Author: admin

Posted on

Naomi Campbell Ashinda Kesi, Kuendelea Kuongoza Taasisi za Misaada

LONDON, UINGEREZA: Mwanamitindo maarufu duniani, Naomi Campbell, ameshinda kesi ya kupinga marufuku ya miaka mitano iliyokuwa imemzuia kuhudumu kama mdhamini wa taasisi za misaada nchini England na Wales.

Uamuzi huo umetolewa Alhamisi na mahakama maalumu yenye majaji watatu, ambao walibaini kuwa Campbell, mwenye umri wa miaka 56, alipotoshwa na Bianka Hellmich, aliyekuwa mdhamini mwenzake katika taasisi ya Fashion for Relief.

Miaka miwili iliyopita, Charity Commission, taasisi inayosajili na kusimamia mashirika ya misaada nchini England na Wales, ilibaini kuwepo kwa matukio kadhaa ya utovu wa nidhamu na usimamizi mbaya katika Fashion for Relief.

Miongoni mwa masuala yaliyoibuliwa ni matumizi ya fedha za taasisi kugharamia baadhi ya matumizi binafsi ya Campbell, ikiwemo malazi katika hoteli ya nyota tano mjini Cannes, huduma za spa, room service pamoja na sigara.

Kutokana na matokeo hayo, Charity Commission ilimwekea Campbell marufuku ya miaka mitano ya kuhudumu kama mdhamini wa taasisi ya misaada.

Katika uamuzi wake mpya, mahakama imethibitisha kuwa kulikuwa na utovu mkubwa wa nidhamu na usimamizi mbaya ndani ya taasisi hiyo.

Hata hivyo, majaji walihitimisha kuwa matatizo katika usimamizi wa fedha na matumizi mabaya ya fedha za taasisi yalitokana na vitendo vya Hellmich, ambavyo vilifichwa kutoka kwa Campbell.

Mahakama ilibaini pia kuwa Hellmich alitumia nyaraka za kughushi na aliwapotosha washauri wa kitaalamu pamoja na Charity Commission.

Majaji walikubaliana kwamba Campbell alishiriki kwa kiwango fulani katika kushindwa kwa taasisi hiyo kuwasilisha hesabu zake kwa wakati. Hata hivyo, walisema jambo hilo pekee halikumfanyi kuwa mtu asiyefaa kuhudumu kama mdhamini wa taasisi ya misaada.

Wakati wa kusikilizwa kwa kesi hiyo kwa siku nne mwezi Juni, Campbell alisema kosa lake pekee lilikuwa kumwamini Hellmich, ambaye alimfahamu kama mwanasheria.

Campbell pia alidai kuwa Hellmich alighushi saini yake na kutoa taarifa zisizo za kweli kuhusu sifa zake za kitaaluma.

Akizungumza mbele ya mahakama hiyo iliyopo London, Campbell alisema hakuliona tukio hilo kama kushindwa kwake, bali kama matokeo ya kumwamini mtu aliyedhani anaweza kumtegemea.

Charity Commission ilikuwa imepinga ombi la Campbell na kutaka marufuku ya miaka mitano iendelee kutumika.

Uchunguzi wa Fashion for Relief ulianzishwa na Charity Commission mwaka 2021 baada ya kuibuka kwa maswali kuhusu usimamizi wa taasisi hiyo.

Fashion for Relief, ambayo Campbell alihusishwa nayo, iliandaa matukio ya kuchangisha fedha mjini Cannes na London kwa ajili ya kusaidia miradi ya kupambana na umaskini.

Baada ya uchunguzi, taasisi hiyo ilivunjwa na kuondolewa kwenye rejista rasmi ya mashirika ya misaada nchini England na Wales mwaka 2024.

Uamuzi wa mahakama sasa unamruhusu Naomi Campbell kuendelea kuwa na uwezo wa kuhudumu kama mdhamini wa taasisi za misaada nchini England na Wales, huku mahakama ikitofautisha wajibu wake na vitendo vya usimamizi vilivyofanywa na Hellmich.

Posted on

Jihan Aongoza Kura, Tanzania Yatawala Vipengele vya Miss Grand 2026

Global Publishers
October 1, 2026
6 views
0 Comments

Mlimbwende wa Tanzania katika mashindano ya Miss Grand International 2026, Jihan Mohin Dimack, ameendelea kuonyesha ushindani mkubwa baada ya kuongoza katika hatua ya tatu ya upigaji kura wa kipengele cha Country’s Power of the Year.

