Habarimpya

 Na Hamida Ramadhan, Matukio Daima Media

Mjumbe wa Baraza Kuu la Umoja wa Wanawake Tanzania (UWT) kutoka Mkoa wa Dodoma, Asia Abdallah, amewataka wanawake wa Kiislamu kutumia elimu ya dini waliyonayo kuelimisha jamii kupitia mitandao ya kijamii, huku wakizingatia stara na maadili ya Kiislamu.

Asia Abdallah ametoa rai hiyo katika hafla ya Maulid ya wanawake iliyofanyika katika Msikiti wa Abdul Aziz, Chang’ombe mkoani Dodoma, ambapo amesema mitandao ya kijamii ni sehemu muhimu ya maisha ya sasa na inaweza kutumika kueneza elimu ya dini, kujenga jamii na pia kuwa chanzo cha kipato.

Amesema wanawake wa Kiislamu wanapaswa kuhakikisha wanatumia mitandao kwa mambo yenye manufaa badala ya kuchapisha maudhui yasiyokuwa na ujumbe wa kujenga, akisisitiza kuwa mwanamke anaweza kuwa mtumiaji mzuri wa mitandao bila kuacha misingi ya stara.

“Dunia imehamia mitandaoni. Sidhani kama kuna mtu anaharamisha mitandao, lakini unaweza ukaitumia kwa njia nzuri ikakusaidia wewe, ukajiongezea kipato na pia ukatoa elimu kwa umma,” amesema.

Asia amewataka wanawake wanaosoma Qur’an na wenye elimu ya dini kutumia majukwaa kama Instagram, Facebook, TikTok na mitandao mingine kusambaza elimu hiyo ili kuwafikia watu wengi zaidi.

Amesema wakati umefika kwa wanawake wa Kiislamu kushindana katika kusoma na kuifahamu Qur’an Tukufu na kutumia elimu hiyo kuwafikia watu wengi, badala ya kushindana katika mambo yasiyokuwa na manufaa kwenye mitandao.

“Wapo wasomaji wengi wa Qur’an humu ndani, lakini ni wangapi wanafikisha elimu hiyo kwa ukubwa wake? Mitandao inaweza kukufikisha kwa watu elfu 10, elfu 30, elfu 80 au hata zaidi, na huwezi kujua ni nani atakayesikia neno lako na likamsaidia,” amesema.

Aidha, amewataka wanawake wa Kiislamu kutumia mitandao kujenga uchumi wao, akisema kuwa matumizi sahihi ya majukwaa hayo yanaweza kuwapatia fursa za kipato kupitia utengenezaji wa maudhui pamoja na fursa nyingine za kiuchumi.

Katika hatua nyingine, Asia Abdallah amewahamasisha wanawake hao kuchangamkia mikopo inayotolewa na Serikali ya Dkt. Samia Suluhu Hassan ili kuwawezesha kuanzisha na kuendeleza shughuli za kiuchumi.

Amesema mwanamke anapaswa kuwa na elimu ya dini sambamba na uelewa wa maisha na uchumi, ili aweze kujitegemea na kuimarisha familia na jamii kwa ujumla.

“Mwanamke imara utakuwa imara zaidi kama utakuwa unaijua dini, ukajua na maisha yanavyoenda, lakini ukawa umetengeneza na uchumi,” amesema.

Katika hafla hiyo, Asia Abdallah  pia alishiriki katika harambee ya kuchangia ujenzi wa bweni la wanawake, ambapo aliahidi kuchangia Shilingi milioni moja.

 

‎

‎Wazazi, walezi na jamii wametakiwa kuwa na tahadhari ya kuwapeleka Jijini Dar es Salaam na mikoa mingine mikubwa wahitimu wa Darasa la Saba wa mwaka huu, kabla ya kutangazwa matokeo ya kitaifa, kwa kuwa hatua hiyo inaweza kusababisha baadhi yao kushindwa kujiunga Kidato cha Kwanza Januari 2027. 

