Month: September 2026

Posted on

SERIKALI IMEENDELEA KUCHUKUA ATUA ZA KUIMARISHA SEKTA YA ELIMU

Serikali imeendelea kuchukua hatua za kuimarisha sekta ya elimu kwa kuongeza miaka ya elimu ya lazima, kupanua fursa za elimu ya sekondari na kuimarisha mafunzo ya ufundi ili kuwapa vijana uwezo wa kushiriki kikamilifu katika soko la ajira.  

Akizungumza Septemba 02, 2026 jijini Dodoma na Balozi wa Uingereza nchini Tanzania, Waziri wa Elimu, Sayansi na Teknolojia, Prof. Adolf Mkenda, amesema maandalizi ya utekelezaji wa miaka 10 ya elimu ya lazima kuanzia mwaka 2028 yanaendelea, hatua itakayohitaji miundombinu, walimu na nafasi za kutosha katika shule za sekondari.  

Prof. Mkenda amebainisha kuwa mpango huo utasababisha ongezeko kubwa la wanafunzi watakaoingia sekondari, hivyo Serikali imeweka mkakati wa kuhakikisha wanafunzi wote wanaostahili wanapata nafasi ya kuendelea na masomo.  

Aidha, ameongeza kuwa  Serikali inaendelea kuimarisha mfumo wa elimu wenye mikondo ya elimu ya jumla na elimu ya amali, ili wanafunzi wapate maarifa na stadi zinazowawezesha kuajirika au kujiajiri.  

Katika mazungumzo hayo, Prof. Mkenda ameeleza kuwa Serikali inajenga vyuo vya ufundi katika maeneo mbalimbali na kuimarisha mafunzo ya ufundi ili kukidhi mahitaji ya vijana na uchumi wa Taifa.  

Prof. Mkenda ameongeza kuwa Serikali inawekeza katika masomo ya sayansi, teknolojia, uhandisi na hisabati pamoja na teknolojia mpya kama akili bandia (AI), ujifunzaji wa mashine na usalama wa mtandao, ili kuandaa wataalamu wa kisasa.  

Amesisitiza  umuhimu wa ushiriki wa sekta binafsi katika kupanua fursa za elimu, hususan katika ujenzi wa miundombinu na utoaji wa elimu ya amali.

Kwa upande wake, Katibu Mkuu wa Wizara hiyo, Prof. Carolyne Nombo, amesema kuwa Serikali inatazama uwezekano wa kuboresha vivutio vya kisera vitakavyoongeza uwekezaji wa sekta binafsi katika elimu.  

Naye Balozi wa Uingereza nchini Tanzania, Mhe. Marianne Young, amepongeza juhudi za Tanzania na kuahidi kuendeleza ushirikiano katika elimu na na mafunzo ya  ufundi, ikiwemo kuunganisha taasisi za Tanzania na vyuo vikuu vya Uingereza katika maeneo ya teknolojia ya kisasa na mazingira.

 

Posted on

*AFISA UGAVI WMA AHAMASISHA UHAKIKI VIFAA VYA VIPIMO BAADA YA UNUNUZI*

 *MWANZA* 

Wakala wa Vipimo (WMA) umetoa wito kwa Maafisa wanaosimamia  ununuzi na ugavi katika taasisi za umma na binafsi kuhakikisha vifaa vyote vinavyohusiana na vipimo vinawasilishwa WMA kwa ajili ya uhakiki kabla ya kupelekwa kwa watumiaji.

Akizungumza leo Septemba 2, 2026 katika Maonesho ya 21 ya  Biashara ya Afrika Mashariki yanayoendelea katika Uwanja wa Furahisha  jijini Mwanza, Afisa Ugavi wa WMA, Bi. Rehema Komba amesema ni vema taasisi zinapokamilisha ununuzi wa vifaa vya kivipimo,  zisivipeleke moja kwa moja kwa watumiaji bila kuhakikiwa, kwani inaweza lkupelekea hasara kwa serikali na wananchi.

