Posts

Posted on

JNHPP kuipa Tanzania nafasi mpya biashara za kikanda – HabariLeo

PWANI: Serikali inalenga kutumia Mradi wa Bwawa la Mwalimu Julius Nyerere ( JNHPP) kuongeza uzalishaji wa umeme na kuiweka Tanzania katika nafasi muhimu ya kuwa kitovu cha biashara na uwekezaji katika ukanda wa Afrika Mashariki.

Akizungumza katika hafla ya uzinduzi wa Bwawa la Mwalimu Nyerere, Mkurugenzi wa TANESCO, Lazaro Twange, amesema mradi huo umejengwa katika eneo la Mto Rufiji na umebuniwa kuwa na mitambo tisa ya kuzalisha umeme.

Twange amesema jumla ya mitambo hiyo tisa imebuniwa kuzalisha megawati 2,115, hatua ambayo itaongeza kwa kiasi kikubwa uwezo wa Tanzania katika uzalishaji wa umeme na kuchochea shughuli za kiuchumi na biashara.

Amesema Serikali kupitia TANESCO ilisaini mkataba wa ujenzi wa mradi huo tarehe 12 Desemba 2018 na kampuni za Arab Contractors na Elsewedy Electric, zote kutoka Misri, huku siku moja kabla, tarehe 11 Desemba 2018, Serikali ikimkabidhi TANESCO jukumu la kusimamia utekelezaji wa mradi huo.

Aidha, amesema tarehe 17 Aprili 2019 TANESCO ilisaini mkataba na TANROADS kwa ajili ya masuala ya ushauri na usimamizi wa baadhi ya shughuli za mradi.

Kwa mujibu wa Twange, Bwawa la Mwalimu Nyerere ni mradi mkubwa wa kihandisi wenye miundombinu ya kisasa na ya kimkakati, ukiwa na vipengele sita muhimu vinavyounda kituo hicho cha kuzalisha umeme.

Ameeleza kuwa bwawa hilo lina uwezo wa kuhifadhi maji takribani mita za ujazo bilioni 32.784, huku maji yanayoingia kwenye bwawa yakitokana na vyanzo vikuu vitatu ambavyo ni Mto Kilombero unaochangia asilimia 65, Mto Luwegu asilimia 19 na Mto Ruaha asilimia 15.

Posted on

TAG NA EAGT ZAFUNGUA UKURASA MPYA BAADA YA MGOGORO WA MIAKA 40

 

Na Hamida Ramadhan, Matukio Daima Dodoma

BAADA ya zaidi ya miongo minne ya kutokubaliana, Kanisa la Tanzania Assemblies of God (TAG) na Kanisa la Evangelistic Assemblies of God Tanzania (EAGT) zimefikia makubaliano ya kuhitimisha tofauti zao, hatua iliyofikiwa kupitia kusainiwa kwa hati rasmi ya makubaliano jijini Dodoma.

Mzozo huo ulijitokeza kufuatia mgawanyiko wa mwaka 1980, na kwa miaka iliyofuata ukahusisha masuala mbalimbali yaliyohitaji suluhu, ikiwemo namna ya kushughulikia mali zilizokuwa chini ya taasisi hizo.

Hatua ya sasa imekuja baada ya viongozi wa makanisa hayo kukaa pamoja na kufikia muafaka unaolenga kuweka kikomo cha tofauti hizo na kuruhusu kila upande kuendelea na shughuli zake bila mvutano wa muda mrefu.

Miongoni mwa mambo yaliyoainishwa katika makubaliano hayo ni utaratibu wa kushughulikia na kugawana mali zilizohusishwa na mgogoro huo, jambo ambalo limekuwa sehemu ya mjadala kati ya pande hizo kwa muda mrefu.

Akizungumza baada ya hafla hiyo, Askofu Mkuu wa TAG, Askofu Dkt. Barnabas Mtokambali, amesema kufikiwa kwa makubaliano hayo ni hatua yenye umuhimu mkubwa kwa taasisi hizo na waumini wake, baada ya kipindi kirefu cha kutafuta suluhu.

Kwa upande wake, Askofu Mkuu wa EAGT, Askofu Prof. Brown Mwakipesile, amesema makubaliano hayo yanaashiria mwanzo wa mahusiano mapya kati ya makanisa hayo, huku akieleza umuhimu wa pande zote kuheshimu na kutekeleza yaliyokubaliwa.

