Netanyahu Atoa Onyo Kali Dhidi ya Serikali Itakayoungwa Mkono na Vyama vya Kiarabu

Waziri Mkuu wa Israel, Benjamin Netanyahu, amepinga uwezekano wa kuundwa kwa serikali ya wachache itakayokuwa madarakani kwa kutegemea uungwaji mkono wa vyama vya Kiarabu, akivitaka vyama vya Kizayuni kuungana na Likud kuunda serikali pana ya kitaifa.

Akizungumza Jumatano jioni Novemba 4, 2026 Netanyahu alisema Israel inakabiliwa na changamoto za kiusalama zinazotokana na Iran na washirika wake, pamoja na kile alichokitaja kuwa ni vitisho vya ndani vinavyohusishwa na vyama vya Kiislamu vinavyounga mkono ugaidi.

Alidai kuwa vyama hivyo vinatishia utambulisho wa Kiyahudi wa taifa la Israel na vinaweza kuathiri uwezo wa serikali kukabiliana na maadui wake.

Netanyahu alionya kuwa serikali yoyote itakayokuwa inategemea uungwaji mkono wa vyama hivyo haitakuwa na uwezo wa kutosha kukabiliana na changamoto za kiusalama.

Alisema wawakilishi wa vyama hivyo wamekuwa wakitoa kauli ambazo, kwa mtazamo wake, zinaonyesha uungwaji mkono kwa wapiganaji wa Nukhba wanaoshikiliwa katika magereza ya Israel.

Badala yake, Netanyahu ametaka kuundwa kwa serikali pana ya kitaifa itakayoongozwa na chama chake cha Likud, ikijumuisha vyama vyote vya muungano wa kitaifa pamoja na vyama vingine vya Kizayuni vitakavyokuwa tayari kujiunga.

Aidha, aliwashutumu viongozi wa kambi ya mrengo wa kushoto kwa kujaribu kuunda serikali nyembamba ya wachache inayotegemea uungwaji mkono wa vyama vya Kiarabu.

Alidai kuwa viongozi hao wanaweka mbele maslahi yao ya kisiasa badala ya maslahi ya taifa.

Kauli za Netanyahu zinaonesha kuendelea kwa mvutano wa kisiasa nchini Israel kuhusu muundo wa serikali ijayo na nafasi ya vyama vya Kiarabu katika siasa za nchi hiyo.