Month: September 2026

Posted on

MBUNGE KIGOMA KASKAZINI AOMBWA KUBORESHA VIWANJA VYA MICHEZO

Na Fadhili Abdallah,Kigoma

WAPENZI wa soka katika jimbo la Kigoma Kaskazini mkoani Kigoma wamemuomba mbunge wa jimbo hilo Kiza Mayeye  kuboresha viwanja vya soka katika jimbo hilo ikiwemo kuzungumzia uzio ili kuwezesha michezo kufanya kwa usalama na kulata tija katika kuibua vipaji.

Wito huo wa wapenzi wa soka wa jimbo hilo umetolewa katika uzinduzi wa ligi ya mpira wa miguu inayoandaliwa na Mbunge wa jimbo la Kigoma Kaskazini, Kiza Mayeye inayojumuisha jumla ya timu 32 ikijulikana kama Mayeye Cup.

Mmoja wa wapenzi hao wa soka Hussein Suleiman wa Mwandiga alisema kuwa jimbo hilo lina wapenzi wengi wa soka lakini viwanja vingi haviko kweny hali nzuri akitolea mfano Uwanja wa Tarafa kwenye mji mdogo wa Mwandiga maarufu kwa mashindano mbalimbali lakini uwanja huo hauna uzio na magari,pikipiki, baiskeli zimekuwa zikipita sambamba na kuwa na mifereji mikubwa wakati wa mvua.

Hoja hiyo imeunga mkono na Shaban Mambo Mshauri wa mbunge wa jimbo hilo Kigoma Kaskazini ambaye alisema kuwa amepokea maombi mengi ya vijana ya kutaka kuboreshwa kwa viwanja vyao ukiwemo uwanja maarufu wa Tarafa Mwandiga ambao umekuwa ukitumika kwa michezo mbalimbali.

Mambo alisema kuwa binafsi ameshafikisha suala hilo kwa mbunge na kwa kuanza kwa ligi hiyo ni wazi atatekeeleza ombi hilo ili kuwezesha michezo kufanyika mahali pazuri, salama na kuleta tija kwenye suala la michezo kuwa ajira.

 Akizungumza katika uzinduzi huo kwa niaba ya Mbunge wa jimbo hilo Katibu wa Mbunge,Ilaki Issa  alisema kuwa kufanyika kwa mashindano hayo kunatokana na maombi ya vijana wengi kuomba kufanyika kwa mashindano ambayo yatashirikisha timu mbalimbali za jimbo hilo na kwamba ametimiza ahadi hiyo.

 Issa alisema kuwa Mshindi wa kwanza atapata Zawadi ya pesa taslim shilingi milioni mbili na jezi seti moja, Mshindi wa pili atanyakua pesa taslim shilingi milioni moja na seti moja ya jezi ambapo mshindi wa tatu ataondoka na jezi Seti mbili huku kukiwa pia na zawadi kwa Mchezaji bora, mfungaji bora na golikipa bora.

Posted on

PBPA YAWAWEZESHA MAMA LISHE KURASINI KUHAMIA NISHATI SAFI YA KUPIKIA

 

Dar es Salaam, Septemba 3, 2026

Mkurugenzi wa Uendeshaji wa Wakala wa Uagizaji Mafuta kwa Pamoja (PBPA), Mhandisi Bruno Tarimo, amewahimiza mama na baba lishe kuachana na matumizi ya kuni na mkaa wa kawaida na kuhamia katika nishati safi ya kupikia ili kulinda afya zao, kuhifadhi mazingira na kuongeza ufanisi wa biashara zao.

Mhandisi Tarimo ametoa wito huo leo, Septemba 3, 2026, wakati wa mafunzo ya matumizi ya nishati safi ya kupikia yaliyotolewa na PBPA kwa mama na baba lishe wa Kikundi cha Jitihada, yaliyofanyika Kurasini jijini Dar es Salaam. Katika tukio hilo, PBPA imewakabidhi mama na baba lishe 70 jumla ya tani 1.7 za mkaa mbadala.

