Author: admin

DAR ES SALAAM:  Jukwaa la ubunifu wa mavazi nchini maarufu kama Tanzania Fashion Festival, msimu wa saba litafanyika Septemba 26, 2026 likinogeshwa na  Video Queen, Fayvanny Ukumbi wa Terrace Slipway, ijini Dar es Salaam.

Msemaji wa tamasha hilo,  Bhoke Egina, amesema kila msimu umekuwa na utofauti wake, huku mwaka huu wakitarajia kumpokea Fayvanny kama mgeni rasmi.

Amesema pia jukwaa hilo litawakutanisha warembo mbalimbali, akiwemo Miss Grand Tanzania, Beatrice Alex na Miss Grand Kilimanjaro, Tess Kessy.

“Kila msimu tunakuwa na utofauti. Mwaka huu tumepata muitikio mkubwa kutoka kwa warembo, hivyo tumeamua kuwapa nafasi zaidi kushiriki katika jukwaa hili,” amesema

Amesema Tanzania Fashion Festival inalenga kukuza sanaa za maonesho, kuibua vipaji vipya na kuwapa nafasi wabunifu wachanga kuonyesha kazi zao bila gharama.

“Lengo la jukwaa hili ni kuendeleza na kukuza sanaa za maonesho, kuibua na kuunga mkono vipaji vipya vinavyochipukia. Mbunifu anatakiwa kuandaa mavazi yake na kuja kuyaonesha katika jukwaa hili bila gharama,” amesema.

Amesema tamasha hilo litawakutanisha mastaa mbalimbali kutoka katika tasnia ya muziki wa bongo fleva, filamu, mitindo na sanaa nyingine za maonyesho, pamoja na viongozi na wadau wa tasnia.

Amesema aliamua kuanzisha jukwaa hilo kutokana na kutambua mchango wake katika tasnia ya ubunifu wa mavazi na kutaka kuwainua wabunifu wachanga.

“Kwa kutambua mchango wangu katika tasnia ya ubunifu wa mavazi nchini, niliamua kuandaa jukwaa hili ili kuibua wabunifu wachanga na kuzidi kuipa nafasi tasnia ya mavazi nchini,” amesema.

 

Tanzania imetangaza azma yake ya kuwania nafasi ya uanachama usio wa kudumu katika Baraza la Usalama la Umoja wa Mataifa kwa kipindi cha 2029–2030, huku ikiahidi kupeleka katika chombo hicho sauti imara ya Afrika na kusukuma mbele diplomasia ya kuzuia migogoro, utatuzi wa migogoro kwa njia za amani na mageuzi ya operesheni za kulinda amani.

 

Msimamo huo umetolewa na Makamu wa Rais wa Jamhuri ya Muungano wa Tanzania, Mhe. Deogratius Ndejembi, wakati akimwakilisha Rais wa Jamhuri ya Muungano wa Tanzania Mhe. Dkt. Samia Suluhu Hassan, katika Mjadala wa Mkutano wa 81 wa Baraza Kuu la Umoja wa Mataifa, unaofanyika jijini New York, Marekani.

 

Mhe. Ndejembi amesema Tanzania ikichaguliwa itatoa kipaumbele kwa diplomasia ya kuzuia migogoro kabla haijawa vita, utatuzi wa migogoro kwa njia za amani, kuimarisha nafasi ya wanawake katika ulinzi na ujenzi wa amani, kuongeza ushiriki wa vijana katika ajenda za amani na usalama, pamoja na kusukuma mbele mageuzi ya operesheni za Umoja wa Mataifa za kulinda amani.

 

Tanzania imesema dhamira hiyo imepata uungwaji mkono wa Umoja wa Afrika (AU), huku uchaguzi ukitarajiwa kufanyika Juni 2028.

 

Katika hotuba ya Makamu wa Rais, Tanzania imeweka wazi msimamo kwamba Umoja wa Mataifa unapaswa kuendelea kufanyiwa mageuzi ili kuimarisha misingi ya haki, usawa na uwakilishi wenye uwiano, badala ya mfumo wa kimataifa kuendelea kuakisi zaidi nguvu na ushawishi wa mataifa machache.

