Month: September 2026

Posted on

SERIKALI INAWEKEZA KWENYE MADINI KUKUZA UCHUMI WA VIWANDA, KUONGEZA FURSA ZA AJIRA – PROF. SHEMDOE

Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amesema Serikali ya Awamu ya Sita inayoongozwa na Mhe. Rais Dkt. Samia Suluhu Hassan imeendelea kuweka mazingira bora ya uwekezaji na usimamizi wa rasilimali madini, kwa lengo la kuhakikisha utajiri wa madini unatumika kikamilifu katika kujenga uchumi wa taifa na kuongeza fursa za ajira kwa wananchi.

Prof. Shemdoe amesema hayo Septemba 16, 2026, akiwa Ruangwa mkoani Lindi, wakati akifungua Maonesho ya Madini na Fursa za Uwekezaji mkoani humo.

“Lengo la Serikali ni kuhakikisha kuwa sekta ya madini haibaki kuwa ya uchimbaji pekee, bali inakuwa kichocheo cha viwanda, teknolojia, ajira, biashara, ubunifu na maendeleo ya jamii,” amesisitiza Prof. Shemdoe.

Katika kuhakikisha lengo hilo linatimia, Prof. Shemdoe ameyataka makampuni makubwa yaliyowekeza katika sekta ya madini kuangalia namna bora ya kuwekeza katika ujenzi wa viwanda vya uchenjuaji wa madini mkoani Lindi, hususan katika maeneo yenye rasilimali hizo, ili wananchi wanaozunguka maeneo hayo wanufaike zaidi kupitia fursa za ajira.

Prof. Shemdoe amesema maonesho hayo ni jukwaa muhimu linalowaunganisha Serikali, wananchi, wawekezaji katika sekta mbalimbali za uchumi, wataalam pamoja na taasisi za kifedha, kwa ajili ya kujenga uelewa mpana kuhusu rasilimali zilizopo na fursa za uwekezaji, pamoja na namna sekta mbalimbali za uchumi, ikiwemo madini, zinavyoweza kuongeza ajira, mapato na kukuza uchumi wa mtu mmoja mmoja na taifa kwa ujumla.

“Nilipofika hapa nilitembelea mabanda mbalimbali yaliyowakutanisha wachimbaji wakubwa, wadogo, wanaoleta teknolojia, akina mama, vijana na taasisi za kifedha, ili wakitoka hapa watoke na fursa mbalimbali zinazotokana na uwekezaji katika sekta ya madini,” ameeleza Prof. Shemdoe.

Kwa upande wake, Mkuu wa Mkoa wa Lindi, Mhe. Adam Kighoma Malima, amesema mkoa huo si maskini, bali changamoto ni wananchi wake kuwa maskini, kwani mkoa hauwezi kuitwa maskini wakati una utajiri wa madini mbalimbali, jambo aliloliona kupitia maonesho hayo.

Mhe. Malima ameahidi kuwa ofisi yake itaendelea kusimamia maonesho kama hayo ya madini ili yaendelee kuibua fursa na kuvutia uwekezaji utakaowanufaisha wananchi.

Aidha, Mhe. Malima amesema anatarajia kuwa ndani ya kipindi cha uongozi wa miaka mitano wa Mhe. Rais Dkt. Samia Suluhu Hassan, mkoa wa Lindi utakuwa umetambua fursa zake, kuzipa kipaumbele na hatimaye kuwa miongoni mwa mikoa yenye mapato makubwa nchini.

Naye Mbunge wa Ruangwa ambaye pia ni Naibu Waziri, Wizara ya Ardhi, Nyumba na Maendeleo ya Makazi, Mhe. Kaspar Mmuya, amesema Ruangwa ina kiwanda kikubwa cha graphite, huku akieleza kuwa madini yaliyopo wilayani humo si graphite, dhahabu na kopa pekee, bali yapo madini mengine mengi.

