Month: September 2026

Posted on

Dk Samia atekeleza ahadi, Tarsila apokea Mil 20/- – HabariLeo

DAR ES SALAAM: BINTI aliyebuni na kutengeneza ndege nyuki (drone), Tarsila Mellita, amepokea Sh milioni 20 kutoka kwa Rais Dk Samia Suluhu Hassan, fedha zilizowasilishwa na Msaidizi wa Rais Maendeleo ya Jamii, Jacqueline Kawishe.

Fedha hizo ni utekelezaji wa ahadi iliyotolewa na Rais Dk Samia wakati wa kilele cha Maonesho ya Kimataifa ya Kilimo ya Nane Nane 2026 yaliyofanyika jijini Dodoma, baada ya kukagua banda la vijana aliloshiriki Tarsila wakati wa maonesho hayo.

Tarsila amebuni ndege nyuki inayotumika kusambaza viuatilifu kwenye mashamba, ubunifu unaolenga kuongeza ufanisi katika shughuli za kilimo kupitia matumizi ya teknolojia.

Binti huyo na vijana wenzake wanamiliki kampuni ya Nyika Ventures, ambayo itatumia fedha hizo kuendeleza na kuboresha teknolojia ya drone inayotengenezwa nchini.

Hatua hiyo ni sehemu ya juhudi za kuongeza matumizi ya teknolojia katika kilimo na kuwawezesha vijana kutumia ubunifu kutatua changamoto zinazowakabili wakulima na kuongeza ufanisi katika uzalishaji.
–

Posted on

WANANCHI NDUNGU WAMLILIA MWANRI: “TUNATESWA NA KILIO CHA MAJI”

Ashrack Miraji Matukio Daima 

WANANCHI wa Kata ya Ndungu, Jimbo la Same Mashariki, Wilaya ya Same, Mkoa wa Kilimanjaro, wameangua kilio mbele ya Naibu Katibu Mkuu wa CCM Bara, Aggrey Mwanri, wakieleza namna ukosefu wa huduma ya maji safi na salama unavyowaathiri.

Wananchi hao wamesema kwa muda mrefu wamekuwa wakikabiliwa na changamoto ya ukosefu wa maji, hali inayowalazimu kutumia maji yasiyo salama kwa matumizi ya binadamu na hivyo kuongeza hofu kuhusu afya zao.

Wakizungumza katika mkutano wa hadhara uliofanyika Jana tarehe 24/9/2026 Kata ya Ndungu, mbele ya Naibu Katibu Mkuu huyo, wananchi walisema eneo hilo halina miundombinu ya kutosha ya maji, licha ya changamoto hiyo kuendelea kwa muda mrefu bila kupata ufumbuzi wa kudumu.

Walisema wamekuwa wakifikisha kilio chao kwa viongozi mbalimbali waliowahi kutembelea kata hiyo, lakini hadi sasa hawajaona suluhisho la kudumu la tatizo hilo.

Diwani wa Kata ya Ndungu alisema changamoto ya maji imekuwa ni tatizo kubwa kwa wananchi, akieleza kuwa wamekuwa wakitoa kilio hicho mara kwa mara kwa viongozi mbalimbali bila kupata majibu ya uhakika kuhusu lini tatizo hilo litapatiwa ufumbuzi.

Kutokana na hali hiyo, wananchi hao walimuomba Naibu Katibu Mkuu huyo kusaidia kufikisha kilio chao kwa Serikali ili hatua zichukuliwe za kuhakikisha wanapata huduma ya maji safi na salama.

Akizungumza katika mkutano huo, Naibu Katibu Mkuu wa CCM Bara, Aggrey Mwanri, alikiri kupokea na kuelewa changamoto hiyo, akisema atawasilisha suala hilo kwa Waziri wa Maji, Juma Aweso, ili hatua za kulitatua ziweze kuchukuliwa.

Mwanri alisema changamoto hiyo inahitaji kufanyiwa kazi ili wananchi wa Ndungu waweze kupata huduma ya maji safi na salama, huku akieleza kuwa atahakikisha kilio hicho kinawafikia wahusika katika Serikali kwa ajili ya kutafuta ufumbuzi.

