Year: 2026

Dar es Salaam. Ili kuhakikisha makundi yote yanashiriki na kunufaika na fursa zinazotokana na uwekezaji nchini, Mamlaka ya Uwekezaji na Maeneo Maalum Tanzania (Tiseza) imeingia makubaliano na Ella Foundation kutumia mifuko inayozalishwa na watu wenye ulemavu wa kusikia kama zawadi kwa wawekezaji wanaofika nchini.

Mifuko hiyo inazalishwa na watu wenye uziwi kupitia ujuzi wanaoupata katika taasisi hiyo ikiwa ni sehemu ya juhudi za kuwawezesha kujitegemea na kuwapatia soko la uhakika la bidhaa zao.

Mkurugenzi wa Tiseza, Hilead Teri anasema ushirikiano huo ni sehemu ya utekelezaji wa jukumu la mamlaka kuhakikisha fursa za uwekezaji zinawafikia Watanzania wote wakiwamo watu wenye mahitaji maalumu.

Anasema miongoni mwa bidhaa zinazozalishwa na watu hao ni mifuko yenye ubora ambayo sasa Tiseza itakuwa ikinunua na kuitumia kama zawadi rasmi kwa wawekezaji wanaokuja nchini.

“Tutakuwa washirika wao wa kununua bidhaa ambazo zimetengenezwa na watu wenye makundi maalumu. Mfano ni mifuko hii ambayo tutaendelea kuitumia na kuwapatia wawekezaji mbalimbali,” anasema.

Kwa mujibu wa Teri, hatua hiyo inalenga kutoa soko endelevu kwa bidhaa huku ikiwezesha taasisi za Serikali kutumia mahitaji yao ya kawaida kuchochea matokeo chanya katika jamii.

Anasema awali Tiseza imekuwa ikitumia bidhaa zinazozalishwa nchini, ikiwamo korosho na mvinyo kama sehemu ya zawadi kwa wawekezaji hivyo kuongeza bidhaa zinazotengenezwa na watu wenye mahitaji maalumu kutasaidia kupanua fursa hizo.

“Tumekuwa tukitumia bidhaa za Tanzania kama korosho na mvinyo kwa wawekezaji. Sasa tutaongeza bidhaa hizi ambazo zimetengenezwa na watu wenye mahitaji maalumu. Hatua hii itawasaidia kupata soko endelevu la bidhaa zao na kuongeza fursa za kiuchumi,” anasema.

Anasema ushirikiano huo pia unaonyesha namna taasisi zinavyoweza kutumia shughuli zao za kawaida kusaidia makundi maalumu, huku ukichochea ubunifu, ujuzi na maisha endelevu kwa vijana.

Teri anasema Tiseza inalenga kuendeleza ushirikiano wa muda mrefu na Ella Foundation katika kuunga mkono na kutangaza ubunifu na ujuzi wa watu wenye mahitaji maalumu.

“Tutaangalia katika sera zetu kwani kuna baadhi ya kazi zinaweza kufundishwa hivyo tutawashawishi wawekezaji kuwa wanapotoa ajira wawafanye watu wenye ulemavu kuwa sehemu ya wanufaika,” anasema.

Kwa upande wake, mwanzilishi wa Ella Foundation, Esther Jaswant anasema ulemavu haupaswi kuwa kikwazo kwa mtu kupata uhuru wa kiuchumi, hivyo taasisi hiyo imeanzisha miradi ya uzalishaji wa bidhaa zenye ubora ili kuwasaidia viziwi kujitegemea.

“Moja ya miradi yetu ni kuzalisha bidhaa zenye ubora ili kusaidia viziwi kujikwamua kiuchumi. Fursa tuliyopata inatoa ujumbe kwamba Tanzania inawathamini watu wenye ulemavu, kwani mifuko yetu ina nembo inayoonyesha imetengenezwa na nani,” anasema.

Aliongeza kuwa matumizi ya bidhaa hizo na Tiseza kama zawadi kwa wawekezaji ni fursa muhimu ya kuitangaza kazi inayofanywa na viziwi, huku ikiwapatia soko na kuongeza thamani ya ujuzi wanaoupata.

