Category: Burudani

Posted on

Shigongo Aendelea na Ziara za Kusikiliza Kero za Wananchi Buchosa

Global Publishers
October 10, 2026
0 views
0 Comments

BUCHOSA: Mamia ya wananchi wa Jimbo la Buchosa wameendelea kujitokeza katika mikutano ya hadhara ya Mbunge wao, Eric Shigongo, inayofanyika katika kata mbalimbali za jimbo hilo kwa lengo la kusikiliza sera na mipango ya utekelezaji wa Ilani ya Chama Cha Mapinduzi (CCM).

Mikutano hiyo iliyofanyika katika Kata za Maisome, Bangwe, Iligamba na Bupandwa imekuwa fursa kwa wananchi kueleza changamoto zinazowakabili, kuuliza maswali na kupata majibu kuhusu masuala mbalimbali ya maendeleo katika maeneo yao.

Katika mikutano hiyo, wananchi wameonesha kufurahishwa na majibu yaliyotolewa na Shigongo kuhusu hoja walizowasilisha, huku wakipata nafasi ya kufuatilia mipango ya utekelezaji wa miradi inayolenga kuboresha huduma za kijamii na miundombinu jimboni humo.

Akizungumza kwa niaba ya wananchi wa Kata ya Maisome, Diwani wa kata hiyo, Sikujua Makaye, alimpongeza Shigongo kwa mchango wa fedha zinazolenga kufanikisha miradi ya maendeleo iliyokuwa imekwama kwa muda mrefu.

Makaye alitaja baadhi ya miradi hiyo kuwa ni Kituo cha Afya Maisome, Shule ya Msingi Kagogoro, barabara ya Kanini hadi Kisaba na Shule ya Msingi Ilogelo, ambayo kwa mujibu wa taarifa zilizotolewa, ilikuwa imekwama kwa kipindi cha miaka 15 bila kukamilika.

Miradi hiyo inatajwa kuwa muhimu kwa wananchi wa maeneo husika kutokana na mchango wake katika kuboresha upatikanaji wa huduma za afya, elimu na usafiri.

Kuendelea kwa mikutano hiyo kunatoa nafasi kwa wananchi wa Buchosa kufuatilia utekelezaji wa mipango ya maendeleo, huku viongozi wakipata fursa ya kusikiliza mahitaji ya wananchi na kueleza hatua zinazochukuliwa katika kutatua changamoto zao.

Wananchi wanatarajia kuona mipango na ahadi zinazotolewa katika mikutano hiyo zikifuatwa na utekelezaji wenye matokeo yanayoonekana katika maisha yao ya kila siku.

Posted on

NGAJILO AWEZESHA VIONGOZI KATA ZOTE 18 KUPATA MAFUNZO YA ITIKADI YA CHAMA

 

 Mbunge wa Jimbo la Iringa Mjini, Fadhili Ngajilo amewezesha  viongozi wa kata  zote 18 za jimbo hilo kushiriki mafunzo ya itikadi ya Chama Cha Mapinduzi (CCM), yanayofanyika kuanzia Oktoba 9 hadi 19, 2026.

Ngajilo amechukua jukumu hilo ikiwa ni sehemu ya mchango wake katika kufanikisha mafunzo hayo yanayolenga kuimarisha chama kuanzia ngazi za chini.

Mafunzo hayo yanawalenga makada na viongozi wa CCM katika ngazi za kata na matawi, yakilenga kuongeza uelewa wa itikadi ya chama, kuongeza wanachama, kujenga uwezo wa kisiasa na kimaadili, pamoja na kuwawezesha viongozi wa chama kusimamia utekelezaji wa majukumu ya Serikali.

Akizungumzia mchango huo, Diwani wa Kata ya Igumbiro, Jack Chatanda, amempongeza mbunge huyo kwa moyo wake wa kujitolea na kuunga mkono shughuli za chama.