Kwa mujibu wa matokeo yaliyooneshwa kwenye tovuti rasmi ya mashindano hayo, Jihan anaongoza kwa kupata asilimia 32 ya kura, akifuatiwa na Shyare Andrade wa Ecuador mwenye asilimia 15.

Ignacia Michelson wa Chile anashika nafasi ya tatu kwa asilimia 13, huku Emoura Phạm wa Vietnam akiwa nafasi ya nne kwa asilimia 12.

Tanzania pia imeendelea kufanya vizuri katika kipengele cha Miss Popular, ambapo inaongoza kwa asilimia 19 ya kura, ikifuatiwa na Vietnam yenye asilimia 17.

Matokeo hayo yanaifanya Tanzania kuwa miongoni mwa nchi zinazoonekana kupata uungwaji mkono mkubwa katika hatua hiyo ya mashindano.

Watanzania wanaendelea kuhamasishwa kumpigia kura na kumuunga mkono Jihan wakati zoezi la upigaji kura likiendelea, huku kila kura ikiwa na mchango katika safari yake ya Miss Grand International 2026.

Posted on

TANZANIA, QATAR ZALENGA KUIMARISHA USHIRIKIANO WA MADINI KUPITIA STAMICO

*Kampuni za Qatar zaalikwa kushiriki Mkutano wa Kimataifa wa Uwekezaji katika Sekta ya Madini (TMIC) 2026*

*Qatar Mining yaonesha utayari wa kushirikiana na Tanzania; wawekezaji waalikwa TMIC 2026*

**DOHA, QATAR**

Tanzania na Qatar zimeonesha dhamira ya kuimarisha ushirikiano katika Sekta ya Madini, huku Shirika la Madini la Taifa (STAMICO) likitajwa kuwa muhimu katika utekelezaji wa miradi ya pamoja, ikiwemo kuwawezesha wachimbaji wadogo.

Hayo yameelezwa wakati wa ziara ya ujumbe wa Sekta ya Madini Tanzania nchini Qatar ukiongozwa na Naibu Waziri wa Madini, Dkt. Steven Kiruswa, Baada ya kukutana na Naibu Waziri Mkuu Mstaafu wa Qatar ambaye pia ni Mwenyekiti wa Kampuni ya Thirty Five Investment Holding, Dkt. Khalid Mohamed.

Dkt. Kiruswa amesema Tanzania iko tayari kushirikiana na wawekezaji wa Qatar kupitia STAMICO katika miradi mbalimbali ya madini, ikiwemo kuwawezesha wachimbaji wadogo kupata mitaji, teknolojia na mafunzo ili kuongeza tija na ushiriki wao katika mnyororo wa thamani.

Amesema ushirikiano huo unakuja wakati Tanzania ikiendelea kufungua fursa za utafiti na uwekezaji, akibainisha kuwa utafiti wa kina wa rasilimali za madini umefanyika kwa asilimia 16 pekee ya eneo la nchi.

“Mpaka sasa Tanzania imefanya utafiti wa kina kwa asilimia 16 tu ya eneo lake. Hii ni fursa kubwa kwa wawekezaji kushirikiana na Serikali katika kufanya utafiti na kubaini rasilimali zilizopo,” amesema.

Dkt. Kiruswa pia amezialika kampuni za madini na wawekezaji kutoka Qatar kushiriki Mkutano wa Kimataifa wa Uwekezaji katika Sekta ya Madini (TMIC) 2026, utakaofanyika jijini Dar es Salaam kuanzia Novemba 19 hadi 21, 2026.

Ameeleza kuwa mkutano huo utajadili fursa za uwekezaji, teknolojia, uongezaji thamani na maendeleo ya mnyororo wa thamani wa madini.

Katika mazungumzo mengine, Dkt. Kiruswa amekutana na kuzungumza na Mkurugenzi Mtendaji wa Shirika la Madini la Taifa (Qatar Mining), Abdulaziz Abubakar ambapo ameonesha utayari wa kushirikiana na Tanzania.

Ushirikiano huo pia unatarajiwa kwenda sambamba na utekelezaji wa mpango wa Mining for a Brighter Tomorrow (MBT) unaolenga kuwawezesha wachimbaji wadogo, hususan vijana, wanawake na watu wenye mahitaji maalum, kupata mitaji, teknolojia, ujuzi na masoko.

