Author: admin

DAR ES SALAAM: Mamlaka ya Mapato Tanzania (TRA) imekusanya Sh trilioni 10.65 katika kipindi cha Julai hadi Septemba 2026, ikiwa ni asilimia 107.49 ya lengo la Sh trilioni 9.91 lililowekwa kwa robo ya kwanza ya mwaka wa fedha 2026/2027.

Kwa mujibu wa taarifa ya utendaji kazi ya robo hiyo, makusanyo hayo yameongezeka kwa asilimia 18.81 ikilinganishwa na Sh trilioni 8.96 zilizokusanywa katika kipindi kama hicho cha mwaka wa fedha 2025/2026.

Katika kipindi hicho, TRA pia imekamilisha uchunguzi wa mashauri 130 ya ukwepaji kodi yenye thamani ya Sh bilioni 331.15, huku ikifanikiwa kukusanya Sh bilioni 44.74.

Mamlaka hiyo imesema itaendelea kuchukua hatua za kisheria na kinidhamu dhidi ya mianya inayosababisha Serikali kupoteza mapato, ikiwemo vitendo vya ukwepaji kodi, biashara za magendo na ukiukaji wa maadili kazini.

Katika udhibiti wa mipaka, TRA imefanya operesheni 1,185 za kufuatilia uingizaji wa mizigo kwa njia zisizo rasmi. Operesheni hizo zilisababisha kukamatwa kwa bidhaa za magendo zenye thamani ya Sh bilioni 12.72 na kuokoa kodi ya Sh bilioni 5.34.

Aidha, ukaguzi wa mizigo na magari 47,773 yanayohusika na usafirishaji wa mizigo umebaini makosa 197 ya udanganyifu, hatua iliyoiwezesha TRA kukusanya Sh bilioni 79.68.

Akieleza hatua zinazochukuliwa kuimarisha nidhamu na uwajibikaji ndani ya taasisi hiyo, Kamishna Mkuu wa TRA, Yusuph Juma Mwenda, amesema watumishi 1,028 wamepatiwa mafunzo kwa lengo la kuboresha ujuzi katika usimamizi wa sheria za kodi na ukusanyaji wa mapato ya Serikali.

“TRA imewapatia mafunzo watumishi 1,028 ili kuboresha ujuzi wao katika usimamizi wa sheria za kodi na ukusanyaji wa mapato ya Serikali,” amesema Mwenda.

Ameongeza kuwa TRA imeimarisha pia maadili ya watumishi kwa kuchukua hatua za kinidhamu dhidi ya watumishi tisa waliobainika kuwa na changamoto mbalimbali za kimaadili katika kipindi hicho.

Katika eneo la migogoro ya kodi, TRA imesema imetatua mashauri 10 yaliyokuwa mahakamani yenye thamani ya Sh bilioni 7.78.

Kwa mujibu wa Mamlaka hiyo, hatua hiyo inalenga kuongeza usawa katika utekelezaji wa sheria za kodi na kuweka mazingira salama zaidi kwa biashara na uwekezaji nchini.

TRA imesema itaendelea kuimarisha mifumo ya ukusanyaji mapato, udhibiti wa magendo na ukwepaji kodi pamoja na uwajibikaji wa watumishi ili kuhakikisha Serikali inapata mapato yanayostahili.

  Na Mwandishi Wetu.

Taasisi ya Teknolojia Dar es Salaam (DIT) imehitimisha awamu ya pili ya mafunzo ya mradi wa majaribio unaolenga kuwawezesha vijana kutumia teknolojia ya kidigitali katika kujitangaza, kujiajiri na kuongeza fursa za ajira, huku vijana 32 waliokuwa wakishiriki mafunzo hayo wakihitimu.

Hafla ya kufunga mafunzo hayo imefanyika leo, Oktoba 02, 2026, katika Taasisi ya Teknolojia Dar es Salaam (DIT), ikiwa ni sehemu ya juhudi za Serikali kupitia Wizara ya Elimu, Sayansi na Teknolojia za kuwawezesha vijana kutumia ujuzi wa kidigitali katika kujiletea maendeleo na kuchangamkia fursa zinazotokana na ukuaji wa uchumi wa kidigitali.

Mafunzo hayo ya majaribio yamewalenga vijana kuwawezesha kutumia teknolojia ya habari na mawasiliano (TEHAMA) katika kuboresha ufanisi wa shughuli wanazofanya, ikiwemo shughuli za kibiashara, utengenezaji wa maudhui mtandaoni pamoja na kujitangaza kitaalamu kupitia majukwaa ya kidigitali.

Akizungumza wakati wa kufunga mafunzo hayo, Kaimu Mkuu wa Taasisi ya Teknolojia Dar es Salaam (DIT), Prof. Ezekiel Amri, amesema teknolojia ya habari ni moja ya nyenzo muhimu katika kukuza uchumi wa mtu binafsi, hususan vijana, pamoja na kuchangia katika ukuaji wa uchumi wa Taifa.