Dar es Salaam. Jeshi la Polisi Kanda Maalumu ya Dar es Salaam limewakamata na kuwashikilia watuhumiwa 18 pamoja na pikipiki 23, likiwatuhumu kujihusisha na matukio ya kushambulia, kuchoma na kuharibu magari yanayopata ajali.

Polisi pia limewaonya waendesha bodaboda wenye tabia ya kujichukulia sheria mkononi baada ya ajali, likisema baadhi yao hujiona wamekosewa hata wanapokuwa wahusika au chanzo cha ajali, kisha kuchoma au kuharibu magari yaliyohusika.

Onyo hilo limetolewa baada ya ajali iliyotokea leo, Agosti 19, 2026, katika Barabara ya Kilwa, eneo la Mivinjeni, Temeke, iliyosababisha vifo vya watu wawili na kumjeruhi mmoja.

Kwa mujibu wa taarifa iliyotolewa na Kamanda wa Polisi Kanda Maalumu ya Dar es Salaam, Jumanne Muliro ajali hiyo ilitokea saa 3:45 asubuhi baada ya lori aina ya DAF lililokuwa na tela kugongana na pikipiki aina ya Boxer.

Lori hilo lilikuwa likitokea eneo la Uhasibu kuelekea Bendera Tatu, wakati pikipiki hiyo ikiendeshwa na Msichoke Mohamed, maarufu Mnyige, mkazi wa Chamazi, Dar es Salaam.

Polisi imesema chanzo cha ajali hiyo ni dereva wa pikipiki kuhama kutoka barabara ya huduma na kuingia katika Barabara ya Kilwa bila kuchukua tahadhari kwa watumiaji wengine wa barabara.

Wakati wa ajali, pikipiki hiyo ilikuwa imebeba abiria wawili.

Ajali hiyo ilisababisha kifo cha dereva wa pikipiki, Msichoke Mohamed, pamoja na mmoja wa abiria, George Luis Nyantora, mfanyabiashara na mkazi wa Mbagala Zakhem, Dar es Salaam.

Abiria mwingine, William Ashery, maarufu Tumbo, mjasiriamali na mkazi wa Mwanza, alijeruhiwa na kupelekwa hospitalini kwa matibabu.

Bodaboda wachoma lori baada ya ajali

Baada ya ajali hiyo, kundi la waendesha bodaboda lilikusanyika eneo la tukio na kudaiwa kuchoma moto sehemu ya mbele ya lori lililohusika katika ajali, maarufu ‘horse’.

Jeshi la Polisi limelaani tukio hilo, likisema kuchoma moto, kupiga au kuharibu magari yanayohusika katika ajali, pamoja na kupora mali zilizomo ndani yake, ni vitendo vya kihalifu na kinyume cha sheria.

Polisi imesema baadhi ya waendesha bodaboda wamekuwa na tabia ya kujiona wao ndio waliokosewa kila ajali inapotokea, hata pale ambapo uchunguzi unaweza kuonyesha kuwa wao ndio waliohusika au kusababisha ajali.

Kwa mujibu wa Polisi, badala ya kuacha mamlaka zinazohusika kufanya uchunguzi na kuchukua hatua kwa mujibu wa sheria, baadhi yao hukusanyika na kuamua kulipiza kisasi kwa kushambulia magari au watu wanaohusishwa na ajali.

Jeshi hilo limeonya kuwa hatua hiyo haiwezi kuvumiliwa na kwamba waendesha bodaboda watakaohusika na uharibifu wa mali au vitendo vya vurugu watachukuliwa hatua za kisheria.

Watuhumiwa 18 washikiliwa

Polisi Kanda Maalumu ya Dar es Salaam imesema imewakamata na kuwashikilia watuhumiwa 18 pamoja na pikipiki 23 zinazodaiwa kuhusishwa na matukio ya aina hiyo.

Baadhi ya pikipiki hizo, kwa mujibu wa taarifa hiyo, ziliachwa na watuhumiwa waliokimbia baada ya matukio yaliyotokea maeneo ya Mbopo, Mabwepande, Bunju B, Tegeta, Kunduchi, Kimara na Magomeni Kanisani.

Polisi imesema kukamatwa na kushikiliwa kwa watuhumiwa hao ni sehemu ya hatua zinazochukuliwa kukomesha tabia ya baadhi ya waendesha bodaboda kushambulia magari mara baada ya ajali.

