Month: September 2026

Na Hamida Ramadhan, Matukio Daima Media Dodoma

CHAMA Cha Wafugaji Nchini (CCWT) kimesema kufutwa kwa sheria iliyokuwa ikiruhusu mifugo kutaifishwa baada ya kuingia katika maeneo ya hifadhi ni hatua inayokwenda kuondoa hofu na kero iliyokuwa ikiwakabili wafugaji nchini.

Hata hivyo, chama hicho kimesisitiza kuwa mabadiliko hayo hayatoi ruhusa kwa wafugaji kuingiza mifugo katika maeneo ya hifadhi, kikieleza kuwa wafugaji wanapaswa kutumia nafasi hiyo kuimarisha ufugaji wao na kuzingatia sheria za uhifadhi.

Mwenyekiti wa CCWT, Mrida Mshota, amesema hayo jijini Dodoma wakati akizungumza na waandishi wa habari, akieleza kuwa wafugaji wamepokea hatua hiyo kwa matumaini makubwa kutokana na changamoto walizokuwa wakikabiliana nazo kutokana na utekelezaji wa sheria hiyo.

Amesema pamoja na kuondolewa kwa adhabu ya kutaifishwa mifugo, wafugaji bado wana wajibu wa kuhakikisha shughuli zao zinafanyika katika maeneo yanayotambuliwa kisheria na kuepuka migogoro na maeneo ya hifadhi.

Kwa mujibu wa Mshota, ufugaji wenye tija unahitaji wafugaji kuachana na mifumo ya zamani na kuelekea katika ufugaji wa kisasa unaozingatia matumizi bora ya ardhi, lishe bora ya mifugo na uzalishaji wenye tija.

Amesema hatua hiyo inaweza kusaidia kujenga mazingira mazuri zaidi kati ya wafugaji, Serikali na taasisi zinazohusika na uhifadhi, iwapo wafugaji wataendelea kutekeleza wajibu wao kwa kuzingatia sheria na taratibu zilizowekwa.

Katika hatua nyingine, CCWT imeitaka Serikali kuendelea kuboresha huduma za msingi kwa wafugaji, hasa kuhakikisha chanjo za mifugo zinapatikana na kutolewa kwa wakati katika maeneo mbalimbali nchini.

Mshota pia amesisitiza umuhimu wa kuharakisha utambuzi na usajili wa mifugo, akisema hatua hiyo ni muhimu katika kuwezesha Serikali kuwa na takwimu sahihi za mifugo na kurahisisha utoaji wa huduma kwa wafugaji.

Amesema uwepo wa mfumo mzuri wa utambuzi wa mifugo utasaidia pia katika kudhibiti magonjwa, kufuatilia mifugo na kuboresha mipango ya maendeleo katika sekta ya mifugo.

CCWT imesema ushirikiano kati ya Serikali na wafugaji ni muhimu katika kuhakikisha mabadiliko ya sera na sheria yanafikia malengo yaliyokusudiwa, huku wafugaji wakitakiwa kutekeleza wajibu wao kwa kuzingatia maslahi mapana ya taifa.

Marekebisho ya Sheria ya Uhifadhi wa Wanyamapori yaliyofuta utaifishaji wa mifugo inapoingia ndani ya hifadhi yameelezwa kuzingatia matakwa ya Katiba ya Jamhuri ya Muungano wa Tanzania, kwa kuwa utaratibu wa awali ulikuwa ukikiuka misingi ya Katiba.

Kamati ya Kudumu ya Bunge ya Nishati na Madini ikiongozwa na Mwenyekiti wake, Mhe. Subira Mgalu (Mb.) imepatiwa mafunzo kuhusu usimamizi wa mikataba ya msaada wa kiufundi katika Sekta ya Madini, ikiwa ni pamoja na masharti ya kisheria yanayohusu umiliki wa leseni ndogo za uchimbaji wa madini.

Akizungumza kupitia mafunzo hayo yaliyofanyika kwenye Ofisi za Makao Makuu ya Tume ya Madini jijini Dodoma mapema leo Mkurugenzi wa Huduma za Sheria wa Tume ya Madini, Francis Kayichile, kwa Niaba ya Katibu Mtendaji wa Tume ya Madini amesisitiza kuwa mtu ambaye si raia wa Tanzania kupewa leseni ndogo ya uchimbaji madini ni kosa kwa mujibu wa Sheria ya Madini, Sura ya 123, kwa kuwa fursa ya kuomba na kumiliki leseni hizo imetengwa kwa Watanzania pekee.