‎Wito huo umetolewa na wananchi wa Kijiji cha Samamba, Kata ya Kituntu, Wilaya ya Ikungi, mkoani Singida, wakati wa mahafali ya nne ya Shule ya Msingi Samamba, iliyoshika nafasi ya kwanza kimkoa kwa miaka mitatu mfululizo.

‎Aidha Wananchi hao wameitaka jamii kutambua na kuunga mkono juhudi za walimu wanapofanya kazi kwenye mazingira magumu, yenye changamoto, ikiwemo kuwapa pongezi na motisha wanapofanya vizuri, ili kuongeza bidii na ari zaidi ya kuendelea kuboresha ufaulu wa wanafunzi.

‎Mwalimu Mkuu wa Shule ya Msingi Samamba, Adinani Mkuki, ameeleza mambo mbalimbali yanayochangia mafanikio ya shule hiyo katika kipindi cha miaka mitatu mfululizo, kwa kutaja ushirikiano baina ya wazazi, walimu na serikali kama silaha kuu ya mafanikio.

‎Diwani wa Kata ya Kituntu, Ali Ramadhani, ametoa tahadhari kuhusu watu wanaowarubuni wanafunzi, hususan wasichana, kwa ahadi za kuwapeleka mijini au mikoani kwenda kufanya kazi za ndani kabla ya matokeo. Naye mwakilishi wa benki ya NMB Tawi la Singida Mjini,Chimlumbe Wenda,ametaka wazazi na walezi kushirikiana kuwalinda wahitimu hao, dhidi ya vishawishi hivyo.

‎Kwa upande wao, wahitimu wa Darasa la Saba akiwemo Amosi Masanja ameeleza kuwa pamoja na kufanya vizuri kitaaluma, shule hiyo bado inakabiliwa na changamoto ya upungufu wa madawati na vyumba vya madarasa.

‎Shule ya Msingi Samamba ilianzishwa mwaka 2014 kwa nguvu za wazazi na sasa ina wanafunzi 666, wakiwemo wasichana 334, pamoja na walimu 11, lakini kutokana na upungufu wa walimu, wazazi wamekuwa wakigharamia posho za walimu watatu wa kujitolea ili wanafunzi waendelee kupata huduma bora ya elimu bila kukwama.

‎

KAGERA: KATIBU Tawala wa Wilaya ya Bukoba, Proscovia Mwambi, amesema Manispaa ya Bukoba imetoa mikopo ya zaidi ya Sh milioni 800 kwa vikundi 123 vya wanawake, vijana na watu wenye ulemavu kupitia mpango wa mikopo ya asilimia 10 inayotolewa na serikali bila riba.

Amesema vikundi vilivyonufaika ni 68 vya wanawake, 37 vya vijana na tisa vya watu wenye ulemavu, ikiwa ni sehemu ya juhudi za kuwawezesha wananchi kiuchumi na kukuza shughuli zao za uzalishaji mali.

Akizindua Mwezi wa Maendeleo ya Jamii, Mwambi amesema idadi ya wanufaika inaweza kuongezeka endapo vikundi vya wanawake, vijana na watu wenye ulemavu vitashiriki kikamilifu katika kutambua na kutumia fursa zinazotolewa na serikali.

Amesema mikopo hiyo hutolewa bila riba kwa vikundi vinavyokidhi vigezo vilivyowekwa, bila ubaguzi, huku vikundi vinavyorejesha mikopo yao vizuri vikiendelea kupewa fursa zaidi hadi vitakapojitegemea kiuchumi.

Katika hatua nyingine, amesema Manispaa ya Bukoba imesajili vikundi 164 katika mfumo wa manunuzi ya umma wa Mamlaka ya Udhibiti wa Ununuzi wa Umma (PPRA), ili viweze kunufaika na fursa ya asilimia 30 ya manunuzi katika taasisi za serikali kwa mujibu wa Sheria ya Ununuzi wa Umma ya mwaka 2023.

Amesema kupitia mfumo huo, vikundi viwili tayari vimepata zabuni zenye thamani ya Sh milioni 491, huku vingine vikiendelea kupata fursa hizo kwa kuzingatia vigezo vilivyowekwa.