Katika tukio jingine lililotajwa na Polisi, Ally Abdallah (44), fundi rejeta na dereva bodaboda, anadaiwa kuwa miongoni mwa kundi la waendesha pikipiki lililohusika katika tukio la Agosti 15, 2026.

Kwa mujibu wa Polisi, siku hiyo Abdallah akiwa na kundi la wenzake na pikipiki zao, walilishambulia gari lenye namba T 333 EMR, aina ya Harrier, rangi nyeusi, baada ya mmoja wao kuhusika katika ajali.

Gari hilo lilishambuliwa kwa jiwe kubwa lililovunja kioo cha nyuma na kusababisha uharibifu pamoja na hofu kwa mwenye gari.

Dar es Salaam. Chama cha ACT- Wazalendo kimepinga uamuzi wa Serikali wa kusitisha kwa miezi sita leseni ya Gazeti la MwanaHALISI kikisema hatua hiyo inakiuka uhuru wa habari na haki ya umma kupata taarifa.

Katika taarifa yake ya Jumatano, Agosti 19, 2026, ACT Wazalendo kimekosoa uamuzi huo  na kuitaka Serikali kuondoa kusitishwa kwa leseni hiyo.

“ACT Wazalendo tunalaani kwa nguvu zote uamuzi wa Serikali kusitisha kwa miezi sita leseni ya uchapishaji na usambazaji wa Gazeti la MwanaHALISI kuanzia Agosti 19, 2026,” imeeleza taarifa hiyo iliyosaniwa na waziri kivuli wa habari, mawasiliano na teknolojia ya habari wa chama hicho, Shangwe Shao.

Chama hicho kimeeleza kinautambua wajibu wa vyombo vya habari kuzingatia weledi, lakini kimesisitiza kuwa makosa ya kitaaluma yanapaswa kushughulikiwa kwa namna inayolinda uhuru wa habari, haki ya kusikilizwa na masilahi ya umma.

“Serikali imejipa mamlaka ya kumchunguza, kumsikiliza na kumuadhibu mtoa huduma wa habari,” imeeleza ACT- Wazalendo.

Kwa mujibu wa taarifa ya Serikali kupitia Idara ya  Habari Maelezo, leseni ya MwanaHALISI imesitishwa kwa miezi sita kuanzia Agosti 19, 2026, baada ya kukiuka sharti la tatu la leseni linalovitaka vyombo vya habari kuzingatia Sheria ya Huduma za Habari, Sura ya 229, na Kanuni zake za mwaka 2017.

Maelezo imeeleza kosa lilihusisha toleo namba 571 la Agosti 6 hadi 12, 2026, lililokuwa na habari yenye kichwa “Nchimbi agoma kujiuzulu” katika kurasa za kwanza, pili na tatu. 

Idara hiyo imedai habari hiyo haikuzingatia usahihi, mizania na uthibitishaji kabla ya kuchapishwa.

Maelezo pia imesema katika ukurasa wa pili wa gazeti hilo lilichapisha picha ya Waziri wa Habari, Utamaduni, Sanaa na Michezo, Paul Makonda, lakini maelezo chini ya picha yalimtaja kuwa Makamu wa Rais, Dk Emmanuel Nchimbi.

Idara imetaja hilo kuwa dosari ya mwandishi na wahariri.

*Kuhusu mizania* 
Maelezo imesema habari hiyo ilijikita katika madai ya kujiuzulu kwa Nchimbi bila kuonyesha kuwa yeye alihojiwa au kutoa kauli kuhusu suala hilo.

 Aidha, imesema madai yaliyodaiwa kutolewa na Makonda hayakuambatana na uthibitisho wa moja kwa moja kutoka kwake.

Idara pia imesema mwandishi hakufanya jitihada za kuwahoji viongozi wa CCM au wajumbe wa kikao kilichodaiwa kujadili suala hilo, akiwamo Katibu Mkuu, Katibu wa Itikadi na Uenezi au Ofisa Habari, ili kuthibitisha taarifa zilizotokana na vyanzo fiche.