Kayichile amesema Kifungu cha 64 kikisomwa pamoja na kifungu cha 9 (3) cha Sheria ya Madini, Sura ya 123, kinatoa fursa kwa Watanzania pekee kuwasilisha maombi ya leseni ndogo za uchimbaji madini, hivyo mtu asiye raia wa Tanzania hanufaiki na fursa hiyo.

Amesema pamoja na umiliki wa leseni kuwa kwa Watanzania, wamiliki wa leseni ndogo wanaweza kupata msaada wa kiufundi kutoka kwa wawezeshaji kwa kuzingatia sheria na kanuni zilizopo.

Aidha ameeleza kuwa kwa mujibu wa kanuni hizo mwenye leseni yenye msaada wa kiufundi amepatiwa  asilimia 30 ya faida baada ya kuondoa tozo zote za Serikali, bila kuzingatia gharama za uendeshaji wa mradi alizobeba mwezeshaji.

Ameongeza kuwa usimamizi wa mgodi, uingizaji wa vifaa na mitambo pamoja na ulinzi wa eneo na mali ni majukumu ya pamoja ya wahusika wa mkataba.

Kayichile amesema mkataba wa msaada wa kiufundi huwa na muda wa awali wa miaka mitatu na unaweza kuhuishwa, lakini kwa jumla muda wake haupaswi kuzidi miaka 12 au uhai wa mgodi unapoisha.

“Mikataba hiyo husajiliwa na Tume ya Madini na wahusika wana haki ya kufanya marekebisho  wakati wowote na pindi kunapofanyika marekebisho ya sheria  yanayoathiri masharti ya mkataba au pale inapobainika uwepo wa madini mapya katika eneo lenye leseni yenye msaada wa kiufundi” amesema.

Amesema Tume ya Madini inaendelea kusimamia na kufuatilia utekelezaji wa mikataba hiyo, huku akisisitiza kuwa ukiukwaji wa masharti unaweza kusababisha hatua kuchukuliwa kwa mujibu wa Kifungu cha 74 cha Sheria ya Madini, Sura ya 123, ikiwemo kusitishwa au kufutwa kwa leseni.

Aidha, Kayichile amesema Serikali imefanya marekebisho ya Kanuni za Haki Madini kwa lengo la kulinda haki za wenye maduara waliopo ndani ya maeneo yenye leseni ndogo za uchimbaji madini.

Amesema kupitia Kanuni za Madini (Msaada wa Kiufundi) za mwaka 2025, hususan Kanuni ya 8(1)(h), mwenye leseni analazimika, kabla ya kuingia mkataba wa msaada wa kiufundi, kufanya makubaliano na wenye maduara au kuwalipa fidia kwa uwekezaji walioufanya katika eneo lenye leseni hiyo.

Kwa mujibu wa Kayichile, hatua hiyo inalenga kuhakikisha haki za Watanzania wanaomiliki leseni na wenye maduara zinalindwa, huku ikiweka mazingira ya ushirikiano katika shughuli za uchimbaji madini yanayozingatia sheria na kuhakikisha rasilimali za madini zinawanufaisha Watanzania wote.

Kikao hicho kilichoongozwa na Mwenyekiti wa Kamati ya Kudumu ya Bunge ya Nishati na Madini, Mhe. Subira Mgalu (Mb.) kimeshirikisha pia watendaji wa taasisi zilizopo chini ya Wizara ya Madini.

Dkt. Mwigulu ameyasema hayo leo, Septemba 3, 2026, wakati akifungua Kongamano la Tano la Kitaifa la Ushiriki wa Watanzania katika Miradi ya Kimkakati na Uwekezaji, lililofanyika Dodoma.

Amesema Serikali chini ya uongozi wa Rais Samia Suluhu Hassan inaendelea kuweka mazingira ya kisera, kisheria na kiutendaji yatakayowawezesha Watanzania kushiriki moja kwa moja katika shughuli za uchumi.

“Tuwawezeshe Watanzania kushika uchumi wao hii ndiyo njia ya kuongeza ajira, kuongeza vyanzo vya mapato na kujenga sekta binafsi yenye nguvu,” amesema.