Posted on

Marekani Yakataa Viza ya Mkuu wa Jeshi la Sudan Mkutano wa UN

Global Publishers
September 25, 2026
0 views
0 Comments

Marekani imezuia viza ya mkuu wa jeshi la Sudan, Abdel Fattah al-Burhan, kabla ya safari yake iliyopangwa kwenda New York kuhudhuria Mkutano Mkuu wa Umoja wa Mataifa (UN), hatua inayoongeza mvutano kati ya Washington na jeshi la Sudan.

Kwa mujibu wa Reuters, chanzo cha ngazi ya juu nchini Sudan kimesema Burhan ameahirisha safari yake kwenda New York, ingawa bado hajapokea taarifa rasmi kuhusu kukataliwa kwa viza. Serikali ya Sudan imeelezea hatua hiyo kama ukiukaji wa Mkataba wa UN na sheria za kimataifa, ikisisitiza kuwa iko tayari kwa amani.

Balozi wa Sudan katika UN amemwomba Katibu Mkuu wa Umoja huo, Antonio Guterres, kuingilia kati suala hilo. Katika barua yake, balozi huyo amesema kumzuia Burhan kuhudhuria Mkutano Mkuu wa UN kunakiuka wajibu wa Umoja huo kwa nchi wanachama.

Chanzo cha kidiplomasia cha Sudan kimeiambia Reuters kuwa maafisa wa Marekani wameweka sharti kwamba Burhan akubali kusitisha mapigano kwa siku 90 ili kuhudhuria mkutano huo.

Pendekezo hilo linahusishwa na Mshauri Mkuu wa Marekani anayehusika na Masuala ya Waarabu na Afrika, Massad Boulos. Wizara ya Mambo ya Nje ya Marekani haikutoa maoni kuhusu viza hiyo.

Marekani imesema Jeshi la Sudan (SAF), kikosi cha Rapid Support Forces (RSF) na viongozi wao “hawawakilishi utawala halali wa kikatiba nchini Sudan.” Burhan alitarajiwa kuhutubia Mkutano Mkuu wa UN leo, lakini hotuba hiyo itatolewa na Waziri wa Mambo ya Nje wa Sudan, Mohieldin Salem hatua hiyo inatokea wakati vita vya Sudan vilivyoanza Aprili 2023 vikiendelea.



Posted on

MHE. MBUNGE DAVID MATHAYO AMPOKEA NAIBU KATIBU MKUU BARA NDUGU AGGREY MWANRI

Same Kilimanjaro 

Mbunge wa Jimbo la Same Magharibi, Mhe. David Mathayo, amempokea Naibu Katibu Mkuu wa Chama Cha Mapinduzi (CCM) Tanzania Bara, Ndugu Aggrey Mwanri, aliyewasili katika Ofisi za CCM Wilaya ya Same kwa ajili ya kuanza ziara ya kikazi katika wilaya hiyo.

Ndugu Mwanri amewasili Same jana ikiwa ni sehemu ya ziara yake ya kikazi, ambapo a alitembelea Majimbo ya Same Mashariki na Same Magharibi kwa ajili ya kukutana na viongozi, wanachama wa CCM pamoja na wananchi katika maeneo mbalimbali.

Katika ziara hiyo, Naibu Katibu Mkuu huyo  alisikiliza na kujadili masuala mbalimbali yanayohusu shughuli za Chama Cha Mapinduzi, pamoja na changamoto na maendeleo ya wananchi wa Wilaya ya Same.

Ziara hiyo hili hitimishwa kwa mkutano wa hadhara, ambapo Ndugu Mwanri atazungumza na wananchi pamoja na wanachama wa CCM kuhusu masuala mbalimbali ya chama na maendeleo ya jamii.

Posted on

Judith Aonyesha Gari Jipya la Sh Milioni 160, Asema “Nililipa Cash”

Mwanadada muigizaji Judith.

Muigizaji Judith amewapa mashabiki wake jambo jipya la kuzungumza baada ya kuonyesha gari lake jipya, huku akifichua kuwa gari hilo limemgharimu Sh milioni 160 na kwamba hakulinunua kwa kudunduliza fedha.