Baadhi ya viongozi na waumini wa makanisa hayo, akiwemo Mchungaji Isaya Ikili na Mchungaji Ayubu Mtula, wamepokea hatua hiyo kwa furaha, wakisema inatoa fursa ya kuimarisha umoja na kuondoa tofauti zilizodumu kwa muda mrefu.

Wamesema suluhu hiyo inapaswa kuwa msingi wa kujenga mahusiano mazuri zaidi na kuendeleza huduma za makanisa hayo kwa waumini na jamii kwa ujumla, badala ya kuendelea kutumia nguvu na muda katika tofauti za zamani.

Kwa kusainiwa kwa hati hiyo jijini Dodoma, TAG na EAGT sasa zimeweka rasmi msingi wa kuhitimisha mgogoro huo wa muda mrefu, huku utekelezaji wa makubaliano kuhusu mali na masuala mengine yaliyokubaliwa ukitarajiwa kufungua ukurasa mpya katika historia ya makanisa hayo.

Posted on

Rais Samia Akutana na Msanii Mkongwe Yvonne Chaka Chaka

Global Publishers
August 22, 2026
60 views
0 Comments

DAR ES SALAAM: Rais wa Jamhuri ya Muungano wa Tanzania, Dkt. Samia Suluhu Hassan, amekutana na msanii mkongwe kutoka Afrika Kusini, Yvonne Chaka Chaka, katika Ikulu jijini Dar es Salaam.

Rais Samia alizungumza na msanii huyo tarehe 20 Agosti 2026, katika mazungumzo yaliyofanyika wakati Chaka Chaka akiwa nchini Tanzania kwa ajili ya kushiriki katika Jukwaa la Mashariki Creative Expo 2026.

Jukwaa hilo linalenga kutoa elimu pamoja na kuhamasisha ulinzi wa kazi za ubunifu, likijumuisha maeneo mbalimbali kama filamu, sanaa za ufundi na muziki.

Ushiriki wa msanii huyo mkongwe katika jukwaa hilo unaongeza fursa ya kubadilishana uzoefu na maarifa katika sekta ya ubunifu, huku wadau wakijadili namna ya kulinda na kuendeleza kazi za wasanii.

Chaka Chaka ni miongoni mwa wasanii wakubwa wa Afrika Kusini waliojenga jina kwa muda mrefu katika muziki wa bara hilo na amekuwa akihusishwa pia na shughuli mbalimbali za kijamii na kibinadamu.

Kukutana kwake na Rais Samia kunakuja wakati Tanzania ikiendelea kuimarisha nafasi ya sekta ya ubunifu katika kukuza vipaji, ajira na fursa za kiuchumi kwa vijana na wasanii.

Posted on

Freeman Mbowe Aonekana Kwenye Uzinduzi wa Kituo cha Julius Nyerere

Global Publishers
August 22, 2026
78 views
0 Comments

RUFIJI, PWANI: Aliyekuwa Mwenyekiti wa Chama cha Demokrasia na Maendeleo (CHADEMA) na Mbunge wa Jimbo la Hai, Freeman Mbowe, amewasili katika hafla ya uzinduzi rasmi wa Kituo cha Kuzalisha Umeme cha Julius Nyerere (JNHPP).

Kituo hicho, kinachopatikana katika eneo la mradi wilayani Rufiji, Mkoa wa Pwani, kina uwezo wa kuzalisha jumla ya Megawati 2,115 za umeme.

Uzinduzi huo ni sehemu ya hatua muhimu katika sekta ya nishati nchini Tanzania, huku mradi wa JNHPP ukilenga kuongeza uzalishaji wa umeme na kusaidia kukidhi mahitaji yanayoongezeka ya nishati nchini.

Mbowe ni miongoni mwa viongozi na wageni mbalimbali waliohudhuria hafla hiyo, ambayo imewakutanisha wadau na viongozi katika eneo la mradi wa Julius Nyerere.

Kituo hicho kinatarajiwa kuwa na mchango mkubwa katika kuongeza upatikanaji wa umeme na kuimarisha shughuli za kiuchumi na kijamii nchini.

Posted on

TTCL YALENGA KAYA ZAIDI 400,000 KATIKA AWAMU MPYA YA FAIBA MLANGONI KWAKO

 

Na Matukio DaimaMedia 

Shirika la Mawasiliano Tanzania (TTCL) limeanza utekelezaji wa Awamu ya Pili ya Mradi wa Faiba Mlangoni Kwako (Fiber to the Home–FTTH), likilenga kuongeza zaidi ya Home Pass 400,000 ili kupanua upatikanaji wa intaneti yenye kasi kwa wananchi, taasisi na wafanyabiashara nchini.

