Category: Burudani

Posted on

Maganya: Jumuiya ya Wazazi Yaunga Mkono Nchimbi Kuvuliwa Uanachama – Video

Global Publishers
August 28, 2026
0 views
0 Comments

Mwenyekiti wa Taifa wa Jumuiya ya Wazazi ya Chama Cha Mapinduzi (CCM), Fadhili Maganya, amesema jumuiya hiyo inaunga mkono uamuzi wa kumvua uanachama wa CCM, Dkt. Emmanuel Nchimbi.

Maganya ameyasema hayo Agosti 27, 2026, akiwa Misungwi, mkoani Mwanza, wakati wa ufunguzi wa sherehe za Wiki ya Wazazi Kitaifa.

Amesema msimamo huo unatokana na hatua zilizochukuliwa na chama dhidi ya Dkt. Nchimbi, huku akisisitiza umuhimu wa wanachama kuheshimu katiba, kanuni na maamuzi ya chama.

Posted on

Baada ya Kimya, Mwijaku Amtaka Maua Sama Aachie Muziki Mpya

Mjadala kuhusu kurejea kwa msanii wa Bongo Fleva, Maua Sama, katika muziki umeibuka upya baada ya mwanahabari na mchambuzi wa burudani Mwijaku kumtaka msanii huyo kuanza kutoa kazi mpya.

Kupitia ukurasa wake wa Instagram leo, Agosti 27, 2026, Mwijaku ametoa ujumbe mfupi lakini wenye uzito kwa Maua Sama, akisisitiza kuwa mashabiki wake bado wanahitaji kusikia muziki mpya kutoka kwake.

“Tunataka nyimbo mpya,” aliandika Mwijaku.

Kauli hiyo imeibua hisia mbalimbali kwenye mitandao ya kijamii, huku baadhi ya mashabiki wakionyesha hamu ya kumuona Maua Sama akirejea studio na kuendelea na safari yake ya muziki.

Maua Sama ni miongoni mwa wasanii wa kike waliowahi kufanya vizuri katika muziki wa Bongo Fleva na Afro-Pop nchini Tanzania.

Alijenga jina kupitia nyimbo mbalimbali zilizopokelewa na mashabiki, ikiwemo “Iokote”, ambayo ilichangia kuongeza umaarufu wake katika tasnia ya muziki.

Kwa kipindi cha hivi karibuni, mashabiki wamekuwa wakisubiri kusikia kazi mpya kutoka kwa msanii huyo, huku maisha yake binafsi yakionekana kuchukua sehemu kubwa ya muda wake.

Ujumbe wa Mwijaku umeongeza matarajio kwa mashabiki wanaotamani kumuona Maua Sama akirudi kwenye muziki.

Kwa kuwa tayari ana historia na msingi wa mashabiki katika tasnia hiyo, kurejea kwake kwa kazi mpya kunaweza kuongeza ushindani katika muziki wa kike na kutoa hamasa mpya kwa mashabiki wa Bongo Fleva.

Kwa sasa, bado haijafahamika iwapo Maua Sama amepanga kutoa kazi mpya, lakini ujumbe wa Mwijaku umeweka wazi jambo moja mashabiki bado wanaisubiri sauti yake.

Stori na Nasra Kassim | GPL -TUDACO

Posted on

CCM KUMFUTA DKT. NCHIMBI UANACHAMA: JE, ANAKOMA MOJA KWA MOJA KUWA MAKAMU WA RAIS?

 

WAKILI PAUL KISABO ANAKUJA NA JIBU HILI  KUWA  HAPANA.

Ibara ya 47(4)(c) ya Katiba inaweka uanachama na udhamini wa chama cha siasa kama moja ya sifa za mtu kuteuliwa kuwa mgombea wa nafasi ya Makamu wa Rais. Aidha, Ibara ya 47(4)(d) inamtaka mtu huyo kuwa na sifa zinazomwezesha kuwa Mbunge au Mjumbe wa Baraza la Wawakilishi.

Hivyo, kuwa mwanachama na mgombea aliyependekezwa na chama cha siasa ni sharti la kikatiba katika uteuzi wa Makamu wa Rais.

Hata hivyo, baada ya mtu kushika nafasi hiyo, mazingira ya kukoma kuwa Makamu wa Rais yanaainishwa na Ibara ya 50(2) ya Katiba. Kwa mazingira ya Dkt. Emmanuel Nchimbi, Ibara ya 50(2)(c) inaeleza kuwa Makamu wa Rais ataendelea kushika kiti chake hadi atakapojiuzulu, huku Ibara ya 50(2)(h) ikitambua kukoma kushika nafasi hiyo vinginevyo kwa mujibu wa masharti ya Katiba.

Muhimu zaidi, Ibara ya 50(2) haisemi kwamba Makamu wa Rais anakoma kushika nafasi yake moja kwa moja anapopoteza uanachama wa chama kilichomdhamini.

Hii ni tofauti na nafasi ya Mbunge. Ibara ya 71(1)(e) ya Katiba inaeleza wazi kwamba Mbunge ataacha kuwa Mbunge iwapo ataacha kuwa mwanachama wa chama alichokuwa mwanachama wake wakati alipochaguliwa au kuteuliwa kuwa Mbunge.

