URUSI: Uhusiano kati ya Tanzania na Urusi unaingia katika sura mpya, huku fursa katika biashara, uwekezaji, elimu, sayansi, teknolojia, nishati, kilimo na viwanda zikionekana kuwa maeneo muhimu ya kuunganisha urafiki wa muda mrefu na mahitaji ya maendeleo ya sasa.
Ziara ya Rais wa Jamhuri ya Muungano wa Tanzania, Dk Samia Suluhu Hassan, nchini Urusi mwezi Juni 2026, pamoja na ushiriki wa Waziri Mkuu, Dk Mwigulu Lameck Nchemba, katika Mkutano wa Tatu wa Wakuu wa Nchi na Serikali za Afrika na Urusi uliofanyika Moscow mwezi Oktoba 2026, imeendelea kuweka msukumo katika uhusiano huo.
Hata hivyo, nyuma ya mikutano ya viongozi na diplomasia ya kimataifa kuna swali muhimu: Tanzania inaweza kufanya nini ili fursa zinazotokana na uhusiano huo ziwafikie vijana, wanafunzi, wafanyabiashara na wananchi kwa ujumla?
Mhandisi Mashauri Jofrey Sabwoya, Katibu wa Chama Cha Mapinduzi (CCM) Diaspora nchini Urusi na Mwenyekiti wa Shirikisho la Wanafunzi wa Tanzania nchini humo, anaangazia fursa hizo, nafasi ya diaspora na namna Tanzania inaweza kutumia uzoefu, maarifa na teknolojia kutoka Urusi kuharakisha maendeleo yake.
𝐌𝐖𝐄𝐍𝐄𝐍𝐃𝐎 𝐖𝐀 𝐃𝐈𝐏𝐋𝐎𝐌𝐀𝐒𝐈𝐀 𝐓𝐀𝐍𝐙𝐀𝐍𝐈𝐀 𝐍𝐀 𝐔𝐑𝐔𝐒𝐈 𝐊𝐔𝐅𝐔𝐀𝐓𝐈𝐀 𝐙𝐈𝐀𝐑𝐀 𝐘𝐀 𝐕𝐈𝐎𝐍𝐆𝐎𝐙𝐈 𝐇𝐀𝐎.
Kwa mtazamo wake, Mhandisi Mashauri Jofrey Sabwoya anaona uhusiano wa kidiplomasia kati ya Tanzania na Urusi ukiendelea kuimarika na sasa ukiingia katika hatua mpya yenye mwelekeo mkubwa wa kiuchumi, kiteknolojia na kimkakati. Anasema uhusiano huo umejengwa katika misingi ya kihistoria, urafiki, kuheshimiana na kutambua mamlaka ya kila taifa.
Anaeleza kuwa tangu miaka ya mwanzo ya uhuru wa mataifa mengi ya Afrika, Urusi ilikuwa miongoni mwa washirika waliounga mkono harakati za ukombozi wa bara hilo na kujenga ushirikiano na mataifa yaliyokuwa yakijitafutia nafasi katika jumuiya ya kimataifa.
Hata hivyo, anasema fursa iliyopo sasa ni kubadilisha uhusiano huo kutoka katika urafiki wa kihistoria na kisiasa pekee kwenda kwenye ushirikiano unaozalisha manufaa ya moja kwa moja kwa wananchi. Kwa mujibu wake, ziara ya Rais wa Jamhuri ya Muungano wa Tanzania, Dk Samia Suluhu Hassan, nchini Urusi mwezi Juni 2026, pamoja na ushiriki wa Waziri Mkuu, Dk. Mwigulu Nchemba, katika Mkutano wa Tatu wa Afrika na Urusi mwezi Oktoba 2026, ni ishara muhimu ya kuendelea kuimarika kwa mahusiano hayo katika ngazi za juu za uongozi.
Rais Dk Samia Suluhu Hassan akiwa na mwenyeji wake Rais wa Urusi, Vladamir Putin, katika Ikulu ya Urusi wakati wa ziara aliyoifanya Juni 2026 nchini humo.