Akizungumza wakati wa uzinduzi rasmi wa awamu hiyo jijini Dar es Salaam, Waziri wa Mawasiliano na Teknolojia ya Habari, Angellah Kairuki, amesema Serikali inataka huduma hiyo ifike katika maeneo yenye makazi yanayokua, masoko, maeneo ya biashara, viwanda, shule, vyuo, vituo vya afya na ofisi za Serikali Tanzania Bara na Zanzibar.

Amesema mafanikio ya mradi huo hayataangaliwa kwa idadi ya miundombinu itakayojengwa pekee, bali pia kwa wananchi watakaounganishwa, ubora na kasi ya intaneti pamoja na kiwango cha kuridhika kwa wateja.

“Mradi wa Faiba Mlangoni Kwako si ujenzi wa miundombinu ya mawasiliano pekee, bali ni hatua ya kimkakati ya kufungua fursa za elimu, biashara, ajira na ubunifu, na kuchochea ujenzi wa uchumi wa kidijitali nchini,” amesema.

Waziri Kairuki ameitaka TTCL kuhakikisha huduma hiyo inatolewa kwa ubora, uhakika na gharama zinazomudu wananchi, huku ikiboresha mifumo ya huduma kwa wateja, hasa katika kushughulikia malalamiko kwa wakati na kwa ufanisi.

Aidha, ameagiza shirika hilo kuandaa vifurushi vinavyokidhi mahitaji na uwezo wa makundi mbalimbali, yakiwemo familia, wanafunzi, vijana na wafanyabiashara wadogo na wa kati.

Kwa mujibu wa Waziri Kairuki, utekelezaji wa mradi huo pia unatakiwa kusimamiwa kwa kuzingatia uwajibikaji na nidhamu ya kibiashara, huku wazabuni na wakandarasi wakihakikisha kazi zinakamilika kwa wakati, kwa ubora unaotakiwa na kwa kuzingatia thamani ya fedha inayowekezwa.

Amesema mradi huo ni sehemu ya utekelezaji wa Dira ya Taifa ya Maendeleo 2050 na Mkakati wa Taifa wa Uchumi wa Kidijitali wa mwaka 2024–2034, unaolenga kuongeza matumizi ya teknolojia na upatikanaji wa huduma za Serikali kwa njia za kidijitali.

Ameeleza kuwa Dira ya Taifa ya Maendeleo 2050 inalenga kuhakikisha ifikapo mwaka huo angalau asilimia 70 ya wananchi wanatumia TEHAMA, huku zaidi ya asilimia 80 ya huduma za Serikali zikitolewa kwa njia ya kidijitali iliyo salama na jumuishi.

Akizungumzia hali ya matumizi ya intaneti nchini, Waziri Kairuki ametumia takwimu za Mamlaka ya Mawasiliano Tanzania (TCRA) kwa robo mwaka iliyoishia Juni 2026, akisema usajili wa intaneti ulifikia 62,793,986, wakati matumizi ya data yalifikia Petabaiti 1,041.

Hata hivyo, amesema idadi ya usajili wa huduma ya Faiba Nyumbani ilikuwa 178,904, jambo linaloonyesha kuwa bado kuna nafasi kubwa ya kuongeza matumizi ya intaneti ya kasi kupitia teknolojia ya nyuzi za macho.

Kwa upande wake, Mkurugenzi Mkuu wa TTCL, Moremi Marwa, amesema kuanza kwa Awamu ya Pili ni sehemu ya utekelezaji wa Mpango Mkakati wa Biashara wa Miaka 10 wa shirika hilo kwa kipindi cha 2025/26 hadi 2034/35.

Marwa amesema TTCL imefikia hatua hiyo ikiwa tayari imejenga msingi kupitia Awamu ya Kwanza ya mradi huo, ambapo shirika limefanikiwa kujenga zaidi ya Home Pass 280,000 na kufikisha jumla ya maungio ya huduma ya nyuzi za macho karibu 300,000 nchini.

Posted on

Nafasi za Kazi kwa Wanawake – Wahudumu wa Maduka Mlimani City na Posta

Global Publishers
August 22, 2026
846 views
0 Comments

Nafasi za kazi zimetangazwa kwa wanawake pekee kwa ajili ya kufanya kazi kama Wahudumu wa Maduka katika maeneo ya Mlimani City na Posta, Dar es Salaam.