Chatanda amesema Ngajilo amekuwa akisaidia shughuli mbalimbali za CCM, ikiwemo vikao vya ngazi za wilaya na kata, kila anapowasilishwa maombi ya msaada.

“Nadhani amekuwa mwepesi kusaidia chama kwa kuwa amelelewa na chama tangu akiwa Chipukizi, hivyo ana mapenzi ya dhati,” alisema Chatanda.

Kwa upande wao, viongozi wa CCM katika kata mbalimbali za Iringa Mjini wamempongeza Ngajilo kwa mchango wake, wakieleza kuwa hatua hiyo inaonesha kujali na kuthamini shughuli za chama.

Wamesema mchango huo utasaidia kurahisisha ushiriki wa kata zote 18 katika mafunzo hayo na kuimarisha maandalizi ya viongozi na makada watakaoshiriki.

Mafunzo hayo yanatarajiwa kuwa sehemu ya juhudi za kuimarisha uelewa wa itikadi, maadili na misingi ya CCM miongoni mwa viongozi na wanachama wake katika Jimbo la Iringa Mjini.

Mwisho

Posted on

Mahakama Yaahirisha Uamuzi wa Kesi ya Said Issa Dhidi ya Chadema

Mahakama Kuu ya Tanzania, Masjala Ndogo ya Dar es Salaam, imeahirisha kutolewa kwa uamuzi kuhusu maombi ya zuio katika kesi inayowahusisha Said Issa Mohamed na Ahmed Rashid Khamis dhidi ya Chama cha Demokrasia na Maendeleo (CHADEMA).

Mahakama imesema uamuzi huo utatolewa Oktoba 22, 2026, saa 8 mchana, baada ya Jaji aliyepaswa kutoa uamuzi huo kuwa na majukumu mengine nje ya kituo chake cha kazi.

Kesi hiyo, inayojulikana kama Maombi Madogo Namba 14864 ya 2026, inatokana na mgogoro wa ndani ya CHADEMA ulioanza mwaka 2025.

Katika shauri hilo, Said Issa Mohamed, aliyekuwa Makamu Mwenyekiti wa CHADEMA Zanzibar, pamoja na Ahmed Rashid Khamis na marehemu Maulidah Anna Komu, waliwasilisha kesi dhidi ya viongozi wa chama hicho wakilalamikia kile walichodai kuwa ni ubaguzi katika usambazaji wa rasilimali za chama kati ya Tanzania Bara na Zanzibar.

Mwezi Aprili 2026, Mahakama ya Rufaa ilifuta uamuzi wa Mahakama Kuu uliokuwa umezuia shughuli za kisiasa za CHADEMA kwa siku 309, hatua iliyorejesha haki ya chama hicho kuendelea na shughuli zake za kisiasa.

Baadaye, Mei 28, 2026, Mahakama Kuu ilitupilia mbali kesi kuu Namba 8323 ya 2025 kutokana na kasoro za kisheria katika hati ya malalamiko, ikiwemo kutotajwa kwa tarehe husika zinazohusiana na madai yaliyowasilishwa.

Kufuatia uamuzi huo, Juni 6, 2026, CHADEMA ilimvua Said Issa Mohamed uanachama, ikidai kuwa alikiuka katiba na kanuni za chama kwa kuchukua hatua za kisheria dhidi ya viongozi wake.

Uamuzi kuhusu maombi ya zuio katika shauri hilo sasa unatarajiwa kutolewa Oktoba 22, 2026 katika Mahakama Kuu, Masjala Ndogo ya Dar es Salaam.

Posted on

RAIS SAMIA APELEKA TABASAMU KWA WASANII TOZO ZIKIPUNGUZWA

Baraza la Sanaa la Taifa (BASATA) limetangaza marekebisho ya kanuni ambazo zimepunguza utitiri wa tozo na kupunguza kwa kiwango kikubwa kiwango cha ada walizokuwa wakitozwa wasanii na wanaofanya shughuli za sanaa kwa mwaka.

