Rais wa Marekani, Donald Trump, amesema Urusi inatarajia kusambaza zaidi ya tani 300,000 za mafuta ya dizeli katika masoko ya Marekani na dunia, huku tani nyingine 500,000 zikitarajiwa kuwasilishwa mwezi Novemba, katika hatua inayolenga kupunguza gharama za nishati zinazoongezeka kutokana na vita vinavyoendelea na Iran.
Trump ametoa kauli hiyo Ijumaa kupitia mtandao wa kijamii, baada ya kufanya mazungumzo na Rais wa Urusi, Vladimir Putin, akieleza kuwa kiongozi huyo amekubali kuruhusu usambazaji wa mafuta hayo katika masoko ya kimataifa.
Hatua hiyo imekuja wakati bei za nishati zikiendelea kuwa suala muhimu kwa uchumi wa dunia, huku gharama za mafuta zikiongezeka kutokana na athari za mzozo wa kijeshi unaohusisha Iran.
Wizara ya Hazina ya Marekani imetangaza pia kutoa leseni ya muda inayoruhusu mafuta ya dizeli kutoka Urusi kuingia katika masoko ya dunia. Hata hivyo, Ikulu ya Marekani haijaweka wazi utaratibu wa malipo ya mafuta hayo wala tarehe rasmi ya kuanza kwa usambazaji wake.
Uamuzi huo unazua maswali kuhusu mwelekeo wa sera ya Marekani dhidi ya Urusi, hasa ikizingatiwa kuwa ni mwezi mmoja tu tangu Trump asaini vikwazo vikubwa vilivyolenga sekta ya nishati ya Urusi na viwanda vingine vinavyosaidia kufadhili vita vya Moscow nchini Ukraine.
Aidha, hatua hiyo imeibua mjadala kuhusu iwapo Washington itaendelea kuimarisha vikwazo dhidi ya Moscow, wakati sheria inayoungwa mkono na vyama vikuu vya siasa nchini Marekani ikilenga waagizaji wakubwa wa mafuta na gesi ya Urusi.
Katika ujumbe wake, Trump hakuzungumzia moja kwa moja vikwazo hivyo wala vita vya Ukraine, badala yake akisisitiza kuwa kupunguza gharama za maisha kwa Wamarekani ni kipaumbele chake.
Ametaja wakulima, wafugaji na madereva wa malori kuwa miongoni mwa makundi yanayoweza kunufaika na juhudi za kupunguza gharama za nishati, ambazo zina athari kwa shughuli za uzalishaji, usafirishaji na bei za bidhaa.
Kwa upande wake, mjumbe maalumu wa Rais Putin, Kirill Dmitriev, amesema ushirikiano kati ya Marekani na Urusi katika sekta ya dizeli na nishati unaweza kuwa na manufaa kwa uchumi wa dunia.
Iwapo mpango huo utatekelezwa kama ulivyoelezwa, unatarajiwa kuwa na athari katika biashara ya kimataifa ya mafuta na mahusiano ya kiuchumi kati ya Washington na Moscow. Hata hivyo, kiwango cha athari zake katika bei za mafuta na gharama za nishati kitategemea utekelezaji wa mpango huo na hali ya mzozo unaoendelea Mashariki ya Kati.