Amesema lengo la kuwawezesha Watanzania si kuwazuia wawekezaji wa nje, bali kuongeza uwezo wa kampuni na wananchi wa ndani ili nao wanufaike na fursa zinazotokana na rasilimali na miradi mbalimbali ya maendeleo.

Kwa upande wake, Kaimu Katibu Mtendaji wa Baraza la Taifa la Uwezeshaji Kiuchumi (NEEC), Gwakisa Bapala, amesema takribani wadau 600 wameshiriki kongamano hilo la siku mbili lililoanza Septemba 2, 2026.

Amesema washiriki wamejadili changamoto na fursa zilizopo katika miradi ya kimkakati na uwekezaji, pamoja na kupewa mbinu za kushiriki na kunufaika na fursa zinazotokana na manunuzi ya umma.

Bapala amesema pamoja na Serikali kuweka mwongozo unaotaka angalau asilimia 30 ya wanufaika wa zabuni za manunuzi ya umma kuwa makundi maalum, ikiwemo vijana, bado ushiriki wa makundi hayo umebaki kuwa mdogo, ukiwa karibu asilimia moja pekee.

Amesema kongamano hilo limeweka maazimio yanayolenga kuwapa wadau mbinu za kunufaika na zabuni za manunuzi ya umma, fursa za uwekezaji katika sekta mbalimbali pamoja na maeneo mengine yanayotolewa na Serikali.

Kongamano hilo limefanyika chini ya kaulimbiu: “Ushiriki wa Watanzania ni Nguzo ya Uchumi Shindani na Jumuishi kuelekea Dira ya Taifa ya Maendeleo 2050.

Wataalamu, watafiti, wanasayansi, watunga sera na wadau wa Uchumi wa Buluu kutoka Tanzania, Afrika na mataifa mbalimbali duniani wanatarajiwa kukutana jijini Dar es Salaam katika Kongamano la Tano la Kimataifa la Uchumi wa Buluu.

Kongamano hilo litafanyika Septemba 7 hadi 9, 2026 katika Ukumbi wa Kimataifa wa Julius Nyerere (JNICC), huku Makamu wa Rais wa Jamhuri ya Muungano wa Tanzania, Deogratius Ndejembi, akitarajiwa kuwa mgeni rasmi.

Mkuu wa Chuo cha Bahari Dar es Salaam, Tumaini Gurumo, amesema kongamano hilo litatoa fursa kwa wadau kujadili namna rasilimali za maji zinavyoweza kutumika kuongeza ukuaji wa uchumi na kuchochea maendeleo endelevu.

Akizungumza na waandishi wa habari jijini Dar es Salaam leo, Septemba 3, 2026, Gurumo amesema washiriki watawasilisha tafiti na mawasilisho ya kitaalamu yatakayosaidia kubaini changamoto zinazoikabili sekta hiyo na kutafuta suluhisho.

“Lengo ni kuwakutanisha wabobezi wa masuala ya Uchumi wa Buluu pamoja na wadau mbalimbali, wakiwemo wale wenye uelewa mkubwa wa sekta hii na wale wanaotaka kujifunza zaidi,” amesema.

Amesema majadiliano yatahusisha fursa zinazopatikana kupitia bahari, mito, maziwa na rasilimali nyingine za maji, pamoja na namna ya kuzitumia kukuza ubunifu, ajira na shughuli za kiuchumi kwa kuzingatia matumizi endelevu.

Kwa mujibu wa Gurumo, kongamano hilo linaendana na Dira ya Taifa ya Maendeleo 2050 pamoja na Ajenda 2063 ya Umoja wa Afrika, ambazo zinasisitiza matumizi endelevu ya rasilimali katika kuchochea maendeleo ya kiuchumi na kijamii.

Amesema washiriki kutoka nchi mbalimbali tayari wamethibitisha kushiriki, wakiwemo kutoka Kenya, Ghana, Afrika Kusini, Comoro, Seychelles na Uganda.

Kwa upande wa nje ya Afrika, amesema washiriki wanatarajiwa kutoka Japan, Sweden, Urusi na nchi nyingine, huku mabalozi wanaowakilisha nchi zao nchini Tanzania, taasisi za kitaifa na kimataifa, viongozi wa Serikali na sekta binafsi, wanasayansi na watafiti wakitarajiwa kuhudhuria.

Mbali na wataalamu na wadau wa sekta hiyo, waandaaji wamewaalika vijana kutoka vyuo vikuu, shule za sekondari na shule za msingi kushiriki katika kongamano hilo.