Mshahara: TSh 450,000 kwa mwezi.

Sifa za mwombaji:

  • Awe mwanamke.
  • Awe mchapakazi, mwaminifu na mwenye nidhamu.
  • Awe na uwezo mzuri wa kuwasiliana na wateja.
  • Uzoefu wa kazi ni faida.

Jinsi ya kuomba

Waombaji wanatakiwa kutuma maombi yao kupitia WhatsApp: 0747065803.

Kumbuka: Nafasi hizi ni kwa wanawake pekee na nafasi ni chache. Waombaji wanashauriwa kutuma maombi mapema.

Posted on

DKT. YONAZI AWAKUMBUSHA VIJANA KULINDA AFYA ZAO KATIKA MAPAMBANO DHIDI YA UKIMWI

 

Na. Mwandishi Wetu –  Kazuramimba Kigoma

Katibu Mkuu, Ofisi ya Waziri Mkuu anayeshughulikia masuala ya Sera, Bunge, Uratibu na Wenye Ulemavu, Dkt. Jim Yonazi, Amewaasa vijana kulinda afya zao na kuepuka tabia hatarishi ili kupunguza maambukizi mapya ya VVU, kwa kuzingatia kuwa ni kundi linaloongoza kuwa hatarini zaidi nchini Tanzania.

Dkt. Yonazi ameyasema hayo mwishoni mwa wiki wakati wa ziara yake ya kikazi ya kukagua utekelezaji wa Afua za UKIMWI Wilaya ya Uvinza Mkoa wa Kigoma alipoambatana na Mkurugenzi Mtendaji wa Tume ya Kudhibiti UKIMWI Tanzania, Dkt. Adam Mrisho, timu ya wataalam kutoka Ofisi yake, Wizara ya Afya, TAMISEMI na Ofisi ya Mkoa huo.

Aidha amepata wasaa kutembelea Kituo cha Maarifa Kata ya Kazuramimba mkoani humo kinachotoa huduma za masuala ya VVU na UKIMWI, na kukutana na vijana wanaotekeleza afua za UKIMWI kupitia vikundi vya uzalishaji mali kwa lengo la kujiinua kiuchumi na kujiletea maendeleo yao.

Akiwa katika kituo hicho, Dkt. Yonazi amepokea taarifa kutoka kwa mwenyekiti wa kikundi, Billy Sekibaha, kuhusu shughuli zinazofanywa na kikundi hicho ikiwemo za biashara ndogondogo za kuuza dagaa pamoja na shunguli za ushonaji wa nguo kwa lengo la kujikwamua kiuchumi na kuondokana na dhana ya utegemezi.

Amesisitiza kuwa, kundi la vijana linategemewa na Taifa katika shughuli za uzalishaji mali na kujiletea maendeleo yao na Taifa kwa ujumla hivyo ni vyema vijana wakaendelea kujilinda na kulinda wengine kwa kutambua hali zao na endapo wakagundulika kuwa na maambukizi ya VVU inashauriwa kuanza kutumia dawa mapema.

“Mnafanya kazi nzuri sana, endeleeni kuchangamkia uwepo wa mitandao ya kijamii kutangaza bidhaa zenu ili kuwafikia wateja wengi zaidi na kujitangaza kitaifa na kimataifa,” alisisitiza Dkt. Yonazi

Kwa upande wake Mtendaji  wa TACAIDS, Dkt. Adam Mrisho amewapongeza vijana hao kwa kazi nzuri wanazofanya na kusisitiza kuwa Tume itaendelea kuwawezesha vijana kiuchumi na kuwajengea uwezo ili kuendeleza mapambano dhidi ya maambukizi mapya ya VVU na kufikia lengo la kutokomeza UKIMWI ifikapo mwaka 2030.

Posted on

Ally Kamwe Atoa Onyo kwa Mashabiki “Tusipoe, Hakuna Kuridhika”

Meneja wa Habari na Mawasiliano wa Yanga, Ally Kamwe, amewataka mashabiki wa klabu hiyo kutoridhika na matokeo mazuri ya mwanzo wa msimu, akisema timu bado haijafikia kiwango kinachohitajika na benchi la ufundi.

Kamwe amesema Yanga bado ipo katika hatua za kujenga mfumo wa uchezaji unaotakiwa na kocha, huku akiwataka mashabiki kutoweka presha kutokana na kauli za wachambuzi wala kulewa sifa.