Judith ametoa ufafanuzi huo baada ya kuwapo kwa taarifa zilizokuwa zikidai kuwa gari hilo lina thamani ya Sh milioni 90. Muigizaji huyo amekanusha taarifa hizo na kusema yeye alilinunua kwa Sh milioni 160, huku akisisitiza kuwa alilipa fedha hizo taslimu.

Judith amesema mafanikio hayo ni sehemu ya matokeo ya kazi yake, akieleza kuwa amekuwa akifanya kazi kwa bidii usiku na mchana.

Kupitia ukurasa wake wa Instagram, Judith aliweka picha za gari hilo na kuandika ujumbe huu:

“Baraka zinazovaliwa kwa uzuri. 🥷
Gari hili ni kwa ajili ya wanawake warembo pekee. 😎

Sura mpya. Moyo uleule.
Bado najifunza, bado nakua na bado nimeweka miguu yangu chini.

Kumbuka: Aina hii ya gari ni kwa ajili ya wanawake warembo tu, na si kwa wanaume 😂

Uzuri, kujiamini na kusudi — taji limevalishwa. 👑✨
Hongera kwa malkia wote wa Miss Grand! ”

Baada ya ujumbe huo, mashabiki walijitokeza kwa wingi kumpongeza Judith, huku baadhi yao wakimtania kuwa gari hilo ni mwanzo wa kupata magari makubwa zaidi.

Nana Dollz alimpongeza huku akisema: “Range Rover mwakani , mambo mengi mazuri zaidi yanakuja .”

Shabiki mwingine alitania kuhusu kauli yake ya kwamba gari hilo si la wanaume, akisema: “Naondoka na sentensi ya mwisho  ‘si kwa wanaume’. Hongera babe .”

Wengine waliendelea kumpongeza kwa ujumbe mbalimbali kama “Hongera tajiri,” “Msichana wangu,” “Hongera mama,” huku wakitumia emoji za moto na moyo kuonyesha furaha yao.

Wakati huohuo, Judith amekuwa akitajwa kwenye mitandao kufuatia tetesi za kuachana na mpenzi wake ambaye awali alikuwa akihusishwa naye.

Baadhi ya watu wamekuwa wakidai kuwa uhusiano huo umefikia mwisho, ingawa madai hayo bado ni tetesi.

Pamoja na gumzo hilo, Judith kwa sasa ameendelea kuonyesha mafanikio yake, huku gari hilo jipya likiwa miongoni mwa vitu vilivyoibua gumzo kubwa kwa mashabiki wake.

Posted on

Haaland wa Moto Afikisha Goli 64 Kwenye Uzi wa Norway

Global Publishers
September 25, 2026
0 views
0 Comments

Mshambuliaji wa Manchester City na timu ya taifa ya Norway Erling Haaland, ameendelea kuweka rekodi ya kuvutia katika soka la kimataifa baada ya kufunga mabao mawili katika ushindi wa Norway wa 3-2 dhidi ya Denmark kwenye mchezo wa UEFA Nations League.

Haaland alifunga bao lake la kwanza dakika ya 18 kabla ya kuongeza la pili dakika ya 74, na kuifanya Norway kupata ushindi katika mchezo huo wa kusisimua.

Mabao hayo mawili yameifanya rekodi yake ya kimataifa kufikia mabao 64 katika mechi 56 akiwa na timu ya taifa ya Norway, wastani wa zaidi ya bao moja kwa kila mchezo.

Kwa kufikisha mabao hayo 64, Haaland amevuka idadi ya mabao ya kimataifa iliyowahi kufungwa na Ronaldo Nazario na Zlatan Ibrahimovic, ambao kila mmoja alifunga mabao 62 katika maisha yake ya kimataifa.

Haaland pia anaendelea kuwa miongoni mwa wafungaji bora wa UEFA Nations League, akiwa tayari amefikisha mabao 21 katika mechi 17 kwenye mashindano hayo.

Kwa sasa, rekodi yake inaendelea kuvutia kutokana na kasi ambayo amekuwa akifunga mabao akiwa na Norway, huku akiwa bado ana umri wa miaka 26.