Prof. Amri amewapongeza vijana hao kwa kukamilisha mafunzo hayo, akibainisha kuwa wote 32 walioanza mafunzo wameweza kuyamaliza, bila mshiriki hata mmoja kuacha njiani.

“Katika Dunia ya leo, suala la Teknolojia ya Habari ni mojawapo ya mambo yanayosaidia sana kukuza uchumi, kwa mtu binafsi hasa vijana kupitia shughuli mnazozifanya na pia uchumi wa Taifa. Napenda kuwapongeza sana, mmeanza mafunzo haya mkiwa 32 na mmeyamaliza mkiwa hao hao 32, hakuna aliyeishia njiani,” amesema Prof. Amri.

Aidha, Prof. Amri amewakaribisha vijana hao kuendelea kutumia fursa zinazopatikana DIT kwa ajili ya kuendeleza ujuzi walioupata, akieleza kuwa taasisi hiyo imejipambanua kwa kuwa na wataalamu waliobobea katika masuala ya teknolojia.

Amesema DIT ina wataalamu pamoja na vifaa vinavyoweza kuwawezesha vijana kupata mafunzo mbalimbali ya kiteknolojia, hivyo kuwataka wahitimu hao kutumia mafunzo waliyopata kama hatua ya kuendelea kujifunza kupitia kozi fupi zitakazotolewa na Kitengo cha ITCOEICT.

“Mafunzo haya yawafanye mfikirie kupata mafunzo zaidi ya kozi fupi mbalimbali zitakazotangazwa hapa na Kitengo chetu cha ITCOEICT. Hongereni sana na karibu sana DIT,” amesema Prof. Amri.

Kwa upande wake, Mkuu wa Mafunzo, Kituo cha Umahiri wa TEHAMA – DIT, Bw. Othman Mfinanga, amesema mafunzo hayo yamekuja kutoa majibu kwa changamoto mbalimbali zilizokuwa zikiwakabili vijana katika kutumia teknolojia ya kidigitali kwenye shughuli zao.

Bw. Mfinanga amesema mafunzo hayo ni sehemu ya mradi wa majaribio ambao Serikali ya Jamhuri ya Muungano wa Tanzania imeuanzisha kwa kutambua umuhimu wa kuwawezesha vijana kutumia ujuzi wa kidigitali katika kuboresha shughuli zao.

Amesema kupitia mafunzo hayo, vijana wamepata nafasi ya kujifunza namna teknolojia inavyoweza kutumika katika kuongeza ufanisi wa shughuli mbalimbali, ikiwemo biashara na utengenezaji wa maudhui mtandaoni.

“Haya mafunzo ni mafunzo ya majaribio ambayo Serikali yetu ya Jamhuri ya Muungano wa Tanzania imeona kwamba kuna haja ya kuwawezesha vijana katika shughuli zao ili waweze kutumia ujuzi wa kidigitali katika kuboresha ufanisi wa shughuli wanazozifanya, kama ni shughuli za kibiashara, utengenezaji wa maudhui mtandaoni na kadhalika,” amesema Bw. Mfinanga.

Naye mmoja wa wanufaika wa mafunzo hayo, Fredy Mwita, ambaye ni mwanafunzi wa Chuo cha Bahari, ameishukuru Serikali kwa kutoa fursa hiyo kwa vijana na kusema mafunzo hayo yatamsaidia kutumia maarifa aliyoyapata kwa namna yenye manufaa.

Fredy amesema anatarajia kutumia ujuzi huo katika shughuli zake na kuhakikisha maarifa aliyoyapata yanakuwa sehemu ya mchango wake chanya kwa maendeleo ya nchi.

Ameeleza kuwa mafunzo hayo yamekuwa fursa muhimu kwa vijana kupata ujuzi unaoweza kuwasaidia katika mazingira ya sasa ambayo teknolojia ya kidigitali imekuwa sehemu muhimu ya shughuli za kiuchumi na kijamii.

Mafunzo hayo ni sehemu ya mradi wa majaribio unaolenga kuwajengea vijana uwezo wa kutumia teknolojia ya habari na mawasiliano katika kuboresha shughuli zao, kujitangaza, kuongeza ufanisi, kukuza biashara na kuchangamkia fursa mbalimbali zinazopatikana kupitia uchumi wa kidigitali.

