Chama Aitawala Simba, Mguu wa Kulia Wampa Mabao Manne

Kiungo mshambuliaji wa Simba SC, Clatous Chama, ameonyesha ubora wa kutumia mguu wa kulia katika kufunga mabao kwenye Ligi Kuu Tanzania Bara msimu huu.

Simba SC imefunga jumla ya mabao 11 katika michezo sita, huku Chama akiwa kinara wa ufungaji ndani ya kikosi hicho akiwa amefunga mabao manne, yote akitumia mguu wake wa kulia.

Bao lake la nne alifunga katika mchezo dhidi ya Azam FC uliochezwa kwenye Uwanja wa Azam Complex, ambapo Simba SC ilipata ushindi wa mabao 2-0. Chama pia alifungua akaunti yake ya mabao katika mchezo dhidi ya Pamba Jiji FC uliochezwa Uwanja wa CCM Kirumba, Mwanza.

Kwa upande wa Yanga SC, Maxi Nzengeli pia ni miongoni mwa wachezaji wanaotegemea zaidi mguu wa kulia katika kufunga mabao. Nzengeli aliweka rekodi ya kuwa mchezaji wa kwanza kufunga bao akiwa nje ya eneo la mita 18 katika mchezo dhidi ya Namungo FC.

Wachezaji wengine walioonyesha uwezo mkubwa wa kutumia mguu wa kulia ni Maabad Maabad wa Coastal Union na Abdul Sopu wa Azam FC, ambao kwa mujibu wa rekodi za Ligi Kuu Tanzania Bara wamefunga mabao matatu kila mmoja kwa kutumia mguu huo.

Na Lunyamadzo Mlyuka