“Tunasimamia mchakato wa manunuzi, lakini baada ya vifaa kufika, tuzikumbushe taasisi zetu kupeleka kwanza Wakala wa Vipimo kwa uhakiki. Msiogope kuchelewa kwa siku chache, bali ogopeni hasara ya miaka,”  amesema.

Akifafanua, Bi. Rehema ametoa mfano wa Mamlaka na Kampuni za Maji, ambapo amesema maafisa ugavi katika Mamlaka hizo  wanapaswa kushauri na kuhakikisha mita zote mpya za maji baada ya kununuliwa zinapita WMA kwa uhakiki  kabla ya kufungwa kwa wateja.

“Kama kila afisa ugavi atatoa ushauri huu mara baada ya kukamilisha manunuzi, tutakuwa tumepiga hatua kubwa kuhakikisha kuna biashara ya haki na ulinzi wa walaji nchini” ameongeza.

Mtaalamu huyo wa Ugavi amesema WMA ina mitambo ya kisasa inayowezesha kutoa huduma ya uhakiki wa haraka hali  inayoepusha usumbufu kwa taasisi wakati wa kutoa huduma.

Maonesho ya Biashara ya Afrika Mashariki yameanza tarehe  28 Agosti na yanatarajiwa kuhitimishwa tarehe 6 Septemba, 2026.

 

Posted on

Msako wa TANESCO! Wateja Wanaotumia Umeme Bila Kulipa Wakamatwa

Global Publishers
September 3, 2026
72 views
0 Comments

SHIRIKA la Umeme Tanzania (TANESCO) Mkoa wa Ubungo jijini Dar es Salaam limeendelea na operesheni yake maalum ya kuwabaini na kuwachukulia hatua wateja ambao wanatumia umeme bila kulipia wakiwa wameunganishiwa umeme na vishoka mtaani kinyume na utaratibu.

Katika operesheni hiyo TANESCO Mkoa wa Ubungo imekamata baadhi ya wateja wake katika maeneo ya Mabibo External,Mburahati na Kimara Kilungure na miongoni mwa wateja hao wamekuwa wakitumia umeme wa TANESCO bila kulipia kwa zaidi ya mwaka mmoja sasa.

Akizungumza Septemba 2, 2026 wakati wa operesheni hiyo fundi wa Shirika la Umeme Tanzania (TANESCO) Mkoa wa Ubungo Salum Bure amesema wamewakamata wateja ambao wamechepusha umeme kupitia vishoka.

“Katika eneo la Mtaa wa Amani uliopo Mabibo External kuna mteja tumekuta amechepusha umeme na mara ya mwisho amenunua umeme Agosti mwaka 2025.

Hivyo kwa zaidi ya mwaka mmoja halipi umeme na ameunganishiwa na kishoka.

“Pia katika Mtaa wa Tanzanite uliopo Kimara Kirungule kuna mteja amekuwa akiliibia Shirika letu kwa kutumia umeme ambao haulipii na yeye amechepusha umeme kupitia vishoka,”amesema na kuongeza wateja wote ambao watabainika wameunganisha umeme kinyume na utaratibu hatua za kisheria zitachukuliwa

Bure amesema operesheni inayoendelea sasa inatokana na maelekezo ya Mkurugenzi wa Shirika hilo la TANESCO huku akitumia nafasi hiyo kuwataka wale wote wenye tabia ya kutumia umeme bila kuulipia waaache na wale wenye changamoto wafike katika ofisi zao kutoa taarifa.