Hayo yalitangazwa jana jijini Dar es Salaam na Kaimu Katibu Mtendaji wa baraza hilo, Edward Buganga wakati akizungumza na waandishi wa habari ofisini kwake kuhusu marekebisho hayo ya kanuni.

Alisema marekebisho ya tozo hizo kwa mwaka 2026 yalifanywa na Bunge zinazolenga kuimarisha usimamizi wa Sanaa, kuwawezesha wasanii na wadau wa Sanaa, na kupunguza utitiri wa tozo.

Alisema kanuni hizi ambazo tayari zimeanza kutumika na tunawakumbusha wadaua kuwa hazilengi kuzuia ubunifu na zinaweka utaratibu unaolinda wasanii, hadhira, watoto, urithi wa Sanaa na maslahi ya wadau, huku ikiwezesha sekta kukua na kushindana ndani na nje ya nchi.

 Alisema mabadiliko hayo ya kanuni yanahusu wasanii na vikundi vya Sanaa, maDJs, washereheshaji, maproduza, Mameneja,  Waandaaji wa Matukio, Studio na Kampuni za Sanaa, Vyombo vya habari vinavyotumia Wasanii na Kazi za Sanaa, Vyama na Mashirikisho, Wamiliki wa Kumbi, Wasambazaji wa kazi za Sanaa na wadau wengine wa Sanaa.

Alisema kwa mujibu wa kanuni hizo mpya, msanii huru anapotaka kujisajili kwa mara ya kwanza analazimika kulipa shilingi 10,000 na kuhuisha kibali chake kila mwaka atalipia shilingi 10,000 tofauti na zamani ambapo walikuwa wakilipa shilingi 40,000.

Alisema tozo za vikundi vya sanaa zilikuwa shilingi 60,000 kwa mwaka lakini kwa sasa zimepunguzwa hadi shilingi 30, 000 wanaposajili na watakapotaka kuhuisha vibali vyao kila mwaka watalazimika kutoa tena shilingi 30,000.

Buganga alisema mwandaaji wa tukio la sanaa atalazimika kuomba kibali kwa BASATA siku 30 kabla ya tukio lake na kwamba kibali hicho sasa kitatolewa bila malipo.

“Hapa tunasisitiza waandaaji wa matukio ya sanaa wawe na vibali ili wataalamu wetu wawasaidie kuwapa mwongozo wa Kwenda vizuri na kibali atapata bure, akikiuka tutamchukulia hatua,” alisema

Alisema kanuni zimegusia usajili na utoaji wa vibali, upunguzaji wa baadhi ya tozo, usimamizi wa sanaa katika Mikoa na Wilaya, usalama wa matukio na kumbi za Sanaa, ulinzi wa watoto katika sanaa, ulinzi wa sanaa za jadi na urithi, maadili, nidhamu na mazingira bora na nafuu kwa shughuli za Sanaa.

Buganga alisema usajili na vibali vitatolewa kupitia mfumo wa kidijitali wa AMIS na kwamba mwombaji akitimiza masharti, cheti au kibali hutolewa ndani ya siku saba na huwa halali kwa muda wa mwaka mmoja.

Kuhusu matukio ya sanaa, Buganga alisema matukio yoye ya sanaa yanahitaji kuwa na kibali cha BASATA Pamoja na mpango wa tukio ambavyo vinatakiwa kuwasilishwa angalau siku 30 kabla.

“Mwandaaji anatakiwa kuhakikisha wasanii na wahusika wote wana vibali halali, usalama wa washiriki na hadhira unazingatiwa, na maudhui yanazingatia sheria na Maadili ya mtanzania,” alisema.

Alisema kazi za sanaa hazipaswi kuchochea vurugu, ubaguzi, unyanyasaji au kukiuka sheria na badala yake sanaa inaweza kuelimisha, kukosoa, kuonya na kuelekeza jamii na kwamba ukosoaji wa kijamii si kosa iwapo unazingatia sheria na Maadili.

