifu kwa mashabiki pamoja na waandaaji wa matamasha. Anaeleza kuwa amekuwa akijenga uhusiano mzuri na wanamuziki anaofanya nao kazi na kuwasaidia kutimiza ndoto zao, licha ya baadhi yao kuondoka na kuendelea na miradi au fursa nyingine. Kwa upande wa mashabiki, Banana anasema amekuwa akipokea kwa upendo ishara mbalimbali za mapenzi kutoka kwao, hasa wanapomfuata baada ya maonesho au kwenye matamasha.

Mitandao imebadilisha muziki

Kama ilivyo kwa sekta nyingine, muziki umebadilika kutokana na ukuaji wa teknolojia na mitandao ya kijamii. Banana anasema TikTok, Instagram na YouTube ni miongoni mwa majukwaa yaliyobadilisha namna wasanii wanavyowafikia mashabiki. Anasema tofauti na zamani, ambapo redio na televisheni zilikuwa miongoni mwa njia kuu za kusambaza kazi za wasanii, sasa msanii anaweza kuwafikia mashabiki moja kwa moja kupitia mitandao hiyo. Hata hivyo, anasisitiza kuwa umaarufu wa wasanii wa zamani haupaswi kupuuzwa, kwa kuwa wengi walifanikiwa kujenga majina makubwa bila kutegemea mitandao ya kijamii iliyopo leo.

Ushauri kwa vijana

Kwa wasanii chipukizi wanaotaka kujenga safari ndefu katika muziki, Banana anawataka kuzingatia matumizi sahihi ya lugha katika utunzi wa nyimbo. Anasema matumizi ya misamiati ya muda mfupi na maneno yanayoweza kupoteza maana kadri miaka inavyosonga yanaweza kuathiri uimara wa kazi za wasanii. Kwa mtazamo wake, kazi nzuri ni ile inayoweza kusikilizwa leo na bado ikaendelea kuwa na maana kwa kizazi kijacho. Pia amesema yeye na timu yake wanaendelea kuunga mkono vipaji vya vijana kwa lengo la kuandaa kizazi kipya cha wasanii wa Bongo Fleva.

Urithi wa familia

Banana Zoro anatoka katika familia yenye historia kubwa katika muziki wa Tanzania. Alizaliwa pamoja na dada yake, Maunda Zoro, ambaye naye aliwahi kujulikana katika tasnia ya muziki kabla ya kufariki. Historia hiyo imeendelea kuwa sehemu ya utambulisho wa Banana, ambaye amebeba urithi wa familia huku akijenga jina lake mwenyewe katika muziki wa Tanzania. Mbali na muziki, Banana Zoro pia amejihusisha na uigizaji na kwa sasa ni sehemu ya tamthilia ya Huba. Katika maisha yake binafsi, Banana ni baba wa watoto watatu, wavulana wawili na msichana mmoja. Anasisitiza umuhimu wa kulinda familia na kutenganisha maisha binafsi na kazi.

Safari bado inaendelea

Leo, Banana Zoro anaendelea kuwa sehemu ya historia ya muziki wa Tanzania.Kutoka katika familia iliyobeba muziki kwa miaka mingi hadi kujenga safari yake mwenyewe, msanii huyo amedhihirisha kuwa kipaji pekee hakitoshi, bali kinahitaji kuambatana na nidhamu, ubunifu na uvumilivu. Safari yake ni simulizi ya msanii aliyerithi muziki kutoka katika familia, lakini hakubaki kuwa mrithi wa jina pekee. Alitengeneza sauti yake, akajenga mashabiki wake na kuacha alama yake katika muziki wa Tanzania.

 

Posted on

Askari Polisi Afariki Akiwa Mahabusu Kituo Cha Polisi Tanga

Global Publishers
August 31, 2026
432 views
0 Comments

Tanga — Jeshi la Polisi Mkoa wa Tanga limethibitisha kifo cha askari wake, H.1796 Koplo Mwita, aliyekuwa akishikiliwa kwa ajili ya uchunguzi katika Kituo cha Polisi Wilaya ya Tanga.