Mhandisi Mashauri anaona matukio hayo yakifungua fursa za kuimarisha ushirikiano katika maeneo mbalimbali yenye umuhimu kwa maendeleo ya Tanzania, ikiwemo biashara, uwekezaji, elimu, nishati, madini, kilimo, viwanda na teknolojia. Kwa mtazamo wake, hatua muhimu ni kuhakikisha fursa zinazotokana na mahusiano hayo zinatafsiriwa kuwa matokeo yanayoweza kuonekana na wananchi, badala ya kubaki katika mikutano, makubaliano na diplomasia ya ngazi za juu.
Akizungumzia nafasi yake kama Katibu wa CCM Diaspora nchini Urusi, anasema anaamini diaspora ina wajibu wa kuunga mkono juhudi za Serikali katika kuimarisha mahusiano hayo kupitia diplomasia ya wananchi, kuitangaza Tanzania na kujenga mazingira mazuri ya ushirikiano kati ya Watanzania na Warusi. Ujumbe wake mkuu ni kwamba Tanzania na Urusi hazipaswi kubaki kuwa marafiki wa kihistoria pekee, bali zinapaswa kuwa washirika wa maendeleo ya sasa na ya baadaye.
𝐙𝐈𝐀𝐑𝐀 𝐈𝐍𝐀𝐀𝐒𝐇𝐈𝐑𝐈𝐀 𝐍𝐈𝐍𝐈 𝐌𝐖𝐄𝐍𝐄𝐍𝐃𝐎 𝐖𝐀 𝐊𝐈𝐌𝐊𝐀𝐊𝐀𝐓𝐈 𝐁𝐀𝐈𝐍𝐀 𝐘𝐀 𝐍𝐂𝐇𝐈 𝐇𝐈𝐙𝐎?
Mhandisi Mashauri Jofrey Sabwoya anaona ziara mbili za viongozi waandamizi wa Tanzania nchini Urusi mwaka 2026 kuwa na umuhimu mkubwa katika kuonesha dhamira ya taifa kupanua ushirikiano wake wa kimataifa na kutumia diplomasia kama nyenzo ya kuharakisha maendeleo. Anasema ziara ya Rais wa Jamhuri ya Muungano wa Tanzania, Dk Samia Suluhu Hassan, nchini humo mwezi Juni mwaka huu ilikuwa ya kihistoria, ikiwa ni ziara ya pili ya Rais wa Tanzania nchini Urusi baada ya ile ya Baba wa Taifa, Mwalimu Julius Kambarage Nyerere, iliyofanyika Oktoba 1969.
Kwa mujibu wa Sabwoya, ziara hiyo ilikuwa na nafasi muhimu katika historia ya kidiplomasia ya mataifa hayo mawili, kwa kuwa iliwapa viongozi fursa ya kujadili mustakabali wa mahusiano yao na kuimarisha maeneo ya ushirikiano wenye manufaa kwa pande zote. Aidha, anasema ziara ya Waziri Mkuu, Dk. Mwigulu Lameck Nchemba, mwezi Oktoba 2026, aliyemwakilisha Rais katika Mkutano wa Tatu wa Afrika na Urusi, imeonesha mwendelezo wa juhudi za Tanzania za kuimarisha ushirikiano huo katika mfumo mpana wa mahusiano kati ya Afrika na Urusi.
Mhandisi Mashauri Jofrey Sabwoya, Katibu wa CCM Diaspora Urusi, akimkaribisha na kuzungumza na Waziri Mkuu Dk Mwigulu Lameck Nchemba wakati wa ziara yake nchini Urusi.
Akifafanua umuhimu wa ziara hizo, Sabwoya anazitaja kuwa na mwelekeo katika maeneo matatu muhimu, ambayo ni diplomasia ya uchumi, ushirikiano wa kimkakati na diplomasia ya matokeo. Anasema kupitia diplomasia ya uchumi, Tanzania inaweza kutumia mahusiano yake ya kimataifa kuvutia mitaji, wawekezaji, teknolojia na masoko mapya ya bidhaa zake. Katika ushirikiano wa kimkakati, anaona umuhimu wa kupanua wigo wa washirika katika sekta za nishati, madini, usafirishaji, kilimo, elimu na viwanda. Hata hivyo, anasisitiza kuwa mazungumzo ya viongozi yanapaswa kuzaa miradi, ajira, biashara, mafunzo na fursa zinazogusa maisha ya wananchi.
