Year: 2026

GEITA: KIONGOZI wa Mbio za Mwenge Kitaifa Mwaka 2026, Wazo Michael Mwang’oda, ameagiza viongozi wa serikali kushiriki, kufuatilia na kusimamia kikamirifu miradi ya Uwajibikaji wa Kampuni kwa Jamii (CSR).

Mwang’oda ametoa maagizo hayo alipoongoza msafara wa mbio za mwenge kutembelea, kukagua na kuweka jiwe la msingi mradi wa ujenzi wa kituo cha afya cha kata ya Lwamugasa wilayani Geita.

Amesema fedha za CSR zinazotolewa na makampuni ni fedha halali za watanzania kwa kuwa zinatolewa kwa mjibu wa sheria za nchi na hivo miradi ushiriki wa viongozi wa serikali ni jambo muhimu.

“CSR inatolewa kwa mjibu wa sheria, kwa ajili ya kurudisha kwa wananchi, kwa kuwa wanarudisha kwa jamii, basi serikali isimamie kwa ukaribu, tusiwaachie wadau wetu wa maendeleo peke yao”, amesema.

Aidha, ameagiza kituo cha afya Lwamugasa kuunganishiwa umeme ili kuruhusu miundombinu iliyojengwa na serikali kuanza kutoa huduma za afya kwa wananchi kusudiwa wa eneo la Lwamugasa.

Amesema haina afya kuona ujenzi wa miundombinu yote umekamilika, vifaa tiba vimenunuliwa na watoa huduma za afya wameajiliwa lakini kituo cha afya hakitoshelezi kutoa huduma kwa kukosa umeme.

“Kitakwimu kata hii ina zaidi ya wananchi elfu 72, niombe wanaohusika waweze kuleta umeme mahala hapa ili huduma zingine zianze kutolewa katika kituo hiki”, amesema.

Naibu Waziri wa Tamisemi na Mbunge wa Jimbo la Busanda, Dk Jafari Rajabu Self amesema kituo cha afya Lwamugasa kinatarajia kuhudumia takribani wananchi 72,000 wa kata ya Lwamugasa.

“Kati ya wananchi hao elfu 72, wapo kina mama wanaojifungua kwa mwezi, wastani wa kina mama 250 na Lwamugasa hapakuwa kabisa na kituo cha afya.

Awali Mganga Mfawidhi wa Kituo cha Afya Lwamugasa, Charles Anthony amesema mradi umegharimu takribani sh bilioni 1.24 kati yake sh milioni 565 ni fedha za CSR kutoka kampuni ya Bucreef.

DAR ES SALAAM: Tanzania inalenga kuvutia mitaji mikubwa zaidi kutoka Ulaya kwa kuimarisha mazingira ya uwekezaji kwa sekta binafsi, hatua inayotarajiwa kuongeza ajira na kuchochea ukuaji wa uchumi.

Waziri wa Mipango na Uwekezaji, Profesa Kitila Mkumbo ameeleza hayo leo Agosti 27, Dar es Salaam, katika mkutano wa mashauriano kati ya Serikali na wawakilishi wa wafanyabiashara na wawekezaji kutoka Umoja wa Ulaya (EU).

Katika mkutano huo, pande hizo zimejadili fursa mbalimbali za uwekezaji, na namna ya kuongeza thamani ya mazao yanayozalishwa nchini ili kuongeza ushindani wa bidhaa za Tanzania katika soko la dunia.

Prof. Mkumbo amesema Serikali inaendelea kuweka mazingira wezeshi kwa sekta binafsi na wawekezaji, huku ikilenga kutumia fursa zilizopo kuongeza uzalishaji, ajira na kukuza uchumi wa Taifa.

Kwa upande wake, Balozi wa Ireland nchini Tanzania na Mwenyekiti Mwenza wa Umoja wa Ulaya, Nicola Brennan, amesema EU ina dhamira ya kuendelea kuwekeza na kushirikiana na Tanzania katika maeneo mbalimbali ya kiuchumi.

Amesema utekelezaji wa Dira ya Taifa ya Maendeleo 2050 utasaidia kuimarisha mazingira ya biashara na uwekezaji, hivyo kuongeza fursa za Tanzania kuvutia mitaji mikubwa kutoka Ulaya na kuimarisha nafasi yake kama nguvu ya kiuchumi katika Afrika Mashariki.

MOROGORO; Watanzania wameombwa kujenga utamaduni wa watu majirani kutambuana na inapotokea jirani yako humuelewi vizuri toa taarifa mapema kwa viongozi wa serikali ya mtaa au polisi.

Kauli hiyo imetolewa leo Agosti 27, 2026 na Kamishna wa Polisi Jamii Tanzania, Alex Mkama alipozungumza na waandishi wa habari baada ya kukagua Banda la Polisi Jamii katika Tamasha la Nne la Kitaifa la Utamaduni linalofanyika mkoani Mororgoro na kueleza kwa njia hiyo itasaidia kupunguza baadhi ya vitendo vya jinai.