Akizungumzia ulinzi wa sanaa za jadi, alisema matumizi ya Sanaa za jadi kwa madhumuni ya kibiashara nje ya muktadha wa jamii husika yatahitaji kibali cha BASATA.

Alisema hatua hiyo inalenga kulinda urithi, utamaduni na haki za jamii zinazomiliki na kurithisha Sanaa hizo na kwamba mapato yatakayopatikana kupitia matumizi ya Sanaa Jadi yatarejeshwa kwa jamii husika kwenye eneo la Sanaa.

Kuhusu wasanii wa nje na maonesho nje ya nchi, Buganga alisema msanii au kikundi kinachokwenda nje ya nchi kwa maonesho kinahitaji kuwa na kibali cha BASATA na kuwasilisha taarifa ndani ya kabla ya safari.

“Wasanii wa kigeni wanaokuja Tanzania kwa shughuli za kibiashara watahitaji kuwa na  kibali cha BASATA. Shughuli za mafunzo, warsha, kubadilishana ujuzi au kidiplomasia zinaweza kupewa utaratibu maalumu wa kutotozwa ada, kwa mujibu wa Kanuni,” alisema .

Mwisho

Posted on

Mahakama Yaahirisha Uamuzi wa Kesi ya Said Issa Dhidi ya Chadema

Mahakama Kuu ya Tanzania, Masjala Ndogo ya Dar es Salaam, imeahirisha kutolewa kwa uamuzi kuhusu maombi ya zuio katika kesi inayowahusisha Said Issa Mohamed na Ahmed Rashid Khamis dhidi ya Chama cha Demokrasia na Maendeleo (CHADEMA).

Mahakama imesema uamuzi huo utatolewa Oktoba 22, 2026, saa 8 mchana, baada ya Jaji aliyepaswa kutoa uamuzi huo kuwa na majukumu mengine nje ya kituo chake cha kazi.

Kesi hiyo, inayojulikana kama Maombi Madogo Namba 14864 ya 2026, inatokana na mgogoro wa ndani ya CHADEMA ulioanza mwaka 2025.

Katika shauri hilo, Said Issa Mohamed, aliyekuwa Makamu Mwenyekiti wa CHADEMA Zanzibar, pamoja na Ahmed Rashid Khamis na marehemu Maulidah Anna Komu, waliwasilisha kesi dhidi ya viongozi wa chama hicho wakilalamikia kile walichodai kuwa ni ubaguzi katika usambazaji wa rasilimali za chama kati ya Tanzania Bara na Zanzibar.

Mwezi Aprili 2026, Mahakama ya Rufaa ilifuta uamuzi wa Mahakama Kuu uliokuwa umezuia shughuli za kisiasa za CHADEMA kwa siku 309, hatua iliyorejesha haki ya chama hicho kuendelea na shughuli zake za kisiasa.

Baadaye, Mei 28, 2026, Mahakama Kuu ilitupilia mbali kesi kuu Namba 8323 ya 2025 kutokana na kasoro za kisheria katika hati ya malalamiko, ikiwemo kutotajwa kwa tarehe husika zinazohusiana na madai yaliyowasilishwa.

Kufuatia uamuzi huo, Juni 6, 2026, CHADEMA ilimvua Said Issa Mohamed uanachama, ikidai kuwa alikiuka katiba na kanuni za chama kwa kuchukua hatua za kisheria dhidi ya viongozi wake.

Uamuzi kuhusu maombi ya zuio katika shauri hilo sasa unatarajiwa kutolewa Oktoba 22, 2026 katika Mahakama Kuu, Masjala Ndogo ya Dar es Salaam.

Posted on

Mwigizaji Nana Patekar Afariki Dunia Akiwa Na Miaka 75

Mwigizaji mkongwe wa India, Nana Patekar, amefariki dunia akiwa na umri wa miaka 75 baada ya kupata mshtuko wa moyo katika makazi yake ya Dona Paula, Goa.