Na Tereza Muga



Posted on

Rayvanny Kutumbuiza Afro Nation Portugal 2027

 

 

Msanii wa Tanzania, Rayvanny, ametangazwa kuwa miongoni mwa wasanii watakaotumbuiza katika tamasha kubwa la Afro Nation Portugal 2027, nchini Ureno.

Jina la Rayvanny limeonekana katika orodha ya kwanza ya wasanii iliyotangazwa na waandaaji wa tamasha hilo Septemba 23, 2026, hatua inayomweka tena msanii huyo wa Tanzania kwenye jukwaa kubwa la muziki wa Afrika kimataifa.

Tamasha hilo linatarajiwa kufanyika kuanzia Juni 9 hadi 11, 2027, katika ufukwe wa Praia da Rocha, Portimão, nchini Portugal, likiwa na lengo la kuunganisha muziki, utamaduni na burudani kutoka Afrika na maeneo mbalimbali duniani.

Rayvanny atashiriki jukwaa hilo pamoja na baadhi ya majina makubwa katika muziki wa Afrika na kimataifa, akiwemo Davido, Rema, Fally Ipupa, Omah Lay, Victony na Shenseea.

Davido, Rema na Fally Ipupa wametajwa miongoni mwa wasanii wakuu watakaotumbuiza katika tamasha hilo.

Kwa upande wa muziki wa Amapiano, jukwaa la Piano People Stage linatarajiwa kuwakutanisha wasanii mbalimbali, akiwemo Kabza De Small, TxC na Dlala Thukzin.

Waandaaji wa Afro Nation wamesema orodha hiyo bado haijakamilika, huku wasanii wengine wakitarajiwa kutangazwa katika awamu zijazo kuelekea tamasha hilo.

Kwa Rayvanny ushiriki huo unampa nafasi ya kuwakilisha muziki wa Tanzania katika moja ya matukio ya kimataifa yanayolenga Afrobeats, Amapiano na muziki wa Afrika. Tamasha hilo limekuwa likifanyika Portugal tangu mwaka 2019 na limeendelea kuwaleta pamoja wasanii na mashabiki kutoka maeneo mbalimbali duniani.

Na Anifa Mwegelo



Posted on

Mwanamume Ampaiga Risasi Ex-Wake Baada Ya Kudai Msaada wa Malezi

Mwanamume mwenye umri wa miaka 63 nchini Marekani, Darrell Long, amepatikana na hatia ya jaribio la kumuua kwa makusudi mke wake wa zamani, Dawn, baada ya kumpiga risasi mara tano katika nyumba aliyokuwa akiishi pamoja na mtoto wao wa kiume.

Long, mkazi wa Pennsylvania, alipatikana na hatia Jumanne, Septemba 22, 2026, kwa makosa mbalimbali likiwemo jaribio la mauaji ya daraja la kwanza, uvamizi wa nyumba, shambulio la kusababisha majeraha makubwa, shambulio kwa kutumia silaha na unyanyasaji.

Tukio hilo lilitokea Machi 25, 2025, baada ya Long kuvamia nyumba ya Dawn wakati akiwa amelala kwenye sofa sebuleni. Kwa mujibu wa mwendesha mashtaka wa Kaunti ya Lebanon, Pier Hess Graf, Long alimpiga Dawn usoni kwa kutumia bunduki kabla ya kumpiga risasi mara kadhaa.

Dawn alijaribu kujitetea na katika purukushani hiyo alifanikiwa kumng’ang’ania Long na kumwangusha chini. Hata hivyo, Long aliendelea kutumia bunduki hiyo na kumpiga risasi nyingine, ikiwemo moja iliyompiga mkononi na kusababisha jeraha kubwa kwenye kidole chake cha shahada.

Bunduki hiyo ilikwama wakati wa mapambano, lakini baada ya Long kujaribu kuirekebisha, alifanikiwa kuendelea kumpiga Dawn risasi. Mwathiriwa, akiwa amejeruhiwa katika sehemu kadhaa za mwili, alijikokota hadi chumbani na kujifungia.