Akimwakilisha Mkurugenzi Mtendaji wa PBPA, Mhandisi Tarimo amesema mafunzo hayo ni sehemu ya ushiriki wa Wakala katika utekelezaji wa Mkakati wa Taifa wa Matumizi ya Nishati Safi ya Kupikia wa miaka 10, uliozinduliwa mwaka 2024 na Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Mkakati huo unalenga kuhakikisha kuwa, ifikapo mwaka 2034, asilimia 80 ya Watanzania watakuwa wamehama kutoka katika matumizi ya nishati zisizo safi na salama na kuanza kutumia nishati safi ya kupikia.

“Tumekuja kushirikiana na mama na baba lishe pamoja na watoa huduma wa teknolojia za nishati safi ili kuwapatia elimu kuhusu matumizi yake na kuwasaidia kuachana na nishati zisizo safi na salama,” amesema Mhandisi Tarimo.

Ameeleza kuwa PBPA imeanza na mama na baba lishe wa Kurasini kwa sababu eneo hilo lina makampuni mengi ya mafuta ambayo ni miongoni mwa wadau wakuu wa Wakala. Wafanyakazi wa makampuni hayo hupata huduma za chakula kutoka kwa mama na baba lishe wanaofanya biashara katika maeneo ya Kurasini na Kigamboni.

“Wafanyakazi wanapokuja kula wataona chakula kimepikwa katika mazingira safi, hakina moshi na kina ladha nzuri. Wanaweza pia kuifikisha elimu hii kwa ndugu, jamaa na marafiki. Kwa namna hiyo, tunaendelea kuchangia utekelezaji wa lengo la kuwafikia asilimia 80 ya Watanzania,” amesema.

Mhandisi Tarimo amesema, katika mafunzo hayo, washiriki walipata fursa ya kuona na kujifunza matumizi ya majiko ya kisasa ya umeme, majiko banifu na mkaa mbadala. Pia walishuhudia kwa vitendo namna teknolojia hizo zinavyoweza kutumika kupika chakula kwa haraka, bila kutoa moshi mwingi wala kuchafua vyombo vya kupikia.

Amesema matumizi ya kuni na mkaa wa kawaida yana madhara kwa afya za watumiaji, hususan mama na baba lishe ambao hukaa karibu na moshi kwa muda mrefu. Aidha, matumizi ya nishati hizo yanachangia uharibifu wa mazingira unaotokana na ukataji wa miti.

PBPA pia inaendelea kuzihamasisha taasisi zinazohudumia au kuandaa chakula kwa zaidi ya watu 100 kwa siku kuhamia katika matumizi ya nishati safi na salama ya kupikia.

Kwa upande wake, Mwenyekiti wa Kikundi cha Jitihada, Bw. Lugano Mwaiswelo, amesema mafunzo hayo yamewapatia washiriki maarifa yatakayowasaidia kulinda afya zao na kuboresha mazingira wanamofanyia biashara.

“Tunaishukuru Serikali ya Rais Samia kwa kuwakumbuka mama na baba lishe kupitia jitihada za kuhamia katika nishati safi ya kupikia inasaidia kuboresha mazingira na kulinda afya zetu. Tumepokea elimu hii kwa furaha, tutazingatia tuliyofundishwa na tutakuwa mfano kwa vikundi vingine kwa kutumia majiko banifu, mkaa mbadala na majiko ya umeme,” amesema Bw. Mwaiswelo.

Mmoja wa mama lishe walioshiriki mafunzo hayo, Bi. Joyce Benjamin Mtweve, amesema maonesho ya upishi yaliyofanyika yamewathibitishia kuwa matumizi ya nishati safi yanaweza kurahisisha kazi zao na kuboresha mazingira ya biashara.

“Tumefurahi sana kwa ujio wenu na kwa kutuonesha majiko ya nishati safi. Tumeshuhudia yakipika vizuri, bila moshi na bila kuchafua sufuria. Tuko tayari kuunga mkono juhudi hizi,” amesema Bi. Mtweve.

Naye Rais wa Mama Lishe Tanzania, Bi. Latifa Habibu Masasi, amesema upatikanaji wa gesi, majiko ya umeme, majiko banifu na mkaa mbadala umewapa mama lishe fursa ya kuchagua teknolojia inayolingana na mahitaji pamoja na uwezo wao.