Taarifa kutoka Manipal Hospital zimeeleza kuwa Patekar alifikishwa hospitalini akiwa tayari hana fahamu, huku madaktari wakifanya juhudi za kumuokoa kabla ya kuthibitisha kifo chake.

Kwa mujibu wa daktari Shekhar Salkar wa Manipal Hospital, Patekar alikuwa ametuma ujumbe kwa rafiki yake majira ya saa 2:30 usiku akieleza kuwa alikuwa hajisikii vizuri na alikuwa akipata maumivu upande wa kushoto wa mwili.

Rafiki huyo aliuona ujumbe baadaye na kufika nyumbani kwa Patekar majira ya saa 4:00 asubuhi, ambapo alimkuta akiwa anapata shida ya kupumua na kutokwa jasho.

Timu ya matibabu iliwasili katika makazi yake na kuanza kumpa huduma ya kwanza ya CPR kabla ya kumpeleka hospitalini. Juhudi za kumuokoa ziliendelea njiani na hospitalini, huku madaktari wakiendelea na CPR kwa takribani dakika 45 hadi saa moja.

Hata hivyo, juhudi hizo hazikufanikiwa na Patekar alitangazwa kuwa amefariki dunia majira ya saa 5:20 asubuhi.

Mwili wake ulipelekwa Goa Medical College kwa uchunguzi wa kitabibu ili kubaini kwa kina chanzo cha kifo chake.

Patekar alikuwa miongoni mwa waigizaji mashuhuri katika sinema za Kihindi na Kimarathi, akiwa na safari ya kisanii iliyodumu kwa takribani miongo mitano.

Alianza kuonekana katika filamu mwaka 1978 na baadaye kupata umaarufu kupitia filamu mbalimbali zikiwemo Parinda, Krantiveer, Prahaar na Salaam Bombay. Alijulikana kwa uigizaji wenye nguvu na uwezo wa kuigiza nafasi zenye mitazamo tofauti.

Katika maisha yake ya kisanii, Patekar alishinda Tuzo tatu za National Film Awards na kutunukiwa Padma Shri, moja ya tuzo kubwa za kiraia nchini India.

Mbali na uigizaji, pia alifanya kazi kama mwongozaji na mtayarishaji wa filamu. Pia alihusika katika shughuli za kijamii, ikiwemo kupitia Naam Foundation, iliyolenga kusaidia wakulima na juhudi za uhifadhi wa maji.

Kifo chake kimeibua maombolezo nchini India, huku viongozi na wasanii mbalimbali wakitoa salamu za rambirambi.

Waziri Mkuu wa India, Narendra Modi, amemsifu Patekar kwa umahiri wake wa kisanii, upekee na uwezo wa kuacha alama katika kila nafasi aliyocheza.

Muigizaji Akshay Kumar pia ametoa salamu za rambirambi kufuatia kifo hicho.

Patekar ameacha mke wake pamoja na mtoto mmoja wa kiume, huku tasnia ya filamu nchini India ikipoteza mmoja wa waigizaji waliodumu kwa muda mrefu katika jukwaa la sanaa.

Posted on

TFS YAPIGA JEKI UJENZI WA OFISI ITIMBO*

-*_Yatoa mifuko 50 ya saruji, kuahidi tofali 8,000_*

Na Mwandishi Wetu, Iringa

MUFINDI: Wakala wa Huduma za Misitu Tanzania (TFS), kupitia Shamba la Miti Sao Hill, umeunga mkono ujenzi wa ofisi ya Kijiji cha Itimbo, Wilaya ya Mufindi mkoani Iringa, kwa kukabidhi mifuko 50 ya saruji na kuahidi kutoa tofali 8,000.

Vifaa hivyo vilikabidhiwa Oktoba 7, 2026, ikiwa ni sehemu ya juhudi za TFS kupitia Shamba la Miti Sao Hill kuimarisha ushirikiano na jamii zinazozunguka shamba hilo. Msaada huo unatarajiwa kuongeza kasi ya ujenzi wa ofisi hiyo na kuboresha mazingira ya utoaji wa huduma za kijamii na kiutawala kwa wananchi.