Kwa upande wake, Balozi wa Tanzania nchini Qatar, Mhe. Habibu Mohamed, amezialika kampuni za madini nchini humo kutumia fursa za uwekezaji zilizopo Tanzania.

Naye, Mkurugenzi Mtendaji wa Qatar Mining, Abdulazizi Abubakar, amesema kampuni hiyo iko tayari kuangalia maeneo ya ushirikiano yatakayochangia maendeleo ya Sekta ya Madini na kunufaisha Tanzania na Qatar.

Posted on

Rais Samia Atuma Salamu za Pole Kufuatia Kifo cha Bilionea Chivayo

Global Publishers
October 1, 2026
6 views
0 Comments

Rais Samia Suluhu Hassan, kupitia akaunti yake rasmi ya Mtandao wa Kijamii wa Instagram, ametuma salamu za pole kufuatia kifo cha bilionea Wicknell Chivayo, raia wa Zimbabwe.

Rais Samia ameandika ujumbe wa Kiingereza unaotafsirika Kiswahili kama ifuatavyo:

“Ni kwa masikitiko makubwa ninatoa pole kufuatia kifo cha mfanyabiashara wa Zimbabwe, Bw. Wicknell Chivayo, mke wake mpendwa pamoja na watu wengine watatu ambao kwa masikitiko makubwa walipoteza maisha katika ajali ya helikopta iliyotokea Marondera.

“Zimbabwe na Afrika zimepoteza mjasiriamali kijana na mwenye maono, ambaye amegusa maisha ya watu wengi.

“Kwa niaba ya Serikali na wananchi wa Jamhuri ya Muungano wa Tanzania, ninatoa salamu zangu za pole za dhati na za kutoka moyoni kwa Mheshimiwa Emmerson Mnangagwa, Rais wa Jamhuri ya Zimbabwe; familia ya Chivayo, familia za wote waliopoteza wapendwa wao, pamoja na wananchi wa Zimbabwe.

“Mungu azilaze roho zao mahali pema peponi.

Amina.”

Posted on

Rick Ross Akamatwa Miami Kwa Mashtaka ya Unyanyasaji wa Mwili

Msanii wa muziki wa Marekani Rick Ross, ambaye jina lake halisi ni William Roberts II, amekamatwa jijini Miami, Florida, kwa mashtaka mawili ya kumpiga na kumshambulia aliyekuwa mpenzi wake, Jazzma Kendrick.

Ross alijisalimisha mwenyewe kwa polisi Alhamisi, Oktoba 1, 2026.

Kwa mujibu wa taarifa za polisi zilizonukuliwa, Kendrick alidai kuwa tukio hilo lilitokea Agosti 28 katika nyumba ambayo wawili hao walikuwa wakiishi.

Inadaiwa kuwa Kendrick alikuwa amelala wakati Ross alipomwamsha na kuanza kumuuliza kuhusu picha aliyokuwa ametagiwa kwenye mitandao ya kijamii. Mazungumzo hayo yalidaiwa kugeuka kuwa ugomvi, ambapo Kendrick alisema Ross alimpiga kofi usoni.

Aliendelea kudai kuwa Ross alimpiga mara kadhaa kifuani, kabla ya kumkaba shingoni kiasi cha kumfanya ashindwe kupumua. Pia alidai kuwa Ross alimvuta kwa nywele zake na kumsukumia ukutani.

Kendrick aliripotiwa kuwasilisha kwa polisi picha ambazo anadai zinaonyesha majeraha aliyoyapata.

Ross, ambaye bado yuko kwenye mchakato wa kesi, amekana mashtaka hayo na amedai hana hatia. Mawakili wake, Steve Sadow na Bradley Horenstein, wamesema mteja wao ameshtakiwa kwa makosa na kwamba sababu za aliyekuwa mpenzi wake kutoa madai hayo hazijaeleweka.

Mawakili hao pia wameeleza kuwa madai hayo yaliwasilishwa kwa polisi takribani mwezi mmoja baada ya tukio linalodaiwa kutokea, huku wakiiomba jamii kutohukumu kabla ya mchakato wa kisheria kukamilika.

