Mwanasheria Mkuu wa Chama cha Demokrasia na Maendeleo (CHADEMA), Dk Nshala Rugemeleza, amesema Mwenyekiti wa chama hicho, Tundu Lissu, ana nia ya kukata rufaa kupinga hukumu ya kifungo cha miaka minne jela iliyotolewa na Mahakama Kuu ya Tanzania, Masjala Ndogo ya Dar es Salaam.
Mbali na hatua ya kukata rufaa, Dk Nshala amesema chama hicho kinaandaa taratibu za kuomba dhamana kwa Lissu, akieleza kuwa kosa la uchochezi ambalo ametiwa hatiani nalo linadhaminika kwa mujibu wa sheria.
Akizungumza na waandishi wa habari katika makao makuu ya CHADEMA, Mikocheni jijini Dar es Salaam, Ijumaa Novemba 6, 2026, muda mfupi baada ya kutoka mahakamani, Dk Nshala amesema hatua hizo ni sehemu ya mipango ya chama katika kupinga uamuzi uliotolewa dhidi ya mwenyekiti wao.
Amesema ingawa uamuzi rasmi wa kukata rufaa utafanywa baada ya kufanya mazungumzo zaidi na Lissu, tayari kiongozi huyo ameonyesha nia ya kupinga hukumu hiyo kupitia taratibu za kisheria.
“Tutakaa na Lissu, lakini leo ameonyesha kuwa ana nia ya kukata rufaa. Kingine, Lissu ameonyesha kuwa mahakama haizingatii kwamba amekaa ndani siku 577 kwa kosa la uhaini, lakini leo mahakama imesema si uhaini bali uchochezi,” amesema Dk Nshala.
Kauli hiyo inakuja baada ya Mahakama Kuu kumwachia huru Lissu katika shtaka la uhaini, lakini kumtia hatiani kwa kosa dogo la uchochezi na kumhukumu kifungo cha miaka minne jela.
Katika hatua nyingine, CHADEMA imesema itafuata taratibu za kisheria kuwasilisha maombi ya dhamana, ikieleza kuwa inataka Lissu apate fursa ya kuwa nje wakati taratibu za kupinga hukumu hiyo zikiendelea.
Hata hivyo, maombi ya dhamana na hatua ya kukata rufaa vitategemea taratibu na maamuzi ya mahakama husika.
Kwa hatua hiyo, hatima ya Lissu sasa inaelekezwa katika hatua nyingine za kisheria, huku CHADEMA ikiweka wazi nia yake ya kutumia njia za kikatiba na kisheria kupinga hukumu hiyo.