admin – Page 86 – Habarimpya

September 19, 2026

MKARUDI NA USHINDI- ADA- MLINGA*

Dodoma

TIMU za Maliasili Sports Club zimetakiwa kuhakikisha zinacheza kwa nguvu, juhudi na maarifa michezo yote katika Michuano ya SHIMIWI 2026 ili kuhakikisha zinaipatia Wizara ya Maliasili na Utalii ushindi wa hali ya juu.

Wito huo umetolewa na Mkurugenzi Msaidizi Idara ya Utawala na Rasilimali Watu wa Wizara hiyo Bi. Violeth Mlinga wakati akiiaga timu hiyo kwa niaba ya Katibu Mkuu wa Wizara hiyo Dkt. Hassan Abbasi kabla ya kuanza safari yao kuelekea Moshi, Mkoani Kilimanjaro.

Bi. Mlinga amesisitiza kuwa, Wizara hiyo imeiamini Club hiyo hivyo wachezaji wana wajibu wa kuzingatia weledi na taratibu zote za Utumishi wa Umma ili kulinda taswira ya Wizara hiyo ili kuibuka na matokeo chanya ambayo ni ushindi kwa timu zote.

Ameongeza kuwa, ushiriki wa Wizara hiyo katika michuano hayo ni sehemu ya kuongeza wigo si tu wa kutangaza shughuli za Wizara bali kujenga pia uhusiano mwema wa kiutumishi na Wizara zingine kwa maslahi mapana ya taifa kwa ujumla.

Naye Mkwenyekiti wa Club hiyo Bw. Elia Mtalemwa, amesema Club hiyo imejiandaa vyema na kuwa lengo kuu ni kurudi na ushindi katika michezo yote kama walivyoelekezwa.

Pamoja na kuushukuru uongozi wa Wizara kwa mchango mkubwa katika maandalizi na ushiriki wa Club hiyo, amesema timu zote zimejiandaa vyema na kuwa lengo lao kuu ni ushindi kwenye michezo yote.

Maliasili Sports Club, inaelekea Moshi Mkoani Kilimanjaro kuungana na Wizara zingine kuoneshana ubabe katika Michuano ya SHIMIWI itakayoanza hivi karibuni.

September 19, 2026

MAKAMU WA RAIS AAGIZA MAWAZIRI WATATU KUTATUA MGOGORO WA MIPAKA PUGU NDANI YA SIKU SABA

Dar es Salaam.

Makamu wa Rais wa Jamhuri ya Muungano wa Tanzania, Mhe. Deogratius Ndejembi, amewaagiza Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (OWM–TAMISEMI), Waziri wa Ardhi, Nyumba na Maendeleo ya Makazi na Waziri wa Maliasili na Utalii kufika ndani ya siku saba katika Dampo la Pugu kwa ajili ya kutatua mgogoro wa muda mrefu wa wananchi kuhusu mipaka ya kiutawala na mpaka wa Msitu wa Kazimzumbwi.

Makamu wa Rais ametoa agizo hilo Septemba 18, 2026, jijini Dar es Salaam, wakati akizungumza na wananchi wa Pugu mara baada ya kufanya ziara katika Dampo la Pugu, linalohudumia Mkoa wa Dar es Salaam kwa kupokea taka, na kusikiliza kero zinazowakabili wananchi wa eneo hilo.

“Nikiwa Dampo kuna wazee wangu waliwasilisha malalamiko juu ya kubuguziwa katika Msitu wa Kazimzumbwi, wakidai hawajui kama wako eneo gani la utawala, Pwani au Dar es Salaam. Hivyo, ninawaelekeza Mawaziri wa TAMISEMI, Ardhi, Nyumba na Maendeleo ya Makazi na wa Maliasili na Utalii kuhakikisha ndani ya siku saba wawe wamefika hapa kutatua changamoto hiyo ya wananchi kubuguziwa,” amesema Mhe. Ndejembi.

Aidha, Mhe. Ndejembi amewataka mawaziri hao watakapofika katika eneo hilo kuzungumza na wananchi na kuhakikisha katika kutatua changamoto hiyo wanatumia taarifa rasmi ya Serikali kuhusu mipaka ya kiutawala, yaani Government Notice (GN) iliyochapishwa katika Gazeti la Serikali, kama msingi wa kubaini mipaka husika.

Akizungumza kwa niaba ya mawaziri wenzake, Waziri wa Nchi, OWM–TAMISEMI, Mhe. Prof. Riziki Shemdoe, ameahidi kutekeleza maelekezo hayo ya Makamu wa Rais kwa kufika katika eneo hilo ndani ya siku saba na kuzungumza na wananchi kwa ajili ya kutafuta suluhisho la mgogoro huo.

“Mhe. Makamu wa Rais, tumepokea maelekezo yako ya kutatua mgogoro huu wa wananchi wa mipaka ya kiutawala na Msitu wa Kazimzumbwi ndani ya siku saba. Hivyo, mimi Prof. Riziki Shemdoe, Waziri wa TAMISEMI, Dkt. Akwilapo, Waziri wa Ardhi, na Dkt. Ashatu Kijaji, Waziri wa Maliasili, tutakuja kuzungumza na wananchi ili kutatua mgogoro huo,” amesema Prof. Shemdoe.