Uamuzi huo, kwa mujibu wa Maelezo, umezingatia pia mwenendo wa gazeti hilo kurudia makosa baada ya kuonywa. 

ACT Wazalendo, hata hivyo, imesema hatua hiyo inapaswa kupingwa kwa kulinda nafasi ya vyombo vya habari katika demokrasia.

“Uhuru wa habari na haki ya kupata, kutoa na kupokea taarifa ni nguzo za Katiba, demokrasia na uwajibikaji wa Serikali. Sheria ya Huduma za Vyombo vya Habari ya mwaka 2016 na sheria nyingine zinazompa mamlaka makubwa Mkurugenzi wa Habari juu ya vyombo vya habari zinapaswa kufutwa, na kuondoa vifungu vinavyokandamiza uhuru wa habari,” ACT Wazalendo imeeleza.

Dar es Salaam. Makamu Mwenyekiti wa Chama cha Mapinduzi (CCM) Bara, Stephen Wasira, amewataka wanachama wa chama hicho kukutana mara kwa mara katika vikao rasmi ili kujadili masuala mbalimbali na kuepuka kupotoshwa na taarifa zisizo za kweli zinazosambazwa kwenye mitandao ya kijamii.

Wasira ametoa kauli hiyo leo, Agosti 19, 2026, wilayani Ikungi, mkoani Singida, wakati akianza ziara rasmi ya kikazi ya kukagua uhai wa chama hicho.

Amesema vikao vya wanachama ni muhimu kwa kuwa vinatoa fursa ya kupata taarifa sahihi, kubadilishana mawazo na kuambiana ukweli kuhusu masuala yanayohusu chama na nchi.

“Wanachama wetu nchi nzima, kwa mujibu wa Katiba mna vikao vya wanachama. Mkutane muambizane. Siku hizi kwenye mitandao kuna uongo mwingi sana. Usipoangalia unaweza hata wewe kushirikishwa kusema uongo,” amesema.

Wasira amesema umuhimu wa wanachama kutokubali taarifa zinazotolewa mitandaoni bila kuzihakiki, badala yake wazijadili katika vikao na kutafuta ufafanuzi kutoka kwa watu wenye ujuzi kuhusu suala husika.

“Kwa hiyo ni vizuri kukutana mkasema hili jambo limesemwa sana, maana yake ni nini? Mkamwita mtu anayejua akawasaidia kufafanua,” amesema.

Amesema vikao hivyo pia vinapaswa kutumika kujadili masuala mbalimbali yanayoendelea nchini ili kuwajengea wanachama uelewa na kuwawezesha kukitetea chama kwa hoja sahihi.

Katika hatua nyingine, Wasira amesema CCM itaendelea kulinda uhuru na umoja wa Tanzania, akieleza kuwa mambo hayo ni sehemu ya misingi ambayo chama hicho kimepewa jukumu la kuilinda.

 “Hii ndiyo CCM. Kazi ya kwanza tulipewa ni uhuru na tunalinda. Ya pili ni umoja na tunahakikisha unabaki. Yeyote anayetaka kuubomoa anabomoa msingi ambao hawezi. Anaweza kutikisa matawi lakini mizizi itabaki chini,” amesema.

Wasira pia amekosoa kauli za baadhi ya watu wanaodai kuwa CCM haijafanya chochote tangu Tanzania ipate uhuru, akisema madai hayo hayana uhalisia.

“Wanasema hatujafanya chochote tangu uhuru. Lakini uhuru wa kusema ndio huo walionao. Mdomo una kazi mbili: kusema na kula. Mtu akisema hakuna chochote tangu uhuru, muache tu. Huyo ana matatizo anahitaji msaada,” amesema.

Musoma. Wafanyabiashara katika soko la mitumba la Mlango Mmoja, Kata ya Nyasho, Manispaa ya Musoma, wameingia katika taharuki baada ya askari wa Jeshi la Akiba la manispaa hiyo, maarufu mgambo, kuzingira soko hilo na kuwazuia kufungua vibanda vyao.

Hali hiyo imetokea leo, Jumatano, Agosti 19, 2026, baada ya wafanyabiashara hao kufika sokoni asubuhi kwa ajili ya kuendelea na biashara zao, lakini wakawakuta mgambo wametanda katika maeneo mbalimbali ya soko.