Mhe. Mmuya amesema kutokana na uwepo wa rasilimali hizo, Ruangwa imeendelea kunufaika na mapato yatokanayo na sekta ya madini, ambapo mwaka jana wilaya hiyo ilichangia kiasi cha shilingi bilioni 2.9.

Posted on

Mixx, Zangof Waunganisha Nguvu Kuwezesha Asasi Za Kiraia Zanzibar

Zanzibar, Septemba 16, 2026 – Asasi za kiraia Zanzibar zitapata fursa ya kutumia huduma za kifedha za kidijitali kusimamia malipo, mishahara na fedha za taasisi kwa urahisi na uwazi zaidi, kufuatia makubaliano ya ushirikiano kati ya Mixx na Jukwaa la Asasi za Kiraia Zanzibar (ZANGOF).

Makubaliano hayo yatawezesha asasi zilizo chini ya ZANGOF kutumia huduma ya Mixx Business Suite kufanya malipo ya mishahara na wanufaika, pamoja na kusimamia miamala mingine ya taasisi kwa njia ya kidijitali. Asasi hizo pia zitaweza kupata huduma za mawasiliano na intaneti za Yas.

Akizungumza katika hafla ya utiaji saini iliyofanyika leo Zanzibar, Mrajisi Mkuu wa Asasi za Kiraia Zanzibar, Ahmed Khalid Abdalla, alisema matumizi ya teknolojia yanaweza kusaidia asasi kuboresha usimamizi wa fedha na utoaji wa huduma kwa wananchi.

“Asasi za kiraia zinafanya kazi moja kwa moja na wananchi katika maeneo mbalimbali. Tunataka kuona teknolojia ikitumika kurahisisha kazi zao, kuongeza uwazi katika usimamizi wa fedha na hatimaye kuboresha huduma zinazotolewa kwa wananchi,” alisema Abdalla.

Kwa upande wake, Afisa Mtendaji Mkuu wa Mixx, Angelica Pesha, alisema ushirikiano huo utasaidia kupeleka huduma za kifedha za kidijitali karibu zaidi na asasi pamoja na jamii wanazozihudumia.

“Asasi hizi zinafanya kazi na wanawake, vijana, wajasiriamali na makundi mbalimbali katika jamii. Kupitia huduma zetu, tunataka kuwapa njia rahisi na salama zaidi za kusimamia fedha, kufanya malipo na kuweka akiba. Kwetu, ujumuishaji wa kifedha ni kuona huduma hizi zikimsaidia mwananchi kuboresha shughuli na maisha yake,” alisema Pesha.

Makubaliano hayo pia yanatoa fursa kwa vikundi vinavyofanya kazi na asasi za kiraia kutumia Kikoba cha Mixx, kinachowawezesha wanachama kuweka akiba, kuchangia, kununua na kuuza hisa pamoja na kukopeshana kwa njia ya kidijitali.

Mixx tayari inashirikiana na taasisi mbalimbali Zanzibar katika matumizi ya huduma za kidijitali, zikiwemo Idara ya Maendeleo ya Ushirika, ZARTSA, ZanBus na ZSTC, katika maeneo kama malipo ya wakulima, usafiri wa umma na huduma nyingine.

Makubaliano na ZANGOF yanatarajiwa kupanua matumizi ya huduma hizo kwa asasi za kiraia na vikundi vya kijamii Zanzibar.

Posted on

Kajala Afichua Kilichotokea Baada Ya Harmonize Kutaka Ndoa, Wolper Afunguka

Mambo ya mapenzi yamechukua nafasi katika mazungumzo ya mastaa wa Bongo, huku majina ya Irene Uwoya, Jacqueline Wolper, Kajala Masanja na Aunty Ezekiel yakitajwa katika mjadala ulioibua maswali kadhaa kuhusu maisha yao ya kimapenzi.

Mjadala huo ulipomfikia Irene Uwoya, suala la kuwa na mpenzi lilionekana kuwa moja ya mada zinazomgusa zaidi. Irene alipohojiwa kuhusu mahusiano yake, alikanusha kwa msisitizo kuwa ana mtu, hali iliyozua shauku kwa waliokuwa wakifuatilia mazungumzo hayo.