Dawn alifanikiwa kupiga simu ya dharura 911 kwa kutumia Apple Watch yake baada ya kuvunja sehemu ya kifaa hicho ili kuanzisha huduma ya dharura.

Long alikimbia kutoka eneo la tukio kabla ya polisi kumkamata. Mwendesha mashtaka amesema alifunga mlango kabla ya kuondoka, jambo ambalo lingeweza kuchelewesha msaada kwa Dawn.

Kwa mujibu wa mwendesha mashtaka, shambulio hilo lilihusishwa na mzozo kuhusu msaada wa malezi ya mtoto. Dawn aliwasilisha madai ya msaada wa malezi baada ya kuanza mchakato wa talaka mwaka 2023.

Pia imeelezwa kuwa katika mwezi mmoja kabla ya tukio hilo, Long alimtumia mtoto wao jumbe 23 zenye maneno makali kuhusu Dawn, akitaka mtoto huyo amfikishie ujumbe mama yake ambaye alikuwa amemzuia Long kuwasiliana naye moja kwa moja.

Mmoja wa jumbe hizo, uliotumwa siku 17 kabla ya shambulio, ulidaiwa kuwa na tishio kwamba endapo Dawn angebadilika mwenendo, mtoto wao angeishia kuwapoteza wazazi wote wawili.

Mwendesha mashtaka Hess Graf amesema Long bado anaendelea kumlaumu Dawn kwa shambulio hilo, huku akidai kuwa hakujutia alichokifanya.

Posted on

PSSSF YATOA ELIMU NA HUDUMA MKUTANO WA TRAMPA

Dodoma, Septemba 23, 2026

Mfuko wa Hifadhi ya Jamii kwa Watumishi wa Umma (PSSSF) umeshiriki katika Mkutano wa 14 wa Chama cha Menejimenti ya Kumbukumbu na Nyaraka Tanzania (TRAMPA) uliofunguliwa rasmi Jumatano, Septemba, 2026 na Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe, Ridhiwani Kikwete ambaye aliwataka wanachama wa TRAMPA kuhakikisha historia ya Taifa inalindwa, pamoja na kutoa huduma bora kwa wananchi wanaofika katika ofisi za umma.

Mhe. Ridhiwani Kikwete ameiagiza Taasisi za Umma kuanzisha vituo vya kisasa vya utunzaji wa kumbukumbu na nyaraka, huku akisisitiza matumizi ya mfumo wa Ofisi Mtandao (e-Office).

“Naagiza  Ofisi ya Rais, Menejimenti ya Utumishi wa Umma na Utawala Bora kufuatilia mara kwa mara matumizi ya mfumo huo na kubaini ofisi ambazo hazitumii mfumo huo ili hatua zichukuliwe” aliagiza Mhe. Kikwete  

Aidha, Mhe, Ridhiwani Kikwete alihitimisha hotuba yake kwa  kuagiza Ofisi za Umma kuwekeza nguvu katika matumizi sahihi ya kumbukumbu na kutathmini utekelezaji wa Dira ya Maendeleo ya Taifa ya 2050.

Pembeni mwa mkutano huo wa, PSSSF ilishiriki kwa kutoa huduma kwa wanachama wa TRAMPA ambao ni wanachama wa PSSSF. Mfuko hutumia majukwaa kama haya ili kutoa elimu na huduma kwa wanachama wake.

Afisa Matekelezo Mkuu wa PSSSF Mkoa wa Dodoma, Juma Milinga, amewasisitiza wanachama wa Chama cha Menejimenti ya Kumbukumbu na Nyaraka nchini (TRAMPA) kuendelea kujisajili na kutumia mifumo ya kidigitali katika kupata huduma za mfuko huo badala ya kutegemea matumizi ya makaratasi.

Ameyasema hayo wakati akizungumza katika Mkutano wa 14 wa TRAMPA uliofanyika jijini Dodoma leo Septemba 24, 2026.

Milinga amesema matumizi ya mifumo ya kidigitali yamesaidia kupunguza ucheleweshaji wa madai pamoja na kupunguza changamoto ya upotevu wa nyaraka, hatua inayowezesha wanachama kupata huduma kwa wakati.