Kwa hiyo, pale Katiba ilipotaka kupoteza uanachama wa chama kusababishe kupoteza nafasi ya kikatiba, imeeleza hivyo wazi. Masharti kama hayo hayajawekwa katika Ibara ya 50 kuhusu Makamu wa Rais.

Dkt. Nchimbi aliwasilisha barua yake ya kujiuzulu tarehe 25 Agosti 2026 na kubainisha kwamba kujiuzulu kwake kutaanza kutumika tarehe 4 Septemba 2026.

Ibara ya 149(2) ya Katiba inaweka msingi muhimu kuhusu muda wa kuanza kutumika kwa kujiuzulu: pale mtu anapowasilisha kujiuzulu kwake kwa maandishi na kutaja tarehe ambayo kujiuzulu huko kutaanza kutumika, kujiuzulu huko kunakuwa na athari kuanzia tarehe aliyobainisha.

Kwa hiyo, kwa tafsiri ya masharti haya ya Katiba, kufutwa kwa uanachama wa CCM pekee hakumalizi moja kwa moja nafasi ya Dkt. Nchimbi kama Makamu wa Rais. Kwa kuwa katika barua yake alibainisha tarehe 4 Septemba 2026 kuwa ndiyo tarehe ya kuanza kutumika kwa kujiuzulu kwake, basi kujiuzulu huko kunaanza kuwa na athari za kikatiba tarehe hiyo.

Paul Kisabo

Wakili

Posted on

Ayra Starr Aandika Historia Billboard, “Starrgirl” Yaingia Namba 4 Duniani

Mwimbaji wa Nigeria, Ayra Starr, ameendelea kuonyesha nguvu ya muziki wa Afrika katika soko la kimataifa baada ya album yake mpya “Starrgirl” kuingia katika nafasi ya nne kwenye Billboard World Albums Chart.

Mafanikio hayo yanaifanya “Starrgirl” kuwa miongoni mwa miradi iliyofanya vizuri kwenye chati hiyo, huku Ayra Starr akiendelea kujenga jina lake katika soko la muziki duniani.

Hii ni mara ya kwanza kwa Ayra Starr kuingia kwenye Billboard World Albums Chart kupitia album yake kama msanii wa solo, hatua inayochukuliwa kuwa moja ya mafanikio makubwa katika safari yake ya muziki pamoja na kuongeza heshima kwa muziki wa Nigeria.

Album hiyo ilitolewa rasmi Agosti 14, 2026, kupitia Mavin Records na Republic Records, ikiwa ni album yake ya tatu ya studio.

“Starrgirl” inafuatia album zake mbili zilizotangulia, “19 & Dangerous” iliyotoka mwaka 2021 na “The Year I Turned 21” iliyotolewa mwaka 2024.

Album hiyo ina jumla ya nyimbo 16, huku Ayra Starr akiwashirikisha baadhi ya majina makubwa kutoka Nigeria na kimataifa, akiwemo Wizkid, Rema, ZAYN, Leon Thomas, kwn, Theodora na Danny Ocean.

Miongoni mwa nyimbo zinazopatikana kwenye album hiyo ni “Gimme Dat” akiwa na Wizkid, “Who’s Dat Girl” akiwa na Rema na “Heaven Baby” akiwa na ZAYN.

“Starrgirl” Yawa Mbele ya Album ya Tyla

Katika Billboard World Albums Chart, “Starrgirl” imeingia katika nafasi ya nne, ikiwa nyuma ya miradi mitatu ya K-pop.

Nafasi ya tano imechukuliwa na album “APOP” ya msanii wa Afrika Kusini, Tyla, hivyo Ayra Starr ameweka “Starrgirl” mbele ya album hiyo katika chati.

Mafanikio hayo yamekuja ndani ya muda mfupi tangu album hiyo itoke, jambo linaloendelea kuongeza uzito wa Ayra Starr katika muziki wa Afrobeats na soko la muziki la kimataifa.

Kwa kuingia katika nafasi ya nne kwenye Billboard, Ayra Starr anaendelea kuthibitisha kuwa wasanii wa Afrika wana uwezo wa kushindana katika majukwaa makubwa ya muziki duniani na kuvuka mipaka ya bara hilo.

Stori na Razaku Ramadhan | GPL – TUDACO

Posted on

Mambo 12 Usiyoyajua Kuhusu Ndejembi Hadi Kuteuliwa Kugombea Umakamu wa Rais – Video

Deogratius John Ndejembi ni mwanasiasa wa Tanzania kutoka Chama Cha Mapinduzi (CCM), ambaye kwa sasa anahudumu kama Waziri wa Nishati.

Deogratius John Ndejembi ni mwanasiasa wa Tanzania kutoka Chama Cha Mapinduzi (CCM), ambaye kwa sasa anahudumu kama Waziri wa Nishati.

Deogratius John Ndejembi ni mwanasiasa wa Tanzania kutoka Chama Cha Mapinduzi (CCM), ambaye kwa sasa anahudumu kama Waziri wa Nishati wa Jamhuri ya Muungano wa Tanzania. Pia ni Mbunge wa Jimbo la Chamwino mkoani Dodoma.