Anasisitiza kuwa Tanzania ina sera ya kushirikiana na mataifa mbalimbali kwa kuzingatia maslahi yake ya kitaifa, hivyo kuimarisha uhusiano na Urusi hakumaanishi kuachana na washirika wengine, bali ni kupanua wigo wa fursa za maendeleo. Kwa mtazamo wake, ziara hizo zinatoa nafasi ya kuifanya diplomasia ya Tanzania kuwa daraja la kuunganisha nchi na fursa za uwekezaji, biashara, teknolojia na maendeleo ya wananchi.
𝐅𝐔𝐑𝐒𝐀 𝐒𝐈𝐓𝐀 𝐙𝐀 𝐊𝐈𝐌𝐊𝐀𝐊𝐀𝐓𝐈 𝐀𝐌𝐁𝐀𝐙𝐎 𝐓𝐀𝐍𝐙𝐀𝐍𝐈𝐀 𝐈𝐓𝐀𝐍𝐔𝐅𝐀𝐈𝐊𝐀 𝐍𝐀 𝐔𝐒𝐇𝐈𝐑𝐈𝐊𝐈𝐀𝐍𝐎 𝐇𝐔𝐎
Mhandisi Mashauri Jofrey Sabwoya anasema uzoefu alioupata wakati akiishi na kujifunza nchini Urusi umemwezesha kubaini maeneo sita ya kimkakati ambayo Tanzania inaweza kuyatumia kupanua ushirikiano na taifa hilo kwa manufaa ya uchumi wake.
Anayataja maeneo hayo kuwa ni nishati na umeme, madini na utafiti wa kijiolojia, kilimo na usalama wa chakula, viwanda na teknolojia, teknolojia za kidijitali na akili bandia pamoja na usafirishaji na miundombinu ya biashara.
Katika eneo la nishati na umeme, Sabwoya anasema Urusi ina uzoefu katika uzalishaji wa umeme, uhandisi wa nishati na teknolojia ya nyuklia kwa matumizi ya amani, ambao Tanzania inaweza kuutumia kuongeza utaalamu, kuendeleza miundombinu ya nishati na kujenga uwezo wa wataalamu wake. Pia anaona sekta ya madini kuwa na nafasi kubwa ya ushirikiano, akieleza kuwa uzoefu wa Urusi katika utafiti wa kijiolojia, teknolojia za uchimbaji na usindikaji unaweza kusaidia Tanzania kuongeza thamani ya madini kama dhahabu, urani, nikeli na shaba ndani ya nchi badala ya kutegemea kuuza malighafi pekee. Hata hivyo, anasisitiza kuwa miradi ya nishati inapaswa kuzingatia usalama, gharama, utunzaji wa mazingira na mahitaji ya wananchi.
Akizungumzia kilimo na usalama wa chakula, anasema Tanzania inaweza kunufaika na uzoefu wa Urusi katika uzalishaji wa nafaka, mitambo ya kilimo na teknolojia za uzalishaji wa pembejeo. Anataja fursa za ushirikiano katika upatikanaji wa mbolea, teknolojia za uzalishaji wake, mitambo ya kisasa, tafiti za mbegu bora, uhifadhi na uchakataji wa mazao pamoja na uwekezaji katika viwanda vya kusindika mazao. Kwa maoni yake, ushirikiano huo unapaswa kulenga kuongeza uzalishaji wa mkulima, kupunguza upotevu wa mazao na kumwezesha kupata masoko yenye tija.
Waziri Mkuu Dk. Mwigulu Lameck Nchemba katika kikao na watumishi wa Ubalozi wa Tanzania nchini Urusi, kilicholenga kutafuta fursa za masoko kwa bidhaa za Tanzania nchini Urusi.
