NA MATUKIO DAIMA MEDIA, IRINGAWANANCHI wa Mkoa wa Iringa wamepata fursa ya kunufaika na mafunzo maalumu ya bure yanayolenga kuwajengea uwezo wa kutumia teknolojia katika kuboresha maisha yao, kukuza shughuli za kiuchumi pamoja na kuongeza uelewa katika masuala mbalimbali ya afya.
Mafunzo hayo yameandaliwa na kampuni za Inkcyptus na Far Forlife kutoka jijini Dar es Salaam, ambazo zimeamua kuyasogeza mafunzo hayo kwa wananchi wa Iringa kama sehemu ya kuhamasisha matumizi sahihi na yenye tija ya teknolojia katika maisha ya kila siku.
Akizungumza na Matukio Daima Media katika kipindi cha Tanzania ya Leo, mmoja wa waandaaji wa mafunzo hayo, Lilian Mahina, pamoja na Alen Maturu, walisema wameamua kuja na mpango huo kutokana na umuhimu wa teknolojia katika kuleta mabadiliko ya kiuchumi na kijamii.
Walisema teknolojia imeendelea kuwa sehemu muhimu ya maisha ya sasa, hivyo wananchi wanapaswa kuwa na uelewa wa namna wanavyoweza kuitumia kama nyenzo ya kujikwamua kiuchumi, kuboresha shughuli zao na kupata taarifa muhimu zinazoweza kuwasaidia katika maisha yao.
Kwa mujibu wa waandaaji hao, mafunzo hayo pia ni sehemu ya kuunga mkono jitihada za Serikali za kuhamasisha matumizi ya teknolojia nchini na kuhakikisha wananchi wanapata maarifa yanayoweza kuwasaidia kutumia fursa zinazopatikana kupitia maendeleo ya teknolojia.
“Tumekuja Iringa kutoa mafunzo haya kwa wananchi kwa sababu tunaamini teknolojia inaweza kuwa chombo muhimu cha kuwasaidia watu kufikia mafanikio katika nyanja mbalimbali, ikiwemo uchumi na afya,” walisema.
Walieleza kuwa wananchi wengi bado wana fursa kubwa ya kutumia teknolojia katika kuendeleza shughuli zao, lakini changamoto kubwa ni ukosefu wa uelewa wa kutosha kuhusu namna ya kutumia teknolojia hizo kwa usahihi na kwa manufaa.
Aidha, walisisitiza kuwa mafunzo hayo hayawalengi watu wenye ujuzi mkubwa wa teknolojia pekee, bali ni kwa wananchi mbalimbali wanaotaka kujifunza na kuongeza uelewa wao kuhusu matumizi ya teknolojia katika maisha ya kila siku.
Walisema mafunzo hayo yatafanyika Jumamosi katika Ukumbi wa Maktaba ya Mkoa wa Iringa, kuanzia saa 3:00 asubuhi, huku wakitoa wito kwa wananchi kujitokeza kwa wingi kushiriki.
Waratibu wa warsha ya fursa za kiteknolojia kupitia kampuni ya Inkcyptus & Far forlife Lilian Mahina na Alen Maturu Wakiwa ofisi za matukio Daima Media kueleza fursa za mafunzo ya bure ya uchumi kupitia Teknolojia
“Tunawaalika wananchi wote wa Iringa kutumia fursa hii kwa sababu mafunzo ni bure. Tunataka kuwafikia watu wengi zaidi na kuwapa uelewa wa namna teknolojia inaweza kuwasaidia katika maisha yao,” walieleza.
Walisema matarajio yao ni kuona washiriki wakitoka katika mafunzo hayo wakiwa na maarifa mapya ambayo wataweza kuyatumia katika shughuli zao za kiuchumi, kijamii na kiafya.
Kwa upande mwingine, waandaaji hao wamewataka wananchi kutambua kuwa teknolojia si suala la matumizi ya mitandao ya kijamii pekee, bali ni nyenzo inayoweza kutumika katika kujifunza, kufanya biashara, kutafuta masoko, kupata taarifa sahihi za afya na kuunganisha watu na fursa mbalimbali.
Wamesema kuongezeka kwa uelewa wa matumizi ya teknolojia miongoni mwa wananchi kutasaidia kuongeza kasi ya maendeleo na kuwawezesha watu kutumia fursa zinazotokana na mabadiliko ya kidijitali.
Hivyo, wananchi wa Mkoa wa Iringa wametakiwa kutumia nafasi hiyo ya mafunzo ya bure kwa kujitokeza kwa wingi na kujifunza namna bora ya kutumia teknolojia kama nyenzo ya kujenga maisha yenye mafanikio zaidi.