Kwa mujibu wa taarifa iliyotolewa na Kamanda wa Polisi Mkoa wa Tanga, tarehe 27 Agosti 2026 majira ya saa 1:03 usiku, Koplo Mwita alifariki dunia akiwa ndani ya chumba cha mahabusu katika kituo hicho.

Taarifa hiyo imeeleza kuwa kabla ya kifo chake, marehemu pamoja na afisa mmoja na askari watano wa Jeshi la Polisi wa vyeo mbalimbali walikuwa wakishikiliwa kwa tuhuma za kijinai.

Jeshi la Polisi limesema baada ya kifo hicho, uchunguzi wa kisayansi uliofanywa na ndugu wa marehemu kushuhudia umebaini kuwa chanzo cha kifo kilikuwa kukosa hewa kutokana na kujinyonga.

Aidha, mwili wa marehemu umebakizwa na ndugu zake kwa ajili ya taratibu za mazishi, huku Jeshi la Polisi likisema linaendelea na uchunguzi wa tukio hilo.

Katika taarifa hiyo, Jeshi la Polisi Mkoa wa Tanga limewataka wananchi, waandishi wa habari na watumiaji wa mitandao ya kijamii kuepuka kuanzisha au kusambaza taarifa zisizothibitishwa, pamoja na kutoa hitimisho lisilotokana na matokeo rasmi ya uchunguzi.

Jeshi hilo limeeleza kuwa kufanya hivyo ni upotoshaji ambao ni kinyume cha sheria.

Aidha, Jeshi la Polisi Mkoa wa Tanga limesisitiza kuwa linaendelea na uchunguzi wa tukio hilo na litahakikisha taratibu zote za kiuchunguzi zinafuatwa kwa mujibu wa sheria, kanuni na taratibu.

Imetolewa na Kamanda wa Polisi, Mkoa wa Tanga, Agosti 31, 2026.

Posted on

Shalulile Na Mudathir Waipeleka Yanga Kileleni, Yawafunga Fountain Gate 2-0

Uwanja wa Sheikh Amri Abeid jijini Arusha umeshuhudia mchezo wa Ligi Kuu ya NBC kati ya Fountain Gate FC na Yanga SC, ambapo Yanga imeibuka na ushindi wa mabao 2-0 na kuendeleza rekodi yake ya ushindi wa asilimia 100 katika mechi tano za mwanzo za msimu.

Yanga ilianza mchezo kwa kasi, ikitafuta bao la mapema, huku Fountain Gate ikiwa makini katika dakika za mwanzo. Baada ya dakika kadhaa za kushambuliana, Peter Shalulile aliifungia Yanga bao la kwanza dakika ya 26 baada ya kumalizia pasi ya kisigino kutoka kwa Stephane Aziz Ki, aliyecheza mechi yake ya kwanza ya ligi tangu kurejea Jangwani.

Bao hilo liliipa Yanga nguvu zaidi, huku mabingwa hao watetezi wakianza kutawala mchezo na kulazimisha Fountain Gate kutumia muda mwingi kujilinda.

Licha ya wenyeji kujaribu kusawazisha, safu ya ulinzi ya Yanga iliendelea kuwa imara na kuzuia mashambulizi yao, hivyo kipindi cha kwanza kikamalizika Yanga ikiwa mbele kwa bao 1-0.

Kipindi cha pili, Yanga iliendelea kulisakama lango la Fountain Gate, huku benchi la ufundi likifanya mabadiliko kwa lengo la kuongeza nguvu katika eneo la kiungo na ushambuliaji.

Juhudi hizo zilizaa matunda dakika ya 76, ambapo Mudathir Yahya alifunga bao la pili baada ya kufuatilia mpira uliorejea kutoka kwa kipa wa Fountain Gate, kufuatia shambulizi lililoanzishwa na Seleman Mwalimu.

