Mikoa inayotarajiwa kupata vipindi vya mvua zinazoambatana na ngurumo za radi ni Kagera, Geita, Shinyanga, Mwanza, Simiyu na Mara.
Katika maeneo ya Pwani ya Kaskazini, mvua zinatarajiwa pia katika baadhi ya maeneo ya Tanga, kaskazini mwa Morogoro, Pwani na Dar es Salaam, pamoja na visiwa vya Unguja na Pemba.
MIKOA MINGINE KUPATA MVUA ZA VIPINDI
TMA imeeleza kuwa baadhi ya maeneo ya mikoa ya Arusha, Manyara na Kilimanjaro nayo yanatarajiwa kupata vipindi vya mvua katika kipindi hicho.
Wakati huo huo, mikoa ya Lindi na Mtwara inatarajiwa kupata mvua nyepesi katika baadhi ya maeneo, hali inayoonesha kuwa mwenendo wa hali ya hewa utatofautiana kulingana na eneo.
Utabiri huo unaonesha kuwa si maeneo yote ya mikoa iliyotajwa yatapata mvua kwa wakati mmoja, kwani mvua hizo zinatarajiwa kujitokeza katika maeneo maalumu na kwa vipindi tofauti.
DODOMA, SINGIDA NA NYANDA ZA JUU KUSINI-MAGHARIBI KUBAKI KAVU
Kwa upande mwingine, TMA imetabiri hali ya ukavu katika mikoa ya Dodoma na Singida, pamoja na maeneo ya Nyanda za Juu Kusini-Magharibi yanayojumuisha Rukwa, Songwe, Mbeya, Njombe na Iringa.
Hali hiyo inamaanisha kuwa maeneo hayo yanatarajiwa kuwa na mwenendo tofauti wa hali ya hewa ikilinganishwa na maeneo ya Kanda ya Ziwa na Pwani yanayotarajiwa kupata mvua.
Utabiri huu unatoa picha ya mwenendo wa hali ya hewa nchini kwa kipindi husika, huku wananchi wakihimizwa kufuatilia taarifa rasmi za TMA ili kupata masasisho kuhusu mabadiliko ya hali ya hewa katika maeneo yao.
Kwa kuwa utabiri unahusu kipindi maalumu cha siku 10, wananchi wanapaswa kuzingatia taarifa zinazotolewa na mamlaka hiyo kadiri hali ya hewa inavyobadilika.