Wafanyabiashara hao wamesema walizuiwa kufungua vibanda vyao hadi watakapolipa Sh10,000 kila mmoja, kiasi kilichoelezwa kuwa ada ya maombi ya kibanda.

Baadhi yao wamesema wameshangazwa na hatua hiyo kwa kuwa walitumia fedha zao kujenga vibanda hivyo baada ya manispaa kutenga eneo hilo kwa ajili ya soko.

“Tunaambiwa tujaze fomu kwa Sh10,000, ambayo ni ada ya maombi. Mbaya zaidi, ukiomba huna uhakika wa kupewa hicho kibanda, wakati tumetumia gharama zetu kujenga vibanda. Huu ni unyanyasaji, tunaomba msaada,” amesema Jenifa Yusufu.

Amesema pia kumekuwa na ongezeko la kodi ya vibanda bila kuzingatia hali ya biashara, jambo analodai linawaweka katika wakati mgumu, hasa kwa kuwa wengi wao hutegemea mikopo.

Kwa mujibu wa Jenifa, awali walilipa Sh12,000 kwa mwezi kama kodi ya kibanda, lakini Aprili mwaka huu ilipanda hadi Sh15,000 na sasa imefikia Sh24,000.

Mfanyabiashara mwingine, Yohana Simon, amesema wanaendelea kutozwa kodi na tozo, huku soko likikosa baadhi ya huduma muhimu, ikiwamo vyoo vya kutosha.

“Hapa mazingira ni sisi ndio tunapambana nayo. Hivi vibanda tumejenga kwa gharama zetu. Hatuna huduma ya ulinzi kutoka manispaa na hata choo kipo kimoja, ambacho hakikidhi mahitaji,” amesema.

Katibu wa soko hilo, David Machera, amesema wafanyabiashara walifikisha malalamiko yao kwa mkuu wa mkoa wa Mara, ambaye ameahidi kukutana nao kesho kusikiliza na kujadili changamoto hiyo.

“Leo tumekuja tunakuta mgambo wamezingira eneo lote, wakati tuna ahadi ya kukutana na Mkuu wa Mkoa kesho. Tuna mikopo tunatakiwa kurejesha, unapotuzuia kufanya biashara unategemea nini?” amehoji.

Mbunge wa Musoma Mjini (CCM), Mgore Miraji, alifika sokoni na kuwasiliana na Mkurugenzi wa Manispaa ya Musoma, akimtaka kuwaondoa mgambo ili wafanyabiashara waendelee na shughuli zao.

“Hii si sawa kabisa. Serikali kila siku inatafuta namna ya kuwawezesha watu wake kujiimarisha kiuchumi. Inakuwaje mfanyabiashara anafungiwa kibanda chake? Mkurugenzi, waondoe mgambo wako hapa ili shughuli ziendelee, kisha tutakutana tufanye kikao kama tulivyokubaliana,” amesema.

Mgore amesema malalamiko hayo aliyapokea tangu juzi na jana walikubaliana kufanya kikao pamoja na mkurugenzi, ofisa biashara na wafanyabiashara hao.

Amesema wafanyabiashara hawajapata elimu ya kutosha kuhusu malipo hayo, akieleza kuwa wanapaswa kuwa na namba ya utambulisho wa mlipa kodi ili kusajiliwa katika mfumo wa Serikali wa Tausi na kupewa control namba za malipo.

“Mnatakiwa kusajiliwa kwenye mfumo wa Tausi ili kila mmoja apewe control namba awe analipa kodi yake kama kawaida. Kwa kuwa wote ni wafanyabiashara wenye vibanda hapa, msiwe na hofu kwani hakuna atakayeondolewa,” amesema.

Mkuu wa Wilaya ya Musoma, Juma Chikoka, amekiri kutokea kwa hali hiyo na kusema ameitisha kikao cha pamoja cha wafanyabiashara, viongozi wao, manispaa na mbunge kwa ajili ya kupata ufumbuzi wa kudumu.

“Ni kweli hiyo hali imetokea. Tayari tumechukua hatua na hivi tunavyoongea biashara zinaendelea pale sokoni. Lengo la kikao ni kupata ufumbuzi wa kudumu juu ya suala hili,” amesema.