Kwa mujibu wa taarifa zinazopatikana katika wasifu wa Bunge, Ndejembi alisoma:
1988–1995: Cannon Andrea Mwaka Primary School.
1996–1998: Jamhuri Secondary School/Kigurunyembe Secondary School.
2002–2004: Merton College, ambako alipata elimu ya Advanced Secondary.
2006–2009: University of Lincoln, Uingereza, akisoma International Relations na kupata Shahada ya kwanza.
2009–2012: Institute of Administrative Management, ambako alipata Advanced Diploma.
Pia wasifu wa Bunge unaonyesha kuwa aliwahi kuwa kwenye masomo ya uzamili katika University of Cumbria kuanzia 2019.

Taarifa zinazoeleza tarehe yake ya kuzaliwa zinamtaja kuwa alizaliwa 12 Julai 1983. Hata hivyo, tarehe hiyo haionekani katika sehemu ya taarifa za jumla kwenye wasifu wa sasa wa Bunge, hivyo ni vizuri kuitaja kama taarifa iliyoripotiwa, si kama jambo lililothibitishwa moja kwa moja na wasifu huo

Safari yake ya kisiasa na kiuongozi imejengwa katika uzoefu wa muda mrefu ndani ya Serikali na Chama Cha Mapinduzi, huku akiwahi kushika nyadhifa mbalimbali katika Serikali kabla ya kupewa dhamana ya kusimamia sekta ya nishati.

1. Ni mtoto wa mwanasiasa mkongwe wa CCM
Deogratius Ndejembi ni mtoto wa Mzee Pancras Mtemi Ndejembi, ambaye alikuwa miongoni mwa viongozi wakongwe na wenye ushawishi ndani ya CCM mkoani Dodoma.

Mzee Pancras Mtemi Ndejembi alihudumu kama Mwenyekiti wa CCM Mkoa wa Dodoma kwa miaka 25, kuanzia mwaka 1982 hadi 2007, kipindi kirefu ambacho kilimfanya kuwa sehemu muhimu ya historia ya siasa za CCM katika mkoa huo.

2. Baba yake alikuwa na ushawishi mkubwa ndani ya CCM kitaifa
Mbali na uongozi wake mkoani Dodoma, Mzee Pancras Mtemi Ndejembi alikuwa na nafasi muhimu katika uongozi wa CCM Tanzania Bara.
Aliwahi kuwa Mwenyekiti wa Wenyeviti wa CCM wa Mikoa yote ya Tanzania Bara, nafasi iliyompa ushawishi na jukumu la kushirikiana na viongozi wa chama kutoka mikoa mbalimbali.

Hivyo, Deogratius Ndejembi amekulia katika familia yenye historia ndefu ya utumishi wa umma na uongozi ndani ya CCM.

3. Safari yake ndani ya CCM
Ndejembi alianza kujihusisha na shughuli za CCM akiwa kijana. Wasifu wa Bunge unaonyesha kuwa:

2007–2017: alikuwa katika uongozi wa CCM ngazi ya Wilaya.
2008–2017: alikuwa Mjumbe wa Baraza la Taifa la UVCCM.
2012–2017: alikuwa Mjumbe wa Halmashauri Kuu ya Taifa (NEC) ya CCM.
2012–2022: alikuwa Mjumbe wa Baraza Kuu la CCM.
2016–2020: alikuwa katika Kamati ya Siasa.
2017–2022: alikuwa Mjumbe wa Baraza Kuu – Wazazi.

Kwa hiyo, safari yake ya kisiasa haikuanza akiwa Waziri; alikulia ndani ya miundo ya CCM kwa miaka kadhaa kabla ya kufika kwenye nafasi za juu za Serikali.

4. Historia yake ya uongozi ndani ya Serikali
Kabla ya kuwa Waziri wa Nishati, Ndejembi amewahi kushika nyadhifa mbalimbali serikalini ikiwemo Ukuu wa Wilaya ya Kongwa kati 2016 hadi 2020, jambo lililomjengea uzoefu katika kusimamia masuala tofauti ya kitaifa.

Amewahi kuwa Naibu Waziri na baadaye Waziri katika maeneo mbalimbali ya Serikali.

5. Aliwahi kuwa Naibu Waziri TAMISEMI
Katika hatua za awali za safari yake ya uongozi wa Serikali, Ndejembi aliwahi kuwa Naibu Waziri katika Ofisi ya Rais, Tawala za Mikoa na Serikali za Mitaa (TAMISEMI) kati yam waka 2023 hadi 2024.

Nafasi hiyo ilimpa uzoefu wa moja kwa moja katika masuala ya Serikali za Mitaa na utekelezaji wa huduma za umma.

6. Aliwahi kusimamia masuala ya kazi, vijana na ajira
Mwaka 2024, Ndejembi alipewa dhamana ya kuwa Waziri wa Nchi, Ofisi ya Waziri Mkuu anayeshughulikia Kazi, Vijana, Ajira na Wenye Ulemavu.

Katika nafasi hiyo, alihusika na eneo muhimu linalogusa moja kwa moja mustakabali wa vijana na nguvu kazi ya taifa.

7. Aliwahi kuwa Waziri wa Ardhi
Kabla ya kuhamia Wizara ya Nishati, Ndejembi pia aliwahi kuongoza **Wizara ya Ardhi, Nyumba na Maendeleo ya Makazi.

Akiwa Waziri wa Ardhi mwaka 2025, alisimamia sekta yenye changamoto kubwa zinazohusisha umiliki wa ardhi, migogoro ya ardhi, makazi na maendeleo ya miji.