 

Tanzania imesisitiza kuwa mageuzi hayo ni muhimu katika kipindi ambacho dunia inakabiliwa na migogoro na vita, athari za mabadiliko ya tabianchi, milipuko ya magonjwa, kasi ya maendeleo ya Akili Mnemba (AI), pamoja na changamoto za usalama wa nishati.

 

 

Makamu wa Rais amesema, Tanzania imepiga hatua kubwa katika kupunguza vifo vya mama na mtoto kwa kuongeza kiwango cha uzazi unaofanyika katika vituo vya afya kutoka asilimia 51 mwaka 2015 hadi asilimia 81 mwaka 2022. Amesema uzoefu katika hilo unaonyesha kuwa uwekezaji katika miradi inayotekelezeka na kuweka ustawi wa watu mbele, maendeleo yanaweza kuhama kutoka hatua ya ahadi hadi matokeo yanayoonekana na kupimika.

 

Amesema ni kwa msingi huo ambapo Rais Samia Suluhu Hassan alikubali jukumu la kuwa kinara wa masuala ya Afya ya Mama na Mtoto kwa niaba ya Umoja wa Afrika. Chini ya uongozi wake, Tanzania imefanikiwa  kupunguza vifo vya akina mama kwa asilimia 80 ndani ya kipindi cha miaka saba pekee. Tanzania inalenga kufikia malengo ya “Sifuri Tatu” (Three Zeros), ambayo ni: Kutokuwepo kwa vifo vya mama na mtoto vinavyoweza kuzuilika;

 kutokuwepo kwa uzazi unaofanyika majumbani; na kutokuwepo kwa watoto ambao hawajapata chanjo. Amesema uzoefu unaonyesha kuwa hilo ni lengo ambalo Afrika inaweza kulifikia kwa mafanikio, lakini litahitaji uongozi thabiti wa kisiasa, rasilimali fedha za kutosha, na ushirikiano imara zaidi. Hivyo, amehimiza Jumuiya ya Kimataifa kuungana nasi katika kulisukuma mbele ajenda hiyo.

 

Tanzania pia imesisitiza umuhimu wa nchi zinazoendelea kupewa sauti kubwa zaidi katika taasisi na mifumo ya kimataifa inayofanya maamuzi ya kifedha yanayoathiri uchumi wake wa muda mrefu wa maendeleo, Tanzania imewasilisha Dira ya Taifa ya Maendeleo 2050 kama msingi wa kujenga uchumi jumuishi, shindani na wenye uwezo wa kustahimili misukosuko, kupitia uwekezaji katika watu, miundombinu yenye tija, teknolojia, ubunifu, wanawake na vijana.

 

Makamu wa Rais amesema ni muhimu kufanyika kwa mageuzi kwenye mfumo wa fedha wa kimataifa ili nchi zinazoendelea ziweze kupata rasilimali zinazohitajika kuharakisha utekelezaji wa Malengo ya Maendeleo Endelevu (SDGs). Amesema Tanzania inasisitiza kuongezeka kwa mikopo yenye masharti nafuu,

 kuhamasishwa kwa uwekezaji wa sekta binafsi, kurahisishwa kwa upatikanaji wa fedha za maendeleo na tabianchi na nchi zinazoendelea kupewa sauti kubwa katika maamuzi ya kifedha duniani.

 

Katika ajenda ya mabadiliko ya tabianchi, Tanzania imeeleza wasiwasi kuhusu pengo kati ya kiwango cha uzalishaji wa gesi chafuzi duniani na fedha zinazotolewa kusaidia nchi zinazoathirika kukabiliana na madhara yake.

 

Tanzania imesisitiza kuwa nchi zinazochangia kwa kiwango kikubwa uzalishaji wa gesi chafuzi zinapaswa kubeba wajibu mkubwa zaidi katika kugharamia hatua za kukabiliana na athari za mabadiliko ya tabianchi.

