MOROGORO: Serikali imewataka ndugu wa watu waliosafiri kwa basi la Green Line kutoka Dar es Salaam kwenda Mbeya Oktoba 8, 2026, kufika Hospitali ya Rufaa ya Mkoa wa Morogoro kwa ajili ya kusaidia kutambua miili ya ndugu zao waliofariki katika ajali za barabarani.
Wito huo umetolewa Oktoba 9, 2026, na Mkuu wa Mkoa wa Morogoro, Queen Sendiga, wakati akizungumza na waandishi wa habari na viongozi wa serikali ya mkoa huo baada ya kutembelea majeruhi 30 wa ajali iliyohusisha basi na lori.
Sendiga amesema serikali inashirikiana na Ofisi ya Mkemia Mkuu wa Serikali kufanya vipimo maalumu vitakavyosaidia kutambua miili ya marehemu iliyoharibika vibaya kutokana na ajali hiyo.
Amesema ushirikiano wa ndugu wa marehemu ni muhimu katika mchakato huo ili kurahisisha utambuzi wa miili na kuwezesha familia kupata taarifa sahihi kuhusu wapendwa wao.
Katika ajali ya kwanza, watu 28 walifariki dunia baada ya basi la Dream Line kugongana na lori eneo la Kikombe cha Chai, Mkambalani, mkoani Morogoro, majira ya saa nne usiku.
Miongoni mwa waliofariki, 26 walikuwa abiria wa basi hilo huku wengine wawili wakiwa kwenye lori lililohusika katika ajali hiyo.
Kwa mujibu wa Kamanda wa Polisi Mkoa wa Morogoro, Andrew Kantimbo, lori hilo lilikuwa likiendeshwa na Abdalla, mwenye umri wa miaka 36, mkazi wa Makambako mkoani Njombe.
Katika ajali ya pili, watu wanne, wakiwemo askari polisi watatu na raia mmoja, walifariki dunia huku wengine saba wakijeruhiwa baada ya gari la polisi aina ya BMW kugongana na lori la kampuni ya ATT katika eneo la Miti Bora, Magole, kwenye barabara ya Morogoro-Dodoma.
Taarifa zinaeleza kuwa gari hilo la polisi lilikuwa likielekea Turiani, wilayani Mvomero, likiendeshwa na Sajini Abdallah Ramadhani, mwenye umri wa miaka 37.
Kwa upande mwingine, lori lililohusika katika ajali hiyo lilikuwa likitoka Dar es Salaam kuelekea Tabora na kuendeshwa na Juma Kasenge, mwenye umri wa miaka 32, mkazi wa Tabora.
Kwa ujumla, ajali hizo mbili zimesababisha vifo vya watu 32 na majeruhi 37, huku mamlaka husika zikiendelea na hatua za kushughulikia waathirika na kutambua miili ya waliofariki.