Akizungumza wakati wa makabidhiano, Mhifadhi Mkuu wa Shamba la Miti Sao Hill, PCO Tebby Yoramu, alisema msaada huo ni sehemu ya utaratibu wa TFS kushirikiana na kusaidia jamii zinazozunguka maeneo ya misitu inayosimamiwa na taasisi hiyo.

“Tunatambua mchango wa wananchi katika shughuli za uhifadhi, hivyo ni muhimu pia sisi kushirikiana nao katika maeneo mbalimbali ya maendeleo,” alisema PCO Yoramu.

Alisema ushirikiano kati ya TFS na jamii ni muhimu katika kuimarisha uhifadhi wa misitu, huku wananchi wakiwa wadau muhimu katika kulinda na kuhifadhi rasilimali hizo kwa manufaa ya kizazi cha sasa na kijacho.

Mwenyekiti wa Kijiji cha Itimbo, Obiath Kilonge, aliishukuru TFS kwa msaada huo akisema umekuja wakati muafaka na utasaidia kuongeza kasi ya ujenzi wa ofisi ya kijiji, ambayo itakuwa na manufaa kwa wananchi katika kupata huduma za kijamii na kiutawala.

“Tunawashukuru sana TFS na Shamba la Miti Sao Hill kwa msaada huu. Mifuko 50 ya saruji na tofali 8,000 ni msaada mkubwa kwetu na utasaidia sana katika ujenzi wa ofisi yetu,” alisema Kilonge.

Mtendaji wa Kijiji cha Itimbo, Zaituni Jafari, alisema msaada huo unaonyesha umuhimu wa ushirikiano uliopo kati ya TFS na jamii zinazozunguka Shamba la Miti Sao Hill, akiahidi kuwa kijiji hicho kitaendelea kushirikiana na taasisi hiyo katika shughuli za uhifadhi wa misitu na mazingira.

Mwenyekiti wa CCM Tawi la Itimbo, Augen Kahulo, aliipongeza TFS kwa kuendelea kuwa karibu na jamii, akisema msaada huo ni ishara ya ushirikiano wa vitendo na utaongeza ari ya wananchi kushiriki katika kulinda misitu na mazingira. “Uhifadhi wa misitu ni jukumu la pamoja, hivyo tutaendelea kuhamasisha wananchi wa Itimbo kulinda misitu na mazingira yetu,” alisema Kahulo.

Posted on

Serikalu yaahidi maji safi vijiji vyote Hanang – HabariLeo

MANYARA: Naibu Waziri wa Maji, Mhandisi Kundo Mathew, amewahakikishia wananchi wa Wilaya ya Hanang’ kuwa Serikali itaendelea kuhakikisha wanapata huduma ya maji safi na salama katika vijiji vyote ambavyo bado havijafikiwa na huduma hiyo.
‎
‎Mhandisi Kundo ameelekeza mamlaka za maji mkoani Manyara kuhakikisha ifikapo 2030 Kila kijiji katika wilaya ya Hanang kinafikiwa huduma ya maji.
‎
‎Kundo amesema hayo wilayani Hanang’, mkoani Manyara, wakati akihitimisha ziara yake ya siku mbili ambapo amemuagiza Meneja wa RUWASA Mkoa wa Manyara kuhakikisha wananchi hawatembei zaidi ya kilomita mbili kufuata huduma ya maji, kwa kuwasogezea huduma hiyo karibu na makazi yao.
‎
‎Amezielekeza mamlaka za maji mkoani Manyara kuhakikisha ifikapo 2030 Kila kijiji katika wilaya ya Hanang kinafikiwa huduma ya maji.
‎
‎Alisema mkoa wa Manyara bado vijiji 55 vimebaki kutokuwa na huduma rasmi ya maji safi na salama ambapo katika wilaya ya Hanang bado vijiji 20 pekee ambavyo vimebaki kutokuwa na miundombinu rasmi.
‎
‎”Hakuna nchi itaendelea bila kujali sekta ya maji,maji ni uhai ni siasa na ni afya yetu pamoja na nguvu kazi ya taifa” Aliongeza kuwa
‎
‎”Maji ni uchumi, uwekezaji ambapo kupitia uwepo wa maji shughuli mbalimbali zitafanyika,” alisema Mhandisi Kundo.
‎
‎Aliwahimiza wananchi wa kijiji cha Mulbadaw kulinda miundombinu ya maji ikiwemo  vyanzo vya maji ili iwe endelevu itakayosaidia vizazi vijavyo.
‎
‎Baadhi ya wananchi wa wilaya ya Hanang wameishukuru serikali na kwamba kwa muda mrefu walikuwa wakimfuata huduma ya maji kwa kutembea zaidi ya kilomita 5.
‎