Rick Ross amewekewa dhamana ya jumla ya takribani TSh milioni 15.6, ambapo TSh milioni 13 ni kwa shtaka la kumkaba na TSh milioni 2.6 kwa shtaka la kumpiga.

Anatarajiwa kufikishwa mahakamani kwa ajili ya kusomewa mashtaka tarehe 22 Oktoba 2026.

Kwa sasa, madai dhidi ya Rick Ross bado hayajathibitishwa mahakamani, na kesi inaendelea kupitia mchakato wa kisheria.

Posted on

Mbunge Kiswaga awafariji watoto wenye mahitaji maalumu – HabariLeo

IRINGA: Zikiwa zimepita mbili tu baada ya kurejea nchini kutoka China alikokuwa katika ziara ya kikazi kwa muda wa wiki tatu, Mbunge wa Jimbo la Kalenga, Jackson Kiswaga, amekutana na kula chakula pamoja na wanafunzi 145 wenye mahitaji maalumu wanaolelewa na kusoma katika shule ya msingi Kipera iliyopo jimboni mwake.

Kiswaga amesema ameamua kutumia muda huo kuwapa faraja na kuwahakikishia kuwa wanathaminiwa na jamii.

Amesema watoto wenye mahitaji maalumu wana ndoto, matarajio na mahitaji kama watoto wengine, hivyo jamii inapaswa kuwapa upendo, faraja na mazingira yatakayowawezesha kutimiza malengo yao.

“Watoto hawa wana matamanio kama walivyo wanadamu wengine. Mungu aliyewaumba watoto hawa ndiye aliyetuumba sisi sote na anatupenda,” alisema.

Kiswaga alisema uamuzi wa kukaa na kula pamoja na watoto hao ulikuwa zaidi ya kushiriki chakula, bali ni sehemu ya kuwapa ujumbe kwamba hawajatengwa na kwamba Serikali na jamii kwa ujumla zinawajali.

“Nimeona njia pekee ni kukaa nao, tule chakula pamoja na tuzungumze ili wasijione kwamba ni watoto waliotengwa. Serikali inawapenda na mimi kama Mbunge wa Jimbo la Kalenga ninawapenda,” alisema.

Kwa mujibu wa Mwalimu Mkuu wa shule hiyo, Faines Mteleka, wanafunzi 145 wenye mahitaji mbalimbali wanapata elimu na malezi katika shule hiyo.

Alisema wanafunzi hao wana changamoto zinazohusiana na ulemavu wa kuona, kusikia, akili, usonji, ualbino na ulemavu wa viungo.

Mteleka alisema watoto hao wanatoka maeneo mbalimbali ndani na nje ya Mkoa wa Iringa, na uwepo wa kituo hicho umesaidia kuwawezesha kupata elimu na malezi bila kulazimika kwenda maeneo ya mbali.

“Wanafunzi wanaishi katika mabweni kwa gharama za Serikali. Wanapata chakula cha asubuhi, mchana na jioni, pamoja na huduma za walezi wanaowahudumia mchana na usiku,” alisema.

Alisema Serikali pia imeendelea kuboresha mazingira ya shule hiyo, huku huduma za watoto wenye mahitaji maalumu zikiendelea kuvutia wanafunzi kutoka maeneo mbalimbali.

Mwalimu huyo alisema shule imepata mafanikio katika kuongezeka kwa uandikishaji wa wanafunzi na ufaulu katika mitihani ya kitaifa.

Hata hivyo, Mteleka alisema bado kuna changamoto ya upungufu wa walimu na vifaa vya kufundishia na kujifunzia vinavyokidhi mahitaji ya wanafunzi wenye changamoto mbalimbali.

“Tuna changamoto ya upungufu wa walimu. Walimu tulionao hawatoshi kuwafundisha wanafunzi wetu ambao ni wengi na wenye mahitaji mbalimbali,” alisema.

Alisema pia bwalo la chakula bado halijakamilika na shule inahitaji msaada wa Serikali na wadau mbalimbali kulikamilisha ili wanafunzi wawe na mazingira bora wakati wa kupata chakula.

Mteleka alisema Serikali pia imeanza ujenzi wa shule ya sekondari katika eneo hilo, ambayo ikikamilika itatoa fursa kwa wanafunzi wenye na wasiokuwa na mahitaji maalumu kuendelea na elimu baada ya kumaliza shule ya msingi.

