Author: admin

Na Matukio DaimaMedia 

Tanzania inatarajia kuwa mwenyeji wa mkutano wa Afrika na nchi za Ghuba utakaofanyika Oktoba 5 na 6 mwaka huu, ukilenga kujadili uhamaji wa wafanyakazi, ajira na mahitaji ya soko la ajira, hasa kwa vijana.

Akizungumza na waandishi wa habari jijini Dar es Salaam, Waziri wa Nchi, Ofisi ya Waziri Mkuu, Kazi, Ajira na Mahusiano, Deus Sangu, amesema mkutano huo unaojulikana kama “Doha Dialogue II”, utawakutanisha nchi za Umoja wa Afrika (AU), Baraza la Ushirikiano la Nchi za Ghuba (GCC), Jordan na Lebanon.

Amesema nchi za GCC zitakazoshiriki ni Saudi Arabia, Umoja wa Falme za Kiarabu (UAE), Qatar, Kuwait, Oman na Bahrain, huku Tanzania ikiwa nchi ya pili kuwa mwenyeji wa mkutano huo unaofanyika kila baada ya miaka miwili.

Sangu amesema mkutano huo ni mwendelezo wa mkutano wa kwanza uliofanyika Doha, Qatar, Mei 21 na 22, 2024, ulioshirikisha nchi 43, zikiwemo 25 za Afrika, na ulihitimishwa kwa kupitishwa kwa Azimio la Doha lililoweka msingi wa kuendeleza ushirikiano huo.

Amesema mkutano wa mwaka huu utakuwa wa kwanza kufanyika katika bara la Afrika, huku moja ya ajenda kuu ikiwa ni kuimarisha uhamaji wa wafanyakazi kati ya nchi, makubaliano ya uhamaji, ujuzi wa wafanyakazi na mahitaji ya soko la ajira.

Kwa mujibu wa Sangu, washiriki pia watajadili mifumo ya kuhakikisha uhamaji wa wafanyakazi unakuwa salama na wenye tija, pamoja na namna ya kukabiliana na mabadiliko ya teknolojia na mahitaji mapya ya soko la ajira.

Amesema Tanzania itatumia mkutano huo kuimarisha nafasi yake katika mijadala ya kimataifa kuhusu uhamaji wa wafanyakazi, kubaini fursa za ajira ndani na nje ya nchi, kulinda haki za wafanyakazi na kuimarisha ushirikiano na nchi za Afrika na GCC Plus.

Sangu amesema mkutano huo pia unalenga kubadilisha makubaliano na majadiliano yaliyopo kuwa hatua za vitendo na matokeo yanayopimika, hatua inayotarajiwa kuongeza fursa za ajira kwa Watanzania, hususan vijana.

Amesema Serikali chini ya uongozi wa Rais Dk. Samia Suluhu Hassan inaamini mkutano huo utaimarisha ushirikiano na washirika wa kimataifa, kuongeza ushindani wa wafanyakazi wa Tanzania katika soko la ajira la kimataifa na kufungua fursa zaidi za ajira kwa Watanzania.

KUPIGA KURA KWA MATUKIO DAIMA TUZO ZA SAMIA KALAMU AWARDS HAPA

MATUKIO DAIMA IMETEULIWA KUSHIRIKI TUZO ZA UMAHIRI WA VYOMBO VYA HABARI NA WANAHABARI TANZANIA TUZO HIZI ZIMETOLEWA NA TCRA NA TAMWA 

 MAARUFU KWA JINA LA SAMIA KALAMU AWARDS (SKA2026)⬇️⬇️⬇️

1:TUZO YA CHOMBO CHA HABARI -MATUKIO DAIMA MEDIA 

PIGA KURA YA CHOMBO MATUKIO DAIMA BONYEZA HAPA

2:TUZO YA JINSIA ,WANAWAKE NA MAKUNDI MAALUM 

PIGA KURA YA PILI YA MATUKIO DAIMA BONYEZA HAPA

3:TUZO YA AFYA

PIGA KURA YA TATU YA MATUKIO DAIMA BONYEZA HAPA

4:TUZO YA MPIGA PICHA 

PIGA KURA YA TATU YA MATUKIO DAIMA BONYEZA HAPA

AHSANTE KWA KUPIGIA KWA KUENDELEA KUTUPIGIA KURA MATUKIO DAIMA MEDIA ENDELEA KUTUPIGIA KURA KILA BAADA YA SAA 24 HADI SEPT 30 KASI YAKO YA KUPIGA KURA NDIO USHINDI .

Na Matukio DaimaMedia 

Serikali imeweka mkakati maalum wa kuhakikisha watu wenye ulemavu wanapata taarifa kwa wakati kuhusu mvua za El Niño pamoja na hatua za kuchukua kujikinga na madhara yanayoweza kujitokeza, ikiwamo kuhakikisha taarifa hizo zinawafikia kulingana na mahitaji yao.

Waziri wa Nchi, Ofisi ya Waziri Mkuu (Sera, Bunge na Watu Wenye Ulemavu), Profesa Palamagamba Kabudi, amesema mbinu na nyenzo maalum tayari zimeandaliwa kwa ajili ya kutoa taarifa kwa makundi mbalimbali ya watu wenye ulemavu, yakiwamo watu wenye uoni hafifu, viziwi na wenye ulemavu wa aina nyingine.