Posted on

JUMUIYA YA WAZAZI CCM KITWIRU YATOA HAMASA KWA WANAFUNZI IPOGOLO

 

NA ANGEL  MAGESA (UoI) Matukio Daima Media 

 Jumuiya ya Wazazi ya Chama Cha Mapinduzi (CCM) Kata ya Kitwiru imetembelea Shule ya Sekondari Ipogoro na kutoa hamasa kwa wanafunzi wanaojiandaa kufanya mitihani ya Taifa ya Kidato cha Pili na cha Nne, huku ikiwataka kusoma kwa bidii, kuwa na nidhamu na kutunza mazingira.

Katika ziara hiyo, jumuiya hiyo iliwapatia wanafunzi vifaa vya shule, ikiwemo kalamu na penseli, kwa ajili ya kuwasaidia katika maandalizi ya mitihani, sambamba na kuwahimiza kutumia vizuri muda wao na kuzingatia masomo.

Katibu Mkuu wa Jumuiya ya Wazazi CCM Kata ya Kitwiru, Chiku Mbilinyi, aliwataka wanafunzi kujiandaa mapema kwa mitihani, kuwa na nidhamu na kusikiliza ushauri unaotolewa na walimu pamoja na wazazi.

Mbilinyi alisema elimu pekee haitoshi bila juhudi, nidhamu na maandalizi mazuri, akisisitiza pia umuhimu wa wanafunzi kushiriki katika utunzaji wa mazingira ili kukabiliana na changamoto za kimazingira.

“Maisha yana changamoto na ushindani, ndiyo maana tunawaambia wanafunzi wajipange vizuri, wasome kwa bidii na kuwa tayari kukabiliana na changamoto zinazoweza kujitokeza kama El Niño. Ni muhimu pia kutunza mazingira yetu kwa sababu mazingira bora ni sehemu ya maisha bora,” alisema Mbilinyi.

Alisema wanafunzi wanapaswa kujiuliza kama wamejiandaa ipasavyo tangu walipoanza masomo, badala ya kusubiri hadi kipindi cha mitihani ndipo waanze kufanya maandalizi.

Julius Saranga, ambaye ni mjumbe wa Jumuiya ya Wazazi CCM kata ya Kitwiru , aliwataka wanafunzi kutumia ipasavyo fursa wanayoipata kupitia elimu, huku akisisitiza umuhimu wa nidhamu na maandalizi ya mapema.

Saranga alisema ushirikiano kati ya wanafunzi, walimu na wazazi ni muhimu katika kuhakikisha wanafunzi wanafikia malengo yao ya kitaaluma.

“Ushirikiano kati ya wanafunzi, walimu na wazazi ni muhimu katika kuwasaidia kufikia malengo yao ya kitaaluma,” alisema.

Kwa upande wao, walimu wa Shule ya Sekondari Ipogolo, wakiongozwa na kaimu mkuu wa shule, walisema wamejipanga kuhakikisha wanafunzi wa Kidato cha Pili na cha Nne wanafanya vizuri katika mitihani ya Taifa.