Aidha, amesema manispaa hiyo ina wafanyabiashara wadogo 805, ambapo 206 tayari wamepata vitambulisho, huku wafanyabiashara wengine 66 wakinufaika na mikopo ya masharti nafuu yenye thamani ya Sh milioni 105.

Kwa niaba ya Afisa Maendeleo ya Jamii wa Manispaa ya Bukoba, Faraja Chaula, amesema maafisa maendeleo ya jamii watatumia Mwezi wa Maendeleo ya Jamii kufuatilia wanufaika wa mikopo ya asilimia 10, kukagua miradi wanayoitekeleza na kutoa elimu kuhusu matumizi sahihi ya fedha za mikopo.

Amesema mwezi huo pia utatumika kutoa elimu kwa wafanyabiashara wadogo kuhusu fursa za mikopo ya masharti nafuu, umuhimu wa lishe bora, kuchangia chakula shuleni na masuala ya afya ya jamii.

Ameongeza kuwa shughuli nyingine ni kutoa elimu ya kupinga ukatili wa kijinsia na kuimarisha mawasiliano kati ya serikali, wananchi na wadau wa maendeleo.

Kongamano la uzinduzi wa Mwezi wa Maendeleo ya Jamii lilihudhuriwa na mamia ya wananchi wa Manispaa ya Bukoba, ambao walipata fursa ya kuelimishwa kuhusu matumizi ya nishati safi ya kupikia pamoja na semina ya uwekezaji na matumizi sahihi ya fedha kupitia vikundi vyao.

Kaulimbiu ya Mwezi wa Maendeleo ya Jamii mwaka huu ni: “Familia Imara, Jamii na Taifa Imara Kuelekea Dira ya Maendeleo 2050.”

GEITA: Waziri wa Nchi, Ofisi ya Waziri Mkuu – Kazi, Ajira na Mahusiano, Deus Sangu, amewataka wachimbaji wadogo wa madini mkoani Geita kuchukua tahadhari dhidi ya athari zinazoweza kujitokeza kutokana na mvua kubwa zinazotarajiwa kunyesha nchini.

Sangu ametoa agizo hilo wakati akifungua mafunzo ya Usalama na Afya Mahali pa Kazi kwa wachimbaji wadogo wa madini mkoani Geita, akisisitiza umuhimu wa wachimbaji kufuatilia taarifa za utabiri wa hali ya hewa kutoka Mamlaka ya Hali ya Hewa Tanzania (TMA) ili waweze kuchukua hatua mapema.

Amesema tahadhari hiyo ni muhimu zaidi kwa kuwa shughuli nyingi za uchimbaji zinazofanywa na wachimbaji hao ni za chini ya ardhi, hivyo uwepo wa mvua kubwa unaweza kuongeza vihatarishi katika maeneo ya uchimbaji.

“Niwatake wachimbaji wote kuendelea kuchukua tahadhari ikiwemo kufuatilia taarifa za utabiri wa hali ya hewa kutoka Mamlaka ya Hali ya Hewa, ili kuchukua tahadhari mapema. Uchimbaji wetu ni wa underground, hivyo ni muhimu kujiridhisha kabla ya kuanza kufanya uchimbaji,” amesema Mhe. Sangu.

Ameongeza kuwa endapo kutatokea madhara yoyote katika maeneo ya uchimbaji, taarifa zinapaswa kutolewa mapema kwa OSHA na mamlaka nyingine zinazohusika ili hatua stahiki ziweze kuchukuliwa.

Waziri Sangu pia amewataka wachimbaji kutumia elimu wanayopewa kuhusu usalama na afya mahali pa kazi, pamoja na kutumia ipasavyo vifaa kinga walivyokabidhiwa, huku akisisitiza umuhimu wa wachimbaji kukumbushana mara kwa mara kuhusu uzingatiaji wa taratibu za usalama.

Kwa upande wake, Mtendaji Mkuu wa Wakala wa Usalama na Afya Mahali pa Kazi (OSHA), Bi. Khadija Mwenda, amesema mafunzo hayo ni sehemu ya utekelezaji wa maelekezo ya Serikali ya kuhakikisha makundi mbalimbali ya wafanyakazi, wakiwemo wachimbaji wadogo, yanapatiwa elimu kuhusu usalama na afya mahali pa kazi.