Katika sekta ya viwanda na teknolojia, Sabwoya anasema uwezo wa Urusi katika uhandisi, utengenezaji wa mashine, kemikali, dawa na vifaa vya kisayansi unaweza kuwa fursa ya kuvutia wawekezaji kuanzisha viwanda nchini Tanzania.
Anataja viwanda vya mbolea, dawa, vifaa vya kilimo na uchakataji wa madini kuwa miongoni mwa maeneo yanayoweza kupewa kipaumbele. Pia anaona umuhimu wa ushirikiano katika teknolojia za kidijitali na akili bandia, ikiwemo programu za kompyuta, usalama wa mifumo ya taarifa, roboti na uchambuzi wa takwimu, pamoja na kuboresha usafirishaji wa bidhaa, mifumo ya ugavi, taratibu za forodha na mifumo salama ya malipo ya biashara kati ya mataifa hayo mawili. Anasema kwa kuunganisha rasilimali za Tanzania na teknolojia, maarifa na uzoefu wa Urusi, nchi hizo zinaweza kujenga ushirikiano wenye manufaa kwa pande zote.
𝐒𝐎𝐊𝐎 𝐋𝐀 𝐔𝐑𝐔𝐒𝐈: 𝐅𝐔𝐑𝐒𝐀 𝐓𝐀𝐍𝐎 𝐊𝐖𝐀 𝐖𝐀𝐅𝐀𝐍𝐘𝐀𝐁𝐈𝐀𝐒𝐇𝐀𝐑𝐀 𝐓𝐀𝐍𝐙𝐀𝐍𝐈𝐀
Akizungumzia fursa za biashara, Mhandisi Mashauri Jofrey Sabwoya anasema soko la Urusi ni eneo ambalo wafanyabiashara wengi wa Tanzania bado hawajalitumia kikamilifu, licha ya kuwa na nafasi ya kupanua mauzo ya bidhaa na huduma za Tanzania. Anaeleza kuwa soko hilo linaweza kuwa miongoni mwa maeneo mapya ya kukuza biashara za Watanzania na kuongeza wigo wa masoko ya bidhaa zinazozalishwa nchini.
Anataja maeneo matano yenye fursa, ambayo ni mazao ya kilimo na bidhaa za chakula, utalii, bidhaa za madini na vito, ushirikiano wa viwanda na uwekezaji wa pamoja pamoja na huduma za kitaalamu na biashara za kidijitali.
Katika eneo la mazao ya kilimo na chakula, Sabwoya anasema Tanzania inaweza kuongeza mauzo ya kahawa, chai, korosho, viungo, matunda na bidhaa nyingine za kilimo katika soko la Urusi. Hata hivyo, anasisitiza umuhimu wa kuhakikisha bidhaa hizo zinakidhi viwango vya ubora, usalama wa chakula, vifungashio na masharti ya uingizaji bidhaa katika soko hilo. Pia anaitaja sekta ya utalii kuwa na nafasi ya kuvutia wageni wengi zaidi kutoka Urusi kwa kuitangaza Tanzania kupitia vivutio vyake vya kipekee, vikiwemo Hifadhi ya Taifa ya Serengeti, Eneo la Hifadhi ya Ngorongoro, Mlima Kilimanjaro, Zanzibar na utajiri wa utamaduni. Anaona ushirikiano na kampuni za utalii, mawakala wa safari na mashirika ya ndege kuwa njia mojawapo ya kufungua fursa hiyo.
“Katika eneo la madini na vito, Tanzania inaweza kupanua nafasi yake katika soko la kimataifa kwa kuuza vito, madini yaliyoongezwa thamani na bidhaa zinazotokana na rasilimali zake, kwa kuzingatia sheria za biashara na viwango vya kimataifa,” anasema.
Aidha, anaona uwezekano wa wafanyabiashara wa Tanzania kuingia ubia na kampuni za Urusi katika uwekezaji wa viwanda, hususan vya usindikaji wa chakula, uzalishaji wa mbolea, dawa na teknolojia za kilimo. Kwa upande wa huduma za kitaalamu na biashara za kidijitali, anataja fursa katika teknolojia, elimu, tafsiri na ushauri wa biashara zinazoweza kuunganisha kampuni za mataifa hayo mawili.