Gurumo amesema ushiriki wa vijana ni muhimu katika kuwajengea uelewa kuhusu Uchumi wa Buluu na fursa zilizopo, ili waweze kuwa sehemu ya kizazi kitakachobeba na kuendeleza ajenda hiyo.

Amesema vijana wanapaswa kutambua nafasi yao katika kutumia fursa zinazotokana na rasilimali za maji, hususan katika maeneo ya ubunifu, utafiti, ajira na shughuli za ujasiriamali.

Amewataka Watanzania kutumia fursa hiyo kushiriki na kuongeza uelewa kuhusu Uchumi wa Buluu, pamoja na namna bahari, mito, maziwa na vyanzo vingine vya maji vinavyoweza kutumika kuchochea maendeleo endelevu nchini na barani Afrika.

*_▪︎ Ataka wigo wa miradi kwa Watanzania kupanuliwa_*

WAZIRI MKUU, Dkt. Mwigulu Nchemba, ametoa wito wa kuhakikisha Watanzania wanashiriki kikamilifu katika uchumi wa nchi yao, akisisitiza kuwa uwezeshaji wa wananchi ni msingi wa kuongeza ajira, kukuza sekta binafsi, kuongeza mapato na kupunguza umaskini.

Dkt. Mwigulu ameyasema hayo leo (Alhamisi, Septemba 03, 2026) wakati akifungua Kongamano la Tano la Taifa la Ushiriki wa Watanzania katika Masuala ya Uchumi, lililofanyika Dodoma, lenye kaulimbiu inayosisitiza ushiriki wa Watanzania kama nguzo ya uchumi shindani na jumuishi kuelekea Dira ya Taifa ya Maendeleo 2050.

Amesema Serikali chini ya uongozi wa Rais Dkt. Samia Suluhu Hassan imeendelea kuweka mazingira ya kisera, kisheria na kiutendaji yatakayowawezesha Watanzania kushiriki moja kwa moja katika shughuli za kiuchumi, akisisitiza kuwa lengo si kuwazuia wawekezaji wa nje bali kuongeza uwezo na ushiriki wa Watanzania.

“Tuwawezeshe Watanzania kushika uchumi wao. Hii ndiyo njia ya kuongeza ajira, kuongeza vyanzo vya mapato na kujenga sekta binafsi yenye nguvu,” amesema.

Dkt. Mwigulu amesema Tanzania ina rasilimali nyingi na fursa kubwa za kiuchumi, hivyo ni muhimu kuhakikisha fursa hizo zinatafsiriwa kuwa ajira, biashara, uwekezaji na umiliki kwa Watanzania.

Dkt. Mwigulu ameiagiza Wizara ya Fedha kuhakikisha marekebisho yanayofuata ya sheria za ununuzi yanaongeza wigo wa miradi inayoweza kutekelezwa na kampuni za Kitanzania.

Amesema kiwango cha Shilingi bilioni 50 kwa baadhi ya miradi kimekuwa kidogo kutokana na kukua kwa uchumi na uwezo wa kampuni za ndani, hivyo akapendekeza kiwango hicho kipandishwe hadi zaidi ya Shilingi bilioni 100 au Shilingi bilioni 150.

“Hii ya bilioni 50 imeshakuwa ya kawaida. Wekeni bilioni 100… au kama mnarekebisha sasa ikachukua muda, wekeni bilioni 150. Mambo yanaenda mbele. Tuwawezeshe Watanzania kushika uchumi wao,” amesema.

Amesisitiza pia kuwa fursa zinazotolewa na Serikali zinapaswa kutumiwa kwa uwajibikaji, akizitaka kampuni za Kitanzania kuhakikisha fedha za miradi zinatumika kutekeleza kazi kwa kiwango na ubora unaostahili, na kuonya kuwa Serikali haitasita kuchukua hatua dhidi ya watakaotumia vibaya fedha za umma.

Katika hatua nyingine, Dkt. Mwigulu amezindua rasmi Mfumo wa Kitaifa wa Taarifa za Uwezeshaji Kiuchumi (NEMIS) unaolenga kurahisisha upatikanaji wa taarifa kuhusu fursa mbalimbali za uwezeshaji kwa Watanzania.