Aunty Ezekiel, kwa upande wake, alitoa kauli iliyoonekana kuongeza utata katika mjadala huo, akigusia namna ambavyo mastaa wa A-List wanavyohusishwa na maisha binafsi ya Irene na hata suala la kumposti endapo wataamua kufanya hivyo.

WOLPER: “SITAKI MUME WANGU ATAJWE”

Kwa upande wa Jacqueline Wolper, mazungumzo yalihamia katika maisha yake ya ndoa, ambapo alionyesha kutopenda jina la mume wake kutajwa katika kipindi chao.

Hata hivyo, baada ya kauli hiyo, aliulizwa iwapo kuna uwezekano kwamba tayari ametengana na mume wake na kutakiwa kuweka wazi hali halisi ya uhusiano wao.

KAJALA AFUNGUKA KUHUSU HARMONIZE NA SUALA LA NDOA

Mambo yalizidi kuwa ya kuvutia baada ya jina la Harmonize kuingia kwenye mjadala kupitia Kajala Masanja.

Kajala alieleza kuwa Harmonize alitumia takribani miaka miwili kumshawishi hadi alipokubali kuwa naye katika uhusiano. Kwa mujibu wa maelezo yake, baada ya uhusiano huo kuanza, Harmonize alifika hatua ya kuzungumzia suala la ndoa.

Hata hivyo, Kajala alisema yeye ndiye aliyekataa kwa wakati huo, akieleza kuwa alitaka kujipa nafasi na muda zaidi kabla ya kufanya uamuzi mkubwa wa kuingia kwenye ndoa.

Katika mazungumzo hayo, Kajala pia alikabiliwa na maswali kuhusu tetesi za matatizo katika uhusiano wake na Harmonize. Wenzake walimtaka kutoa uhakika kuhusu hisia zake kwa rafiki yao, huku wakisisitiza kuwa wanataka kuona heshima na mapenzi yakidumishwa.

Walisema wamechoshwa kumuona Kajala akiumia kutokana na masuala ya mapenzi, hivyo kumtaka kuwa makini na maamuzi yake.

Pamoja na tetesi zinazoendelea kuhusu uwezekano wa Kajala na Harmonize kutengana, Kajala bado hajathibitisha rasmi kuwa wameachana, wala kuweka wazi chanzo cha madai hayo.

Wakati mashabiki wakiendelea kujiuliza kinachoendelea nyuma ya pazia, pia kumekuwa na taarifa kuhusu uwezekano wa Kusah na Harmonize kufanya “special appearance” katika kipindi hicho, jambo ambalo limeongeza hamu ya kujua kitakachojiri iwapo wawili hao watajitokeza.

Posted on

Mahusiano Ya Mastaa Yazua Gumzo, Irene Atoa Msimamo, Kajala Afunguka

Mambo ya mapenzi yamechukua nafasi katika mazungumzo ya mastaa wa Bongo, huku majina ya Irene Uwoya, Jacqueline Wolper, Kajala Masanja na Aunty Ezekiel yakitajwa katika mjadala ulioibua maswali kadhaa kuhusu maisha yao ya kimapenzi.

Mjadala huo ulipomfikia Irene Uwoya, suala la kuwa na mpenzi lilionekana kuwa moja ya mada zinazomgusa zaidi. Irene alipohojiwa kuhusu mahusiano yake, alikanusha kwa msisitizo kuwa ana mtu, hali iliyozua shauku kwa waliokuwa wakifuatilia mazungumzo hayo.

Aunty Ezekiel, kwa upande wake, alitoa kauli iliyoonekana kuongeza utata katika mjadala huo, akigusia namna ambavyo mastaa wa A-List wanavyohusishwa na maisha binafsi ya Irene na hata suala la kumposti endapo wataamua kufanya hivyo.

WOLPER: “SITAKI MUME WANGU ATAJWE”

Kwa upande wa Jacqueline Wolper, mazungumzo yalihamia katika maisha yake ya ndoa, ambapo alionyesha kutopenda jina la mume wake kutajwa katika kipindi chao.