Profesa Kabudi ameyasema hayo jijini Dar es Salaam alipokuwa akizungumza katika Jukwaa la Uratibu na Utekelezaji wa Mpango Kazi wa Kitaifa wa Haki na Ustawi wa Watu Wenye Ualbino Bandiliko wa mwaka 2024–2029, lililowakutanisha wadau mbalimbali kujadili utekelezaji wa mpango huo.

Amesema maandalizi hayo ni sehemu ya kuhakikisha makundi yenye mahitaji maalum hayaachwi nyuma wakati wa utoaji wa taarifa za tahadhari, hasa katika kipindi ambacho Mamlaka ya Hali ya Hewa Tanzania (TMA) imetoa taarifa kuhusu uwezekano wa mvua za El Niño.

Akizungumzia hali ya ulinzi na haki za watu wenye ualbino bandiliko, Profesa Kabudi amesema Tanzania imepiga hatua kubwa katika kukabiliana na changamoto zinazolikabili kundi hilo, ikiwamo unyanyapaa, ubaguzi, mauaji na vitendo vya ukatili.

Kwa upande wao, wawakilishi wa Chama cha Watu Wenye Ualbino Tanzania (TAS) wameipongeza Serikali kwa juhudi zinazochukuliwa katika kupambana na mauaji na ukatili dhidi ya watu wenye ualbino, wakisema utekelezaji wa Mpango Kazi wa Kitaifa unatoa matumaini ya kuboresha zaidi maisha yao.

Wamesema utekelezaji wa mpango huo unatarajiwa kuendelea kufungua fursa sawa kwa watu wenye ualbino katika maeneo muhimu kama elimu, ajira na huduma za afya, huku ukisaidia kuimarisha ulinzi wa haki zao na kuongeza ushiriki wao katika shughuli za kijamii na kiuchumi.

Katika hatua nyingine, Serikali imesema itaendelea kufanya mapitio ya Sera ya Taifa ya Huduma na Maendeleo ya Watu Wenye Ulemavu ya mwaka 2004 ili iendane na mabadiliko ya teknolojia na mahitaji ya sasa ya kijamii na kiuchumi, hatua inayolenga kuboresha huduma na mazingira ya watu wenye ulemavu nchini.

Jukwaa hilo limewakutanisha wawakilishi wa Serikali, taasisi za kimataifa, asasi za kiraia pamoja na vyama vya watu wenye ulemavu, kwa lengo la kuimarisha uratibu wa hatua zinazolenga kulinda haki, usalama na ustawi wa watu wenye ulemavu nchini

.

Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, anashiriki  mafunzo maalum ya uongozi kwa Mawaziri wa Kisekta yanayofanyika katika Chuo Kikuu cha Harvard, jijini Boston, Marekani.

Mafunzo hayo ya siku nne yameanza Septemba 26, 2026 na yanatarajiwa kukamilika Septemba 30, 2026, yakilenga kuwawezesha Mawaziri wa Kisekta kutoka nchi mbalimbali za Afrika na maeneo mengine kubadilishana uzoefu na maarifa katika uongozi, usimamizi na utekelezaji wa majukumu ya wizara za kisekta.

Mafunzo hayo yanahudhuriwa na Mawaziri wa Kisekta kutoka Tanzania, Kenya, Nigeria, Namibia, Chile, Dominican Republic, Malawi, Benin, Côte d’Ivoire, Gabon, Ghana, Guinea, Mauritius, Mauritania, Msumbiji, Sierra Leone na Togo.

Kupitia mafunzo hayo, Mawaziri hao wanapata fursa ya kujifunza na kubadilishana uzoefu kuhusu mbinu mbalimbali za uongozi wa kisekta, usimamizi wa taasisi za umma, ufanyaji wa maamuzi na namna ya kuimarisha utekelezaji wa sera na mipango ya Serikali kwa manufaa ya wananchi.

Aidha, mafunzo hayo yanawapa washiriki fursa ya kujifunza kutoka kwa viongozi wenye uzoefu mkubwa, wakiwemo Mawaziri wa zamani na Marais wastaafu, pamoja na kushirikishana uzoefu kuhusu changamoto na fursa zinazojitokeza katika uongozi wa sekta za umma.

Miongoni mwa wakufunzi katika mafunzo hayo ni Rais Mstaafu wa Awamu ya Nne wa Jamhuri ya Muungano wa Tanzania, Mhe. Dkt. Jakaya Mrisho Kikwete, na Rais wa Tano wa Botswana, Mhe. Mokgweetsi Masisi.

Ushiriki wa Prof. Shemdoe katika mafunzo hayo unatoa fursa ya Tanzania kushiriki katika jukwaa la kimataifa la kubadilishana uzoefu wa uongozi na usimamizi wa sekta za umma, hususan katika maeneo yanayohusu Serikali za Mitaa na utekelezaji wa majukumu ya Serikali kwa wananchi.

Maarifa na uzoefu unaopatikana kupitia mafunzo ni nyenzo muhimu katika kuendelea kuimarisha uongozi, usimamizi na utoaji wa huduma za Serikali kwa ufanisi, pamoja na kuongeza ujuzi wa kukabiliana na changamoto zinazojitokeza katika utekelezaji wa majukumu ya kisekta pamoja na Dira ya Taifa ya Maendeleo 2050.

Kozi hiyo  imeandaliwa na T.H. Chan School of Public Health, Harvard Graduate School of Education na Harvard Kennedy School, ikiwa ni sehemu ya jitihada za kuwawezesha viongozi wa kisekta kujenga uwezo na kubadilishana uzoefu katika uongozi wa umma.