 

 

Katika kueleza mkakati wake wa mpito kuelekea nishati safi, Tanzania imetaja Bwawa la Kufua Umeme la Julius Nyerere lenye uwezo wa kuzalisha megawati 2,115, miradi ya nishati ya jua na upepo yenye jumla ya megawati 650, pamoja na mipango ya kuzalisha megawati 130 za nishati ya jotoardhi.

 

Pia imetaja uwekezaji katika reli ya umeme na lengo la kufikisha matumizi ya nishati safi ya kupikia katika asilimia 80 ya kaya ifikapo mwaka 2034.

Katika eneo la diplomasia ya kimataifa, Makamu wa Rais amesema Tanzania inapinga matumizi ya vikwazo vya upande mmoja vinavyowekwa na baadhi ya mataifa dhidi ya mengine, ikisema hatua hizo zinaweza kudhoofisha mamlaka ya nchi, kuathiri maendeleo na kupunguza uwezo wa wananchi kunufaika kikamilifu na haki zao.

 

Tanzania imeeleza mshikamano wake na Cuba, Zimbabwe na mataifa mengine yanayokabiliwa na vikwazo hivyo, huku ikitoa wito wa kuchukuliwa hatua za makusudi kuelekea kuondolewa kwa vikwazo bila masharti.

 

Kuhusu hali ya Gaza na Mashariki ya Kati, Tanzania inasisitiza umuhimu wa kuwalinda raia, kuruhusu misaada ya kibinadamu kuwafikia wanaohitaji bila vikwazo na kurejesha diplomasia kuwa njia kuu ya kutafuta amani ya kudumu.

 

Kwa ujumla, ujumbe wa Tanzania katika Mkutano wa 81 wa Baraza Kuu la Umoja wa Mataifa umeunganisha ajenda ya kitaifa ya maendeleo na hoja pana kuhusu nafasi ya Afrika katika mfumo wa kimataifa.

 

Tanzania imesisitiza kuwa Umoja wa Mataifa haupaswi kuwa jukwaa linaloakisi pekee uwiano wa nguvu duniani, bali taasisi inayosimamia haki, mshikamano, usawa na maendeleo kwa mataifa yote.

 

Ni msimamo unaoweka bayana ajenda ambayo Tanzania inakusudia kuibeba katika safari yake ya kuwania nafasi katika Baraza la Usalama la Umoja wa Mataifa kwa kipindi cha 2029–2030: kuimarisha sauti ya Afrika, kuzuia migogoro, kutetea suluhu za amani na kusukuma mageuzi ya mfumo wa kimataifa ili uwe na uwakilishi wenye uwiano zaidi.

 

Imetolewa na

Ofisi ya Makamu wa Rais

New York – Marekani

23 Septemba 2026.

 Dar es Salaam

 

Mbunge wa Jimbo la Buchosa, Eric Shigongo, amempongeza Mkurugenzi wa Kituo cha Ubia kati ya Serikali na Sekta Binafsi (PPP), David Kafulila, huku akimtaka kueleza namna Serikali inaweza kuwawezesha vijana wenye ubunifu kupata mitaji na kukuza mawazo yao kuwa biashara.

Shigongo amesema hayo kupitia ujumbe aliouchapisha kwenye ukurasa wake wa Instagram, akimuelekeza swali Kafulila kuhusu uwezeshaji wa vijana wabunifu nchini.

Amesema anaamini Kafulila ana uwezo mkubwa wa kiakili na kwamba, bila kubadilika, kununuliwa au kugandamizwa na watu wasiokubali mawazo mapya, anaweza kuleta mchango mkubwa kwa Taifa.

Katika swali lake, Shigongo amesema Serikali haina uwezo wa kuwaajiri vijana wote nchini, lakini kuna vijana wengi wenye mawazo na ubunifu ambao wanaweza kuwa na mchango mkubwa katika uchumi endapo watawezeshwa.

Amehoji kama Serikali inaweza kuwekeza kwa vijana hao kupitia mfumo wa Co-investing, ambapo Serikali na sekta binafsi wanaweza kushirikiana katika kuwezesha miradi ya vijana wabunifu.