“Nishati safi ni muhimu sana. Teknolojia hizi zinaongeza thamani katika mnyororo wa biashara ya chakula kwa sababu zinawawezesha mama lishe kupika kwa haraka, kwa wakati na katika mazingira salama zaidi,” amesema Bi. Masasi.

Mafunzo hayo yanaashiria kuanza kwa kampeni ya PBPA ya kuhamasisha matumizi ya nishati safi ya kupikia miongoni mwa mama na baba lishe nchini. Kampeni hiyo inatarajiwa kuendelea katika maeneo mengine yenye mama na baba lishe wanaotoa huduma za chakula kwa wadau wa PBPA.

Posted on

UJENZI SPORTS CLUB YATOA MSAADA KWA WANAFUNZI WENYE MAHITAJI MAALUM DODOMA

Timu ya Ujenzi Sports Club imeendelea kuunga mkono juhudi za kuwawezesha wanafunzi wenye mahitaji maalum kwa kutoa msaada wa vifaa mbalimbali kwa wanafunzi wa Shule ya Msingi Mlezi jijini Dodoma.

Msaada huo umetolewa Jumatano, Septemba 2, 2026, ikiwa ni sehemu ya juhudi za Ujenzi Sports Club kuunga mkono kazi inayofanywa na shule hiyo katika kuwawezesha wanafunzi wenye mahitaji maalum pamoja na wanafunzi wengine kupata mazingira bora ya kujifunzia.

Vifaa vilivyotolewa ni pamoja na madaftari, vyombo vya kulia chakula, vifaa vya usafi, sabuni, ndoo pamoja na fedha kwa ajili ya ununuzi wa mipira ya michezo.

Akikabidhi msaada huo, Mwenyekiti wa Ujenzi Sports Club, Arch. Ibrahim Chatila, amesema klabu hiyo inatambua na kuthamini kazi kubwa inayofanywa na walimu katika kuwawezesha wanafunzi wenye mahitaji maalum kutimiza ndoto zao kielimu na katika maisha kwa ujumla.

Amesema msaada huo ni sehemu ya jitihada za Ujenzi Sports Club kuunga mkono juhudi zinazofanywa na shule hiyo, huku akiahidi kuwa klabu itaendelea kushirikiana na kuwahamasisha wadau wengine, hususan katika sekta ya ujenzi, kujitokeza na kusaidia juhudi hizo.

“Tunatambua kazi kubwa inayofanywa na walimu katika kuwalea na kuwawezesha watoto hawa. Msaada huu ni sehemu ya mchango wetu katika kuunga mkono juhudi hizo, na tutaendelea kuwahamasisha wadau wengine kujitokeza na kusaidia,” amesema Arch. Chatila.

Akizungumza baada ya kupokea msaada huo, Mwalimu Mkuu wa Shule ya Msingi Mlezi, Bi. Magreth Kisanga, ameishukuru Ujenzi Sports Club kwa ukarimu na moyo wa kujitolea uliouonyesha kwa kuwasaidia wanafunzi hao.

Amesema msaada huo utasaidia kupunguza changamoto ya upungufu wa baadhi ya vitendea kazi vinavyohitajika katika kuwawezesha wanafunzi kupata mazingira bora ya kujifunzia na kuishi shuleni.

Kwa upande wake, mwalimu anayesimamia kitengo cha wanafunzi wenye mahitaji maalum, Mwl. Hashim Msemo, amesema wanafunzi hao wamekuwa wakifanya vizuri katika masomo yao na wameendelea kufanya vyema katika mitihani yao.

Ametoa wito kwa wadau mbalimbali kujitokeza na kuunga mkono juhudi za shule hiyo ili kuongeza fursa na mazingira bora kwa wanafunzi wenye mahitaji maalum.