Amesema kwa makadirio, Yanga bado ipo katika takribani asilimia 25 ya kiwango ambacho benchi la ufundi linataka kukifikia, hivyo kocha anatakiwa kupewa muda wa kuendelea kuboresha timu.
“Timu yetu bado. Tusiingie presha ya wachambuzi na wala tusilewe sifa. Yanga bado kufika kwenye ubora unaosemwa au kuandikwa hivi sasa.”

Ameongeza:
“Kama ni asilimia ndio kwanza tuko asilimia 25 ya kile benchi la ufundi inachokitaka kitokee uwanjani. Tumpe muda kocha wetu Mangoba Mpiga Miti aendelee kuweka mambo sawa katika uwanja wa mazoezi.”

Kamwe pia amewataka mashabiki kuendelea kuwapa nguvu wachezaji ili waweze kuelewa na kutekeleza mipango ya benchi la ufundi, akiamini hilo litasaidia kujenga muunganiko mzuri wa timu.

Akizungumzia mfumo wa uchezaji wa Yanga, amesema mashabiki tayari wameanza kuuona, lakini unahitaji wachezaji kufanya kazi kwa bidii na kukimbia zaidi uwanjani.

Pia amesisitiza umuhimu wa mashabiki kujaza viwanja na kushangilia timu mwanzo hadi mwisho, akisema hamasa yao inaweza kuwa sehemu muhimu ya kuifanya timu iendelee kucheza kwa kasi.

Kamwe ametoa mfano wa mchezo uliopita, akisema baada ya Yanga kupata mabao matatu, baadhi ya mashabiki walipunguza hamasa na kuanza kutumia simu badala ya kuendelea kushangilia.
“Jana, baada ya chuma 3 ni kama tuliridhika majukwaani na tukaanza kuangalia mpira kwa kuchezea simu. Hii ni SUMU KUBWA. Tukipoa sisi, kila kitu kinapoa.”

Ameongeza kuwa wachezaji wanahitaji kusikia sauti za mashabiki ili waendelee kuwa katika kasi kubwa kwa muda wote wa mchezo.
“Kama Kocha anataka timu isipoe, kwanini sisi tunapoa? Tusipoe. Hakuna kuridhika. Tutashika simu zetu mechi ikiisha.”

Kamwe amesema anaamini mashabiki na wanachama wa Yanga wataongeza hamasa katika mchezo unaofuata Jumatatu, huku akihitimisha ujumbe wake kwa kauli ya “Daima Mbele Nyuma Mwiko.”

Posted on

Marekani Yaongeza Shinikizo la Kiuchumi Dhidi ya Iran, China Yafunguka

US President Donald Trump speaks during a dinner with Central Asian leaders in the East Room of the White House in Washington, DC, on November 6, 2025. (Photo by Mandel NGAN / AFP)

Rais wa Marekani, Donald Trump, amesema Iran bado haijawa tayari kufikia makubaliano anayoyaona kuwa sahihi, huku Washington ikijiandaa kutangaza vikwazo vipya vya kiuchumi dhidi ya Tehran.

Trump alisema Ijumaa kuwa Marekani ina udhibiti mkubwa wa eneo linalozunguka Mlango wa Hormuz, likiwemo eneo la nchi kavu, na akasisitiza kuwa Iran ingeweza kutaka makubaliano lakini bado haijawa tayari kuyakubali masharti yanayofaa kwa mtazamo wake.

Kauli hiyo imekuja wakati Waziri wa Hazina wa Marekani, Scott Bessent, akisema Washington itatangaza Jumatatu maelezo ya vikwazo vipya vya kifedha vinavyolenga kuongeza shinikizo kwa Iran.

Bessent alisema Marekani inaandaa vikwazo vikali zaidi kuwahi kutekelezwa dhidi ya Tehran, huku Trump akionya kuwa nchi yoyote itakayoiunga mkono Iran au kuipa msaada wa aina yoyote inaweza kukabiliwa na madhara ya kiuchumi.

Kwa upande wake, Iran imejibu kwa msimamo mkali. Mkuu wa Majeshi ya Iran, Meja Jenerali Ali Abdollahi, amesema jeshi la nchi hiyo liko tayari kujibu vitisho vipya vya Marekani kwa hatua kali na zenye madhara makubwa.

Abdollahi alisema vikosi vya Iran viko tayari katika maeneo ya ardhini, baharini, angani, ulinzi wa anga na kwenye mitandao ya intaneti kukabiliana na vitisho vyovyote vipya.