“Je, Serikali ipo tayari kuweka na vijana hawa (Co-investing) katika ubunifu wao uwe bidhaa, ili wachangie katika kuajiri wenzao?” amehoji Shigongo.

Shigongo pia amesema changamoto kubwa kwa vijana wabunifu ni pengo la fedha kati ya hatua ya kutengeneza mfano wa bidhaa (prototype) na kuifikisha sokoni (commercialization).

Kafulila, akijibu swali hilo, amesema mjadala kuhusu ufadhili wa vijana na ubunifu unahitaji Tanzania kuhamia kwenye mfumo mwingine, kutoka kwenye dhana ya Serikali kuwa mtoaji wa fedha pekee kwenda kuwa kichocheo cha mtaji binafsi na mshirika wa kugawana hatari.

Amesema changamoto kwa startups na vijana wabunifu si ukosefu wa mawazo, bali ni upatikanaji wa fedha katika hatua za awali, akieleza kuwa taasisi za kawaida za kifedha mara nyingi hutaka dhamana, historia ya mikopo, hesabu zilizokaguliwa na mtiririko wa fedha kabla ya kutoa mikopo.

Kafulila amesema vigezo hivyo vinaweza kuwa vigumu kwa biashara changa na miradi ya ubunifu ambayo bado haijafikia hatua ya kuwa na historia kubwa ya kifedha.

Hoja ya Shigongo kuhusu uwezeshaji wa vijana wabunifu pia ina historia katika mijadala yake Bungeni. Mwaka 2024 aliuliza kuhusu kuanzishwa kwa mfuko wa kusaidia wabunifu kupata mitaji ya kukuza mawazo yao kuwa biashara.

Aidha, katika mijadala ya Bunge ya mwaka 2025, Shigongo alisema Serikali imeanzisha Samia Innovation Fund kwa ajili ya kuwasaidia vijana wabunifu nchini.

Kwa sasa, mjadala kuhusu upatikanaji wa fedha kwa vijana na biashara changa unaendelea pia kupitia programu mbalimbali za ubunifu na uwezeshaji nchini. Septemba 2026, kwa mfano, vijana 20 wabunifu walishiriki AgriFin Hackathon 2026 jijini Arusha kwa lengo la kubuni suluhisho za kiteknolojia zitakazosaidia wakulima kupata huduma za kifedha na kuongeza tija.

Global Publishers
September 23, 2026
24 views
0 Comments

Mbunge wa Jimbo la Buchosa, Eric Shigongo, ameipongeza Mamlaka ya Dawa na Vifaa Tiba nchini (TMDA), chini ya uongozi wa Mkurugenzi Mkuu, Dkt. Adam Mitang’u Fimbo, kwa hatua zinazochukuliwa kudhibiti uingizaji na usambazaji wa dawa bandia nchini.

Katika taarifa iliyotolewa Septemba 22, 2026, TMDA imeeleza kuwa dawa bandia zimekuwa tishio kwa afya na maisha ya Watanzania, ikiwemo kuchangia usugu wa vimelea dhidi ya dawa, hali inayoweza kusababisha madhara makubwa kwa afya ya jamii.

Taarifa hiyo imeeleza kuwa hivi karibuni TMDA imekamata shehena za dawa zenye thamani ya mamilioni ya shilingi, ambazo zimebainika kuwa na viashiria vya kutokuwa salama au kutokidhi viwango vinavyotakiwa.

Aidha, Shigongo ameiomba TMDA kuendelea kuimarisha ukaguzi katika maghala ya kuhifadhia dawa, pamoja na kwa wafanyabiashara na waingizaji wa dawa, ili kuhakikisha ubora na viwango vya dawa vinachunguzwa kabla hazijawafikia wananchi.

Pia, ameiomba Serikali kuendelea kuiwezesha TMDA kwa bajeti, watumishi na vitendea kazi vya kutosha ili kuimarisha udhibiti wa dawa zisizokidhi viwango nchini.