8. Ni Mbunge wa Jimbo la Chamwino
Mbali na majukumu yake ya uwaziri, Ndejembi ni Mbunge wa Jimbo la Chamwino tangu 2020, mkoani Dodoma.
Ubunge wake unampa nafasi ya kuwakilisha wananchi wa Chamwino katika Bunge na kushiriki katika mijadala kuhusu sera, sheria na maendeleo ya taifa.

9. Sasa anaongoza Wizara ya Nishati
Ndejembi kwa sasa anaongoza Wizara ya Nishati, sekta ambayo ni mhimili muhimu wa uchumi wa Tanzania nafasi ambayo aliteuliwa na Rais Samia mwaka huu 2026.

Nishati ina nafasi kubwa katika uzalishaji viwandani, biashara, kilimo, huduma za kijamii na maendeleo ya wananchi kwa ujumla.

10. Safari yake ya uongozi imepitia sekta tofauti
Kinachomtofautisha Ndejembi katika safari yake ya kisiasa ni uzoefu alioupata katika maeneo mbalimbali.

Kutoka TAMISEMI, Kazi, Vijana na Ajira, Ardhi hadi Nishati, amekuwa akipewa dhamana ya kusimamia sekta zenye umuhimu mkubwa kwa wananchi na maendeleo ya nchi.

11. Anaendelea kujenga historia yake mwenyewe ya kisiasa

Ingawa ametoka katika familia yenye historia kubwa ya uongozi ndani ya CCM, Ndejembi ameendelea kujenga safari yake mwenyewe katika siasa na utumishi wa umma.

12: Maisha yake ya kazi kabla ya siasa

Kabla hajawa mwanasiasa mkubwa, Ndejembi alifanya kazi katika sekta binafsi katika nafasi mbalimbali:
2012: Manager – A1 Outdoor
2012–2014: Head of Sales – Smile Communication
2014–2015: Zonal Manager – Tigo
2016: Head of Marketing – GSM Group
2016–2020: Mkuu wa Wilaya (District Commissioner) katika Ofisi ya Rais.

Hii inaonesha kwamba kabla ya kuingia Bungeni alikuwa tayari na uzoefu katika biashara, mauzo, masoko, mawasiliano na utawala wa Serikali.

HITIMISHO
Historia ya uongozi wa baba yake, Mzee Pancras Mtemi Ndejembi, ni sehemu muhimu ya kuelewa mazingira ya kisiasa aliyokulia. Hata hivyo, nyadhifa ambazo Deogratius Ndejembi ameshika zimejenga wasifu wake binafsi ndani ya Serikali na siasa za Tanzania.
Deogratius John Ndejembi ana historia inayounganisha siasa za CCM, utumishi wa umma na uongozi wa kitaifa. Akiwa mtoto wa Mzee Pancras Mtemi Ndejembi, mwanasiasa mkongwe aliyelitumikia Chama Cha Mapinduzi kwa muda mrefu mkoani Dodoma, amekulia katika mazingira yenye historia ya uongozi wa kisiasa.

Leo, Ndejembi anahudumu kama Waziri wa Nishati na Mbunge wa Chamwino, akiendelea na safari yake ya uongozi katika sekta muhimu kwa uchumi na maendeleo ya Tanzania.

Safari kutoka Dodoma, kupitia nyadhifa mbalimbali za Serikali hadi kupewa dhamana ya kuongoza sekta ya nishati, inamfanya Deogratius Ndejembi kuwa mmoja wa wanasiasa ambao historia yao inafuatiliwa kwa karibu katika siasa za Tanzania.

MAKALA NA SIFAEL PAUL & NICOLAUS TRAC | GPL

Posted on

Rais Samia Ateua na Kuhamisha Wakuu Wa Mikoa, Makatibu Tawala

Global Publishers
August 27, 2026
54 views
0 Comments

Dar es Salaam, Agosti 27, 2026 — Rais wa Jamhuri ya Muungano wa Tanzania, Dkt. Samia Suluhu Hassan, amefanya uteuzi na uhamisho wa Wakuu wa Mikoa pamoja na Makatibu Tawala wa Mikoa.

Kwa mujibu wa taarifa iliyotolewa na Mkurugenzi wa Mawasiliano ya Rais, Ikulu, Bakari S. Machumu, uteuzi na uhamisho huo umefanyika kama ifuatavyo:

UTEUZI WA WAKUU WA MIKOA
  1. CP. Salum Rashid Hamduni, aliyekuwa Katibu Tawala wa Mkoa wa Shinyanga, ameteuliwa kuwa Mkuu wa Mkoa wa Mwanza.
  2. Alexander Pastory Mnyeti ameteuliwa kuwa Mkuu wa Mkoa wa Geita.
  3. Stanslaus Haroon Nyongo ameteuliwa kuwa Mkuu wa Mkoa wa Pwani.
  4. Jumanne Abdallah Sagini ameteuliwa kuwa Mkuu wa Mkoa wa Mbeya.
UHAMISHO WA WAKUU WA MIKOA
  1. Martine Reuben Shigela amehamishwa kutoka Mkoa wa Geita kwenda kuwa Mkuu wa Mkoa wa Manyara.
  2. Said Mohamed Mtanda amehamishwa kutoka Mkoa wa Mwanza kwenda kuwa Mkuu wa Mkoa wa Simiyu, akichukua nafasi ya Anamringu Macha ambaye amestaafu.
  3. Abubakar Mussa Kunenge amehamishwa kutoka Mkoa wa Pwani kwenda kuwa Mkuu wa Mkoa wa Songwe, akichukua nafasi ya Jabiri Omari Makame, ambaye atapangiwa majukumu mengine.
  4. Beno Moris Malisa amehamishwa kutoka Mkoa wa Mbeya kwenda kuwa Mkuu wa Mkoa wa Tabora. Anachukua nafasi ya Paul Matiko Chacha, ambaye aliteuliwa kuwa Katibu wa NEC – Idara ya Oganaizesheni ya Chama Cha Mapinduzi (CCM).
  5. Adam Kighoma Malima amehamishwa kutoka Mkoa wa Morogoro kwenda kuwa Mkuu wa Mkoa wa Lindi, akichukua nafasi ya Zainab Telack, ambaye amestaafu.
  6. Queen Cuthbert Sendiga amehamishwa kutoka Mkoa wa Manyara kwenda kuwa Mkuu wa Mkoa wa Morogoro.
UTEUZI NA UHAMISHO WA MAKATIBU TAWALA WA MIKOA

Uteuzi

Richard Marcellino Kayombo ameteuliwa kuwa Katibu Tawala wa Mkoa wa Pwani.

Uhamisho

  1. Bw. Balandya Mayuganya Elikana amehamishwa kutoka Mkoa wa Mwanza kwenda kuwa Katibu Tawala wa Mkoa wa Mbeya.
  2. Dkt. Fatuma Ramadhan Mganga amehamishwa kutoka Mkoa wa Singida kwenda kuwa Katibu Tawala wa Mkoa wa Mwanza.
  3. Pili Hassan Mnyema amehamishwa kutoka Mkoa wa Pwani kwenda kuwa Katibu Tawala wa Mkoa wa Shinyanga.
  4. Rodricks Lazaro Mpogolo amehamishwa kutoka Mkoa wa Mbeya kwenda kuwa Katibu Tawala wa Mkoa wa Singida.

Taarifa hiyo imeeleza kuwa upashaji wa Wakuu wa Mikoa na Makatibu Tawala wa Mikoa wateule utafanyika kwa tarehe itakayopangwa baadaye.

Uteuzi na uhamisho huo umetangazwa na Ikulu, Dar es Salaam, Agosti 27, 2026.

Posted on

RAIS SAMIA AFANYA UTEUZI NA UHAMISHO WA WAKUU WA MIKOA

 

NA MATUKIO DAIMA MEDIA

Rais wa Jamhuri ya Muungano wa Tanzania, Dkt. Samia Suluhu Hassan, amefanya uteuzi na uhamisho wa Wakuu wa Mikoa pamoja na Makatibu Tawala wa Mikoa katika mabadiliko yaliyotangazwa leo, Agosti 27, 2026.

Kwa mujibu wa taarifa iliyotolewa na Mkurugenzi wa Mawasiliano ya Rais, Ikulu, Bakari S. Machumu, mabadiliko hayo yamehusisha uteuzi wa Wakuu wa Mikoa wanne na uhamisho wa wengine sita.

Katika uteuzi huo, CP. Salum Rashid Hamduni, aliyekuwa Katibu Tawala wa Mkoa wa Shinyanga, ameteuliwa kuwa Mkuu wa Mkoa wa Mwanza, huku Alexander Pastory Mnyeti akiteuliwa kuwa Mkuu wa Mkoa wa Geita.

Aidha, Stanslaus Haroon Nyongo ameteuliwa kuwa Mkuu wa Mkoa wa Pwani, wakati Jumanne Abdallah Sagini akiteuliwa kuwa Mkuu wa Mkoa wa Mbeya.

Katika uhamisho wa Wakuu wa Mikoa, Martine Reuben Shigela amehamishwa kutoka Geita kwenda Manyara, huku Said Mohamed Mtanda akihamishwa kutoka Mwanza kwenda Simiyu, akichukua nafasi ya Anamringi Macha ambaye amestaafu.

Vilevile, Abubakar Mussa Kunenge amehamishwa kutoka Pwani kwenda kuwa Mkuu wa Mkoa wa Songwe, akichukua nafasi ya Jabiri Omari Makame ambaye atapangiwa majukumu mengine.

Beno Moris Malisa amehamishwa kutoka Mbeya kwenda kuwa Mkuu wa Mkoa wa Tabora, akichukua nafasi ya Paul Matiko Chacha ambaye aliteuliwa kuwa Katibu wa NEC – Idara ya Organizesheni ya Chama Cha Mapinduzi (CCM).

Naye Adam Kighoma Malima amehamishwa kutoka Morogoro kwenda kuwa Mkuu wa Mkoa wa Lindi, akichukua nafasi ya Zainab Telack ambaye amestaafu, huku Queen Cuthbert Sendiga akihamishwa kutoka Manyara kwenda kuwa Mkuu wa Mkoa wa Morogoro.

MABADILIKO YA MAKATIBU TAWALA

Katika hatua nyingine, Rais Samia amemteua Richard Marcellino Kayombo kuwa Katibu Tawala wa Mkoa wa Pwani.