Fountain Gate ilijaribu kutafuta bao la kufutia machozi katika dakika zilizobaki, lakini Yanga iliendelea kudhibiti mchezo hadi filimbi ya mwisho, na hivyo kuondoka Arusha na ushindi wa mabao 2-0.

Ushindi huo umeifanya Yanga kufikisha pointi 15 baada ya kushinda mechi zote tano, huku ikiwa imefunga mabao 15 na kuruhusu mawili pekee.

Kwa upande mwingine, Fountain Gate imebaki na pointi tatu baada ya mechi tano, ikiendelea kutafuta matokeo yatakayoiinua katika msimamo wa ligi.

FT: Fountain Gate 0-2 Yanga SC
⚽ 26′ Peter Shalulile
⚽ 76′ Mudathir Yahya

Posted on

Video: Makamu wa Rais Awataka Watumishi Kuachana na Kazi kwa Mazoea

Makamu wa Rais wa Jamhuri ya Muungano wa Tanzania, Deogratius Ndejembi, amewataka watumishi wa Ofisi ya Makamu wa Rais, Muungano na Mazingira, kuacha kufanya kazi kwa mazoea na badala yake kuongeza bidii, ubunifu na uwajibikaji katika kutekeleza majukumu yao.

Ndejembi ametoa kauli hiyo leo alipofanya ziara yake ya kwanza katika Ofisi ya Makamu wa Rais, Muungano na Mazingira, iliyopo Mtumba jijini Dodoma, ambapo alipokelewa na watumishi pamoja na Menejimenti ya Ofisi hiyo.

Amesema watumishi wa Serikali wanapaswa kubadili mtazamo na namna ya kutekeleza majukumu yao, huku kila mmoja akitakiwa kuwa mbunifu na kuweka mipango yenye kulenga kuleta matokeo yanayoonekana kwa wananchi na Taifa kwa ujumla.

Makamu wa Rais amewataka watumishi kutambua dhamana kubwa waliyonayo katika kuwahudumia Watanzania na kuhakikisha nafasi zao zinatumika kutoa huduma zenye thamani na kuleta tija kwa wananchi.

Aidha, amesisitiza umuhimu wa kuongeza juhudi katika kulinda na kudumisha Muungano wa Tanzania kwa kuweka mipango endelevu itakayosaidia kutatua changamoto zinazoukabili Muungano, sambamba na kuwaelimisha wananchi kuhusu fursa zinazopatikana kupitia Muungano huo.

Katika eneo la mazingira, Mhe. Ndejembi amewataka viongozi na watumishi wa Ofisi hiyo kuweka mikakati endelevu ya kuimarisha ajenda ya ulinzi na uhifadhi wa mazingira.

Amesema kampeni za upandaji miti na usafi wa majiji na miji zinapaswa kupewa msukumo zaidi, huku kukiwa na maandalizi ya nyenzo na mifumo itakayosaidia kuhakikisha juhudi hizo zinaendelea kwa muda mrefu.

Vilevile, amesisitiza umuhimu wa kuwa na mpango maalum wa kusaidia wananchi kuachana na shughuli za kila siku zinazochangia uharibifu wa mazingira na kuwawezesha kutumia njia mbadala zinazolinda mazingira.

Makamu wa Rais amesema utekelezaji wa mipango hiyo unahitaji ushirikiano, ubunifu na uwajibikaji kutoka kwa viongozi na watumishi wote ili kuhakikisha Serikali inafikia malengo yake na kutoa huduma bora kwa wananchi.

Posted on

SUA YAGEUZA UTAFITI KUWA SULUHISHO LA CHANGAMOTO

 

Na Hamida Ramadhan,Matukio Daima Media Dodoma

CHUO Kikuu cha Sokoine cha Kilimo (SUA) kimeendelea kutumia utafiti, teknolojia na ubunifu kutafuta majibu ya changamoto mbalimbali zinazowakabili wananchi, huku kikijivunia kupata hataza 16 za kimataifa.