Hata hivyo, Sabwoya anasema ili wafanyabiashara wa Tanzania wanufaike kikamilifu na fursa hizo, wanahitaji kuwa na taarifa sahihi za soko, washirika wanaoaminika, uelewa wa lugha na maarifa ya taratibu za kisheria na kibiashara. Anaeleza kuwa jumuiya ya Watanzania wanaoishi Urusi inaweza kuwa kiungo muhimu katika kuwaunganisha wafanyabiashara wa nchi hizo mbili, kutoa taarifa za fursa na kuwaelekeza katika taasisi husika. Anasema anatamani kuona mfanyabiashara wa Tanzania anapofika Urusi tayari ana taarifa sahihi, bidhaa yenye ubora, mshirika wa biashara na mpango wa kuingia sokoni, badala ya kuanza kutafuta mahitaji hayo baada ya kuwasili nchini humo.
𝐄𝐋𝐈𝐌𝐔 𝐍𝐀 𝐔𝐓𝐀𝐅𝐈𝐓𝐈: 𝐅𝐔𝐑𝐒𝐀 𝐘𝐀 𝐊𝐔𝐀𝐍𝐃𝐀𝐀 𝐖𝐀𝐓𝐀𝐀𝐋𝐀𝐌𝐔 𝐊𝐖𝐀 𝐌𝐀𝐄𝐍𝐃𝐄𝐋𝐄𝐎 𝐘𝐀 𝐓𝐀𝐍𝐙𝐀𝐍𝐈𝐀
Mhandisi Mashauri Jofrey Sabwoya anaitaja elimu kuwa miongoni mwa nguzo muhimu za kuimarisha uhusiano kati ya Tanzania na Urusi, akisisitiza kuwa ushirikiano katika eneo hilo haupaswi kuishia katika kuwapeleka wanafunzi kusoma nje ya nchi, bali kuwa mkakati mpana wa kujenga rasilimali watu wenye maarifa, ujuzi, ubunifu na uwezo wa kutatua changamoto za maendeleo ya taifa.
“Urusi ina historia na uzoefu katika elimu ya sayansi, teknolojia, tiba, uhandisi, hisabati, fizikia, kemia na tafiti mbalimbali za kitaalamu, hivyo Tanzania inaweza kutumia fursa hiyo kuandaa wataalamu katika sekta muhimu kwa maendeleo yake,” anasema Mhandisi Sabwoya
Anapendekeza nchi hizo mbili kuongeza nafasi za ufadhili wa masomo katika ngazi za Shahada, Uzamili na Uzamivu, hususan katika fani zenye uhitaji mkubwa nchini, pamoja na kuimarisha tafiti za pamoja kati ya vyuo vikuu katika maeneo ya madini, nishati, kilimo, tiba, mazingira na teknolojia.
Aidha, anasisitiza umuhimu wa kubadilishana wahadhiri na watafiti ili kujenga mazingira ya kubadilishana maarifa, uzoefu na kufanya tafiti za pamoja. Anataja pia lugha kuwa daraja muhimu la mawasiliano na ushirikiano, akipendekeza kuhamasishwa kwa ufundishaji wa lugha ya Kirusi nchini Tanzania na Kiswahili nchini Urusi ili kurahisisha mawasiliano katika biashara na shughuli za kitaaluma. Sambamba na hilo, anasema programu za elimu zinapaswa kuzingatia mahitaji ya soko la ajira na kuandaa wataalamu wenye uwezo wa kuchangia katika uchumi na kutatua changamoto za maendeleo.
Akizungumzia nafasi ya Shirikisho la Wanafunzi wa Tanzania nchini Urusi, Sabwoya anasema lina wajibu wa kuwaunganisha wanafunzi, kuwasaidia kupata taarifa sahihi, kuhamasisha nidhamu ya kitaaluma na kujenga mahusiano kati yao na taasisi mbalimbali. Pia anasisitiza umuhimu wa kuwaandaa wanafunzi kimasomo na kimaadili ili watumie maarifa wanayoyapata kwa manufaa ya taifa.