Pia, Barahindya Mavuganya Elikana amehamishwa kutoka Mwanza kwenda kuwa Katibu Tawala wa Mkoa wa Mbeya; Dkt. Fatuma Ramadhan Mganga amehamishwa kutoka Singida kwenda Mwanza; Pili Hassan Mnyema amehamishwa kutoka Pwani kwenda Shinyanga; na Rodrick Lazaro Mpogolo amehamishwa kutoka Mbeya kwenda kuwa Katibu Tawala wa Mkoa wa Singida.

Taarifa ya Ikulu imeeleza kuwa uapisho wa Wakuu wa Mikoa na Makatibu Tawala wa Mikoa walioteuliwa utafanyika katika tarehe itakayopangwa baadaye.

Taarifa hiyo imetolewa Dar es Salaam, Agosti 27, 2026.

Posted on

MWABUKUSI: KUFUKUZWA CCM KWA NCHIMBI HAKUMVUI MOJA KWA MOJA UMAKAMU WA RAIS

NA MATUKIO DAIMA MEDIA

Rais wa Chama cha Wanasheria Tanganyika (TLS), Wakili Boniface Mwabukusi, amesema hatua ya Chama Cha Mapinduzi (CCM) kumvua uanachama Balozi Dkt. Emmanuel Nchimbi haimaanishi moja kwa moja kwamba amepoteza nafasi yake ya Makamu wa Rais wa Jamhuri ya Muungano wa Tanzania.

Kauli hiyo imekuja wakati kukiwa na mjadala kuhusu athari za kikatiba za uamuzi wa CCM kumfukuza Dkt. Nchimbi uanachama, huku barua yake ya kujiuzulu nafasi ya Makamu wa Rais ikieleza kuwa kujiuzulu kwake kutaanza rasmi Septemba 4, 2026. 

Taarifa za kujiuzulu kwake na tarehe hiyo zimethibitishwa pia na vyombo mbalimbali vya habari.

Kwa mujibu wa maoni ya Mwabukusi yaliyochapishwa katika ukurasa wa Mwananchi Digital, Katiba haijaweka kufukuzwa uanachama wa chama cha siasa kuwa sababu inayomwondoa moja kwa moja mtu katika nafasi ya Makamu wa Rais.

Mwabukusi amesema kwa kuwa Dkt. Nchimbi aliwasilisha barua ya kujiuzulu kwa Rais na kueleza kuwa uamuzi huo utaanza kutumika Septemba 4, 2026, na Rais akakubali kujiuzulu kwake kuanzia tarehe hiyo, basi kwa mtazamo wake anaendelea kuwa Makamu wa Rais hadi kufikia tarehe hiyo, isipokuwa kama kutakuwa na utaratibu mwingine wa kikatiba utakaofuatwa.

Dkt. Nchimbi alitangaza kujiuzulu nafasi ya Makamu wa Rais na kustaafu siasa pamoja na utumishi wa umma, huku uamuzi wake ukitarajiwa kuanza rasmi Septemba 4, 2026.

Siku iliyofuata, CCM ilitangaza kumvua uanachama Dkt. Nchimbi baada ya vikao vya chama kupitia masuala ya nidhamu na maadili yaliyomhusu. 

Chama pia kilimpitisha Waziri wa Nishati na Mbunge wa Chamwino, Deogratius Ndejembi, kuwa mgombea wa kujaza nafasi ya Makamu wa Rais.

Mwabukusi amesisitiza kuwa CCM ina mamlaka ya kumvua Dkt. Nchimbi uanachama kwa mujibu wa taratibu zake, lakini chama chenyewe hakiwezi kumwondoa katika ofisi ya Makamu wa Rais nje ya misingi na taratibu zilizowekwa na Katiba.

Amesema hali hiyo inaibua hoja ya kikatiba inayohitaji tafsiri kuhusu maudhui ya Ibara ya 47 na 50 ya Katiba ya Jamhuri ya Muungano wa Tanzania.

Kwa mujibu wa Mwabukusi, suala hilo linahitaji tafsiri muhimu ya kisheria, ambayo amesema inaweza kutolewa na Mahakama.

Wakati huo huo, Katiba inaweka utaratibu wa kujaza nafasi ya Makamu wa Rais inapokuwa wazi. 

Rais anatakiwa kumteua Makamu wa Rais mwingine ndani ya siku 14 baada ya nafasi kuwa wazi, na uteuzi huo kuthibitishwa na Bunge kwa kura ya wabunge walio wengi.

MWISHO

Posted on

Kesi ya Uhaini ya Lissu Yaendelea leo;- Maswali Mazito Yaibuka Katika Dodoso la Serikali

Kesi ya uhaini inayomkabili Mwenyekiti wa Chama cha Demokrasia na Maendeleo (CHADEMA), Tundu Lissu, imeendelea leo Agosti 27, 2026  katika Mahakama jijini Dar es Salaam, baada ya mwenendo wake kuahirishwa jana.

Katika mwenendo wa jana, upande wa Serikali uliendelea na hatua ya kumuuliza Lissu maswali ya dodoso baada ya kuwasilisha ushahidi wake wa kujitetea.

Mwendesha mashtaka Katuga alianza kwa kumuuliza Lissu kuhusu vielelezo alivyowasilisha mahakamani, ambapo Lissu alithibitisha kuwa vielelezo D1 hadi D15 ni vyake na kwamba ameridhika vitumike katika utetezi wake.

Katika sehemu nyingine ya mahojiano, Katuga alimuuliza Lissu kuhusu maana ya ulinzi wa mashahidi, ambapo Lissu alisema ni mashahidi wa kificho au wanaolindwa.