Miongoni mwa bunifu zinazotekelezwa na chuo hicho ni matumizi ya panya buku katika kubaini kifua kikuu (TB), mabomu yaliyotegwa ardhini pamoja na nyara za Serikali.

Akizungumza na waandishi wa habari, Makamu Mkuu wa SUA, Prof. Raphael Tihelwa Chibunda, amesema mafanikio hayo yanaonyesha namna tafiti zinazofanywa na chuo hicho zinavyoweza kubadilisha maisha ya wananchi na kuongeza tija katika sekta mbalimbali.

Amesema kwa sasa SUA inatekeleza miradi 172 ya utafiti katika maeneo tofauti, huku ikizalisha wastani wa machapisho 500 ya kitaalamu kwa mwaka katika majarida yanayotambulika kitaifa na kimataifa.

Kwa mujibu wa Prof. Chibunda, kupitia Taasisi ya Utafiti na Udhibiti wa Viumbe Hai Waharibifu, panya buku wamefundishwa kubaini TB kwa kutumia makohozi, huku teknolojia hiyo ikitumika pia kwa kushirikiana na Mamlaka ya Usimamizi wa Wanyamapori Tanzania (TAWA) kubaini usafirishaji wa nyara za Serikali.

Amesema SUA pia imefanya utafiti wa kutumia bundi kudhibiti panya waharibifu mashambani, hatua inayolenga kupunguza matumizi ya sumu za kemikali na kuhifadhi mazingira.

“Tunafanya tafiti mbalimbali kwa lengo la kutatua changamoto za wananchi, ikiwamo migogoro kati ya binadamu, mifugo na wanyamapori,” amesema.

Katika sekta ya elimu, Prof. Chibunda amesema idadi ya wanafunzi wa SUA imefikia 17,438 kutoka 15,479 mwaka 2022/2023, huku chuo kikiwa na programu 58 za shahada za uzamili na 32 za shahada za awali, pamoja na programu nyingine za ngazi mbalimbali.

Amesema ongezeko la wanafunzi limekwenda sambamba na uboreshaji wa miundombinu, ambapo kupitia Mradi wa Elimu ya Juu kwa Mageuzi ya Kiuchumi (HEET), SUA inajenga majengo tisa ya kimkakati katika Kampasi za Morogoro na Mizengo Pinda mkoani Katavi.

Prof. Chibunda alisema ujenzi katika Kampasi ya Mizengo Pinda umefikia asilimia 93, huku Serikali ikiwa imetenga Sh bilioni 1.7 kwa ajili ya fidia kwa wananchi 197 waliopisha eneo la upanuzi wa kampasi hiyo.

Aidha amesema SUA imekamilisha Jengo Mtambuka la Mafunzo la Dkt. Samia Suluhu Hassan lenye uwezo wa kuchukua wanafunzi 3,205 kwa wakati mmoja, likiwa na maabara nane na madarasa nane, kwa gharama ya zaidi ya Sh bilioni 11.7.

Amesema chuo hicho sasa kinalenga kukamilisha miradi ya HEET, kuimarisha utafiti na biashara ya bunifu, kuboresha maabara kwa viwango vya kimataifa pamoja na kuimarisha SUA Media, ikiwamo kurejesha SUA TV na kuongeza masafa ya 101.1 SUA FM ili elimu ya kilimo iwafikie wananchi wengi zaidi.

Mwisho

Posted on

EAC YATOA DOLA 2500 KWA GACS-EAC Tour 2026

Na,Jusline Marco;Arusha

Sekretarieti ya Jumuiya ya Afrika Mashariki (EAC) imetoa mchango wa dola za Marekani 2,500 kwa ajili ya kusaidia safari waendesha baiskeli kutoka nchi wanachama wa Jumuiya hiyo.

