Habarimpya

KARAGWE: Shule ya Ushirika wa Wakulima wa Kahawa KDCU Nyaishozi, iliyopo Wilaya ya Karagwe mkoani Kagera, imejikita katika masomo ya sayansi na mazingira kwa lengo la kuwaandaa wanafunzi kutumia maarifa na ubunifu wao katika kutatua changamoto zinazoikabili jamii na kuchochea maendeleo ya sekta ya kilimo.

Shule hiyo, ambayo awali ilianzishwa kwa ajili ya watoto wa jamii ya wakulima wa kahawa wa Kyerwa na Karagwe, kwa sasa imepanua wigo na kupokea wanafunzi kutoka mikoa mbalimbali ya Tanzania.

Katika mahafali yake ya 34 mwaka 2026, jumla ya wanafunzi 255 wanatarajiwa kuhitimu, huku wakiwa na matumaini ya kutumia elimu waliyoipata kujenga maisha yao na kuchangia maendeleo ya jamii na Taifa kwa ujumla.

Mwenyekiti wa Chama cha Ushirika wa Wakulima, Fatson Josiah, amesema elimu ya sayansi na teknolojia inaweza kuwa msingi muhimu wa kubadili kilimo kutoka cha mazoea kwenda kilimo cha kisasa, chenye tija na kinachoendana na mabadiliko ya dunia.

Amesema maandalizi mazuri ya watoto kupitia masomo ya sayansi yanaweza kuwajengea uwezo wa kutumia maarifa, vipaji na ubunifu katika kukabiliana na changamoto mbalimbali za kijamii na kiuchumi.

Josiah amesema licha ya kidato cha nne kuwa hatua ya kawaida katika mfumo wa elimu, ni daraja muhimu linalomuandaa mwanafunzi kwa hatua nyingine za maisha na elimu, hivyo ameiomba jamii ya wakulima kuitumia shule hiyo kama fursa ya kuinua elimu ya watoto wao na kujenga kizazi kitakachokuja kuwa msaada kwa jamii.

Kwa upande wa ushirika, amesema tayari wakulima wamefanya uamuzi wa kuanzisha elimu ya awali katika shule hiyo, huku wakulima wanaozalisha kahawa wakipewa utaratibu wa kugharamia elimu kupitia makato kwenye mauzo ya kahawa badala ya kulipa fedha taslimu.

Amesema utaratibu huo unalenga kuhakikisha watoto wanapata fursa ya kusoma bila kukatishwa masomo kutokana na changamoto za malipo.

Mwalimu Mkuu wa shule hiyo, Audax Gereon, amesema kuanzishwa na kuimarishwa kwa masomo ya sayansi kumekuwa kivutio kikubwa kwa shule hiyo, hali iliyosababisha wanafunzi kutoka mikoa mbalimbali kujiunga nayo.

Gereon amesema elimu inayohusiana na kilimo na mazingira ni muhimu kwa kila mwanafunzi kutokana na nafasi yake katika maisha ya kila siku na maendeleo ya Taifa.

“Kwa mahafali haya ya 34 tunaelezea kielelezo cha mafanikio ya shule kwamba si shule ya wakulima bali ni shule ya Watanzania wote na lengo la shule hii si biashara bali ni huduma kwa watoto na Taifa la kesho,” amesema Gereon.

Diwani wa Kata ya Nyaishozi, Wales Mashanda, amesema amevutiwa na namna wanafunzi wanaosoma masomo ya sayansi wanavyotumia ubunifu wao kutengeneza vifaa mbalimbali kwa kutumia malighafi zinazopatikana katika mazingira yao.

Amesema kupitia mahafali hayo, wanafunzi wameonyesha uwezo wa kubuni na kuwasilisha kazi zao mbele ya jamii, akisisitiza kuwa katika dunia ya sasa, mafanikio ya mwanafunzi hayapaswi kupimwa kwa ufaulu pekee bali pia uwezo wake wa kubuni na kutatua changamoto.

Ametaka watoto wenye vipaji vya ubunifu kupewa nafasi na kuwezeshwa ili waweze kuendeleza mawazo yao na kuibua suluhisho zitakazowanufaisha wao na jamii kwa ujumla.

