Mamia ya Wananchi Wampokea Mlezi wa CCM Mkoa wa Geita, Rajab Abdallah

GEITA: Mamia ya wananchi na wanachama wa Chama Cha Mapinduzi (CCM) wamejitokeza kwa wingi kumpokea Mjumbe wa Kamati Kuu ya Halmashauri Kuu ya CCM Taifa na Mlezi wa CCM Mkoa wa Geita, Rajab Abdallah, aliyewasili mkoani humo kwa ziara ya kichama.

Rajab Abdallah, ambaye pia ni Mwenyekiti wa CCM Mkoa wa Tanga, amewasili Geita leo, Novemba 5, 2026, ambapo msafara wake ulianzia katika Hoteli ya Lenny kabla ya kuelekea Ofisi za CCM Mkoa wa Geita.

Mapokezi hayo yamehudhuriwa na viongozi mbalimbali wa chama na Serikali, akiwemo Mbunge wa Geita Mjini, Mhandisi Chacha Mwita Wambura, Katibu wa CCM Mkoa wa Geita, MNEC wa Mkoa wa Geita pamoja na Mwenyekiti wa CCM Mkoa wa Geita.

Aidha, mamia ya wanachama wa CCM, vijana waendesha bodaboda na wananchi wengine walijitokeza kushiriki mapokezi hayo, wakijipanga katika maeneo mbalimbali ya njia iliyotumiwa na msafara wa kiongozi huyo.

Kuwasili kwa Rajab Abdallah mkoani Geita ni sehemu ya majukumu yake kama mlezi wa chama katika mkoa huo, yanayohusisha kushirikiana na viongozi wa chama katika kusimamia na kuimarisha shughuli za chama katika ngazi mbalimbali.

Mapokezi hayo yameonesha namna viongozi, wanachama na makundi mbalimbali ya wananchi walivyojitokeza kushiriki tukio hilo la kumpokea mlezi wao wa CCM Mkoa wa Geita.