Shule ya Msingi Mlezi ni shule jumuishi inayotoa elimu kwa wanafunzi wenye mahitaji maalum pamoja na wanafunzi wengine, kwa lengo la kuhakikisha kila mtoto anapata fursa sawa ya elimu na maendeleo

Posted on

Friji Bovu: Libasse Gueye Mmoja ni Sawa na Mawinga Wote wa Ligi Kuu – Video

Global Publishers
September 3, 2026
0 views
0 Comments

Mchambuzi wa soka, David Pascol, maarufu kama ‘Friji Bovu’.

Mchambuzi wa soka, David Pascol, maarufu kama ‘Friji Bovu’, amesema atashangaa endapo kiungo mshambuliaji wa Simba SC, Libasse Gueye, hatashinda tuzo ya Mchezaji Bora wa Mwezi kutokana na kiwango alichoonyesha katika michezo ya Ligi Kuu Tanzania Bara mwezi huu.

Akizungumza kupitia Global TV, Pascol amesema Libasse ni mchezaji bora na ameonyesha uwezo mkubwa ndani ya uwanja, huku akitoa kauli kali kwamba:
“Libasse Gueye mmoja ni sawa na mawinga wote wa Ligi Kuu Tanzania Bara.”

Kauli hiyo ameitoa alipofanyiwa mahojiano na mtangazaji wa Global TV, @officialcosmo_, huku akisisitiza ubora wa mshambuliaji huyo wa Simba katika kipindi hiki.

Posted on

Golugwa Kuendelea Kutoa Ushahidi wa Kumtetea Lissu leo – Video

Naibu Katibu Mkuu wa Chama cha Demokrasia na Maendeleo (CHADEMA), Amani Golugwa, leo Septemba 3, 2026, anaendelea kutoa ushahidi wa utetezi katika kesi ya uhaini inayomkabili Mwenyekiti wa chama hicho, Tundu Lissu.

Golugwa alianza kutoa ushahidi wake jana, Septemba 2, 2026, akiwa shahidi wa tatu wa upande wa utetezi, baada ya shahidi wa pili, ambaye ni Katibu Mkuu wa CHADEMA, John Mnyika, kukamilisha ushahidi wake.

Katika ushahidi wake jana, Golugwa aliongozwa na Lissu na kueleza mambo mbalimbali, ikiwemo chimbuko la kampeni ya “No Reforms, No Election” ya CHADEMA, matukio yaliyohusiana na Uchaguzi wa Serikali za Mitaa wa mwaka 2024 pamoja na ripoti mbalimbali za kimataifa zilizotoa madai kuhusu Uchaguzi Mkuu wa Tanzania wa mwaka 2025.

Aidha, Golugwa alieleza namna uongozi ndani ya CHADEMA unavyopatikana pamoja na majukumu yanayohusishwa na nafasi yake ya Naibu Katibu Mkuu wa chama hicho.

Katika mwendelezo wa ushahidi wake leo, Golugwa ataendelea kuongozwa na Lissu katika kutoa utetezi wake.

Kesi hiyo yenye namba 19605/2025 inasikilizwa na jopo la majaji watatu wakiongozwa na Jaji Dunstan Ndunguru.

Lissu anakabiliwa na shtaka la uhaini chini ya Kifungu cha 39(2)(d) cha Sheria ya Kanuni ya Adhabu (Penal Code), Sura ya 16 ya Sheria za Tanzania, kama ilivyorekebishwa mwaka 2023.

Lissu: Unasema kwamba mkutano uliandaliwa na Sekretariet, waeleze waheshimiwa majaji hii Sekretariet ni akina nani?

Golugwa: Hii Sekretariet ninayoizungumzia ni Katibu Mkuu wa Chama, Manaibu Katibu wawili kwa maana ya Bara na Zanzibar, Makatibu wa Mabaraza matatu ya chama, BAWACHA, BAVICHA na BAZECHA.Pia Wakurugenzi wa Chama pamoja na wataalam wawili ambao wameteuliwa na Mwenyekiti kuwa sehemu ya Sekretariet ya chama.

Lissu: Jumla watu wangapi hapo kwa hesbau yako

Golugwa:14 Lissu: Kwa muundo wa Chama Sekretariet ya Chadema ni chombo cha aina gani?