Katika mahafali hayo, wanafunzi wamewasilisha bunifu mbalimbali, ikiwemo utengenezaji wa magari na roboti, pamoja na kutoa elimu kwa wananchi kuhusu magonjwa yasiyoambukiza, ikiwemo shinikizo la damu, na umuhimu wa kuzingatia ulaji unaofaa.

Uongozi wa shule umeahidi kuendelea kuzitambua na kuzifuatilia timu za wanafunzi wenye ubunifu, pamoja na kupokea mahitaji na mawazo yao kuhusu vifaa vinavyoweza kuwasaidia kuendeleza vipaji na ndoto zao kupitia masomo ya sayansi.

Kwa hatua hiyo, Nyaishozi Sekondari inalenga kuendelea kuwa kituo cha elimu kinachowaandaa vijana kuwa wabunifu, watatuzi wa changamoto na wazalishaji wa maarifa yatakayosaidia kuleta mabadiliko chanya katika jamii.

DAR ES SALAAM: Wanafunzi zaidi ya 95 kutoka Tanzania wameondoka nchini kwenda India kwa ajili ya kuendelea na masomo ya elimu ya juu katika vyuo mbalimbali, ikiwa ni kundi la kwanza kati ya wanafunzi 198 wanaotarajiwa kusafiri kwenda India kupitia Global Education Link mwaka 2026.

Wanafunzi hao wameondoka kupitia Kituo cha Ndege cha Kimataifa cha Julius Nyerere (Terminal 3) jijini Dar es Salaam, huku wengi wao wakichagua kusomea fani za sayansi, teknolojia na taaluma nyingine zinazokwenda sambamba na mahitaji ya uchumi wa dunia wa sasa.

Miongoni mwa fani wanazokwenda kusomea ni Uhandisi wa Kompyuta, Usalama wa Mtandao (Cyber Security), Akili Bandia (Artificial Intelligence), Uhandisi wa Ujenzi, taaluma mbalimbali za afya, Sheria na Usimamizi wa Biashara.

Akizungumza kwa niaba ya Mkurugenzi Mtendaji wa Global Education Link, Meneja wa Tawi la Dar es Salaam wa kampuni hiyo, Micky Musa, alisema safari hiyo ni sehemu ya mpango mpana wa kuwaunganisha vijana wa Tanzania na fursa za elimu ya kimataifa.

“Zaidi ya wanafunzi 95 wanaondoka katika kundi hili la kwanza kwenda India, huku kwa mwaka huu mzima tukitarajia jumla ya wanafunzi 198 kwenda kusoma nchini humo. Hili si kundi la mwisho, kwani bado tuna wanafunzi wengine wanaokamilisha taratibu zinazohitajika,” alisema Musa.

Aliongeza kuwa mbali na India, Global Education Link inaandaa kundi jingine la takribani wanafunzi 185 wanaotarajiwa kwenda China, huku wanafunzi wengine wakiwa katika hatua mbalimbali za maandalizi ya kwenda kusoma Malaysia, Marekani na Uingereza.

Musa aliwahimiza vijana wenye ndoto za kusoma nje ya nchi kutembelea ofisi za Global Education Link zilizopo Dar es Salaam, Dodoma, Zanzibar, Mwanza na Arusha.

“Kadri muda unavyoendelea, Watanzania wataendelea kuona makundi zaidi ya wanafunzi yakiondoka kwenda kusoma nje ya nchi. Tunawahimiza vijana wanaotamani kusoma nje ya nchi kutembelea ofisi zetu. Bado kuna muda. Njooni na matokeo yenu ya masomo, Global Education Link iko tayari kusaidia kutimiza ndoto zenu,” alisema.

Aidha, Musa aliwahimiza wazazi na walezi ambao watoto wao wana nia ya kwenda kusoma nje ya nchi kutumia huduma za Global Education Link kwa ajili ya kupata mwongozo kuhusu uchaguzi wa vyuo na programu za masomo, udahili, taratibu za visa pamoja na maandalizi ya safari.