 

Posted on

Morocco Yampata Waziri Mkuu Mwanamke wa Kwanza Katika Historia

RABAT, MOROCCO: Morocco imeingia katika historia baada ya Mfalme Mohammed VI kumteua Fatima Ezzahra El Mansouri kuwa Waziri Mkuu mpya wa nchi hiyo, na kuwa mwanamke wa kwanza kushika nafasi hiyo tangu Morocco ipate uhuru.

El Mansouri ameteuliwa baada ya uchaguzi wa wabunge uliofanyika Septemba 23, huku Waziri Mkuu aliyekuwa madarakani, Aziz Akhannouch, akitarajiwa kuendelea kusimamia serikali kwa muda kama kiongozi wa mpito hadi baraza jipya la mawaziri litakapoundwa.

Ikulu ya Morocco imesema Mfalme Mohammed VI alimpa El Mansouri jukumu la kuunda serikali mpya kufuatia matokeo ya uchaguzi huo.

El Mansouri Aingia Kwenye Historia

El Mansouri, mwenye umri wa miaka 50, ni mwanasheria kutoka familia maarufu ya Marrakesh.

Alianza kupata umaarufu mkubwa katika siasa za Morocco mwaka 2009 baada ya kuwa mwanamke wa kwanza kuwa Meya wa Marrakesh. Alirejea katika nafasi hiyo mwaka 2021.

Tangu Oktoba 2021, amekuwa akihudumu kama Waziri wa Nyumba na Mipango Miji katika serikali iliyoongozwa na Akhannouch.

Chama chake cha Authenticity and Modernity Party (PAM) kilishinda viti 97 kati ya 395 katika Baraza la Wawakilishi, kwa mujibu wa matokeo ya muda yaliyotangazwa na Waziri wa Mambo ya Ndani Abdelouafi Laftit.

Chama cha National Rally of Independents (RNI) cha Akhannouch kilimaliza nafasi ya pili kikiwa na viti 66, kutoka viti 102 kilivyopata katika uchaguzi wa mwaka 2021. Chama cha Istiqlal kilipata viti 65, huku chama cha Islamist Justice and Development Party kikirejea kwa kupata viti 54.

Ushiriki wa wapiga kura ulikuwa asilimia 38, ukishuka kutoka takribani asilimia 50 katika uchaguzi wa mwaka 2021.

El Mansouri Anakabiliwa na Kazi ya Kuunda Serikali

Kwa mujibu wa Katiba ya Morocco, mfalme humteua kuwa Waziri Mkuu kiongozi kutoka chama kilichoshinda viti vingi zaidi katika uchaguzi wa Bunge.

Hata hivyo, PAM haikupata idadi ya viti 198 inayohitajika kupata wingi wa moja kwa moja katika Baraza la Wawakilishi.

Hivyo, El Mansouri atalazimika kujenga muungano wa vyama ili kuunda serikali, kabla ya kuwasilisha orodha ya mawaziri kwa mfalme kwa ajili ya kuidhinishwa.

PAM, RNI na Istiqlal vimekuwa sehemu ya serikali ya pamoja tangu mwaka 2021, ingawa uhusiano kati ya PAM na RNI uliripotiwa kuwa na mvutano kuelekea uchaguzi.

Akhannouch Aondoka Baada ya Miaka Mitano

Akhannouch ameongoza serikali ya Morocco tangu Oktoba 2021.

Mbali na siasa, amekuwa akijulikana pia kutokana na utajiri wake mkubwa na nafasi yake katika Akwa Group, kampuni iliyoanzishwa na baba yake.

Akwa Group inamiliki Afriquia, moja ya mitandao mikubwa ya usambazaji mafuta nchini Morocco, pamoja na shughuli katika sekta za gesi, vyombo vya habari na mali isiyohamishika.

Katika kipindi chake kama Waziri Mkuu, masuala ya bei ya mafuta yalikuwa miongoni mwa hoja zilizozua mijadala, hasa baada ya bei kupanda kwa kiasi kikubwa mwaka 2022.

Kabla ya kuwa Waziri Mkuu, Akhannouch alihudumu kama Waziri wa Kilimo kuanzia mwaka 2007 hadi 2021. Pia aliiongoza RNI kuanzia 2016 hadi Februari 2026, alipobadilishwa na Mohamed Chaouki baada ya kutangaza kwamba hatagombea tena uongozi wa chama kwa muhula wa tatu.