Golugwa: Sekretariet ya Chadema ndicho chombo cha kiutendaji kinachofanya kazi kila siku za kichama kwa niaba ya Kamati Kuu ya Chama

Lissu:Sasa Shahidi umesema Katibu Miuu alikuja na wazo kwamba muandae mkutano muwaandae watia nia hao watia nia ni akina nani?

Golugwa: Hao watia nia ni wanachama wa Chadema ambao aidha walipitishwa kuwa wagombea kwenye uchaguzi wa 2020 katika nafasi za udiwani, ubunge na Urais na kwamba bado nia yao ya kutaka kugombea nafasi hizo bado walikuwa nayo. Na wengine katika kundi hilo la watia nia ni wale ambao hawajawahi kugombea wala kupitishwa kwenye nafasi hizo nilizozitaja kwa maana mwaka 2025 na wao wakataka kutia nia wapitishwe kugombea nafasi hizo. Hao ndio watia nia.

Lissu: Waeleze waheshimiwa majaji hao watia nia walikua wanatia nia ya kugombea nafasi gani

Golugwa:Waheshimiwa majaji hao watia nia walikuwa wanatia nia ya kugombea kwenye uchaguzi wa mwaka 2025.

Lissu:Waeleze waheshimiwa majaji lengo la kuwaita hao watia nia kwenye huo mkutano wa tarehe 3 Aprili lilikuwa lengo gani?

Golugwa: Lengo lilikuwa ni kuwaeleza na kuwafafanulia juu ya msimamo wa Chama uliopitishwa na mkutano kwa maana ya wazo la No Reforms No Elections, na msimamo huo ukawa umefafanuliwa na Kamati Kuu ya chama kwa kuazimiwa hilo ndilo lilikuwa lengo.

Lissu: Waeleze waheshimiwa majaji unaposema No Reform No Elections, huu msimamo ulikuwa unahusu nini hasa?

Golugwa: Msimamo huu ulianza au ulizaliwa baada ya uchaguzi wa Serikali za Mitaa wa Mwaka 2024.

Nikiwa Katibu wa Kanda ya Kaskazini, Katibu Mkuu alituambia Makatibu wa Kanda atuandikie ripoti ya uchaguzi wa Serikali za mitaa jinsi ulivyofanyika, na mimi kama mtendaji ambaye nilikuwa sehemu ya uchaguzi huo kwa kusimamia kanda ya Kaskazini nilitoa ripoti kwa kuonesha madudu mengi ya hivyo yaliyojitokeza.

Na Katibu Mkuu alitutaka tuandike maoni yetu ya kuhusiana na nini chama kifanye kutokana na hayo yaliyojitokeza, kwa hivyo mimi kwenye ripoti niliandika na waheshimiwa majaji naomba nitumie maneno exactly maneno niliyoandika yalikuwa maneno makali “Kwa ushenzi huu niliouona chama kisishiriki uchaguzi mwingine wowote mpaka kushinikiza mabadiliko kwenye mifumo ya uchaguzi”.

Na Makatibu wenzangu kutoka katika kanda 9 kila mmoja kwa lugha yake wote tulitoa taarifa au ripoti yenye pendekezo zinazofanana na ndipo Kamati Kuu ikaketi ikayachakata mapendekezo ya Makatibu wa Kanda na wajumbe wenyewe wa Kamati Kuu ikatafakari kwa jinsi wanavyojua, basi nadhani tarehe 10 Desemba 2024, Mwenyekiti wa Chama wakati huo Mh. Freeman Mbowe akatoa tamko rasmi la chama, msimamo wa Kamati Kuu yaliyoazimiwa kwamba hatutakuwa tayari kwenda kwenye uchaguzi mwingine wowote bila mabadiliko kwenye mifumo ya uchaguzi.

Lissu: Shahidi hebu waeleze waheshimiwa majaji kwa kifupi ni ushenzi gani uliouona.

Golugwa: Waheshimiwa majaji ushenzi ni mwingi.

Lissu: Waeleze majaji kwa ufahamu wako taarifa ya watazamaji wa uchaguzi wa SADC walisemaje juu ya huo uchaguzi.