𝐃𝐈𝐀𝐒𝐏𝐎𝐑𝐀: 𝐃𝐀𝐑𝐀𝐉𝐀 𝐋𝐀 𝐊𝐔𝐈𝐌𝐀𝐑𝐈𝐒𝐇𝐀 𝐔𝐇𝐔𝐒𝐈𝐀𝐍𝐎 𝐖𝐀 𝐓𝐀𝐍𝐙𝐀𝐍𝐈𝐀 𝐍𝐀 𝐔𝐑𝐔𝐒𝐈
Jumuiya ya Watanzania wanaoishi nchini Urusi ina nafasi muhimu katika kuimarisha uhusiano wa mataifa hayo mawili kupitia diplomasia ya wananchi, inayowezesha watu, wafanyabiashara, wanafunzi na wataalamu kushiriki katika kujenga mahusiano ya kimataifa.
Mhandisi Mashauri Jofrey Sabwoya anasema katika diplomasia ya kisasa, jukumu la kuimarisha ushirikiano wa nchi haliwezi kubaki mikononi mwa Serikali pekee, bali linahitaji pia mchango wa jumuiya za diaspora.
Anasema Watanzania wanaoishi Urusi wana nafasi ya kipekee kwa kuwa wanaelewa mazingira ya Tanzania na wakati huo huo wanafahamu mazingira ya kijamii, kiutamaduni, kielimu na kibiashara ya Urusi, hali inayowawezesha kuwa daraja la kuunganisha fursa za mataifa hayo. Kwa mujibu wake, jumuiya hiyo inaweza kutumia nafasi yake kuanzisha mtandao wa wafanyabiashara wa Tanzania na Urusi kwa ajili ya kubadilishana taarifa za bidhaa, huduma, masoko na fursa za uwekezaji, pamoja na kuitangaza Tanzania kupitia mitandao ya kijamii, maonesho na mikutano ya kitamaduni.
Mhandisi Mashauri Jofrey Sabwoya akiwa katika picha na Fredrick Ibrahim Kibuta, Balozi wa Tanzania Shirikisho la Urusi, wakati wa uwakilishi wa wanafunzi wa Kitanzania nchini Urusi.
Aidha, anapendekeza kuimarishwa kwa mahusiano ya kijamii na kitamaduni kupitia matukio yanayotangaza Kiswahili, muziki, vyakula na urithi wa Tanzania, sambamba na kujenga mtandao wa wanafunzi na wataalamu utakaowezesha kubadilishana maarifa na uzoefu. Anasema juhudi hizo zinapaswa kuambatana na ushirikiano wa karibu kati ya jumuiya hiyo, Ubalozi wa Tanzania nchini Urusi, taasisi za biashara, vyuo vikuu na wadau wengine, pamoja na kuanzisha mfumo wa kukusanya na kusambaza taarifa za ufadhili wa masomo, biashara, uwekezaji, mafunzo na masoko kwa Watanzania.
“Jumuiya ya diaspora isiishie kuwa jumuiya ya kukutana katika shughuli za kijamii pekee, inapaswa pia kuwa mtandao wa maarifa, fursa, uwekezaji na mchango wa maendeleo ya taifa,” anasema Sabwoya, akisisitiza umuhimu wa kila Mtanzania anayeishi Urusi kushiriki kuitangaza Tanzania, kuunganisha fursa na kujenga urafiki kati ya wananchi wa mataifa hayo mawili,” anasema.
𝐌𝐀𝐊𝐔𝐁𝐀𝐋𝐈𝐀𝐍𝐎 𝐍𝐀 𝐅𝐔𝐑𝐒𝐀 𝐙𝐈𝐓𝐀𝐕𝐘𝐎𝐆𝐄𝐔𝐊𝐀 𝐌𝐀𝐓𝐎𝐊𝐄𝐎 𝐊𝐖𝐀 𝐖𝐀𝐍𝐀𝐍𝐂𝐇𝐈
Anasema hatua inayofuata baada ya ziara hizo ni kuhakikisha kwamba mazungumzo na makubaliano yanageuzwa kuwa mipango madhubuti ya utekelezaji. Anasema kuna hatua saba muhimu zinazopaswa kuchukuliwa.