Katibu Mkuu wa Jumuiya ya Afrika Mashariki Balozi Stephen Patrick Mbundi amesema EAC iko tayari kuimarisha ushirikiano na waandaaji wa safari hiyo katika siku zijazo, ikiwemo kushirikiana katika uhamasishaji na upatikanaji wa rasilimali pale itakapowezekana huku akisisitiza kuwa ushiriki wa jamii katika masuala ya Muungano hauwezi kutegemea Sekretarieti ya EAC pekee, bali unahitaji watu na taasisi mbalimbali kuwa sehemu ya utekelezaji.

Akizungumza katika uzinduzi wa safari ya baiskeli ya Great African Cycling Safari, Msemaji wa Jumuiya hiyo Balozi Mbundi amesema Muungano wa Afrika Mashariki unapaswa kuwa wa wananchi na kuendeshwa kwa kiasi kikubwa na sekta binafsi, huku Serikali zikibaki na jukumu la kuweka mazingira wezeshi kupitia sera na mifumo ya kitaasisi.

Amesema kuwa Great African Cycling Safari 2026 ni mfano wa namna wananchi wanaweza kuwa sehemu ya moja kwa moja ya kujenga na kuimarisha Muungano wa Afrika Mashariki kupitia michezo, ushirikiano wa kijamii na shughuli zinazovuka mipaka ya nchi.

Ameongeza kuwa Jumuiya ya Afrika Mashariki (EAC) imesisitiza umuhimu wa wananchi, vijana, sekta binafsi na mashirika ya kiraia kushiriki kikamilifu katika kuimarisha na kumiliki mchakato wa ujumuishaji wa kikanda.

Aidha amesema hatua na mwitikio wa kuendeleza Muungano huo unapaswa kuanzia kwa wananchi wa Afrika Mashariki, huku akiwapongeza waandaaji wa Great African Cycling Team kwa kuonyesha kwa vitendo umuhimu wa ushiriki wa wananchi katika mchakato wa ujumuishaji wa kikanda.

Kwa mujibu wa Balozi Mbundi amesema Mkakati wa Saba wa Maendeleo wa EAC umetambua kuimarisha mwelekeo wa kijamii wa Muungano wa kikanda kuwa miongoni mwa malengo yake ya kimkakati ambapo chini ya mkakati huo, mshikamano wa kijamii kupitia utamaduni na michezo ni eneo la kipaumbele, ili kuendeleza programu za michezo za kikanda kupitia ushirikiano.

Pamoja na hayo amemshukuru mwendesha baiskeli kutoka Zimbabwe kwa kujiunga na safari hiyo na kuunga mkono mpango huo, huku akisema ushirikiano wa aina hiyo unaonesha namna michezo inavyoweza kuunganisha watu kutoka mataifa mbalimbali na kusema Sekretarieti ya EAC itaendelea kutafuta maeneo ya ushirikiano na waandaaji wa safari hiyo ili kuimarisha mpango huo na kuongeza mchango wake katika kuendeleza Muungano wa kikanda.

Balozi Mbundi amewataka washirika wa EAC, jamii, sekta binafsi na wadau wengine kuendelea kuwaunga mkono waendesha baiskeli katika safari yao, ambapo amesema wana jukumu muhimu la kufikisha ujumbe wa ujumuishaji wa kikanda kwa wananchi.

Sambamba na hayo amewataka waendesha baiskeli hao, kuendelea kubeba ujumbe wa umoja na mshikamano katika maeneo yote watakayopita huku akisisitiza kuwa tofauti za kimtazamo miongoni mwa watu au nchi si lazima ziwe kikwazo cha maendeleo, kwa kuwa watu wenye hatima moja wanaweza kujadiliana, kutofautiana na hatimaye kufikia suluhisho linalokubalika.

Kwa upande wake Mkurugenzi Mwanzilishi wa GACS- Cycling Afrika John Bosco Balongo amesema kupitia mashirikiano hayo, GACS inatoa fursa ya kipekee ya kuunganisha sera, programu na taasisi za Jumuiya ya Afrika Mashariki pamoja na wananchi wa kawaida kwa kutumia Baiskeli ambayo inakuwa daraja kati ya EAC na watu wake. 