Amesema OSHA imekuwa ikiendesha mafunzo kama hayo katika maeneo mbalimbali nchini, ikiwa ni pamoja na Wilaya za Bukombe mkoani Geita na Namungo mkoani Lindi.

Kwa mujibu wa Bi. Mwenda, wachimbaji wadogo wanakabiliwa na vihatarishi mbalimbali kutokana na aina ya shughuli wanazofanya, jambo lililosababisha OSHA kuamua kuwafikia moja kwa moja kwa kutoa elimu ya usalama na afya pamoja na kuwapatia vifaa vya kujikinga (PPE).

Mafunzo hayo yamewashirikisha wachimbaji kutoka Mbogwe na Geita, pamoja na wachimbaji kutoka Uganda, ambapo wamefundishwa namna ya kutambua na kudhibiti vihatarishi katika maeneo ya kazi pamoja na utoaji wa huduma ya kwanza.

Akizungumza kwa niaba ya Balozi wa Uganda nchini Tanzania, mwakilishi wa Ubalozi huo, Brigedia Jenerali Julius Mbaine, amesema ushiriki wa wachimbaji kutoka Uganda umefungua fursa ya kubadilishana uzoefu na kutambua maeneo ambayo Tanzania na Uganda zinaweza kushirikiana katika sekta ya madini.

Amesema sekta ya madini inaweza kuwa jukwaa muhimu la kuimarisha mahusiano ya nchi hizo mbili, hususan katika uwekezaji, biashara na mnyororo wa thamani wa madini.

“Sekta ya madini inatoa jukwaa muhimu la kuimarisha mahusiano. Ubalozi wa Uganda nchini Tanzania uko tayari kusaidia kuimarisha uhusiano wa kitaasisi na kibiashara kati ya nchi hizo mbili, hususan katika kukuza uwekezaji, biashara na mnyororo wa thamani wa madini,” amesema Brigedia Jenerali Mbaine.

Ameongeza kuwa mazungumzo yaliyofanyika kati ya ujumbe wa Uganda na wadau wa madini mkoani Geita yamewapa fursa ya kuelewa zaidi sekta ya madini nchini Tanzania na kubaini maeneo yenye maslahi ya pamoja.

Kwa upande wake, Mbunge wa Geita Mjini, Chacha Mwita Wambura, amepongeza juhudi zinazofanywa na OSHA katika kusimamia usalama na afya mahali pa kazi nchini.

Amesema shughuli za uchimbaji madini zina vihatarishi mbalimbali, hivyo elimu na uzingatiaji wa taratibu za usalama ni muhimu katika kulinda maisha na afya za wachimbaji.

Mafunzo hayo yameandaliwa na OSHA kwa kushirikiana na Mkoa wa Geita ikiwa ni sehemu ya Maonesho ya 9 ya Kimataifa ya Teknolojia ya Madini yanayofanyika mkoani humo.

Global Publishers
September 26, 2026
0 views
0 Comments

DOHA, QATAR: Waziri Mkuu wa Jamhuri ya Muungano wa Tanzania, Dkt. Mwigulu Nchemba, amewasili nchini Qatar leo, Septemba 25, 2026, kwa ziara ya kikazi.

Dkt. Mwigulu amewasili katika Uwanja wa Ndege wa Kimataifa wa Hamad, jijini Doha, ambapo amepokelewa na Mkuu wa Itifaki wa Wizara ya Mambo ya Nje ya Qatar, Balozi Ibrahim bin Yousif Fakhroo.

Pamoja na viongozi hao, Waziri Mkuu amepokelewa pia na Balozi wa Tanzania nchini Qatar, Habibu Awesi Mohamed.

Ziara hiyo ya kikazi inatarajiwa kuendelea kuimarisha uhusiano na ushirikiano kati ya Tanzania na Qatar katika maeneo mbalimbali yenye maslahi kwa mataifa hayo mawili.