Aidha, Prof. Shemdoe ameahidi kutekeleza maelekezo ya Makamu wa Rais ya kuzisimamia Halmashauri zote za Mkoa wa Dar es Salaam kuleta vitendea kazi, ikiwemo tingatinga (bulldozer), kwa ajili ya kuboresha mazingira na kuongeza ufanisi wa huduma ya upokeaji wa taka katika Dampo la Pugu.

Prof. Shemdoe amesema tayari amemwelekeza Mkuu wa Mkoa wa Dar es Salaam kuanza kufuatilia utekelezaji wa agizo hilo ili kuhakikisha vitendea kazi vinapatikana na hatua zinazohitajika zinachukuliwa.

Prof. Shemdoe ametumia fursa hiyo kumshukuru na kumpongeza Makamu wa Rais, Mhe. Deogratius Ndejembi, kwa kufanya ziara katika Dampo la Pugu, kusikiliza kero za wananchi na kutoa maelekezo ya hatua za haraka kuchukuliwa kwa ajili ya kuongeza ufanisi wa utendaji kazi wa dampo hilo linalohudumia Mkoa wa Dar es Salaam.

September 19, 2026

MAKAMU WA RAIS MHE NDEJEMBI AUNGANA NA WANANCHI KUFANYA MAZOEZI

Makamu wa Rais wa Jamhuri ya Muungano wa Tanzania, Mhe. Deogratius Ndejembi ameungana na wananchi mbalimbali kufanya mazoezi ya asubuhi katika barabara ya fukwe za Coco beach kuelekea Daraja la Tanzanite, Jijini Dar es Salaam, leo tarehe 19 Septemba 2026.

September 19, 2026

CCM Yapongeza ACT-Wazalendo Kuwasilisha Jina la Makamu wa Kwanza

Chama Cha Mapinduzi (CCM) Zanzibar kimepongeza uteuzi wa Makamu wa Kwanza wa Rais wa Zanzibar, kikisema hatua hiyo imekamilisha muundo wa Serikali ya Umoja wa Kitaifa kwa mujibu wa Katiba ya Zanzibar.

Akizungumza na waandishi wa habari ofisini kwake Kisiwandui, Katibu wa Kamati Maalum ya NEC, Idara ya Itikadi, Uenezi na Mafunzo Zanzibar, Khamis Mbeto Hamisi, amesema CCM imempongeza Rais wa Zanzibar na Mwenyekiti wa Baraza la Mapinduzi kwa kutekeleza matakwa ya Katiba.

Mbeto pia amepongeza Chama cha ACT-Wazalendo kwa kuwasilisha jina la mgombea kwa nafasi hiyo, akisema hatua hiyo ni sehemu ya utekelezaji wa misingi ya Serikali ya Umoja wa Kitaifa.

Amesema kwa mujibu wa Ibara ya 39 ya Katiba ya Zanzibar, Serikali hiyo inatakiwa kuwa na Makamu wa Kwanza na Makamu wa Pili wa Rais, pamoja na majukumu yao yaliyoainishwa kikatiba.

Kwa mujibu wa Mbeto, ACT-Wazalendo sasa inapaswa kushiriki kikamilifu katika utekelezaji wa majukumu ya Serikali ya Umoja wa Kitaifa kwa kuzingatia Katiba na sheria za Zanzibar.

Amesema CCM inatarajia viongozi watakaounda Serikali hiyo, wakiwemo Makamu wa Kwanza wa Rais na mawaziri, kufanya kazi kwa kuzingatia maslahi ya wananchi, Dira ya Taifa ya 2050 pamoja na mipango ya maendeleo ya Zanzibar.

Mbeto amesisitiza umuhimu wa viongozi wa kisiasa kutumia kauli zinazojenga umoja na mshikamano, huku akivitaka vyama vya siasa na wafuasi wao kuwa makini na matumizi ya mitandao ya kijamii ili kuepuka kauli zinazoweza kuleta mgawanyiko.

Amesema licha ya vyama kuendelea na shughuli zao za kisiasa, wanapaswa kutambua kuwa Serikali ya Umoja wa Kitaifa inalenga kuwaunganisha wananchi wa Zanzibar.

CCM imesema iko tayari kushirikiana na viongozi wote wa Serikali ya Umoja wa Kitaifa, wakiwemo Rais, Makamu wa Kwanza wa Rais, Makamu wa Pili wa Rais, mawaziri na watendaji wengine, katika kuhakikisha serikali inatekeleza majukumu yake kwa ufanisi.

Mbeto amesema ushirikiano huo unalenga kuimarisha umoja, mshikamano na maendeleo ya Zanzibar, huku akiwataka viongozi na wananchi kutumia fursa hiyo kujenga mazingira yatakayowezesha Zanzibar kupata maendeleo zaidi.

September 19, 2026

Makamu wa Rais Ndejembi Aungana na Wananchi Kufanya Mazoezi Dar

Makamu wa Rais wa Jamhuri ya Muungano wa Tanzania, Deogratius Ndejembi, ameungana na wananchi mbalimbali kufanya mazoezi ya asubuhi katika barabara ya fukwe za Coco Beach kuelekea Daraja la Tanzanite, jijini Dar es Salaam.

Mazoezi hayo yamefanyika leo, Septemba 19, 2026, yakishirikisha wananchi katika kuimarisha afya na kuhamasisha mtindo bora wa maisha.