Pia amewaomba wananchi wanapobaini baadhi yao kwa wamejiunganishia Umeme kinyume na utaratibu kwa kutumia vishoka kutoa Taarifa TANESCO kupitia namba ambayo unapiga bure ambayo ni 180

Kwa upande wake Mjumbe wa shina namba 10 katika Mtaa wa Amani eneo la Mabibo External Rose Peter amesema TANESCO wamefika katika eneo lake kukagua wale ambao wanaiba umeme kwa kujiunganishia bila utaratibu na kweli wamemkamata watu waliojiunganishia umeme bila utaratibu.

“Kwahiyo kwa wananchi wenzangu nitoe rai tuache tabia ya kuiibia TANESCO umeme .Hii iwe onyo kwa wote ambao wanaiba umeme na ushauri wangu tutumie mita zetu vizuri.”

Posted on

Wasira Akutana na Wabunge wa CCM katika Makao Makuu ya Chama

MAKAMU Mwenyekiti wa Chama Cha Mapinduzi (CCM – Bara), Stephen Wasira, amekutana na kuzungumza na Kamati ya Wabunge wa CCM, Septemba 2,  2026, katika Ukumbi wa White House Makao Makuu ya Chama jijini Dodoma.

Katika kikao hicho Wasira aliambatana na ujumbe wa Sekretarieti ya Halmashauri Kuu ya Taifa (NEC) ya CCM ukiongozwa na Katibu Mkuu, Balozi Dkt. Asha-Rose Migiro.

Posted on

Sababu 7 Kwanini Wagonjwa wa Pressure Wanatumia Kitunguu Saumu

High blood pressure (hypertension) ni sababu kubwa ya magonjwa ya moyo, kiharusi na uharibifu wa figo. Kwa muda mrefu, tiba asili zimekuwa zikisisitiza umuhimu wa lishe na mimea tiba katika kuzuia na kudhibiti shinikizo la damu  na miongoni mwa mimea iliyopewa utafiti mkubwa zaidi ni kitunguu saumu.

Zaidi ya maelfu ya tafiti zimechunguza uwezo wa kitunguu saumu kusaidia mwili kupambana na magonjwa mbalimbali, na matokeo mengi yanaonyesha kinaweza kuwa msaada muhimu katika afya ya moyo.

Kwa nini kitunguu saumu ni muhimu kwenye hypertension?

Kitunguu saumu (Allium sativum) kimehusishwa kwa muda mrefu na faida za mfumo wa moyo na mishipa ya damu. Utafiti unaonyesha kwamba kinaweza kusaidia kupunguza shinikizo la damu, hasa kwa watu ambao tayari wana hypertension.

Siri kubwa ipo kwenye kiungo chake mahsusi kinachoitwa allicin kinachotokea unapokikata au kukiponda.

Allicin:

  • Hulegeza na kupanua mishipa ya damu,

  • Huongeza uzalishaji wa nitric oxide,

  • na hivyo hupunguza msukumo wa damu kwenye kuta za mishipa.

Matokeo ya tafiti kadhaa yameonyesha kupungua kwa wastani wa karibu 8–9 mmHg kwa shinikizo la juu (systolic) na 5–6 mmHg kwa shinikizo la chini (diastolic), jambo linaloonyesha kwamba kitunguu saumu kinaweza kuwa nyongeza nzuri sambamba na matibabu ya kawaida.

Jinsi kinavyofanya kazi ndani ya mwili

Mbali na kulegeza mishipa, allicin pia huchochea kutengenezwa kwa misombo kama hydrogen sulfide na nitric oxide inayosaidia mishipa kuwa laini na kupanuka zaidi.

Kwa upande mwingine, kitunguu saumu huchochea utoaji wa maji na chumvi ya ziada mwilini, hali inayosaidia kupunguza shinikizo la damu kwa njia ya asili.

Ushahidi wa tafiti za kitabibu

Katika tafiti zilizohusisha wagonjwa wenye shinikizo lisilodhibitika, matumizi ya aged garlic extract kwa miezi kadhaa yalionyesha kupungua kwa shinikizo la damu kwa kiwango kinachoonekana kitabibu.