Pia ametaka jamii itilie mkazo suala la maadili kuanzia ngazi ya familia, kwani maadili ndio yanayofanya watu wawajibike, wachukie rushwa na kuupuka vitendo vya uhalifu.

Ameitaka jamii kujenga tabia ya kutambua majirani zao na pale wanapoona wageni wanaowatilia mashaka watoe taarifa polisi au kwa viongozi wa serikali..

Kwa upande wake Mrakibu Mwandamizi wa Polisi kutoka Makao Makuu ya Jeshi la Polisi Kanisheni ya Polisi Jamii Dk, Ezekiel Kyogo, amesema wameshiriki tamasha hilo kwa lengo la kutoa elimu Kwa jamii.

Amesema matukio mengi ya jinai chimbuko lake ni kukosekana maadili, hivyo kupitia elimu hiyo wataweza kurejesha jamii kwenye maadili.

Naye Mkuu wa Dawati la Jinsia na Watoto wa Jeshi la Polisi Mkoa wa Morogoro,  Pendo Meshurie amesema kupitia tamasha hilo wamekuwa wakitoa elimu ya kupambana na vitendo vya ukatili kupitia sanaa zikiwemo nyimbo na vipeperushi.

Na Samwel Mpogole – Mbeya.

Mkuu wa Wilaya ya Chunya Mhe.Mbaraka Alhaji Batenga amewataka madiwani kutambua wajibu wao wa kuwawakilisha wananchi kwa kuhakikisha wanahudhuria vikao vya Baraza la Madiwani na kushiriki kikamilifu katika kufanya maamuzi ya maendeleo.

Hayo yanajiri baada ya zaidi ya madiwani 10 kutoshiriki kikao maalumu cha Baraza la Madiwani kilichokutana kujadili na kupitisha hesabu za mwisho za Halmashauri kwa mwaka wa fedha 2025/2026.

Mbali na suala la mahudhurio, Mkuu huyo wa Wilaya amewataka madiwani kuhakikisha wanabaini maeneo yenye changamoto ya maji na kuweka mipango maalumu ya uchimbaji wa mabwawa, akisisitiza kuwa mitambo ya uchimbaji ipo na hivyo kinachohitajika ni kuwasilisha maombi ya maeneo yenye uhitaji.

Pia, amewataka madiwani kushirikiana na wananchi na watendaji katika kujiandaa kupokea wahitimu wa darasa la saba na darasa la sita wanaotarajiwa kujiunga na elimu ya sekondari, ambapo Halmashauri ina uhitaji wa vyumba vya madarasa 141 na matundu ya vyoo 577, huku zaidi ya shilingi bilioni tatu zikihitajika kukidhi mahitaji hayo.

Kadhalika, madiwani wametakiwa kusimamia upangaji bora wa huduma za kibiashara, ikiwemo kutenga maeneo rasmi kwa ajili ya shughuli za wachomeleaji na ujenzi wa parking, ili kuhakikisha mji wa Chunya unakuwa salama na wenye mpangilio.

Kwa upande wake, Mwenyekiti wa Halmashauri ya Wilaya ya Chunya, Bwana Kelvin Shinshi, amewaagiza madiwani kuhakikisha wanasimamia vyema wananchi wanaowawakilisha na kufuatilia utekelezaji wa mipango ya maendeleo katika maeneo yao.

Amesema Halmashauri tayari imeanza kuchukua hatua za kutekeleza mipango ya kukabiliana na changamoto ya maji katika maeneo mbalimbali, huku akisisitiza kuwa kila diwani ana wajibu wa kuhakikisha mahitaji ya wananchi yanafikishwa na kufanyiwa kazi.

Kuhusu mahudhurio ya vikao, Mwenyekiti huyo amesema uvunjifu wa nidhamu unaosababishwa na kutohudhuria vikao hautaendelea kuvumiliwa, na kwamba hatua za kinidhamu zitaanza kuchukuliwa dhidi ya madiwani watakaokiuka kanuni na taratibu za mahudhurio.

Kwa upande wake, Mkuu wa TAKUKURU Wilaya ya Chunya, Francis Michael, amesisitiza umuhimu wa kuhakikisha kunakuwa na usimamizi madhubuti na wa ufanisi wa mapato ya Halmashauri, ili fedha zinazokusanywa zitumike kwa mujibu wa sheria na taratibu zilizowekwa.

Amesema usimamizi wa mapato kwa uadilifu utasaidia kuzuia upotevu wa fedha na kuhakikisha rasilimali zinazokusanywa zinatumika kutekeleza miradi ya maendeleo na kutatua changamoto zinazowakabili wananchi.