Kwa upande wao, baadhi ya wanachama wa TRAMPA wameiomba Serikali kupitia PSSSF kuendelea kutoa elimu kuhusu huduma za PSSSF, sambamba na kuboresha miundombinu ya mawasiliano ili wanachama walioko maeneo ya vijijini waweze kupata huduma za mfuko huo kwa ufanisi.

mwisho

Posted on

FAHAMU CHANZO CHA UDUMAVU KWA WATOTO

Na Bibi Maendeleo Irene Samora, Matukio Daima Media

UDUMAVU ni hali inayotokea pale mtoto anapokuwa na kimo au urefu mfupi ikilinganishwa na umri wake kutokana na kuathirika kwa ukuaji na maendeleo ya mwili.

Akizungumza katika kipindi cha Bibi Maendeleo kinachorushwa na Matukio Daima Media, Bibi Maendeleo Irene Samora Kijinga amesema tatizo hilo husababishwa zaidi na ukosefu wa lishe bora wa muda mrefu, magonjwa au maambukizi ya mara kwa mara, pamoja na mazingira yasiyofaa kwa ukuaji wa mtoto.

Amesema Shirika la Afya Duniani (WHO) linaeleza kuwa udumavu hutokana na mchanganyiko wa lishe duni, maambukizi ya mara kwa mara na ukosefu wa malezi yanayochochea ukuaji na maendeleo ya mtoto.

Kwa mujibu wa Irene, udumavu huathiri ukuaji wa mwili na uwezo wa mtoto kujifunza. Mtoto mwenye udumavu anaweza kuwa mfupi sana kulingana na umri wake, kuchelewa kuzungumza, kutembea au kuketi, kuchoka mara kwa mara na kukosa nguvu mwilini.

Amesema athari nyingine ni kupungua kwa uwezo wa mtoto kuelewa masomo na kufanya shughuli mbalimbali ,Hali hiyo inaweza kusababisha mtoto kuwa na maendeleo duni shuleni na kushindwa kufikia kikamilifu uwezo wake wa kimwili na kiakili.

Irene amesema chanzo kikuu cha udumavu ni ukosefu wa chakula chenye virutubisho vya kutosha, vikiwemo protini, vitamini na madini muhimu kama chuma. Magonjwa ya mara kwa mara na mazingira duni pia yanaweza kuathiri ulaji, ufyonzwaji na matumizi ya virutubisho mwilini.

Ameongeza kuwa miongoni mwa sababu zinazoweza kumweka mtoto katika hatari ya kupata udumavu ni kuzaliwa na uzito mdogo, kutonyonyeshwa vizuri maziwa ya mama na kupewa chakula cha nyongeza kisichokidhi mahitaji ya mwili wake.

Sababu nyingine ni mtoto kuugua mara kwa mara magonjwa kama kuhara, malaria na minyoo. Kutopata huduma muhimu za afya, zikiwemo chanjo na matibabu kwa wakati, kunaweza kuongeza uwezekano wa mtoto kuugua mara kwa mara na kuathiri ukuaji wake.

Irene amesema udumavu unaweza kuzuiwa kwa kumpatia mtoto lishe bora yenye mchanganyiko wa vyakula mbalimbali, vikiwemo nyama, samaki, mayai, maziwa, mikunde, mboga, matunda na nafaka kamili.

Aidha, wazazi na walezi wanapaswa kuhakikisha watoto wanapata chanjo zote kwa wakati, wanapelekwa kupata matibabu ya haraka wanapougua na ukuaji wao unafuatiliwa mara kwa mara katika vituo vya afya.

Amesisitiza umuhimu wa kutoa elimu ya afya na lishe kwa wazazi, walezi na jamii nzima ili kuzuia udumavu na kuhakikisha watoto wanakua vizuri kimwili na kiakili.

“Udumavu kwa watoto unatokana zaidi na ukosefu wa lishe bora na magonjwa ya mara kwa mara. Hivyo, kinga yake inaanzia katika lishe bora, malezi yanayofaa na upatikanaji wa huduma bora za afya,” amesema Irene.