IKUMBUKWE,  hii ni awamu ya pili ya mafunzo hayo kwa upande wa DIT. Awamu ya kwanza ilihitimishwa wiki iliyopita, ambapo vijana 48 walihitimu mafunzo hayo na kukabidhiwa vyeti vya utambuzi wa ushiriki wao. Leo, Oktoba 02, 2026, vijana wengine 32 wamehitimisha awamu ya pili, hivyo kuendelea kwa DIT katika kuwajengea vijana uwezo wa kutumia teknolojia ya kidigitali kama nyenzo ya kujiajiri, kujitangaza na kuongeza fursa za ajira.

*Dkt. Kiruswa asisitiza ushirikiano wa Tanzania na Qatar katika kukuza utalii wa madini*

**Doha, Qatar*

Tanzania imetangaza fursa na vivutio vya utalii wa madini nchini Qatar, ikiwa ni sehemu ya juhudi za kukuza sekta hiyo, kuongeza idadi ya watalii na kuchangia ukuaji wa uchumi wa taifa.

Naibu Waziri wa Madini, Dkt. Steven Kiruswa, ameongoza ujumbe wa Tanzania nchini Qatar, ambapo amefanya mazungumzo na viongozi na wadau wa sekta ya utalii nchini humo kuhusu namna ya kuimarisha ushirikiano kati ya Tanzania na Qatar katika kukuza utalii, hususan utalii unaohusisha vivutio vya madini.

Akizungumza baada ya kutembelea na kufanya mazungumzo na uongozi wa utalii nchini Qatar, Dkt. Kiruswa amesema Tanzania ina fursa kubwa katika sekta ya utalii kutokana na kuwa na vivutio mbalimbali, ikiwemo utalii wa madini, mbuga za wanyama, bahari na fukwe pamoja na vivutio vilivyopo Zanzibar.

Amesema Serikali ya Tanzania ipo tayari kushirikiana na Qatar katika kuendeleza, kutangaza na kuvutia watalii katika vivutio vilivyopo nchini, hatua ambayo itasaidia kuongeza mapato, ajira na manufaa ya kiuchumi kwa wananchi na taifa kwa ujumla.

“Tanzania ina vivutio vingi vya utalii, ikiwemo utalii wa madini, wanyamapori, bahari na Zanzibar. Tunataka kutumia fursa hii kuimarisha ushirikiano na Qatar ili kutangaza vivutio vyetu na kuongeza idadi ya watalii wanaotembelea Tanzania,” amesema Dkt. Kiruswa.

Kwa upande wake, Balozi wa Tanzania nchini Qatar, Mhe. Habibu Mohamed, ameupongeza uongozi wa utalii wa Qatar kwa kukubali kushirikiana na Tanzania katika kuendeleza na kutangaza vivutio vya utalii vilivyopo katika nchi hizo.

Amesema ushirikiano huo utasaidia kuongeza uelewa kuhusu fursa za utalii zilizopo Tanzania na Qatar, sambamba na kuongeza idadi ya watalii na kuimarisha mahusiano ya kiuchumi baina ya nchi hizo.

Naye, Mwenyekiti wa Utalii nchini Qatar, Saad Bin Ali AlKharji  ameipongeza Tanzania kwa kuonesha nia ya kushirikiana na Qatar katika kukuza utalii wa madini na sekta nyingine za utalii.

Ameahidi kutoa ushirikiano kwa Tanzania katika kuhakikisha vivutio vya utalii, ikiwemo utalii wa madini, vinatangazwa kwa kiwango kikubwa nchini Qatar ili kuvutia watalii zaidi kutembelea Tanzania.

Ushirikiano huo unatarajiwa kufungua fursa zaidi za kutangaza utalii wa madini wa Tanzania katika masoko ya kimataifa, pamoja na kuchochea uwekezaji na shughuli nyingine za kiuchumi zinazohusiana na sekta ya utalii.

DODOMA: WAZIRI wa Ujenzi, Masanja Kadogosa, amesema atashirikiana kwa karibu na viongozi na watumishi wa wizara hiyo kuhakikisha miradi inayotekelezwa katika Sekta ya Ujenzi inatekelezwa kwa weledi na ufanisi, kwa lengo la kufikia malengo yaliyowekwa na Serikali katika kuendeleza miundombinu nchini.

Kadogosa ameyasema hayo leo, Oktoba 2, 2026, katika Ofisi za Wizara ya Ujenzi, Mtumba jijini Dodoma, mara baada ya kuwasili na kukabidhiwa rasmi Ofisi na aliyekuwa Waziri wa Ujenzi, Abdallah Ulega, kufuatia mabadiliko ya Baraza la Mawaziri yaliyofanywa na Rais Dk. Samia Suluhu Hassan, Septemba 27, 2026.

Amesema yupo tayari kujifunza, kupokea maoni na ushauri kutoka kwa viongozi, watumishi na wadau mbalimbali kuhusu namna bora ya kuendeleza na kukuza Sekta ya Ujenzi nchini, akisisitiza kuwa sekta hiyo ina mchango mkubwa katika kuchochea maendeleo ya taifa.