Utafiti mwingine ulionyesha pia kupungua kwa mkusanyiko wa mafuta kwenye mishipa ya moyo, hivyo kupunguza hatari ya ugonjwa wa moyo kwa walio kwenye hatari kubwa.

Faida nyingine zinazohusishwa na kitunguu saumu

Mbali na shinikizo la damu, tafiti zimehusisha kitunguu saumu na:

  • kupunguza kolesteroli mbaya,

  • kusaidia udhibiti wa sukari mwilini,

  • na kupunguza hatari ya baadhi ya saratani kutokana na misombo yake ya sulfur.

Hata hivyo, si kila utafiti unafanana — hivyo ushahidi unaendelea kukua.

Namna salama ya kukiongeza kwenye lishe

  • Kila mara, kikate au kiponde ili kuamsha allicin kabla ya kupika au kukila.

  • Ongeza kwenye vyakula kama supu, saladi au mboga.

  • Virutubisho vya aged garlic extract vinapatikana; mara nyingi hutumika kati ya 600–1,200 mg kwa siku.

Lakini ni muhimu kuzungumza na daktari kabla ya kuanza virutubisho, hasa kama tayari unatumia dawa za shinikizo au dawa za kupunguza damu kuganda.

Hitimisho

Kitunguu saumu kinaonyesha uwezo wa kusaidia kupunguza shinikizo la damu kwa kuboresha afya ya mishipa na kupunguza mzigo kwa moyo. Hata hivyo, kinapaswa kutumika kama kiunga cha lishe na nyongeza ya matibabu, si mbadala wa dawa alizoandikiwa mgonjwa.

Kabla ya kufanya mabadiliko yoyote ya matibabu shauriana na mtaalamu wa afya.

Posted on

Aishi na Uvimbe Miaka 20 Aomba Msaada wa Matibabu, Afunguka Mazito -Video

Global Publishers
September 3, 2026
1,890 views
0 Comments

Usemi wa Kiswahili “Kabla hujafa hujaumbika” unaakisi kwa kiasi kikubwa maisha ya Ester Juma, mwenye umri wa miaka 32, mkazi wa Tabata Barakuda jijini Dar es Salaam, ambaye kwa zaidi ya miaka 20 amekuwa akiishi na uvimbe mkubwa usoni.

Ester anapitia wakati mgumu huku akihangaika kutafuta fedha kwa ajili ya matibabu na upasuaji wa kuondoa uvimbe huo ambao umeathiri kwa kiasi kikubwa maisha yake ya kila siku.

Akizungumza kuhusu hali yake, Ester amesema amekuwa akikumbana na changamoto mbalimbali anapokuwa katika maeneo ya umma. Anaeleza kuwa baadhi ya watoto humkimbia wanapomuona, huku wakati mwingine hata mtoto wake mwenyewe akimuogopa kutokana na mabadiliko ya sura yake.

Changamoto hiyo, amesema, imemfanya kuishi maisha yenye maumivu na msongo mkubwa huku akiwa na matumaini ya kupata msaada wa matibabu.

Ester amesema aliwahi kufika Hospitali ya Taifa Muhimbili kwa ajili ya kupata matibabu, lakini hakufanikiwa kuanza mchakato huo baada ya kushindwa kupata Shilingi 450,000 zinazohitajika kwa ajili ya vipimo.

Kwa sasa, Ester anaendelea kuomba msaada kutoka kwa wasamaria wema ili aweze kupata fedha za vipimo na hatimaye kufanyiwa upasuaji.

Mtu yeyote aliyeguswa na hali ya Ester na angependa kumsaidia anaweza kuchangia kupitia namba 0760 780914, jina Magoli Juma.