Hata hivyo, baada ya kauli hiyo, aliulizwa iwapo kuna uwezekano kwamba tayari ametengana na mume wake na kutakiwa kuweka wazi hali halisi ya uhusiano wao.

KAJALA AFUNGUKA KUHUSU HARMONIZE NA SUALA LA NDOA

Mambo yalizidi kuwa ya kuvutia baada ya jina la Harmonize kuingia kwenye mjadala kupitia Kajala Masanja.

Kajala alieleza kuwa Harmonize alitumia takribani miaka miwili kumshawishi hadi alipokubali kuwa naye katika uhusiano. Kwa mujibu wa maelezo yake, baada ya uhusiano huo kuanza, Harmonize alifika hatua ya kuzungumzia suala la ndoa.

Hata hivyo, Kajala alisema yeye ndiye aliyekataa kwa wakati huo, akieleza kuwa alitaka kujipa nafasi na muda zaidi kabla ya kufanya uamuzi mkubwa wa kuingia kwenye ndoa.

Katika mazungumzo hayo, Kajala pia alikabiliwa na maswali kuhusu tetesi za matatizo katika uhusiano wake na Harmonize. Wenzake walimtaka kutoa uhakika kuhusu hisia zake kwa rafiki yao, huku wakisisitiza kuwa wanataka kuona heshima na mapenzi yakidumishwa.

Walisema wamechoshwa kumuona Kajala akiumia kutokana na masuala ya mapenzi, hivyo kumtaka kuwa makini na maamuzi yake.

Pamoja na tetesi zinazoendelea kuhusu uwezekano wa Kajala na Harmonize kutengana, Kajala bado hajathibitisha rasmi kuwa wameachana, wala kuweka wazi chanzo cha madai hayo.

Wakati mashabiki wakiendelea kujiuliza kinachoendelea nyuma ya pazia, pia kumekuwa na taarifa kuhusu uwezekano wa Kusah na Harmonize kufanya “special appearance” katika kipindi hicho, jambo ambalo limeongeza hamu ya kujua kitakachojiri iwapo wawili hao watajitokeza.

Posted on

Pablo Franco Atoa Somo Morocco, Atwaa Tuzo Ya Kocha Bora

Aliyekuwa Kocha Mkuu wa klabu ya Simba SC ya Tanzania na AmaZulu ya Afrika Kusini, raia wa Hispania, Pablo Franco Martín, ametangazwa rasmi kuwa Kocha Bora wa Mwaka wa Ligi Kuu ya Morocco, Botola Pro 1, kwa msimu wa 2025/26.

Tuzo hiyo imekuja kufuatia mafanikio makubwa ya kihistoria aliyoyapata kocha huyo baada ya kuiongoza klabu ya Maghreb Fès (MAS Fès) kutwaa ubingwa wa Ligi Kuu ya Morocco, taji ambalo klabu hiyo ilikuwa imelilikosa kwa miaka 46.

Katika kinyang’anyiro hicho, Pablo amewashinda wapinzani wake wa karibu, Alexander Santos, aliyekuwa akiifundisha AS FAR Rabat, pamoja na Mouine Chaabani wa RS Berkane, kufuatia kura zilizopigwa na wadau pamoja na jopo la wataalamu wa soka nchini Morocco.

Chini ya ukufunzi wa Pablo Franco, Maghreb Fès ilimaliza msimu ikiwa kileleni mwa msimamo baada ya kucheza michezo 30, ambapo ilikusanya alama 59. Katika michezo hiyo, timu hiyo ilipata ushindi katika mechi 16, kutoka sare mara 11 na kupoteza michezo mitatu pekee.

Safu ya ushambuliaji ya timu hiyo ilifunga mabao 40, huku safu ya ulinzi ikiruhusu mabao 17 pekee.