Miongoni mwa wanafunzi walioondoka ni wale wanaokwenda kusomea Computer Science, Artificial Intelligence na Cyber Security. Walisema wamechagua fani hizo kutokana na kasi ya maendeleo ya teknolojia na umuhimu unaoongezeka wa ujuzi wa kidijitali katika maendeleo ya uchumi wa kisasa.

Alvin Andrew Munda, mwenye umri wa miaka 17, anayekwenda kusoma katika Chuo Kikuu cha Lovely Professional University nchini India, alisema amechagua kusomea Computer Science kwa sababu analenga kujenga ujuzi wa vitendo katika teknolojia na baadaye kujikita katika taaluma ya Cyber Security.

Alisema msisitizo wa chuo hicho katika mafunzo ya vitendo na matumizi ya maabara ni miongoni mwa sababu zilizomfanya achague chuo hicho.

“Napendelea mfumo wa elimu unaoweka msisitizo zaidi kwenye mafunzo ya vitendo badala ya kuzingatia zaidi nadharia na mitihani. Nataka kutumia maarifa nitakayoyapata kutengeneza suluhisho na hatimaye kujikita katika Cyber Security, kwa sababu usalama wa mtandao una umuhimu mkubwa katika dunia ya sasa,” alisema.

Munda aliishukuru Global Education Link kwa msaada walioupata yeye na familia yake katika mchakato mzima, kuanzia uchaguzi wa chuo hadi maandalizi ya safari.

“Global imetuunga mkono katika mchakato mzima. Walituongoza katika kila hatua na kuwa kiungo kati yetu, wazazi wetu na chuo hadi kufikia hatua hii ya kuwa uwanja wa ndege tayari kwa safari,” alisema.

Mwanafunzi mwingine anayekwenda kusomea fani zinazohusiana na Computer Science na Artificial Intelligence alisema anatarajia kuwa mtaalamu wa data na teknolojia katika miaka ijayo.

Alisema Artificial Intelligence tayari imekuwa sehemu muhimu katika sekta za benki, afya, biashara, serikali na sekta nyingine, hivyo elimu katika eneo hilo itamwezesha kushiriki katika maendeleo ya teknolojia nchini Tanzania.

Aidha, mwanafunzi mwingine anayekwenda kusomea Shahada ya Usimamizi wa Biashara pamoja na Shahada ya Sheria (Bachelor of Business Administration and Bachelor of Laws) alisema anatamani kuwa mwanasheria na mjasiriamali mwenye mafanikio baada ya kukamilisha masomo yake.

Alisema Global Education Link imekuwa na mchango mkubwa katika kumwezesha kufikia hatua ya kwenda kusoma nje ya nchi.

“Global Education imetusaidia sana, hasa katika mchakato wa visa, kupangiwa chuo na maandalizi mengine ya safari. Ushirikiano kati yangu, wazazi wangu na Global Education umetufikisha hapa tulipo leo,” alisema.

Kwa upande wao, wazazi waliowasindikiza watoto wao katika Uwanja wa Ndege wa Kimataifa wa Julius Nyerere waliipongeza Global Education Link kwa kusimamia maandalizi ya wanafunzi kuanzia hatua za awali hadi siku ya kuondoka.

Donald Kito, mzazi wa Isaac Donald Kito, ambaye anaelekea Lovely Professional University kusomea Diploma ya Uhandisi wa Ujenzi, alisema familia yao ilifahamu kuhusu Global Education Link kupitia matangazo.

Alisema baada ya kuwasiliana na taasisi hiyo, walipatiwa taarifa na mwongozo wa kina uliowapa ujasiri wa kuendelea na mchakato wa kumpatia mtoto wao nafasi ya kusoma nje ya nchi.

Kuondoka kwa wanafunzi hao kunaonesha kuongezeka kwa hamu miongoni mwa vijana wa Tanzania ya kupata elimu na sifa za kitaaluma zinazotambulika kimataifa, hususan katika nyanja za teknolojia, uhandisi, biashara, sheria na taaluma nyingine zinazoendana na mahitaji yanayobadilika ya uchumi wa dunia.