Changamoto Zinamsubiri Waziri Mkuu Mpya

Serikali mpya ya El Mansouri inatarajiwa kukutana na changamoto kadhaa, zikiwemo ukosefu wa ajira kwa vijana, gharama za maisha pamoja na maandalizi ya Morocco kuelekea Kombe la Dunia la FIFA 2030.



Posted on

Fursa za Ajira Saudi Arabia na UAE Zatangazwa kwa Watanzania, Maombi Mwisho Oktoba 4, 2026

BRAVO JOB CENTER AGENCY LIMITED inatangaza fursa za ajira kwa waombaji wenye sifa mbalimbali za kufanya kazi Saudi Arabia na Falme za Kiarabu (UAE).

NAFASI ZA MADEREVA WA MAGARI MAKUBWA – SAUDI ARABIA

Waombaji wanahitajika kuwa na:

✅ Uzoefu wa kuendesha magari makubwa wa angalau miaka 2
✅ Leseni halali ya udereva
✅ Rekodi nzuri ya udereva
✅ Umri wa miaka 35 au zaidi
✅ Uwezo wa kufanya kazi kwa muda mrefu/shift ndefu

💰 MASLAHI YA MADEREVA

✅ Mshahara unaoshindana na viwango vya soko
Usafiri wa kwenda kazini kila siku
✅ Posho za safari
✅ Bima ya afya inayotolewa na kampuni
✅ Tiketi ya ndege

🇦🇪 FURSA ZA AJIRA – UAE

BRAVO JOB CENTER AGENCY LIMITED, kwa kushirikiana na SAEY BUSINESS – Misri, inatangaza fursa za ajira nchini UAE.

🎁 MASLAHI YA MFANYAKAZI

✅ Mshahara na posho kulingana na mkataba wa mwajiri
✅ Malazi hutolewa
✅ Huduma za matibabu bure
✅ Usafiri hutolewa kila siku kwenda kazini
✅ Chakula/kitchen facility hutolewa
✅ Saa 8 za kazi kwa siku, siku 6 kwa wiki
✅ Siku 1 ya mapumziko kwa wiki
✅ Overtime hulipwa
✅ Likizo ya siku 30 zenye malipo baada ya kutimiza miezi 12
✅ Tiketi ya kurudi UAE–Tanzania baada ya kukamilika kwa mkataba
✅ Mkataba wa awali wa miaka 2, unaoweza kuongezwa kwa makubaliano
✅ Bima na fidia kwa mujibu wa sheria za nchi ya ajira

📋 UTARATIBU WA AJIRA

Waombaji watachaguliwa kulingana na mahitaji ya mwajiri na nafasi husika. Waombaji watakaokidhi vigezo watawasilishwa kwa mwajiri kwa ajili ya hatua zinazofuata za mchakato wa ajira.

Mwisho wa kufanya usaili ni Oktoba 4, 2026

📞 MAWASILIANO NA MAOMBI

BRAVO JOB CENTER AGENCY LIMITED

📞 0714 326005
📞 0781 634642
📞 0678 805452

📍 OFISI:
Rissa Tower, Lumumba na Amani, Dar es Salaam.

📢 WOTE MNKARIBISHWA!
🤝 Mwambie na mwenzako kuhusu fursa hii

Posted on

Wanamichezo kutibiwa bure JKCI – HabariLeo

DAR ES SALAAM: TAASISI ya Moyo ya Jakaya Kikwete (JKCI) imewaalika wanamichezo wote nchini kujitokeza kupima afya bure, huku ikiahidi kutoa matibabu bila malipo kwa wale watakaobainika kuwa na matatizo ya kiafya.

Hatua hiyo inalenga kuimarisha afya za wanamichezo na kuwawezesha kuendelea na shughuli zao za michezo kwa usalama ili kutimiza ndoto zao, hasa katika kipindi hiki cha AFCON.

Akizungumza na waandishi wa habari jijini Dar es Salaam, Mkurugenzi Mtendaji wa JKCI na Daktari Bingwa wa Magonjwa ya Moyo, Dk Peter Kisenge, amesema taasisi hiyo imekuwa na utaratibu wa kuwafikishia wananchi huduma za afya na sasa imeelekeza nguvu kwa wanamichezo, na kwamba imejiandaa kikamilifu kuwahudumia wanamichezo kwani ina wataalamu, vifaa vya kutosha na teknolojia za kisasa zinazowezesha uchunguzi wa afya kwa ufanisi.