Mfumo huo utasaidia kuwafikishia wananchi taarifa kuhusu fursa za mitaji kupitia mifuko na programu za uwezeshaji, zabuni za umma, fursa za uwekezaji pamoja na taarifa nyingine muhimu za kiuchumi.

Dkt. Mwigulu amehitimisha kwa kusisitiza umuhimu wa kuondoka kwenye mipango na sheria na kuelekea kwenye utekelezaji unaoleta matokeo kwa wananchi.

“Tanzania inasifika sana kwa mipango mizuri, inasifika sana kwa sheria hizi hizi tunazoziandika. Sasa tupige hatua twende kwenye kuhakikisha haya tunayotekeleza, haya tunayopanga, haya tunayoyaandika yanaonekana kwenye vitendo.”

Akizungumza katika kongamano hilo, Waziri wa Nchi, Ofisi ya Waziri Mkuu, Sera, Bunge, Uratibu na Wenye Ulemavu, Prof. Palamagamba Kabudi, amesema Serikali imeendelea kuweka mifumo, sera na sheria zinazolenga kuongeza ushiriki wa Watanzania katika uchumi, akisisitiza umuhimu wa uratibu ili fursa hizo ziwafikie wananchi na kuongeza ushiriki wao katika shughuli za kiuchumi.

Kwa upande wake, Waziri wa Madini, Anthony Mavunde, amesema manunuzi ya bidhaa na huduma katika sekta ya madini yanafikia Shilingi trilioni 5.1 kwa mwaka, ambapo Serikali imehakikisha asilimia 90 ya manunuzi hayo yanabaki nchini Tanzania, hatua inayoongeza ushiriki wa Watanzania katika mnyororo wa thamani wa sekta hiyo.

Kwa niaba ya Bunge, Makamu Mwenyekiti wa Kamati ya Kudumu ya Bunge ya Utawala, Katiba na Sheria, Edwin Swale, amesema Bunge limeendelea kuunga mkono hatua za Serikali za kuwawezesha wananchi kiuchumi kupitia maboresho ya sheria, akibainisha kuwa Serikali imeweka mifuko zaidi ya 74 ya uwezeshaji na imeendelea kuchukua hatua za kupunguza vikwazo kwa wafanyabiashara na wajasiriamali.

Nae, Mwenyekiti wa Baraza la Taifa la Uwezeshaji Kiuchumi, Prof. Aurelia Kamuzora, amesema uwezeshaji wa wananchi unapaswa kwenda sambamba na kujenga uwezo wa watu, upatikanaji wa mitaji, taarifa na ujuzi ili Watanzania waweze kushindana ndani na nje ya nchi.

Amesema Baraza limeweka mkazo katika kuwafikishia wananchi taarifa za fursa za kiuchumi na kuimarisha vituo vya uwezeshaji katika mikoa na wilaya.

Akizungumza katika hafla hiyo, Makamu wa Rais ametoa wito kwa Wizara ya Viwanda na Biashara kwa kushirikiana na wazalishaji wa saruji nchini, kuhakikisha wanatafuta suluhu ya haraka ili kurejesha bei ya kawaida ya saruji kwa wananchi. Amesema maono ya Rais Dkt. Samia Suluhu Hassan ni kuona wananchi wanaweza kununua mfuko wa saruji kwa gharama nafuu hivyo ni lazima kuoanisha uzalishaji wa malighafi zote zinazochangia katika uzalishaji wa saruji ili bidhaa hiyo ipatikane kwa urahisi.

Halikadhalika, Makamu wa Rais amesema ni muhimu kufanya tathimini ya ukuaji wa viwanda hapa nchini ili kutambua ukuaji huo kama unaviwezesha viwanda kuwa na ushindani wa masoko katika kanda, Afrika na Dunia kwa ujumla.

Makamu wa Rais amesema Serikali itaendelea kuchukua hatua kali za kisheria kwa wafanyabishaara wote wanaojihusisha na biashara haramu za uingizaji bidhaa bandia ambazo hukwepa kodi na tozo mbalimbali stahiki ambapo, zinaathiri ukuaji wa viwanda, kusababisha upotevu wa mapato ya serikali pamoja na kupunguza ushindani wa bidhaa zinazozalishwa ndani ya nchi.

Amewataka wazalishaji wa viwandani hapa nchini, kufanya jitihada za kuongeza uchakataji wa malighafi ndani ya nchi kwa kuhakikisha wanaongeza thamani, hatua itakayosaidia katika kuongeza ajira kwa watanzania na ukuaji wa uchumi kwa kasi.