Msemaji wa Bunge la Iran, Mohammad Baqer Qalibaf, ambaye pia ni mshiriki muhimu katika mazungumzo ya Tehran na Washington, amesema Marekani inaonekana kufikia hitimisho kwamba haiwezi kushinda kupitia mapambano ya moja kwa moja ya kijeshi.

Hata hivyo, Qalibaf amekiri kuwa shinikizo la kiuchumi linaendelea kuathiri Iran, akisema nchi hiyo haiwezi kutegemea nguvu za kijeshi pekee ikiwa wananchi wanakabiliwa na njaa na uchumi hauna mzunguko wa fedha, ukuaji na uzalishaji wa ndani.

Vita hivyo, vilivyoanzishwa na Marekani na Israel karibu miezi sita iliyopita, vimesababisha vifo vya maelfu ya watu na kuvuta baadhi ya mataifa ya Ghuba katika mapigano. Mashambulizi ya Marekani yameidhoofisha kwa kiasi kikubwa nguvu za kawaida za kijeshi za Iran na kuathiri uchumi wake.

Pamoja na hayo, Iran bado ina uwezo mkubwa wa kutumia makombora na ndege zisizo na rubani, hali inayoweza kuiwezesha kutishia wapinzani wake katika eneo hilo na kuvuruga usafirishaji wa mafuta kupitia Mlango wa Hormuz.

Mvutano huo pia umeathiri soko la mafuta duniani. Bei ya mafuta ilipanda Ijumaa baada ya Marekani kutishia kuiwekea vikwazo nchi zinazofanya biashara na Iran, huku kukiwa na hofu kuwa hatua hizo zinaweza kupunguza zaidi usambazaji wa mafuta.

China, ambayo ni mnunuzi mkubwa wa mafuta ya Iran, imezitaka Marekani na Iran kutafuta suluhu kupitia diplomasia, ikisema vikwazo na shinikizo havitasaidia kutatua mgogoro huo.

Mlango wa Hormuz unaendelea kuwa eneo muhimu katika mzozo huo. Kabla ya vita, takribani moja ya tano ya mafuta yanayouzwa duniani yalipita katika njia hiyo muhimu ya bahari.

Wakati huo huo, kamanda mkuu wa kijeshi wa NATO, Jenerali wa Jeshi la Anga la Marekani Alexus Grynkewich, ameitisha mkutano wa njia ya video na wakuu wa ulinzi wa nchi washirika kujadili uwezekano wa kusaidia kuhakikisha uhuru wa usafirishaji kupitia Mlango wa Hormuz.

NATO imesisitiza kuwa juhudi hizo si operesheni rasmi ya muungano huo, bali uwezo na uzoefu wa wanachama wake unaweza kusaidia kurahisisha majadiliano kuhusu usalama wa njia hiyo muhimu ya kimataifa.

Posted on

Linah Aahidi Burudani ya Kipekee Kwenye Miaka 30 ya Bongo Fleva – Video

Global Publishers
August 22, 2026
12 views
0 Comments

DODOMA: Nyota wa muziki wa Bongo Fleva, Linah Sanga, amefunguka kuhusu maandalizi yake kuelekea shoo ya kusherehekea Miaka 30 ya Bongo Fleva, inayofanyika jijini Dodoma.

Linah amesema mashabiki wanaweza kutarajia burudani ya aina yake, huku akiahidi kuwa amejipanga vyema kwa ajili ya kupanda jukwaani na kutoa burudani pamoja na “sapraiz” mbalimbali.

Tamasha hilo linatarajiwa kufanyika Chinangali Park, Dodoma, Agosti 22, 2026, ikiwa ni sehemu ya maadhimisho ya miaka 30 ya muziki wa Bongo Fleva.

Akizungumza kupitia Global TV, Linah pia amefunguka kuhusu historia ya mahusiano yake na msanii Amini, akieleza kuwa tofauti zilizojitokeza baina yao zilikuwa miongoni mwa sababu zilizopelekea kuvunjika kwa uhusiano wao.

Mbali na suala hilo, Linah amezungumzia pia wimbo “Yalaiti”, ambao alishirikishwa na msanii na Naibu Waziri wa Habari, Utamaduni, Sanaa na Michezo, Mwana FA.

Kwa sasa, Linah ni miongoni mwa wasanii wanaotarajiwa kutoa burudani katika maadhimisho hayo, huku mashabiki wakisubiri kuona “sapraiz” alizoahidi kwa ajili ya shoo hiyo.