Maswa. Jeshi la Polisi wilayani Maswa, mkoani Simiyu, limegeuza maadhimisho ya miaka 20 ya dhana ya Polisi Jamii kuwa fursa ya kuwafikia wananchi kwa vitendo baada ya kutembelea Hospitali ya Wilaya ya Maswa na kutoa misaada kwa wagonjwa, kuchangia damu na kufanya usafi.

Misaada hiyo imetolewa kwa wagonjwa waliolazwa katika wodi za watoto na wazazi, ikiwa ni sehemu ya juhudi za jeshi hilo kuimarisha uhusiano na jamii na kuonyesha kuwa askari ni sehemu ya wananchi wanaowahudumia.

Akizungumza leo Agosti 19, 2026, wakati wa shughuli hiyo, Mrakibu wa Polisi, Ramadhani Mkimbu amesema maadhimisho hayo yamewapa fursa ya kwenda moja kwa moja kwa wananchi na kushiriki shughuli zenye manufaa kwa jamii.

Amesema kwa Maswa wameamua kuifikia hospitali hiyo kwa kufanya usafi, kuchangia damu na kutoa mahitaji mbalimbali kwa wagonjwa, akieleza kuwa hatua hiyo ni sehemu ya utekelezaji wa dhana ya Polisi Jamii.

“Hivi vitu vyote ambavyo tumevileta kwa ajili ya kuwasaidia wagonjwa katika wodi hizi za wazazi na watoto ni michango ya kila askari kutoka katika mfuko wake na hii ndiyo inayodhihirisha dhana hii ya Polisi Jamii,” amesema.

Mkimbu amesema askari hawapaswi kuonekana kama maadui wa wananchi kwa kuwa wao pia ni sehemu ya jamii na wanatoka katika jamii hizo.

“Askari Polisi ni sehemu ya jamii na si maadui kwa raia kwani wametoka katika jamii. Ni vizuri tukashirikiana na wananchi katika shughuli mbalimbali, zikiwemo za kupambana na uhalifu na wahalifu katika jamii,” amesema.

Amesema kazi za Jeshi la Polisi haziwezi kufanikiwa bila ushirikiano wa wananchi na wadau mbalimbali, wakiwamo taasisi za Serikali na sekta binafsi.

Mganga Mfawidhi wa Hospitali ya Wilaya ya Maswa, Dk Deogratius Mtaki amesema ushiriki wa polisi katika shughuli za kijamii umeonyesha namna jeshi hilo lilivyo karibu nao.

Amesema baadhi ya wagonjwa wana uwezo mdogo wa kujihudumia, hivyo misaada iliyotolewa itawasaidia wakati wakiendelea na matibabu.

“Tuna wagonjwa waliolazwa katika hospitali yetu ya wilaya ambao uwezo wao ni mdogo katika kujihudumia, hivyo misaada hii itawasaidia. Hii pia imetufundisha hata sisi wenyewe kujitoa kwa ajili ya kuwahudumia wengine,” amesema.

Beatrice Julius, ambaye mtoto wake amelazwa hospitalini hapo, amelishukuru Jeshi la Polisi kwa msaada huo, akisema umeonyesha kuwa jeshi hilo linaweza kushirikiana na wananchi katika masuala yanayogusa maisha yao ya kila siku.

Naye Magreth Kadomola, aliyejifungua na kulazwa katika wodi ya wazazi, amesema kutembelewa na polisi na kupatiwa mahitaji mbalimbali kumempa hisia kuwa jeshi hilo lipo karibu na wananchi.

Amesema matukio kama hayo yanaweza kuongeza imani ya wananchi kwa Jeshi la Polisi na kuimarisha ushirikiano katika masuala ya usalama.

“Tunapowaona polisi wakija hospitalini kututembelea na kutusaidia, tunajisikia kuwa wako pamoja nasi. Hii inaongeza imani na ukaribu kati ya wananchi na polisi,” amesema.

Miongoni mwa vitu vilivyotolewa na askari hao ni sabuni za kufulia, mafuta ya kujipaka, pampasi za watoto, dawa za meno, maji na juisi, huku baadhi ya askari wakishiriki pia katika uchangiaji wa damu.