“Niwaeleze kuwa Ofisi yangu ipo wazi kwa yeyote mwenye maoni na ushauri wa kuboresha Sekta yetu. Mlango upo wazi, tushirikiane kwa pamoja kuinua Sekta hii,” amesema Kadogosa.

Aidha, Kadogosa amepongeza namna wizara, kupitia Wakala wa Barabara Tanzania (TANROADS), ilivyojipanga kukabiliana na athari zinazoweza kujitokeza kutokana na mvua zinazotarajiwa kunyesha nchini.

Amesisitiza umuhimu wa wakala huo kuendelea kuchukua tahadhari na hatua stahiki za kuimarisha usalama na uendelevu wa miundombinu ya barabara na madaraja, hususan katika kipindi cha mvua.

Kwa upande wake, aliyekuwa Waziri wa Ujenzi na sasa Waziri wa Katiba na Sheria, Abdallah Ulega, amewataka watumishi wa Wizara ya Ujenzi kumpa ushirikiano wa kutosha Waziri mpya ili wizara hiyo iendelee kutekeleza majukumu yake kwa ufanisi na kusonga mbele katika ujenzi wa taifa.

Makabidhiano hayo yameshuhudiwa na Naibu Waziri wa Ujenzi, Godfrey Kasekenya, Katibu Mkuu, Balozi, Mhandisi Aisha Amour, Naibu Katibu Mkuu, Dk. Charles Msonde, Menejimenti ya Wizara, Wakuu wa taasisi zilizo chini ya wizara pamoja na baadhi ya watumishi wa Wizara.

WAZIRI MKUU Dkt. Mwigulu Nchemba amesema Serikali inaendelea kuchukua hatua za kuwawezesha Watanzania kujiletea maendeleo, ikiwemo kurekebisha sheria mbalimbali zinazowakwaza katika kutekeleza shughuli zao.

Ameyasema hayo leo, Ijumaa, Oktoba 2, 2026, wakati akizungumza na wananchi katika mkutano wa hadhara uliofanyika Mwibara, eneo la Kibara, mkoani Mara.

Amesema baadhi ya mambo yamefanyika ndani ya siku 100 kama alivyoahidi Rais, huku mengine yakiendelea kuchukuliwa hatua.

“Leo tunavyoongea, tumerekebisha sheria mbalimbali ili tuweze kuhakikisha kuwa Watanzania hawakwazwi na baadhi ya sheria katika kutekeleza wajibu wao,” amesema.

Amesema miongoni mwa hatua hizo ni kuwapa wafanyabiashara wapya muda wa kuimarisha biashara zao, ambapo kodi ya mapato kwa biashara mpya inaanza baada ya mwaka mmoja tangu kupata TIN kwa ajili ya kuanza biashara.

Katika hatua nyingine, Waziri Mkuu amekemea tabia ya baadhi ya watumishi kuwachangisha wananchi fedha kwa ajili ya mafuta ya magari ya wagonjwa (ambulance), akisema vitendo hivyo havikubaliki.

“Hatuwezi tukawa na magari ya Serikali yana mafuta, halafu ambulance ya kunusuru maisha ya wagonjwa tuchangishane mafuta. Haya ni mazoea mabaya ambayo hatutaki kuwa utaratibu wa Serikali. Wa aina hiyo akipatikana, tunachukua hatua kali,” amesema.

Aidha, amekemea tabia ya kuficha dawa zilizotolewa na Serikali huku wagonjwa wakielekezwa kununua dawa nje ya vituo vya afya, na kuwaagiza viongozi wa afya kufuatilia hali hiyo hatua kwa hatua ili kuhakikisha wananchi wanapata huduma zinazostahili.

Katika sekta ya nishati, Waziri Mkuu amesema Serikali inaendelea kusogeza huduma ya umeme kwenye vitongoji, mitaa na maeneo mapya ya makazi, akisisitiza kuwa wananchi katika maeneo hayo wanapaswa kunufaika na huduma hiyo.

Kuhusu mvua, amewataka viongozi na mamlaka zinazohusika kujiandaa kukabiliana na uwezekano wa mvua kubwa, ikiwemo kusafisha mifereji na maeneo ya kupitisha maji ili kupunguza athari za mafuriko.

Aidha, amewataka wananchi kutotumia nguvu au kuchukua sheria mkononi katika kushughulikia migogoro ya ardhi na mifugo, akisema Serikali inaendelea kuchukua hatua za kutatua changamoto za maeneo ya malisho na upatikanaji wa maji kwa mifugo.

Waziri Mkuu pia amewataka Watanzania kuendelea kulinda amani ya nchi na mali za umma, akisisitiza kuwa shule, barabara na vituo vya afya ni mali za wananchi na uharibifu wake unawaathiri wao wenyewe.