Walieleza kuwa maandalizi hayo yanahusisha ufuatiliaji wa maendeleo ya wanafunzi, kuhudhuria vipindi kwa wakati na kuwahimiza wanafunzi kusoma kwa bidii.

“Tumepanga kuhakikisha wanafunzi wetu wanafanya vizuri katika mitihani ya Taifa. Tunawasihi wasome kwa bidii, wawe na nidhamu, wahudhurie vipindi na wazazi waendelee kushirikiana nasi ili tuweze kuongeza ufaulu,” walisema walimu hao.

Baadhi ya wanafunzi walieleza kuwa ziara hiyo imewapa hamasa zaidi ya kufanya maandalizi ya mapema na kuongeza juhudi katika masomo yao.

Catherine Bakari, mwanafunzi wa Kidato cha Nne, alisema ujumbe walioupata umewahamasisha kusoma kwa bidii, kuwa na nidhamu na kutunza mazingira.

“Tumeelewa kuwa tunapaswa kusoma kwa bidii, kuwa na nidhamu na pia kutunza mazingira yetu ili kukabiliana na changamoto zinazotuzunguka, ikiwemo El Niño,” alisema Catherine.

Naye Yusuph Ally, mwanafunzi wa Kidato cha Pili, alisema ziara hiyo imewasaidia kutambua umuhimu wa maandalizi ya mapema na kutumia elimu wanayoipata kujenga uwezo wa kukabiliana na changamoto za maisha.

“Ziara hii imetufundisha kuwa maandalizi ni muhimu. Tunapaswa kusoma kwa bidii, kuwa na nidhamu na kuwa tayari kukabiliana na changamoto kama El Niño,” alisema Yusuph.

Ziara hiyo imekuwa sehemu ya juhudi za kuwajengea wanafunzi uelewa kuhusu umuhimu wa elimu, nidhamu, maandalizi ya mapema na utunzaji wa mazingira, huku ikiwahamasisha kutumia fursa ya elimu kujenga maisha yao ya baadaye.

Posted on

Video: Mwabukusi Amtaka Mutungi Kuvifuta Vyama Visivyofanya Shughuli, Atoa Wito kwa Gen Z

Global Publishers
October 7, 2026
12 views
0 Comments

DAR ES SALAAM — Rais wa Chama cha Wanasheria Tanganyika (TLS), Wakili Boniface Mwabukusi, amemtaka Msajili wa Vyama vya Siasa nchini, Jaji Francis Mutungi, kuvifuatilia vyama vya siasa ambavyo havionekani kutekeleza majukumu na shughuli zao kikamilifu, akipendekeza vifutwe iwapo havikidhi matakwa ya kisheria.

Mwabukusi ametoa kauli hiyo leo, Oktoba 7, 2026, wakati wa uzinduzi wa uongozi mpya na nembo ya Baraza la Vyama vya Siasa, uliofanyika katika Hoteli ya Hyatt Regency jijini Dar es Salaam.

Amesema ni muhimu Msajili kuhakikisha vyama vya siasa vilivyosajiliwa vinafanya shughuli zao kwa mujibu wa sheria na taratibu zilizowekwa, badala ya kubaki kwenye orodha ya vyama vilivyosajiliwa bila kuwa na shughuli zinazoonekana.

Aidha, Mwabukusi amesisitiza umuhimu wa kutoa nafasi kwa kizazi kipya, hususan vijana wa Gen Z, kushiriki kikamilifu katika shughuli za kisiasa nchini.

Amesema vijana hao wanapaswa pia kupewa fursa ya kuanzisha vyama vyao vya siasa iwapo wanaona kuna haja ya kuwa na majukwaa yatakayowakilisha mitazamo na matarajio ya kizazi chao.

Kwa mujibu wa Mwabukusi, ushiriki wa vijana katika siasa ni muhimu katika kuhakikisha mifumo ya kisiasa inaendelea kuakisi mabadiliko ya kijamii na mitazamo ya vizazi vipya.