Shahidi: Walisema uchaguzi wa Tanzania umeshindwa kukidhi Vigezo vya chaguzi kwa viwango vya chaguzi za kidemokrasia. Pia kulikuwa na Vitisho kwa viongpzi wa vyama vya upinzani na hivyo mazingira ya kiushindani hayakuwa sawa. Pia hakukuwa na uwazi katika mchakato mzima wa uchaguguzi. Kulikiwa na udanganyifu katika mchakato wa uchaguzi vurugu Siku ya uchaguzi hivyo uchaguzi wa Tanzania umekosa uhalali wa kuitwa uchaguzi.

Lissu: Waeleze Majaji watazamani wa Uchagauzi huo wa Jumuiya ya Ulaya EU walisemaje juu ya uchaguzi huo

Shahidi: Watazamaji wa Jumuiya ya Ulaya kwanza walisema wamesikitishwa na matukio ya vurugu yaliyotokea siku ya uchaguzi na kupelekea kuvuruga uchaguzi na wamesikitishwa na uharibifu wa mali na wamesikitishwa na mtandao kuzimwa mawasiliano na wamesikitishwa na taarifa za mauaji.

Posted on

Madeleka Atoa Msaada wa Milioni 1 Kwa Watoto wa Mjane – Video

Global Publishers
September 3, 2026
30 views
0 Comments

Wakili Peter Madeleka.

Wakili Peter Madeleka ameguswa na changamoto ya mama mjane, Asha Mbaraka anayeuguza watoto wake wawili wanaosumbuliwa na ugonjwa wa figo, taarifa zilizoibuliwa na Global TV.

Global TV iliripoti habari za mjane huyo mara kadhaa ambapo Watanzania walikuwa wakimsaidia kwa kidogo walichojaliwa ambapo leo, Madeleka ameonesha kuguswa na kumkabidhi mjane huyo kiasi cha shilingi milioni moja, fedha taslimu.

Posted on

Spika Zungu Awakalia Kooni Watendaji wa TAMISEMI Uchafu katika Jiji la Dar – Video

Global Publishers
September 3, 2026
48 views
0 Comments

Spika wa Bunge la Tanzania, Mussa Zungu, amewataka watendaji wa Serikali, hususan wa Ofisi ya Waziri Mkuu – Tawala za Mikoa na Serikali za Mitaa (TAMISEMI), kubadili haraka mtazamo wao na kuacha kuchelewesha utekelezaji wa miradi ya ubia kati ya sekta ya umma na binafsi (PPP).

Akizungumza bungeni jijini Dodoma leo, Alhamisi, Septemba 3, 2026, Zungu amesema hivi karibuni Rais alitoa maelekezo na kukemea hali ya uchafu katika Jiji la Dar es Salaam, lakini changamoto kubwa imekuwa kwa watendaji wa TAMISEMI ambao, kwa mujibu wake, wamekuwa kikwazo katika kutafuta suluhisho la tatizo hilo.

Amesema halmashauri za Dar es Salaam na miji mingine mikubwa nchini zinapobuni miradi ya PPP kwa ajili ya kuboresha usafi wa miji na kuiwasilisha TAMISEMI kwa ajili ya kushughulikiwa, majibu kutoka ofisi hiyo yamekuwa yakichelewa au kutotolewa kabisa.

Zungu amesema hali hiyo imekuwa ikiwakatisha tamaa wawekezaji wanaohitaji kushirikiana na Serikali katika kutekeleza miradi ya usafi, na matokeo yake miji hiyo imeendelea kukabiliwa na changamoto ya uchafu.

Ametoa wito kwa watendaji hao kubadili fikra na kuhakikisha miradi ya PPP inayowasilishwa inashughulikiwa kwa wakati ili kutoa fursa kwa sekta binafsi kushiriki katika kutatua changamoto zinazozikabili halmashauri.

Posted on

Jay-Z Kufanya Onyesho London Kusherehekea Miaka 30 ya Muziki

Global Publishers
September 3, 2026
30 views
0 Comments

LONDON, UINGEREZA — Rapper na mfanyabiashara maarufu wa Marekani, Jay-Z, anatarajiwa kufanya maonyesho mawili makubwa katika Uwanja wa Tottenham Hotspur jijini London, Septemba 4 na 5, 2026, ikiwa ni sehemu ya maadhimisho ya miaka 30 tangu kuanza rasmi kwa safari yake katika tasnia ya muziki.