Posted on

Yanga Yamtumia Fabrizio Romano Kutambulisha Jezi za Ligi Ya Mabingwa

Global Publishers
September 3, 2026
0 views
0 Comments

Klabu ya Yanga imemtumia mwandishi maarufu wa habari za michezo duniani, hususan taarifa za usajili wa wachezaji, Fabrizio Romano, kutambulisha jezi zake zitakazotumika katika michuano ya CAF Champions League msimu wa 2026/2027.

Romano, raia wa Italia, amejizolea umaarufu mkubwa duniani kupitia taarifa zake za usajili wa wachezaji na kauli yake maarufu “Here We Go”. Katika tukio hilo, ametumika kuitambulisha jezi ya Yanga ya michuano ya kimataifa, hatua inayotajwa kuwa sehemu ya mkakati wa klabu hiyo kukuza na kuitangaza chapa yake katika soko la kimataifa.

Yanga, ambayo ni moja ya wawakilishi wa Tanzania katika CAF Champions League msimu wa 2026/2027, imeendelea kuweka mkazo katika kuongeza mwonekano wa klabu hiyo kwenye jukwaa la kimataifa, sambamba na dhamira yake ya kufanya vizuri katika michuano ya Afrika.

Uamuzi wa kutumia jina kubwa kama Romano katika utambulisho huo umeipa Yanga fursa ya kufikisha utambulisho wa klabu na jezi zake kwa hadhira kubwa ya mashabiki wa soka duniani.

Posted on

PPRA Yatangaza Nafasi 10 za Ajira Katika Kada za TEHAMA

Dodoma, Septemba 1, 2026 — Sekretarieti ya Ajira katika Utumishi wa Umma (PSRS), kwa niaba ya Public Procurement Regulatory Authority (PPRA), imetangaza nafasi 10 za ajira kwa Watanzania wenye sifa na uwezo unaohitajika.

Tangazo hilo lenye Kumb. Na. JA.9/16/01/54 limetolewa tarehe 1 Septemba 2026, likiwa na nafasi katika kada mbalimbali za Teknolojia ya Habari na Mawasiliano (TEHAMA).

Nafasi zilizotangazwa

  1. ICT Officer II (Software Development – Frontend) — Nafasi 3
  2. ICT Officer II (Software Development – Backend) — Nafasi 4
  3. ICT Officer II (Artificial Intelligence Applications) — Nafasi 2
  4. ICT Officer II (Systems Analyst) — Nafasi 1

 

ICT Officer II – Software Development (Frontend)

Waombaji wa nafasi hizi wanatakiwa kuwa na Shahada ya Computer Science, Software Engineering, Information Technology, Information Systems, Computer Engineering au sifa inayolingana nayo kutoka taasisi inayotambuliwa.

Mwombaji anatakiwa kuwa na uzoefu wa vitendo katika miradi ya kutengeneza programu au portfolio inayoweza kuthibitisha uwezo wake. Pia anatakiwa kuwa na ujuzi wa Angular, TypeScript, HTML5, Tailwind CSS na teknolojia za kisasa za utengenezaji wa interfaces.

Aidha, anapaswa kuwa na ujuzi wa kutengeneza applications za simu kwa kutumia Flutter na Dart, kuunganisha mifumo na REST APIs na GraphQL, pamoja na kutumia Git, GitHub au GitLab.

Ujuzi wa UI/UX kwa kutumia Figma au zana nyingine zinazohusiana nao utakuwa faida ya ziada.

Mshahara: PPRA 5

ICT Officer II – Software Development (Backend)

Nafasi hizi zinahitaji mwombaji mwenye Shahada ya Computer Science, Software Engineering, Information Technology, Information Systems au Computer Engineering kutoka taasisi inayotambuliwa.

Mwombaji anatakiwa kuwa na ujuzi wa Java 21 au zaidi, Spring Boot, Spring Data JPA, Hibernate, REST APIs, GraphQL, PostgreSQL, RabbitMQ na mifumo ya asynchronous na event-driven architecture.