Ubingwa huo ulikamilika kwa ushindani mkali, kwani Maghreb Fès ilitwaa taji hilo kwa tofauti ya alama mbili tu mbele ya washindi wa pili, RS Berkane, na alama tatu mbele ya miamba ya Raja Casablanca.

Mafanikio haya yanaendelea kupandisha wasifu wa kocha huyo mwenye leseni ya UEFA Pro, ambaye amewahi pia kuhudumu kama kocha msaidizi wa Real Madrid nchini Hispania.

Ushindi huu unaandika ukurasa mpya wa mafanikio katika taaluma yake barani Afrika, baada ya vipindi vyake vya nyuma katika ukanda wa Afrika Mashariki na Kusini.

Stori na Peter Jinanai | GPL

Posted on

Mchora Katuni Kinyagulo Tuzo ‘King Kinya’ Afariki Dunia Morogoro

Global Publishers
September 17, 2026
0 views
0 Comments

Mchora katuni maarufu nchini, Kinyagulo Tuzo almaarufu King Kinya, amefariki dunia leo, Septemba 17, 2026 baada ya kuugua kwa kipindi kifupi.

Taarifa iliyotolewa na Ofisi ya Rasilimali Watu ya Kampuni ya MCL aliyokuwa akiifanyia kazi kama mchora katuni wa magazeti, imethibitisha taarifa za kifo cha King Kinya.

Kaka wa marehemu, Kiondo Mjema, amenukuliwa akisema King Kinya alianza kuugua akiwa nyumbani Tabata mwanzoni mwa Julai, 2026 hali iliyomfanya kukaa ndani kwa muda kabla ya kupelekwa Morogoro.

Amesema akiwa Morogoro hali yake ilizidi kuwa mbaya na baadaye alipelekwa hospitalini, ambako alilazwa kwa takriban wiki moja kabla ya kuruhusiwa kurejea nyumbani.

“Alipotoka hospitali aliambiwa arudi tena kwa ajili ya ufuatiliaji. Juzi alirudi hospitalini baada ya kusumbuliwa na tumbo, kuharisha na kutapika, akapewa dawa na kuruhusiwa kurudi nyumbani,” amesema.

Kwa mujibu wa Kiondo, hali ya marehemu ilizidi kuwa mbaya usiku wa kuamkia jana Septemba 15, 2026, akilalamikia maumivu makali ya tumbo na kichwa pamoja na kutapika na kuharisha, ambapo alifariki dunia.

Kiondo amesema msiba upo Kimara Kona na mazishi yanatarajiwa kufanyika kesho Ijumaa Septemba 18, 2026 saa 10 jioni katika makaburi ya Mwananyamala.

Posted on

MADEREVA WMA WASHIRIKI KONGAMANO LA CHAMA CHAO KITAIFA

🔶 *WAAHIDI UTENDAJI MAHIRI ZAIDI* 

*Na WMA  – DODOMA.* 

Baadhi ya madereva kutoka Wakala wa Vipimo (WMA) wanashiriki Kongamano la Tano la Chama cha Madereva wa Serikali Tanzania (MST-TGDU) linaloendelea katika Ukumbi wa Mikutano wa Jakaya Kikwete jijini Dodoma.

Kongamano hilo la kitaifa lililoanza Septemba 12 limewakutanisha mamia ya madereva wa Serikali kutoka mikoa yote nchini, ambapo pamoja na mambo mengine wanajadili mustakabali wa taaluma yao, changamoto wanazokutana nazo barabarani na namna ya kuimarisha nidhamu na weledi kazini.

Kwa mujibu wa waandaaji, kongamano hili ni zaidi ya mkutano wa kawaida; ni darasa huru la kubadilishana uzoefu, kujifunza mbinu mpya za uendeshaji salama, matunzo ya vyombo vya moto vya Serikali na umuhimu wa uwajibikaji katika kulinda mali za umma.

Akizungumza kwa niaba ya madereva wa WMA, Dereva Mkuu kutoka WMA Mkoa wa Dodoma, Bw. John Jumbe amesema ushiriki wao umewapa fursa ya kipekee kujifunza na kuona thamani ya taaluma yao.