Maonyesho hayo, yanayofahamika kama JAŸ-Z 30, yataadhimisha miaka 30 tangu kutolewa kwa albamu yake ya kwanza, Reasonable Doubt, iliyochangia kumweka Jay-Z miongoni mwa wasanii wakubwa na wenye ushawishi katika historia ya muziki wa Hip Hop.

Mbali na kuadhimisha miaka 30 ya Reasonable Doubt, matamasha hayo pia yatahusisha kumbukumbu ya miaka 25 tangu kutolewa kwa albamu yake nyingine yenye mafanikio makubwa, The Blueprint.

Jay-Z, ambaye jina lake halisi ni Shawn Carter, amekuwa mmoja wa wasanii wenye ushawishi mkubwa katika muziki wa Hip Hop kwa zaidi ya miongo mitatu, huku akipanua mafanikio yake kupitia muziki, biashara na uwekezaji.

Mashabiki wa msanii huyo nchini Uingereza na sehemu nyingine duniani wanatarajiwa kujitokeza kwa wingi kushuhudia maonyesho hayo, ambayo yameongeza msisimko kutokana na Jay-Z kutokuwa na ratiba kubwa ya matamasha ya mara kwa mara katika miaka ya hivi karibuni.

Maonyesho hayo ya London yanatarajiwa kuwa sehemu muhimu ya Jay-Z kuangazia safari yake ya miaka 30 katika muziki pamoja na mchango wake katika maendeleo na ukuaji wa Hip Hop duniani.

Stori na Erick Elibariki | GPL

Posted on

UMOJA WA MATAIFA WAONYA KUHUSU EL NIÑO ‘KUBWA ZAIDI’ HUKU NCHI ZIKIJIANDAA KWA ATHARI

 

Dunia imeingia katika “eneo hatari la hali mbaya ya hewa” huku athari za El Niño zikianza kuhisiwa duniani kote, mkuu wa Umoja wa Mataifa António Guterres ameonya.

Shirika la Hali ya Hewa Duniani (WMO) limetoa data ya hivi karibuni kuhusu hali ya hewa mbaya zaidi kwa zaidi ya miaka 70 na huenda ikadumu hadi angalau Februari 2027.

El Niño hubadilisha mifumo ya hali ya hewa kote ulimwenguni, ikisukuma baadhi ya maeneo kwenye ukame huku mengine yakipata vimbunga vikali na mafuriko.

Watabiri wa hali ya hewa pia wanasema El Niño itaongeza hali ya joto katika baadhi ya maeneo, ikija na kuongeza kiwango cha juu cha joto linaloongezeka kote duniani kutokana na mabadiliko ya hali ya hewa yanayosababishwa na binadamu.

“El Niño inazidi kuwa kubwa mbele ya macho yetu. Sayansi haiachi nafasi ya shaka: sayari iko katika maji yasiyojulikana, na maji hayo yanaongeza joto,” Guterres alisema.

BBC ilizungumza na serikali na wanasayansi kuhusu hatua zinazochukuliwa duniani kote ili kupunguza hatari ya vifo, kuhama makazi na uharibifu wa mazingira.

Mifumo ya tahadhari za mapema imeimarishwa na kupelekwa kwa usaidizi wa kimatibabu wa awali, lakini nguvu ya tukio hili maalum imeibua wasiwasi mkubwa hasa kwa makundi yaliyo katika mazingira magumu.

WMO – shirika la Umoja wa Mataifa – limesema limechukua “uhamasishaji mkubwa” kujaribu kusambaza utabiri wake wa matukio mabaya ya hali ya hewa, yanayohusiana na El Niño, kwa jamii nyingi iwezekanavyo.

Katibu Mkuu wa WMO Celeste Saulo alionya: “El Niño ina uwezo wa kuleta pigo kubwa kwa jamii na uchumi kote ulimwenguni.”