John Bosco amesema Safari ya GACS-EAC Tour 2026 tayari imedhihirisha ushirikiano huo wa Afrika Mashariki ambapo safari hiyo imetoa fursa kwa wananchi, vijana, jumuiya, taasisi na vyombo vya usalama kushiriki katika mazungumzo na shughuli za kiutendaji zinazochangia ajenda ya mtangamano wa Afrika Mashariki.

Amesema hadi kufikia sasa, GACS-EAC Tour 2026 imedhihirisha kwamba wakati wananchi wanapewa fursa, wako tayari kushiriki katika mchakato wa mtangamano wa Afrika Mashariki ambapo Safari hiyo imelenga kupanda mawazo na kujenga mahusiano, sambamba na kutengeneza majukwaa kwa ajili ya vijana. 

Sambamba na hayo GACS imeomba uungwaji mkono na ushirikiano kutoka kwa Sekretarieti ya Jumuiya ya Afrika Mashariki katika Utambuzi na Ushirikiano, Mfumo wa Uratibu kati ya GACS na EAC, Vilabu vya Ushirikiano wa EAC, pamoja na Mawasiliano ya Pamoja na Uhamasishaji wa Umma, Ushirikiano wa Mwaka Mzima ambapo amesema safari ya kila mwaka ya GACS itakuwa ni mpango wa kudumu ndani ya ajenda pana zaidi inayohusu ushirikishwaji wa wananchi, ushiriki wa vijana, hatua za kuhifadhi mazingira, na uelimishaji wa umma kuhusu ushirikiano wa Afrika Mashariki.

Ameongeza kuwa kwa sasa wanachohitaji ni ushirikiano imara zaidi wa kitaasisi ili kusaidia kuigeuza safari hiyo kuwa vuguvugu endelevu la kikanda kwa kila kilomita wanayopita kwa baiskeli ni fursa ya mazungumzo, kwa kila shule wanayotembelea ni fursa na kwa kila mpaka wanaovuka ni ukumbusho kwamba hatima yao imeunganishwa hivyo kila kijana anayeshiriki ni balozi mtarajiwa wa ushirikiano wa Afrika Mashariki.

Posted on

*>MAKAMU WA RAIS, ATEMBELEA OFISI YA MAKAMU WA RAIS MUUNGANO NA MAZINGIRA*

 *>AWATAKA WATUMISHI KUACHA KUFANYA KAZI KWA MAZOEA*

 

 

Makamu wa Rais wa Jamhuri ya Muungano wa Tanzania, Mhe. Deogratius Ndejembi, amewataka watumishi wa Ofisi ya Makamu wa Rais, Muungano na Mazingira kuongeza bidii, uwajibikaji na kuachana na utendaji wa kazi kwa mazoea ili kuhakikisha majukumu ya Serikali yanatekelezwa kwa ufanisi na kwa wakati.

 

Makamu wa Rais ametoa wito huo leo, alipofanya ziara yake ya kwanza katika Ofisi ya Makamu wa Rais (Muungano na Mazingira), iliyopo Mtumba, jijini Dodoma, ambako alipokelewa na wafanyakazi pamoja na Menejimenti ya Wizara hiyo.

 

Amesisitiza umuhimu wa watumishi kubadili mitazamo na namna ya kufanya kazi, akitaka kila mmoja kuwa mbunifu na kuweka mipango inayolenga kuleta matokeo yanayoonekana kwa wananchi na Taifa kwa ujumla.

 

Makamu wa Rais amewasihi watumishi kutumia nafasi zao kutoa huduma yenye thamani kwa watanzania na kutambua dhamana waliyonayo katika kuwahudumia wananchi. Pia amewataka kubadili mitazamo na namna ya kufikiri, kuwa wabunifu na kuhakikisha mipango inayowekwa inaleta tija na matokeo chanya katika shughuli mbalimbali zinazotekelezwa kwa maslahi mapana ya Taifa.