 “Tumefurahi sana kushiriki kongamano hili. Tumebadilishana uzoefu na wenzetu kutoka taasisi nyingine na tumejifunza mengi kuhusu uwajibikaji, usalama barabarani na namna ya kuwa mabalozi wazuri wa WMA na Serikali kwa ujumla. Tutaenda kuyafanyia kazi tuliyojifunza,” amesema Bw. Mhando.

Ushiriki wa WMA katika kongamano hilo unaakisi dhamira ya Wakala inayoongozwa na Afisa Mtendaji Mkuu Bw. Alban Mark Kihulla, ya kuendelea kuwawezesha watumishi wake katika ngazi zote ili kuhakikisha wanatoa huduma bora na yenye tija kwa wananchi.

 

Kaulimbiu ya Kongamano hilo linalotarajiwa kuhitimishwa Septemba 19, 2026 ni ‘Dereva wa Serikali, Nguvu Moja, Sauti Moja, Kulinda Amani ya Nchi ni Jukumu letu pia.’

 

Posted on

WIZARA NA BRELA ZAFANYA TATHMINI YA KATAZO LA BIASHARA 15 KWA WAGENI

Katibu Mkuu wa Wizara ya Viwanda na Biashara, Mhe. Balozi Waziri Rajab Salum, leo tarehe 16 Septemba 2026 amefanya kikao kazi na taasisi wezeshi kwa biashara ikiwemo BRELA, TISEZA, TANTRADE, FCC, TPA, TASAC, Idara ya Uhamiaji, Idara ya Kazi na Ajira kutoka Ofisi ya Waziri Mkuu, Wizara ya Uchukuzi pamoja na Halmashauri za Dar es Salaam na Mwanza kwa lengo la kujadili na kufanya maboresho katika utekelezaji wa katazo la biashara 15 ambazo haziruhusiwi kwa wageni nchini.

Akizungumza katika kikao hicho, Katibu Mkuu wa Wizara ya Viwanda na Biashara Mhe. Balozi Waziri alisema hatua hiyo imekuja kufuatia maoni na malalamiko kutoka kwa wadau mbalimbali, hivyo Wizara imeona umuhimu wa kuyafanyia tathmini ili kubaini maeneo yanayohitaji maboresho na kuhakikisha utekelezaji unazingatia malengo yaliyokusudiwa.

Mhe. Balozi Waziri alisema mapendekezo ya kikao na tathmini itawasilishwa kwa Waziri wa Viwanda na Biashara kwa hatua zaidi za na kutoa mwelekeo wa utekelezaji wake huku akisisitiza kuwa Serikali, kupitia Wizara inalenga kulinda na kuimarisha sekta ya biashara nchini kwa kuweka misingi imara ya kiuchumi na kujenga mazingira wezeshi yatakayowawezesha Watanzania kunufaika na fursa za biashara

Aidha, Balozi Waziri alisisitiza umuhimu wa kuzingatia utu katika utekelezaji wa katazo hilo, akibainisha kuwa pamoja na wajibu wa Serikali kusimamia na kutekeleza sheria, utekelezaji wake unapaswa kufanyika kwa kuzingatia utu na kuepusha usumbufu usio wa lazima kwa wahusika.

Baada ya kukamilika kwa tathmini na majadiliano, kikao hicho kilifikia hatua ya kupitisha mapendekezo yaliyofanyiwa maboresho, ambayo sasa yanawasilishwa kwa Waziri wa Viwanda na Biashara kwa ajili ya kutoa mwelekeo wa mwisho kuhusu hatua zinazofuata katika utekelezaji wa katazo hilo.

Hatua hiyo inalenga kuhakikisha kuwa utekelezaji wa katazo la biashara 15 unakwenda sambamba na sera, sheria na taratibu za Serikali, huku ukizingatia maslahi ya Taifa na mazingira wezeshi kwa Watanzania kushiriki kikamilifu katika shughuli za biashara.