Kwa mujibu wa Dk Kisenge, amesema Serikali imeiwezesha JKCI kuwa na maabara maalumu na ya kisasa inayotumia teknolojia ya akili bandia (AI), ambayo itasaidia katika utoaji wa huduma mbalimbali za uchunguzi, na vipimo vitakavyotolewa ni pamoja na uchunguzi wa afya ya moyo, kiwango cha sukari, mapigo ya moyo pamoja na vipimo vingine muhimu vya afya.

Aidha, Dk Kisenge amewataka wanamichezo kujenga utamaduni wa kupima afya mara kwa mara ili kubaini mapema changamoto za kiafya na kupunguza hatari ya vifo vya ghafla wakati wa michezo.

Mchezaji wa pool table, Festo Yohana, ambaye alifika JKCI kwa ajili ya vipimo, ameishukuru taasisi hiyo kwa kuanzisha huduma hiyo bila malipo kwa wanamichezo, kwani wanamichezo wengi hawana utamaduni wa kupima afya zao mara kwa mara, licha ya kushiriki katika shughuli zinazohitaji afya na uimara wa mwili.

Amesema upimaji huo utawasaidia wanamichezo kujua hali zao kiafya, kuchukua hatua mapema endapo watabainika kuwa na changamoto na hivyo kuongeza uwezekano wa kuendelea na michezo yao kwa usalama, na kuwashauri wanamichezo kutumia fursa hiyo kwa kujitokeza kupima afya zao na kuweka afya mbele katika safari yao ya kimichezo.

Kwa upande wake, Balozi wa JKCI, Mrisho Mpoto, amesema lengo la taasisi hiyo ni kuanzisha huduma hiyo ni kupunguza magonjwa ya moyo na magonjwa mengine nchini, huku akisisitiza umuhimu wa kila mtu kufahamu hali yake ya afya.

Amesema ni muhimu zaidi kwa wanamichezo kufahamu viashiria muhimu vya afya zao, ikiwemo kiwango cha sukari, mapigo ya moyo na kiwango cha mafuta mwilini.

Mpoto amesema baadhi ya wanamichezo hufanya mazoezi bila kuzingatia utaratibu unaofaa au bila kufahamu hali ya afya zao, jambo ambalo linaweza kuwaweka katika hatari.

Amesema takwimu zinaonesha kuwa idadi kubwa ya watu hawafahamu hali zao za kiafya, hivyo amewataka wananchi kwa ujumla, pamoja na wanamichezo, kutumia fursa hiyo kwa kufika katika vituo vya JKCI kwa ajili ya vipimo na kupata huduma za matibabu bila malipo.

Hatua hiyo, amesema, inalenga kujenga utamaduni wa uchunguzi wa afya mapema na kusaidia wananchi kuchukua hatua stahiki kabla ya matatizo ya kiafya kuwa makubwa.

Posted on

Rais Samia Aapisha Mawaziri Watatu, Aongoza Baraza la Mawaziri

Global Publishers
October 1, 2026
0 views
0 Comments

DODOMA: Rais wa Jamhuri ya Muungano wa Tanzania, Dkt. Samia Suluhu Hassan, leo Oktoba 1, 2026, ameapisha viongozi mbalimbali aliowateua hivi karibuni katika hafla iliyofanyika Ikulu Chamwino, Dodoma.

Kwa mujibu wa taarifa iliyotolewa na Kurugenzi ya Mawasiliano ya Rais, walioapishwa ni Abdallah Hamis Ulega kuwa Waziri wa Katiba na Sheria, Dkt. Juma Zuberi Homera kuwa Waziri wa Nishati na Masanja Kung’u Kadogosa kuwa Waziri wa Ujenzi.

Aidha, Rais Samia amemuapisha Asha Khamis Abdulla kuwa Naibu Katibu Mkuu wa Wizara ya Fedha, akishughulikia masuala ya usimamizi wa fedha.

Baada ya kuwaapisha viongozi hao, Rais Dkt. Samia Suluhu Hassan ameongoza kikao cha Baraza la Mawaziri.

Hafla hiyo imefanyika Ikulu Chamwino, mkoani Dodoma, huku viongozi hao wakianza rasmi majukumu yao katika nafasi walizoteuliwa na Rais.