 

Halikadhalika, amewataka kuongeza jitihada katika kudumisha Muungano kwa kuwa na mipango endelevu inayolenga kutatua changamoto mbalimbali pamoja na kutoa elimu ya fursa zilizopo katika Muungano.

 

Amewasihi Viongozi na Watumishi wa Wizara hiyo, kuwa na mipango endelevu katika utekelezaji wa ajenda ya ulinzi na uhifadhi wa mazingira kwa kutumia vema kampeni za upandaji miti, usafi wa majiji na miji kwa kuweka nyenzo zitakazosaidia kufanya hali hiyo kuwa endelevu. Vile vile amesisitiza umuhimu wa kuwa na Mpango maalum utakao saidia wananchi kuhama katika shughuli za kila siku zinazoharibu mazingira.

 

Awali, Waziri wa Nchi, Ofisi ya Makamu wa Rais (Muungano na Mazingira), Mhandisi Hamad Masauni, amempongeza Makamu wa Rais kwa kuaminiwa na Rais wa Jamhuri ya Muungano wa Tanzania Mhe. Dkt. Samia Suluhu Hassan, katika nafasi hiyo na kumhakikishia ushirikiano katika kutekeleza majukumu mbalimbali yanayohusu Ofisi ya Makamu wa Rais.

 

Akiwasilisha taarifa kuhusu shughuli zinazotekelezwa na idara mbalimbali zilizo chini ya Ofisi ya Makamu wa Rais, Katibu Mkuu, Ofisi ya Makamu wa Rais Dkt. Richard Muyungi, amesema wizara hiyo ina Idara nne, Vitengo nane na Taasisi mbili zinazotekeleza majukumu mbalimbali, ikiwemo utekelezaji wa Dira ya Taifa ya Maendeleo 2050 katika masuala ya Muungano na Mazingira.

 

Imetolewa na

Ofisi ya Makamu wa Rais

31 Agosti 2026

Dodoma.

Posted on

*WMA: KILO NA LITA YA TANZANIA NI KILO NA LITA YA DUNIA*

*Na WMA – MWANZA*

 Meneja wa Wakala wa Vipimo (WMA) Mkoa wa Geita, Bi. Eva Ikula amesema usimamizi wa matumizi sahihi ya vipimo unaofanywa na WMA umewezesha bidhaa za Tanzania kuaminiwa na kukubalika zaidi katika soko la kimataifa.

Akizungumza na waandishi wa habari leo Agosti 31, 2026 katika banda la WMA wakati wa Maonesho ya Biashara ya Afrika Mashariki yanayoendelea katika Viwanja vya Furahisha jijini Mwanza, Bi. Ikula amesema mojawapo  ya sababu kubwa ya bidhaa za Tanzania kukubalika katika soko la kimataifa ni uhakika wa vipimo.

“Kilo yetu ni kilo ya Kenya, ya India, na ya Ujerumani pia. Hiyo ndiyo nguvu ya matumizi ya vipimo sahihi.”

Amesema WMA inaendelea kutoa elimu kupitia kampeni mbalimbali ili kujenga uelewa kuwa “Kipimo sahihi ni pasipoti ya bidhaa yako kuingia soko lolote duniani.”

Amebainisha kuwa wanunuzi wa kimataifa wanaiamini Tanzania kwa sababu WMA  inatumia mfumo mmoja wa kimataifa wa vipimo – SI Units.

“Matokeo yake ni rahisi. Mkataba unapotiwa saini London, Beijing au Johannesburg, wanajua kilo ya Tanzania ni sawa na kilo yao,” amesema.

Amehitimisha kwa kusema WMA haijali tu kilo na lita bali inajenga imani.

” Tunapouza kwa kipimo sahihi, tunauza kwa heshima. Na dunia inaheshimu wale wanaouza kwa heshima.”

Maonesho ya Biashara ya Afrika Mashariki yalianza Agosti 28 na yanatarajiwa kuhitimishwa Septemba  6, 2026 yakiongozwa na kaulimbiu isemayo “Usalama na Amani ni Kichocheo cha  Biashara na Uwekezaji”.