 

Posted on

KUPIGA KURA ZA SAMIA KALAMU AWARDS 2026 KWA MATUKIO DAIMA PEKEE INGIA HAPA

 

MATUKIO DAIMA IMETEULIWA KUSHIRIKI TUZO ZA UMAHIRI WA VYOMBO VYA HABARI NA WANAHABARI TANZANIA TUZO HIZI ZIMETOLEWA NA TCRA NA TAMWA 

 MAARUFU KWA JINA LA SAMIA KALAMU AWARDS (SKA2026)

1:TUZO YA CHOMBO CHA HABARI -MATUKIO DAIMA MEDIA 

2:TUZO YA JINSIA ,WANAWAKE NA MAKUNDI MAALUM 

3:TUZO YA AFYA

 

4:TUZO YA MPIGA PICHA 

AHSANTE KWA KUPIGIA KWA KUENDELEA KUTUPIGIA KURA MATUKIO DAIMA MEDIA ENDELEA KUTUPIGIA KURA KILA BAADA YA SAA 24 HADI SEPT 30 KASI YAKO YA KUPIGA KURA NDIO USHINDI .

Posted on

TANZANIA NA UJERUMANI ZAJADILI FURSA ZA UWEKEZAJI NA USHIRIKIANO WA KIUCHUMI

Naibu Waziri wa Mambo ya Nje na Ushirikiano wa Afrika Mashariki, Mhe. James Millya (Mb.), amekutana na ujumbe wa ujumbe wa Serikali na wafanyabiashara 30 waandamizi kutoka Ujerumani ulioongozwa na Waziri  wa Masuala ya Shirikisho, Ulaya na Kimataifa Mhe. Manfred Pentz. Mkutano huo uliofanyika Septemba 16, 2026 katika Ofisi Ndogo za Wizara jijini Dar es Salaam ulilenga kujadili fursa za uwekezaji na kuimarisha ushirikiano wa muda mrefu kati ya Tanzania, Ujerumani na ukanda wa Afrika Mashariki.

Akizungumza katika majadiliano hayo, Waziri Manfred Pentz amebainisha kuwa Ujerumani inaona fursa kubwa za kiuchumi nchini Tanzania na katika ukanda huo, hususan kwenye maeneo ya uhamishaji wa teknolojia, ubunifu na upatikanaji wa masoko. Hata hivyo, alisisitiza umuhimu wa kutatua changamoto za kodi, sera, vikwazo visivyo vya kikodi na miundombinu ili kuendelea kuboresha mazingira ya biashara na uwekezaji.

Kwa upande wake, Mhe. Millya amethibitisha utayari wa Tanzania kushirikiana na wawekezaji kutoka Ujerumani, akieleza kuwa nchi ina utulivu mkubwa wa kisiasa na fursa lukuki. Amebainisha kuwa sekta za kimkakati zinazotoa fursa hizo ni pamoja na sekta ya madini, utalii, mazingira na rasilimali za asili, ambazo zipo tayari kupokea mitaji na ushirikiano mpya.

Naye Balozi wa Ujerumani nchini Tanzania Annett Günther amesisitiza haja ya kuhamisha ushirikiano huo kutoka kwenye majadiliano kwenda kwenye utekelezaji wa vitendo wa miradi ya maendeleo. Ameongeza kuwa jukwaa la Invest East Africa Forum litatumika kama fursa muhimu ya kupokea na kushughulikia kwa pamoja changamoto mbalimbali zinazowakabili wawekezaji wanaoingia katika ukanda huo.

Ushirikiano kati ya pande hizo mbili unazidi kupanuka katika sekta za kisasa, ikiwemo teknolojia ya Akili Bandia (AI), kufuatia kusainiwa kwa Hati ya Makubaliano (MoU) kati ya Ujerumani na Afrika Mashariki. Mkataba huo unalenga kusaidia ujumuishaji, uwezeshaji na ukuaji wa teknolojia ya AI ili kuchochea maendeleo endelevu ya kiuchumi katika ukanda wa Afrika Mashariki.