Month: November 2026

*_▪︎ Bei ya kununua mahindi yaongezwa hadi shilingi 500_*

WAZIRI MKUU Dkt. Mwigulu Nchemba ameitaka Wakala wa Taifa wa Hifadhi ya Chakula (NFRA) kuharakisha taratibu za kuuza mazao pindi masoko yanapopatikana, ili kuepuka kupoteza fursa hizo kutokana na michakato mirefu.

Vilevile, amezitaka taasisi zinazohusika kuendelea kutafuta masoko ya kudumu na kuwezesha uuzaji wa mazao nje ya nchi, huku akieleza kuwa bei ya kununua mahindi kupitia NFRA imeongezwa kutoka shilingi 450 hadi shilingi 500.

Amesema hayo Bungeni, jijini Dodoma leo (Alhamisi, Novemba 05, 2026), wakati wa kipindi cha maswali ya papo kwa papo kwa Waziri Mkuu, katika Mkutano wa Tano, Kikao cha Nane cha Bunge la 13.

Alikuwa akijibu swali la Mbunge wa Kongwa, Isaya Mngurumi Moses, aliyetaka kufahamu mikakati ya Serikali ya kutafuta masoko na kuboresha bei za mazao ili wakulima wanufaike na uzalishaji wao.

Dkt. Mwigulu amesema NFRA inapopata masoko inapaswa kukamilisha taratibu za mauzo kwa wakati, kwa sababu ucheleweshaji unaweza kuwafanya wanunuzi kupata mazao katika masoko mengine yenye michakato mifupi zaidi.

Amesema Serikali imekuwa ikitumia mazungumzo na viongozi wa mataifa mbalimbali kutafuta masoko ya mazao ya Tanzania na kupanua wigo wa biashara kwa wakulima.

Kuhusu bei ya mahindi, Waziri Mkuu amesema amekutana na Wizara yenye dhamana ya kilimo mara kadhaa kujadili namna ya kuboresha bei ya ununuzi kupitia NFRA.

Amesema bei hiyo iliongezwa kutoka shilingi 200 hadi shilingi 300, baadaye shilingi 450 na sasa shilingi 500.

“Tulikaa tena kwa mara ya mwisho, tukashauriana kwamba kama bado wanaweza kwenda juu zaidi, wafanye hivyo, na tulikubaliana sasa watapeleka iwe shilingi 500,” amesema.

Amewataka wakulima wenye mahindi wanayohitaji kuuza kufika katika ofisi za NFRA za mikoa na kanda ili kutumia fursa ya bei hiyo iliyoboreshwa.

Hata hivyo, amesema NFRA huenda isiweze kununua mahindi yote, hivyo jitihada za kupanua masoko na kuwezesha mauzo nje ya nchi zinapaswa kuendelea.

Katika hatua nyingine, Waziri Mkuu amewaelekeza Wakuu wa Mikoa kuchukua hatua kali dhidi ya watu wanaopeleka mifugo katika mashamba ya wakulima bila ridhaa yao, akisisitiza kuwa Serikali haitakubali uvunjaji wa sheria wa makusudi.

Akijibu swali la Mbunge wa Nachingwea, Fadhili Ally Liwaka, kuhusu migogoro ya wakulima na wafugaji, amesema hatua zinapaswa kuchukuliwa dhidi ya mtu aliyefanya kosa, bila kugeuza tukio hilo kuwa mgogoro kati ya jamii.

“Kama mmoja amefanya kosa hilo, achukuliwe hatua kali huyo huyo. Wala wakulima wasione wafugaji ni adui zao, na wala wafugaji wasione wakulima ni adui zao,” amesema.

Amewataka wananchi kuepuka kujichukulia sheria mkononi na badala yake kutumia vyombo vya sheria kutafuta haki.

Vilevile, amewaelekeza viongozi katika ngazi mbalimbali kuimarisha mipango ya matumizi bora ya ardhi na kusitisha ugawaji wa maeneo kinyemela. Amesema rushwa, matumizi mabaya ya ofisi na ugawaji wa ardhi usiofuata taratibu vinachochea migogoro katika jamii.