Ujuzi wa Kubernetes, Redis, Spring Security, OAuth2, JWT, JUnit 5, GraphiQL na Postman utakuwa faida ya ziada.

Mshahara: PPRA 5

ICT Officer II – Artificial Intelligence Applications

Waombaji wa nafasi hizi wanatakiwa kuwa na Shahada ya Computer Science, Software Engineering, Artificial Intelligence, Data Science au taaluma nyingine inayohusiana na teknolojia.

Mwombaji anatakiwa kuwa na ujuzi wa Python, TypeScript au JavaScript, pamoja na uzoefu katika AI execution pipelines, RESTful APIs, JSON na asynchronous programming.

Pia anatakiwa kuwa na uzoefu wa kutumia au kusanidi Large Language Models (LLMs) zinazoweza kuendeshwa ndani ya mifumo kama Ollama, LM Studio, vLLM au LocalAI, au kutumia huduma za LLM za mtandaoni kama OpenAI, Gemini au Anthropic.

Ujuzi wa prompt engineering, structured outputs, JSON schemas, function calling, tool use, agentic AI workflows, embeddings, vector databases na Retrieval-Augmented Generation (RAG) utahitajika kulingana na mahitaji ya nafasi.

Mshahara: PPRA 5

ICT Officer II – Systems Analyst

Nafasi hii inahitaji mwombaji mwenye Shahada ya Computer Science, Information Systems, Information Technology, Software Engineering, Computer Engineering, Business Information Systems au sifa inayolingana nayo.

Mwombaji anatakiwa kuwa na uelewa au uzoefu wa vitendo katika systems analysis, enterprise information systems, user requirements gathering, system testing, ICT user support, business process analysis na technical documentation.

Ujuzi katika cybersecurity, enterprise applications na Government ICT systems utakuwa faida ya ziada.

Mshahara: PPRA 5

Masharti muhimu ya maombi

PSRS imesema waombaji wote lazima wawe raia wa Tanzania na wasizidi umri wa miaka 45.

Waombaji wanatakiwa kuambatanisha nakala zilizothibitishwa za vyeti vyao vya elimu na taaluma, transcripts, vyeti vya usajili wa kitaaluma pale inapohitajika, pamoja na cheti cha kuzaliwa.

Aidha, Form IV na Form VI result slips, testimonials na partial transcripts hazitakubalika.

Mwombaji anatakiwa pia kupakia picha ya Passport Size ya hivi karibuni katika Recruitment Portal na kutaja referees watatu wenye mawasiliano yanayoaminika.

Waombaji wenye vyeti vya elimu vya nje ya Tanzania wanatakiwa kuhakikisha vyeti hivyo vimetambuliwa na mamlaka husika, ikiwemo TCU, NECTA au NACTVET.

Jinsi ya kutuma maombi

Maombi yote yanatakiwa kuwasilishwa kupitia Recruitment Portal ya Sekretarieti ya Ajira katika Utumishi wa Umma.

Recruitment Portal: portal.ajira.go.tz

Barua ya maombi inapaswa kuandikwa kwa Kiswahili au Kiingereza, kusainiwa na kuelekezwa kwa:

Secretary,
President’s Office, Public Service Recruitment Secretariat,
P.O. Box 2320,
Mahakama Street, Tambukareli,
Dodoma.

Mwisho wa kutuma maombi

Mwisho wa kutuma maombi ni Septemba 14, 2026.

PSRS imesema ni waombaji watakaoteuliwa pekee ndio watakaofahamishwa kuhusu tarehe ya usaili.

Aidha, mwombaji atakayewasilisha vyeti vya kughushi au taarifa za uongo atachukuliwa hatua za kisheria.

Maombi yatakayowasilishwa kupitia njia nyingine tofauti na Recruitment Portal hayatazingatiwa.

Chanzo: Public Service Recruitment Secretariat (PSRS), Tangazo Kumb. Na. JA.9/16/01/54, Septemba 1, 2026.