Kwanza, kuweka mfumo wa utekelezaji wa makubaliano. Kila makubaliano yanayofikiwa kati ya Tanzania na Urusi yanapaswa kuwa na mpango wa utekelezaji, taasisi zinazowajibika, muda wa utekelezaji na matokeo yanayotarajiwa.
“Hatupaswi kuridhika na kusainiwa kwa mikataba pekee; tunapaswa kufuatilia utekelezaji wake na kupima manufaa yake.
Pili, Kuimarisha Tume ya Pamoja ya Ushirikiano wa Tanzania na Urusi. Tume hii inapaswa kuwa na jukumu muhimu la kufuatilia utekelezaji wa miradi, kutambua changamoto za kibiashara na kiutawala na kuibua maeneo mapya ya ushirikiano,” anasema.
Tatu, anasema kuongeza ushiriki wa sekta binafsi. Serikali ziweke mazingira mazuri kwa wafanyabiashara na wawekezaji wa nchi zote mbili kushirikiana.
“Hii ni pamoja na kuboresha upatikanaji wa taarifa za uwekezaji, mifumo ya malipo, usafirishaji na taratibu za kibiashara,”
Pia anataja kipaumbele katika miradi yenye manufaa ya moja kwa moja kwa wananchi. Tuwe na miradi inayogusa maisha ya watu, kama vile:
* Viwanda vya mbolea na pembejeo za kilimo.
* Teknolojia za kuongeza uzalishaji na usalama wa chakula.
* Viwanda vya kuongeza thamani ya madini.
* Miradi ya nishati na umeme.
* Mafunzo ya kitaalamu kwa vijana.
* Ushirikiano wa kisayansi na kiteknolojia.
“Tano, Kuimarisha ushirikiano wa elimu na ajira. Nafasi za ufadhili wa masomo ziendane na mahitaji ya taifa. Pia, tuweke mifumo ya kuwasaidia wahitimu kutumia utaalamu wao katika taasisi na sekta mbalimbali nchini Tanzania,”
Sita, Kutumia diaspora kama rasilimali ya maendeleo. Watanzania wanaoishi Urusi wanapaswa kushirikishwa katika kutafuta fursa za biashara, uwekezaji, elimu, teknolojia na utalii.
Anasema wanapaswa kujenga mfumo unaowaunganisha Watanzania walioko nje ya nchi na taasisi za Serikali pamoja na sekta binafsi ili maarifa na mitandao waliyonayo iweze kuwa na manufaa kwa taifa.
Jambo jingine ni kuweka mfumo wa uwajibikaji na tathmini ya matokeo. Ni muhimu kuwepo kwa tathmini ya mara kwa mara inayopima idadi ya miradi iliyoanzishwa, uwekezaji ulioingia, ajira zilizozalishwa, wanafunzi walionufaika na ongezeko la biashara kati ya nchi hizi mbili. Kwa kufanya hivyo, wananchi wataweza kuona thamani halisi ya diplomasia.
“Ningependa kusisitiza kwamba ziara ya Mheshimiwa Rais na ushiriki wa Mheshimiwa Waziri Mkuu katika Mkutano wa Afrika na Urusi ni fursa muhimu kwa taifa letu. Sasa ni wakati wa kuendeleza mazungumzo hayo na kuyabadilisha kuwa utekelezaji wenye manufaa kwa pande zote.
Tunahitaji kutoka kwenye diplomasia ya mikutano kwenda kwenye diplomasia ya matokeo; kutoka kwenye makubaliano kwenda kwenye miradi; na kutoka kwenye fursa kwenda kwenye manufaa halisi kwa wananchi,” anamaliza kiongozi huyo.
Makala hii imeandaliwa kwa ushirikiano na Mhandisi Mashauri Jofrey Sabwoya, Katibu wa Chama Cha Mapinduzi (CCM) Diaspora nchini Urusi na Mwenyekiti wa Shirikisho la Wanafunzi wa Tanzania nchini humo.
Mawasiliano: sabwoyajofrey@gmail.com
+255626724744