Lissu pia alihojiwa kuhusu madai yake kwamba baadhi ya watu waliokuwa ndani ya mahakama huenda walikuwa mashahidi waliolindwa. Alipoulizwa kama madai hayo yalikuwa ushahidi au hisia, Lissu alisisitiza kuwa ni ushahidi kwa sababu watu hao hawakujulikana na umma.

Lissu: Ni vyangu kwa sababu mimi ndiye niliyeomba viingizwe mahakamani.

Katuga: Je, nikisema kwamba uliomba vipokelewe mahakamani kama vielelezo vyako, umeridhika na yaliyomo ndani ya vielelezo hivyo?

Lissu: Ndiyo, nimeridhika.

Katuga: Umeridhika vitumike kama vielelezo vyako, na unaridhika na vielelezo ulivyovitoa?

Lissu: Nimeridhika vitumike katika utetezi wangu.

Katuga: Waheshimiwa Majaji, tunaomba vielelezo D1 hadi D15 …

Katuga: Naona tutakaa hapa siku mbili

Lissu: Unanitisha na siku mbili nimekaa ndani mwaka na miezi mitano

Katuga: Iambie mahakama ulinzi wa mashahidi maana yake nini

Lissu: Ni mashahidi wa kificho/ ni mashahidi wanaolindwa

Katuga: Iambie mahakama, Je, ulisema baadhi ya watu huenda tulikuwa nao humu ndani. Je, huu ni ushahidi au hisia tupu?

Lissu: Ndio ni shahidi wangu sababu hawajulikani hakuna anayewajua isipokua nyie

Katuga: Je ushahidi wa kwamba hawa ni mapolisi. Je, ni ushahidi au fununu tu?

Lissu: Ni ushahidi sababu hawajulikani na yeyote

Katuga: Sasa shahidi tunataka majibu sahihi ni kweli au sio kweli. Ushahidi wa kwamba baadhi ya mashahdi huenda tulikuwa nao humu ndani. JE, ni kweli, sio kweli, sio wa kuona wala kusikia?

Lissu: Sio Kweli

Katuga: Iambie mahakama kama ni kweli au sio kweli unatuhuma nyingie za kuchapisha uongo mtandaoni

Lissu: Ni kweli

Katuga: Iambie mahakama unakumbuka ulisomewa hoja za awali na ikaanza kusikilizwa

Lissu: Ndio nianakumbuka

Katuga: Unakumbuka uliposomewa hoja za wali ulisema majaji ni ma-CCM

Lissu: Sikumbuki

Katuga: Iambie mahakama hii katika hotuba yako pia ulitangaza kutokugombea kwa chama chako

Lissu: Sikumbuki, nakumbuka nilisema tutahamasisha ….

Katuga: Hapana, hukumbuki nimsekia ukijiita mwenyekiti wa Chadema. Iambie mahakama kama chama chako kilishiriki uchaguzi mwaka jana

Lissu: Hapana hakikushiriki

Katuga: Je, ni kweli kwamba uliposema mahakamani hakuendeki huna imani na mahakama

Lissu: Kwenye maswala haya ya uchaguzi sina imani na mahakama

Katuga: Kwenye zile njia ulizotuambia jana. Je, nitakuwa sahihi kwamba hukupanga kabisa kuiomba mahakama kutumia sheria

Lissu: Sikupanga kabisa

Katuga: Kwa hiyo ni sahihi kwamba swala la kupinga sheria kwa njia ya mahakama sio njia mbadala wala ya kidemokrasia

Lissu: Hapana

Katuga: Kwa hiyo kukinukisha ni njia ya kidemokrasia?

Lissu: Ndio ni njia ya kidemokrasia

Katuga: Kuhamasisha uasi ni njia ya kidemokrasia?

Lissu: Ndio ni njia ya kidemokrasia

Katuga: Uko Timamu mzee wangu

Lissu: Kimya

Katuga: Kama nilikusia ulitamka vifungu vya 55, 63, 52 kifungu cha 52 cha sheria ya habari. Ni kweli kwamba sheria ya habari iliundwa kwa ajili ya kuendesha tasnia ya habari?

Lissu: Ndio

Katuga: Kama nilikusikia vyema ulisema kuikosoa serikali sio kosa

Lissu: Nilisema kuipinga serikali sio kosa

Katuga: Kama una kanuni yako ya adhabu hapo kwa ridhaa ya mahakama hiki kifungu cha 55, yale maneno uliyotumbua, ‘ya kuzuia uchaguzi’ waambie majaji kuzuia uchaguzi ni kuipinga serikali au kuzuia uchaguzi?

Lissu: NI kuzuia uchaguzi

Katuga: Kuhamasisha uasi, kukinukisha nikupinga serikali au kupanga kuipindua serikali?

