Dereva Afariki Dunia Baada ya Gari la Mizigo Kupinduka Muheza

Jeshi la Polisi Mkoa wa Tanga linaendelea na uchunguzi wa ajali ya barabarani iliyohusisha gari la mizigo aina ya HOWO lenye namba za usajili T.491 EFD, lililokuwa likivuta tela lenye namba T.582 EEZ na T.384 DTY, baada ya dereva kushindwa kulimudu na kusababisha gari hilo kuacha barabara na kupinduka.

Kwa mujibu wa taarifa iliyotolewa na Kamanda wa Polisi Mkoa wa Tanga Oktoba 11, 2026, ajali hiyo ilitokea Oktoba 10, 2026, majira ya saa 11:20 jioni, katika eneo la Muheza–Kibanda, Wilaya ya Muheza, mkoani Tanga.

Taarifa hiyo imeeleza kuwa gari hilo lilikuwa likitoka Tanga kuelekea Zambia na lilikuwa likiendeshwa na Airwae Ponsiano Taabuya, ambaye alifariki dunia kutokana na ajali hiyo.

Uchunguzi wa awali unaeleza kuwa chanzo cha ajali hiyo ni dereva kushindwa kulimudu gari, hali iliyosababisha gari hilo kuacha barabara na kupinduka.

Jeshi la Polisi Mkoa wa Tanga limeendelea kutoa wito kwa madereva kuzingatia sheria na kanuni za usalama barabarani, pamoja na kuwa makini wanapokuwa barabarani ili kuepusha ajali zinazoweza kusababisha vifo na majeruhi.