Aidha, Makamu wa Rais ameitaka Wizara ya Viwanda na Biashara kuhakiki takwimu sahihi za idadi ya viwanda vilivyopo ili kuweka mikakati ya namna ya kuongeza wanachama wa Shirikisho la Viwanda Tanzania, hali itakayorahisisha uwepo wa chombo kimoja kinachowawakilisha wazalishaji wa viwandani.

Makamu wa Rais amesema katika kukuza uchumi na kuboresha maisha ya watanzania, sekta ya viwanda ina nafasi kubwa kwa kuwa ndiyo chimbuko la maendeleo ya haraka na ni muhimili mkuu katika uongezaji thamani wa malighafi zilizopo, utoaji ajira kwa wananchi, kuongeza mapato ya Serikali pamoja na fedha za kigeni.  Pia, amesema sekta ya viwanda ni muhimu katika kuboresha sayansi na teknolojia na  kuongeza uzalishaji, na hivyo kukuza ubunifu, uvumbuzi, uchumi, na kuondoa umasikini nchini.

Amesema kutokana na wingi wa rasilimali zilizopo nchini ikiwemo misitu na madini mbalimbali, ni muhimu kukuza  sekta ya viwanda na kuendelea kujenga mahusiano kati ya sekta ya viwanda na nyingine ili kuongeza ufanisi, kuharakisha maendeleo jumuishi na hatimaye kuongeza kipato cha Watanzania walio wengi.

Makamu wa Rais amesema Serikali ya Awamu ya Sita inayoongozwa na Rais Dkt. Samia Suluhu Hassan itaendelea kufanya kazi kwa karibu na sekta binafsi ili kuharakisha maendeleo ya Taifa.

Kwa upande wake Waziri wa Viwanda na Biashara Mhe. Judith Kapinga, amesema Wizara hiyo imeendelea kutekeleza mikakati mbalimbali ili kuhakikisha lengo lake la kuendeleza sekta ya viwanda linafanikiwa. Amesema Sekta hiyo imeendelea kujiimarisha ili kuongeza nafasi katika mchango wa pato la Taifa na kuongeza ufanisi kwa lengo la ukuaji wa sekta hiyo muhimu.

Amesema tayari Wizara imekamilisha na itazindua Sera ya Maendeleo endelevu ya Viwanda ya Mwaka 2025 na Sera ya Maendeleo ya jasiriamali ndogo na za kati ya mwaka 2003 Toleo la mwaka 2025 ikiwa na lengo la kwenda sambamba na Dira 2050 ambayo inategemea uendelevu wa Viwanda.

Mwenyekiti wa Shirikisho la Viwanda Tanzania (CTI) Hussein Suphian Ally ameipongeza Serikali kwa mafanikio mbalimbali yanayoendelea kuimarisha mchango wa sekta ya viwanda nchini ikiwemo uwekezaji mkubwa unaofanywa katika miradi ya kimkakati ambayo imeendelea kuongeza ushindani katika sekta ya viwanda.

Amesema CTI inapongeza juhudi za Serikali za kuendelea na ujenzi wa miradi ya Reli ya Kisasa (SGR), ujenzi na upanuzi wa Bandari, ujenzi wa mitandao ya barabara pamoja na uwekezaji katika nishati na miundombinu mingine ya kiuchumi ambayo kwa pamoja imeendelea kupunguza gharama za usafirishaji, kurahisisha biashara na kuongeza uwezo wa bidhaa zinazozalishwa nchini kufikia masoko ya ndani, kikanda na kimataifa.

Katika hafla hiyo Rais wa Jamhuri ya Muungano wa Tanzania Mhe. Dkt. Samia Suluhu Hassan amezawadia tuzo ya heshima kwa kutambua mchango wake katika uboreshaji wa mazingira ya uwekezaji na viwanda nchini.

Hafla hiyo imewakutanisha wazalishaji wakubwa, wakati na wadogo, wafanyabiashara pamoja na wadau wengine wa sekta ya viwanda na biashara, huku tuzo hizo zikiendelea kuwa jukwaa la kuhamasisha ubora, ubunifu, uwekezaji, matumizi ya teknolojia na uzalishaji endelevu nchini.

Imetolewa na

Ofisi ya Makamu wa Rais

03 Septemba 2026

Dar es Salaam.