Lissu: Ni kuipinga serikali, sikuwa nazungumza habari ya serikali tulikuwa tunapanga kuzuia uchaguzi

Katuga: Unakumbuka umesema kwenye hotuba yako ulikuwa huzungumzii serikali

Lissu: Ndio sikuwa napinga serikali nilikua nazungumza habari za uchaguzi

Katuga: Kama nikikusikia vyema uliwaambia waheshimiwa hawa mashahidi wanaotoka jeshi la polisi, kasoro mmoja, wote wamejiandikia maelezo kitu ambacho ni kinyume cha sheria. Waambie majaji kama uliwatajia kifungu cha sheria na sheria yenyewe

Lissu: Sikuwaambia kifungu lakini kipo

Katuga: Unajua kwamba askari aliyemuandika shahidi maelezo na yeye ni shahidi kama huyo shahdi hata fika mahakani

Lissu: Sikumbuki

Katuga: Kama nilikusikia vyema uliiambia mahakama hii kwamba shahidi PW1 hakusema kama alivyogundua ni kosa la uhaini hakuwasiliana na ngazi za juu akiwemo DCI, kwamba ilipelelezwa vibaya

Lissu: nilisema ilipelelezwa vibaya

Katuga: Iambie mahakama kama sheria inaelekeza ukigundua kosa la uhaini lazima uwasiliane na hizo mamlaka zote, imabie mahakama kama ulitaja kifungu

Lissu: Hapana sikutaja kifungu

Katuga: Je unakumbuka ulisema kuna kutoelewana kati yako na Kingai (Kamishna wa Polisi Ramadhani Kingai ni Mkurugenzi wa Upelelezi wa Makosa ya Jinai (DCI) nchini Tanzania) pamoja na IGP Wambura (Mkuu wa Jeshi la Polisi Tanzania, IGP Camillius Wambura)

Lissu: Ni kweli nimekamatwa mara kadhaa bila kuzingatia taratibu

Katuga: Umekuwa mwanasheria muda mrefu na mwana siasa miaka 24. Je, ushawafunguliwa wawili hawa mashitaka?

Hapana: Sijawafungulia

Katuga: Kama nimekusikia vizuri uliambia mahakama hii kwamba wale mashahdi walioletwa ni mashahidi ambao walikuwa ni washitakiwa

Lissu: Nilisema walikiri kupanga uhalifu

Katuga: Je, kuna sheria inayozuia mtu aliyefanya uhalifu kuja kutoa ushahidi?

Lissu: Hapana

Katuga: Katika ushahidi wa mashahidi toka Jeshi la polisi walieleza walikamata wote

Lissu: Waliokamata waliweza kuwatambua

Katuga: Kwa ushahidi huo ina maana inawezekana kukawa na wengine

Lissu: Hawakutambuliwa au hawakukamatwa

Katuga: Nakukumbusha ile kauli yako si ndio uliambia mahakama mtu yeyote anaweza kutafsiri vyovyote vile na wale walisema wamehamasika kutokana na nini

Lissu: Maneno yangu

Katuga: Kwa hiyo nitakuwa sahihi nikisema walielewa hotuba yako na kufanyia kazi maneno yako kwa jinsi walivyoelewa

Lissu: Hapana siwezi sema sababu siwajui na siwezi kuwasemea

Katuga: Je, uliiambia mahakama hawa mashahidi ni waongo na hawastahili kuaminiwa na mahakama?

Lissu: Ndio, niliambia mahakama hawapaswi kuaminiwa wao na ushahidi wao

Posted on

Mwakioja atekeleza ahadi, akabidhi pampu ya maji Lanzoni – HabariLeo

TANGA: MBUNGE wa Jimbo la Mkinga, Twaha Mwakioja, ametekeleza ahadi yake baada ya kukabidhi pampu ya maji kwa ajili ya Shule ya Sekondari Lanzoni, pamoja na kutoa fedha taslimu na vifaa mbalimbali vya maendeleo na michezo katika wilaya hiyo.

​Katika ziara yake iliyofanyika katika Kata ya Mhinduro, Mbunge Mwakioja alikabidhi pampu hiyo inayolenga kupunguza kero ya muda mrefu ya upatikanaji wa maji shuleni hapo, sambamba na kutoa Sh 300,000 kwa ajili ya ukarabati wa vyoo katika Shule ya Msingi Bamba Mavengero.

​”Leo nimekuja kutekeleza ahadi zangu baada ya kubaini changamoto mbalimbali kwenye shule zetu. Ninaamini misaada hii itasaidia kuweka mazingira mazuri ya kujifunzia kwa vijana wetu,” alisema Mwakioja alipokuwa akizungumza na wananchi.

​Mbali na sekta ya elimu, Mbunge huyo aligusa nyanja nyingine muhimu kwa jamii ya Mkinga kwa kutoa misaada wa

​Viti 20 kwa kikundi cha wanakijiji cha Muheza ili kurahisisha shughuli zao za kijamii na Sh 500,000 kwa Klabu ya Mpira wa Miguu ya St. Augustino FC (inayomilikiwa na Kanisa Anglikana Mhinduro) ikiwa ni hamasa kwa vijana kujihusisha na michezo.

 

​Katika ziara hiyo, Mwakioja alipata fursa ya kusikiliza na kupokea kero mbalimbali za wananchi, kukutana na makundi ya vijana, pamoja na kushiriki katika kikao cha Halmashauri Kuu ya CCM Kata ya Mhinduro.

​Akihutubia wananchi waliojitokeza kwa wingi, aliainisha mafanikio mbalimbali ya kimaendeleo yaliyopatikana jimboni humo tangu alipoingia madarakani. Alisisitiza kuwa siri ya maendeleo ya haraka inatokana na ushirikiano thabiti kati ya wananchi, viongozi wa Chama, na Serikali.