Kuhusu huduma za afya, Waziri Mkuu amesema Serikali itafanya uandikishaji wa awamu ya pili wa bima ya afya kwa wote ili kuendelea kuyafikia makundi ambayo bado hayajafikiwa.

Akijibu swali la Mbunge wa Viti Maalum, Stella Alex Ikupa, kuhusu matibabu kwa watu wenye ulemavu ambao bado hawajafikiwa na mpango huo, amezitaka taasisi za afya kuendelea kuwahudumia kupitia dirisha la msamaha wa matibabu.

“Pasitokee mtu kukosa matibabu kwa sababu ya hali yake ya ulemavu ama hali yake ya kifedha,” amesema.

Amewahimiza pia Watanzania kuendelea kujisajili katika mfumo wa bima ya afya kwa wote, akisisitiza kuwa mpango huo unalenga wananchi wote, wenye kipato na wasio na kipato.

MBEYA; Wafanyabiashara na wawekezaji jijini Mbeya wametakiwa kujitokeza katika vikao vya majadiliano ya miradi ya maendeleo wanapoalikwa na serikali ili kupata taarifa za fursa za uwekezaji na kujiandaa kushiriki katika utekelezaji wake,badala ya kusubiri miradi itangazwe ndipo waanze kuzitafuta fursa hizo.

Wito huo umetolewa na Mkuu wa Idara ya Viwanda, Biashara na Uwekezaji wa Jiji la Mbeya, Festo Nashon, wakati wa kikao cha majadiliano na wawekezaji pamoja na taasisi za kifedha kuhusu taarifa za upembuzi wa awali wa mradi wa ujenzi wa stendi mpya ya Uyole, unaotarajiwa kutekelezwa kwa ushirikiano kati ya sekta ya umma na sekta binafsi.

Nashon amesema ushiriki wa wawekezaji wazawa una umuhimu mkubwa kwa sababu wanafahamu mazingira ya biashara na uwekezaji katika maeneo yao hivyo wana nafasi nzuri ya kutambua fursa na changamoto zilizopo katika maeneo wanayokusudia kuwekeza.

Mkuu wa Idara ya Maandalizi na Uendelezaji wa Miradi kutoka Kituo cha Ubia (PPP) Innocent Mauki, amesema taasisi hiyo inaendelea kufanya ziara katika halmashauri mbalimbali nchini kwa ajili ya kujadiliana na wadau kuhusu miradi inayotarajiwa kutekelezwa kwa ushirikiano na sekta binafsi.

“Ziara hii imelenga kupata maoni ya wawekezaji na wadau kuhusu mambo yanayopaswa kuzingatiwa na kuboreshwa katika maandiko ya miradi hiyo ili yaendane na mazingira ya uwekezaji pamoja na mahitaji halisi ya wananchi wa Mbeya,”amesema Mauki

Amesema Halmashauri ya Jiji la Mbeya ina miradi miwili inayotarajiwa kutekelezwa kwa mfumo wa ubia na sekta binafsi ukiwemo wa ujenzi wa Stendi mpya ya Uyole huku akisisitiza kuwa lengo ni kuhakikisha miradi hiyo inakuwa na tija kwa wananchi , huku ikiwezekana pia kupata ufadhili au mikopo kutoka taasisi za kifedha.

Amesema ushiriki wa sekta binafsi katika miradi ya maendeleo ni nguzo muhimu ya kufikia malengo ya Dira ya Taifa ya Maendeleo ya 2050, inayolenga kuifanya sekta binafsi kuwa mshiriki mkuu katika kukuza uchumi wa Tanzania kwa asilimia 70.

Mwakilishi wa wawekezaji, Mkuu wa Masoko wa Kampuni ya Maranatha, Shitindi Venance, amewahimiza Watanzania kutumia fursa zilizopo katika kipindi hiki akisema fursa hizo zinaweza kupungua kadiri muda unavyokwenda huku akiwahimiza vijana kuchangamkia fursa ya kubuni mifumo ya kidigitali katika itakayosaidia uendeshaji miradi hiyo.